Brokbrok Ston I Kavremap Mi, I Mekem Fet blong Mi I Kam Strong Moa

17 Disemba, 2024 wan dei we i stat olsem eni narafala dei long Port Vila, Vanuatu. Vila taon i bisi wetem evriwan i stap rere from holidei, mo mi bin stap wok long wan popula stoa blong ol klos, traem blong helpem ol kastoma mo stap kavremap ol presen. Afta, graon andanit long mifala i stat blong seksek strong, mo i no bin gat eni woning.

Olsem wan riten misinari we i gat 26 yia, mo naoia we mi stap wok insaed long stek praemeri, mi bin fesem plante hadtaem bifo blong mekem fet blong mi i kam strong moa—be i no bin gat wan we i mekem mi rere from hemia ia. Be yet, long wan taem blong kwik disasta ia, mi no bin fraet. Mi harem klia wan smol kwaet voes we i talem long mi, “Jane, bae yu oraet.”

I bin stat olsem wan smol seksek nomo mo i kam wan bigfala mo strong graon i seksek. Tingting i go olbaot, pipol i ronron mo lukaot ples blong stap sef, be bifo mi save kasem doa blong kamaot, TV skrin i foldaon long solda blong mi. Mi foldaon long flo taem we tudak i kavremap mi.

Blong wan smol taem, fraet i winim mi, be wan kwaet filing i fulumap hat blong mi. Nomata mi fas insaed, mi bin save se mi no bin stap miwan. Wan minit afta, smol tintin voes ia i se, “yu tanem yu!” Taem mi tanem bodi blong mi, mi luk se ol han blong mi oli oraet, hed blong mi i oraet, mo mi no kasem eni kil. Mi save sidaon smol be mi no save stanap from wan bigfala simen antap long mi.

Kolosap long mi lelebet, mi harem ol voes blong wan woman mo boe blong hem, we tufala i fas insaed long ol brokbrok ston. Mifala i stap toktok mo mekemsua se wanwan long mifala i save se bae help i kam. Tufala i gat wan mobaelfon, be i had blong kontaktem eniwan from ol netwok i nomo wok. Ol aoa i pas taem mifala i stap wet, no save muv, mo stap lisin nomo long ol saerin blong trak aotsaed mo noes blong ol pipol we i stap wok antap long mifala. Mi bin prea, wetem tras se Papa blong mi long Heven i bin save wea mi stap mo we bae Hem i sendem help i kam.

Taem naet i kam, mi filim wan blesing we mi no tingting se bae i olsem—fres win. Nomata se mifala i stap andanit long bilding we i foldaon, mifala i save pulum gud win, mo mi bin filim wan kwaet pis ova long mi. Nomata se situesen i bin series tumas, mi bin save long hat blong mi se God i save abaot mifala.

Eli long moning, mifala i harem ol voes antap long mifala. Tim blong sevem ol man i kam. Yangfala man we i fas wetem mi insaed i singaot, mo no longtaem tim blong sevem man oli ansa. Wan afta wan, oli traehad blong mekem wan wei mo karemaot mama blong boe ia, afta boe ia. Bifo oli aot, oli promesem mi se bae oli kambak from mi. Mi stap lukluk nomo taem we laet blong olgeta i stap go lus long wei aot, mo blong fastaem afta we graon i seksek, mi bin stap miwan.

Ol minit ia naoia i kam ol aoa, mo mi prea bakegen . Mi luklukbak long ol blesing blong laef blong mi: lav blong famli blong mi, paoa we mi kasem long misinari wok, mo ol kavenan we mi bin mekem wetem Papa long Heven. Long kwaet mo tabu spes ia, mi bin filim bigfala tras ia se mi stap long han blong Hem.

Long en, wan long ol tim blong sevem man i singaotem nem blong mi. “Sista Jane, yu save luk laet blong mi?” Mi tanem hed blong mi mo luk wan smol laet we i saenaot long tudak. “!Yes!” Mi ansarem hem, wetem wota i fulap long ae blong mi.

Ol tim blong sevem man ia oli mekem gud wok blong olgeta. Oli talem long mi se bae oli muv i kam sloslo blong no mekem eni samting i foldaon. Mi save se i gat denja long wok blong olgeta, mo mi prea kwaet nomo from olgeta mo mi. Oli karemaot sloslo ol pis blong ol brokbrok ston ia kam kasem mi. Taem ol strong han ia oli leftemap mi i go aotsaed long laet, hat blong mi i bin fulap from plante pipol we oli lukluk mi—stap singaot wetem glad, stap krae mo stap prea. Afta mi bin harem voes ia we mi wantem harem tumas. “Jane, mama hemia.” Han blong mama blong mi i kavremap mi, mo mi save se mi stap long hom.

Afta 27 aoa we mi fas andanit long bilding ia we i foldaon, mi kamaot mo no kasem wan pis kil. Hat blong mi i fulap wetem tangkyu—i no from mi sef long saed blong bodi, be from God i stap oltaem long laef blong mi. Tru long prea mo fet, mi bin kam strong moa, kasem moa kamfot, mo long en mi sef. Mi talem tangkyu from gospel blong Jisas Kraes, from paoa blong prea, mo from save ia se nomata hadtaem blong yumi i dak olsem wanem, laet blong Hem bae i oltaem faenem yumi.

Not blong Edita: 7.3 magnitude 2024 Port Vila etkwek i seksek kolosap long kapitol blong Vanuatu long 12:47:26 VUT long 17 Disemba 2024. Kolosap 14 pipol i ded long taem we graon i seksek, mo ova 250 oli kasem kil.