Á bak við tjöldin: Túlkun og gestaþjónusta

Yfir eina helgi á sex mánaða fresti njótum við aðalráðstefnu. En á bak við tjöldin vinna þúsundir sjálfboðaliða og starfsmanna kirkjunnar mánuðum saman við að gera það mögulegt.

Þeir hafa allt til reiðu til að hægt sé að senda spámannlegan boðskap til milljóna um heim allan. Hér er smá innsýn í þetta risavaxna verkefni.

Túlkunarþjónusta

Eitt hundrað fjörutíu og þrjú tungumálateymi um allan heim túlka aðalráðstefnuræður í rauntíma, svo meðlimir geti hlustað án seinkunar á móðurmáli sínu. Aðeins 57 þessara teyma túlka frá höfuðstöðvum kirkjunnar í Salt Lake City.

Túlkun er frábrugðin þýðingu, sem felur í sér að breyta rituðum orðum yfir í annað tungumál. Með túlkun verða tungumálateymin að vera tilbúin til að túlka breytingar á síðustu stundu og athugasemdir sem gerðar eru í ræðustólnum. Túlkar hjálpa meðlimum um heim allan að hlýða á fagnaðarerindið á eigin tungumáli (sjá Kenning og sáttmálar 90:11).

Gestaþjónusta

Ef þið hafið sótt aðalráðstefnu í Salt Lake City í Bandaríkjunum, hafið þið tekið eftir sætavísum sem vísa ykkur til sætis. Um 400 trúboðar á Musteristorginu gefa í sjálfboðavinnu um 9.000 klukkustundir meðan á aðalráðstefnunni stendur, til að hjálpa gestum að komast greiðlega inn og út úr Ráðstefnuhöllinni.

Þau leiðbeina 20.000 gestum á hverjum ráðstefnuhluta. Þegar ráðstefnuhluta lýkur, vinna þau við að vísa gestum út eins fljótt og auðið er, svo þau geti þrifið gangana fyrir aðra sem mæta á næsta hluta.