Te Ekaretia e Katauraoi Buoka ibukin te Kaawa ae Rootaki n te Ieka I Papua New Guinea

Ngke te “oonia” e orea te atimwakoro ae tionako ae Parama i Papua New Guinea maeao n 22 n Okitobwa 2024, kaain te kaawa n te tabo akea te tabo ae kona n karekea buokaia iai. Inanon ti tabeua te aoa ao te ieka e urui mwenga aika bati, urui taabo n unuuniki, ao n katarikai ranin mwanibwa n te komiunite.

E kaania abubua mwaitiia aomata aika maeka n te atimwakoro ae tamaroa man tionako aio i Papua New Guinea maeao. E kaania teuana te katenimwakoro mwaitiia kain te aba ae a membwa n te Parama Mwaanga n te Daru Titeiki n Ana Ekaretia Iesu Kristo Ibukiia Aika Itiaki ni Boong aika Kaitira.

Ngke e roko taekan te angibuaka aio n te titeiki tienta i Daru, taan kairiiri n te Ekaretia a waekoa ni kanakoi buoka. A kanakoaki amwarake, te ran, te ooning, ao raumean te ran man atuun kawan Papua New Guinea i Port Moresby nakon te kaibuke ae tataninga i Daru.

Mai Daru, buoka aikai, n raonaki ma mitinare man te Ekaretia ibukin Buokaia Aomata aika iai rabakauia ma mwakuri n ibuobuoki n tain te angibuaka, mitinare ma taan kairiiri n te Ekaretia a buti n te Gulf i Papua New Guinea rinanon te Fly River, ao n waerakea te aba ni karoko n te atimwakoro ae Parama.

N rokoia, a kunei aua mweenga ma bwain te komiunite aika a uruaki, ma Aika Itiaki aika a nanomatoa man nanomwaaka a kaman waaki n karaoa tabeia n buoka aia kaawa.

Ngke e roko te bwaati ma taian booti aika uarereke ngke kanga ea tawanou man ora taari n 29 n Okitobwa, e a nang ora taari ao e aki kona n reke angan kawaerakean buoka nakon te kaawa, ngaia are buoka aika a katokaaki n booti ake a uarereke, n kaniiaki riki nakon te kaora.

Ma n tokin te tai aki naba kona booti aika uarereke aiki n kaania te kaora, ngaia are a ruo kain te kaawa n anai.

Inanon te tawanou anne, kaaain te kaawa n raonaki ma mitinare a tabaokioki n rianna uoua te kiromiita rinanon te kaora n kawerakei amwarake, te ran ae itiaki, ao raumean te ran, n karokoi iaon te aba.

Anne, e anaa ae raka iaon teniua te aoa ni kamwaingi buoka man booti ake a uarereke nakon te kaawa.

Buoka a nikiraki n te kauntira, ao e waaki te katauraoi ibukin tibwakina nakoia kaain te kaawa.

Ngke a bane n roko n te kaawa taian buoka, utu a butimwaai tibwaia man te buoka are a tia n uoti mai taari.

I Port Moresby, Johnny Leota, te Country Office Manatia, e iangoia kakabwaia ake a reke rinanon kangaanga aekaki aikai. “Imwiin ana urubwai te oonia, nanomatoaia ma aia onimaki aomata man te atimwakoro ae Panama e ootanako nge a karekea te buoka inanon te tai ae uarereke are ena buokiia inanon te tai ae rawawata aio inanon maiuia” Aia kakaitau ma aia tangira ibukin te Tia Kamaiu e rikirake ngke a noora Ana tangira rinanon aia mwakuri ni ibuobuoki ae tawe kain te Ekaretia. Te mwakuri n ibuobuoki e na raonaki ma karekean buoka ma taan kairiiri n te komiunite ibukin tararuaaia nakon tain angibuaka n taai aika ana roko.

Kaokan atimwakoro ae Parama nakon tamaroana are mai imwaina ena aki bati n riki. Ma Aika Itiaki i Parama, raonaki ma raraoia ao kain rarikiia, ataia bwa ana bon aki maroaa n kaitaraan te kangaanga aio, ao Ana Ekaretia Iesu Kristo ibukiia Aika Itiaki ni Boong aika Kaitira ana tauraoi n tei n anga te buoka, n te anga n rabwata ao n tamnei, bwa Aika ana Itiaki te Atua ma kaain rarikiia ana uaia ni mwakuri n kaoka tamaroan abaia ae e rootaki inanon te tai aio.