A Kanga Ara Berita aika Tabu n Kamwakura Mwaakan te Atua?

Tamnei iroun Connor Johnson

Iai tibwangara n tatabemaniira n karaoi berita aika tabu ma Atuan karawa. Ti karaoi berita aikai tabu ngkai ti karekei taian otenanti n te nakoanibonga. Ngkai ti kawakin ara berita aika tabu, E kakabwaiaira ma Mwaakana.

Tia kauringa ana kaetieti ni burabeti Beretitenti Russell M. Nelson ibukin karekean mwaakan te Atua: “Ni kabane mwaane ao aine ake a ira buakon te mwakuri n otenanti n te nakoanibonga ao ake a karaoi ao ni kawakin berita ma te Atua iai aia kona ni karekea mwaakan te Atua.” Karekean te mwaaka mai iroun te Atua bon te bwaintituaraoi ae kakukurei nakoia Natina.

Tera te mwaaka, ae reke man kawakinan berita aika tabu ake ti karaoia rinanon otenati n te nakoanibonga, inanon maiun n te bong teuana-ma-teuana? E na kanga te aine n te berita ae tabu n karekea te mwaaka mai karawa aio?

Au kantannga bwa au katooto e na buokiko ngkana ko waaki inanon karaoan te mwakuri n tamnei n reiakiniko nanon karekean mwaakan te Atua.

N te bong teuana ao I karekea te tekiti mairoun buun natiu te mwaane ae Amy: “Tataro ibukin Dottie.”

Tibu te aine ae Dottie e tuai man matu man te tairiki are mai mwaina. E ngaina ana ngaina Amy irarikina ao e taku bwa e biua Dottie. E kamooia Amy n te bwainaoraki, ma e bon teimatoa n kabuebue ma aki mamatu Dottie. Natiu are Connor iai nakonakona man ana tabo n mwakuri ao e na aki oki inanon uabong te bong.

Ngke e a ngaina, e nooria Amy bwa e a bwata rian Dottie. Baina naba a bwata ao n mwaitoro ngkana a ringaki. E roko te namakin iroun Amy ae, “Nikira Dottie iroun aia taokita ataei.” E karaoa nanon te wirikiriki arei, e tareboonia aia aobiti aia taokita ataei, ao e tuangaki bwa e kona n reke karinakina ngkekei naba.

Ti tekeraoi, bwa ana aobiti aia taokita ataei e mena n iteran te kawai ni kaitara ma ana auti tinau. E roko te namakinna iroun Amy bwa e na buti irarikin ana auti tinau. Tinau e mwakuri iakuun ana auti ao e nang kukurei n taraa tarin Dottie ae aua-ana-ririki ae Goldie, ngke Amy e uota Dottie nakon te taokita. Bon kaekan raraoman Amy ibukin kainanoan taraakin Goldie ao kamarurungan Dottie n te tai ae ti teuana.

E kunea te taokita bwa e numonia Dottie, ao e bon reke man bwabwana ngke e tebotebo irabong n nako. E bwainaorakiiaki Dottie ao e bong ana bong n wene inanon bain tinana, ao n karietaaki bwa eaonga n uki kawain ikeikena bwa ena kona n ikeike.

I karekea aia katairiki iaon kawaiu n okira mwengau. Ao e kariaia Amy, ao I kakaitau iai. I tabe n iangoa aron Amy ngke e aki rereke matuuna, rawawatan tararuaan te nati ae aoraki, ao kainanoan tararuaan naba Goldie.

I rianna nakon mwengaia ma te amwarake are i karekea ao I kunea Amy ma natina bwa a rau. Iai nooran te kukurei iroun Amy ngke mwananga ao te oota imoana. E rau, e ngae ngke e na manga tiku naba n ti ngaia ma Dottie inanon aorakina. E aki maaku. E ninikoria. Bon te rau ae akea kabotauana. I tangiria n mena ibuakon te rau anne ao n namakinna.

E kekeiaki Amy ni kawakin ana berita aika ma te Atua ao ni kakabwaiaaki ni Mwaakana ni kakorakora. Te tamnei e tuangnga bwaai ake e na karaoi ibukin tararuaan Dottie. Ao mwaakan te Uea e kakorakora konabwaina n taobarai kainanoia ana utu ma te taotaonakinnano ao te tangira ao ma te rau n nano bwa ana bon nakoraoi bwaai ni kabane.

Aio bon te kakabwaia man mwaakan te Atua, ae reke iroura rinanon berita aika tabu man ana mwakuri ni kamaiu te Tia Kamaiu. Te mwaaka aio e bitiira, kakorakoraira, karau nanora, anganiira te nanomatoa, uota te rau nakoira, ao ni karababa ara konabwai n kakoroi nanon katabeara n aine mai karawa.