Kawaiu ni Keiakina te Taotaonakinnano

Tamnein te tia korokaraki iroun Shaun Sutton

Ngke I a okira mweengau i Biribin maiaki n 2016 imwiin reken te karineaki ao te kamoamoaaki man au mwakuri ni mitinare i Biribin meang, I uaiakina te nako n reirei i Brigham Young University–Hawaii ao n rinanon naba te kakukurei are a nang rinanona kairake n ikawai.

N te tai ae waekoa, irarikin anne, e a tabe ni bwaka rawatau. N ana kukune te taokita imwiin au tutuo ao e a reke te aoraki ae te hyperthyroidism. E kakamaakai neiei n te kantaninga are tera ae e na riki ngkana e aki waekoa ni katokaki te aoraki aei.

N aki tabe ma aron te bwainaoraki, e a moanna ni bitaki rabwatau. A moanna n tibutaua matau, ao i rangi ni bakitaia. I a ririba te rawetamnei ao n tataraa naba tamneiu n te tirotaam ibukin teiu ae e kaokoro.

E a tabe ni mwakuri te bwainaoraki ma teutana imwiin teutana. Ma teniua te ririki imwiina, I a manga tutuo riki ao ni kuneaki te kauoua n aoraki—rawawatan te iango. Aoraki aika uoua aikai a iraea mai irou onimakinau i bon irou. I korakai n teirake mai i aon au kainiwene n nako n reirei, ao I namakinna bwa I aki bati ni konabwai ni beku n te Ekaretia.

I a rangi n un ngkai e kariaia te Atua bwa e na riki aio nakoiu. I miimi bwa bukin tera ngkai N na beku ma nanou ao tamneiu ni koaua ao karaoana e uota te kataaki ae mwaiti? E ngae n anne, I a karekea te raunnano, man ana taeka Beretitenti Jeffrey R. Holland, te Bonomowii n Beretitenti nte kooram n Abotoro n te Tengaun ma Uoman aikai: “Iango aika a uruaki a kona n mao n ai naba rii aika a mwaoto ma naano aika uruaki n mao.” I tang ngke I ongo taeka akanne. E uruaki au iango ngaia I kainnanoa te kamarurungaki.

I ikawairake n te mweenga ae a onimaki kaaina, ao au onimaki iroun Tamau are I Karawa ao Iesu Kristo e rangi ni matoatoa n aki tabe ma te maraki ao te nanououa. N te tai ae karaurau, I butimwaea ao ni kataneiaai ma arou ae boou.

Ngkai, waniua te ririki imwiina, I aki manga tineaki man aorakiu. . I butimwaai bwa mwakoron maiu. I namakinna te mwarurung n te aro ae bwanin. I a kona ni beku ao ni maiu n te aro ae kakukurei ao n reke reireiau mai iai, e ngae ngke te kataaki ni marurungiu ena teimatoa inanon maiu aei. I reiakinna bwa te kekeiaki n taotaonakinnano bon mwakoron te maiu ae mamate (taraa Reirei ao Berita aika Tabu 121:7–8). I bon reiakinai ni mooi man au mwangko ae mwao ao n teimatoa ni korakora.

Ngkai I riki bwa te tia mwakuri n te personnel department of an artificial intelligence company, ao n anai au kooti n te aonraain n te tairiki mai Brigham Young University–Pathway Worldwide. E toki au titiraki “Bukin tera bwa ngai?” ao ni moanna n titiraki “Tera ae I kona n reiakinna? Tera kabwaiau ae e na reke man te taneiai aei?”

Ngkana I tanrikaaki, I nooria bwa Tamau are i Karawa ao Iesu Kristo a bon mena irarikiu inanon mwanangau. Ni waaki nako, I ataia bwa antai ae I kona n onimakinna (taraa Taeka n Rabakau 3:5–6; 2 Nibwaai 4:34).