“E Tau au Mwakuri ae I Karaoia?,” Riaona, Maati 2025.
Bannan te Onimaki
E Tau au Mwakuri ae I Karaoia?
Ngai irou nna kunea te onimaki, tangira, ao te koaua n te tamnei man maiuakinan te maiu ae kaokoro. I bon aki. I kunea n Ana Ekaretia Iesu Kristo Ibukiia Aika Itiaki ni Boong aika Kaitira ao n te tembora.
Tamnei iroun Leslie Nilsson
Ngke tebwi tabun au ririki n te 1960 tabun, e waaki te buaka i Vietnam. E tiringaki John F. Kennedy, ao arona naba ma Martin Luther King Jr. ao Robert Kennedy. I kaitaraia au karo ao katei ma reirei n boong aikekei. I aki tangiria n iein ao n karikiia natiu nakon te aonaaba ae korakora te mwakuri ni iowawa iai, te baebaeka n ikawai, ao te aki barongaaki.
I kitana te kauarinan, ao n mwaing nako Haight Ashbury District i San Francisco, California, USA, ao n maiuakina te maiu n beekan man 1969-1972. I tiku n taabo n bobotaki, n mwakuri n tabo ake kona n reke iai au mwakuri, ao n maiuakina te maiu n tangira te bitaki ma karekean te kukurei n te maiu n rabwata, ao n ikotaki ma kaboonganan te turaki.
Ngke tebwii tabun ana ririki Randy, e taku bwa e na akea te kukurei inanon maiuna n taai aika ana roko. “I kaitaraia au karo ao katei ma reirei n boong aikekei” e taku.
N te tai naba ane, I ukoukora te onimaki, te tangira, ao te koaua n tamnei. I iangoi raoi man kamatebwai ekaretia aika kakaokoro, n anai ma iai bwaai ake I taku bwa a koaua man kakawaki. N au kakaea, e ngae n anne, e toki ma te nanobuaka. Tariu ae, John, e ataia ae i kakaenako, ao e anganai Ana Boki Moomon.
“Ko riai n warekia,” e koreia John, are e tibwa kaaina te Ekaretia tabeua te tai n nako.
Ngke I kabaneaki ti bukin warekan Ana Boki Moomon man au mwakuri n te tabo ni bwaa, I taku irou, “E aki raoiroi aio.” I karenakoa te boki.
E aki maan imwina, e tuangai John bwa e na roko n te San Francisco Bay Area ma te kurubu n anene mai Brigham Young University.
“I tangiria n noriko,” e taku, ao n tuatua bwa tina kaitiboo n te California Oakland Tembora.
Ngkana I buti n te Bay Area n te tairiki, I aki toki n nonora te tembora. E taraa raoi nakon tamneiu, ngaia are I wareka rongorongona ao n tangira n rin inanona. I kaitibo ma John n te ingabong teuana imatan te tembora. Imwiin kaitiboora, e tuangai bwa e a boo ana tai n rin n te tembora ma ana kurubu n anene.
“Randy, ko aki kona n rin n te tembora,” e tuangai John.
“I ataia, bwa ngai te beekan,” I kaeka, “ma I a tia ni kamatebwai ekaretia n te aono n Maiaki, I kakang uaanikai, I maeka n te tabo ae ti tibwauai bwaai ni kabane iai, ao iai au $20. Iraua te kanrin?”
“E raka riki iaon anne” e kaeka John. “E aki tau arom.”
N te tai anne, I aranai bwa te aomata ae wanawana, rabakau, ao n rabakau n te aro n tamnei. E na kanga n aki tau arou?
Kaonaki ma te Kantaninga
Inanon ririki aika bati, au karo aki ataia bwa I mena iaa. Bon aomata aika raraoi ae a kataia n anganai te reirei ae tamaroa ao n aki kukurei n au rinerine. Ngke e aoraki tamau, e kataia tinau n kairoroai bwa nna okira mwengaia i Washington D.C. Ngke I roko, John e karekea au mwakuri irarikiia taan katea te Washington D.C. Tembora.
I aki ataia, ma e a tia n barongaia bwa nna mwakuri ma aomata aika a tia n mitinare. I rangi ni kubanako iroun John Howell, te mataniwii n te kateitei, e na bae n tuanga temanna te tia mwakuri bwa e na tataro imwain waakinan te mwakuri n te bong anne—te bwai ae I aki nonoria irouia raou n mwakuri mai imwaina.
Te bong teuana ngke ti mwakuri, ngaira tabeman tia kanimwa mataroan te tembora are e tinebu ao ea bwaka naba ao n kamatiraa tabon baiu n ai aron te koin. E waekoa n roko John, e taraa tabon baiu, e kakaea ana bwaa ae tia ni katabuaki, ao ni kakabwaiaai. E waekoa ni mao baiu n te aro are I aki kainanoa kawaran te taokita.
N te tai naba teuana, I anganaki te mwariro bwa nna kanakoi mwammwa n timanti mai i aontano.
“Bukin tera?” I titirakina temanna raora n mwakuri. “Aki kawenea te kaabeti?”
“Randy, ko aki ataia bwa antai auti aio?” e kaeka. “Ti karokoraoia ibukin Teuare Kororaoi.”
Ngkai te aonaaba e a onrake n akea te onimakinaki, te maraki n nano, te riribai, ao te maku, aia banna ni katoto ao aia reirei kairake n ataeinimwaane aikai a anganai te kantaninga. Ngke a tibwauaia aia koaua taan mwakuri ma ngaia, I ataia bwa a bon aki kewe man koaua raoi. A tia n anga uoua te ririki man maiuia ni beku ibukiia aomata, ao a nang rabakau n iango raoi. I tangiria ni kakoauaa aia reirei. I namakinna bwa I karekea kaotakiu are I ukoukoria ao te Uea e katauraoa tamneiu.
E tuangai John Howell bwa nna kaitiboo ma mitinare. Ma, I rineia bwa tariu ma raoraona temanna, ae a tia naba ni mitinare, bwa a na reirei ma ngai. Ngke a reireinai, I tangira te kakoaua ae eaki kona n ngurengureaki bwa e na kakoauai bwaai ake I reiakin. N akean te kakoaua anne, ao I aki tangiria n reiakinaki riki.
Ngke I titiraki bwa a kanga n ataa te koaua, a kaeka n taku, “Ti a tia n wareka man tataroakinna ao n namakina te kakoaua mairoun te Tamnei ae Raoiroi.” A tuangai bwa I kainanoa naba te kakoaua anne.
N te tairiki anne I nako buakon aroka n au kaawa. I aki ataia bwa maanra au tataro, ma I tataro ma nanou ni kabane. I kaokioki au titiraki aika aua nakon te Atua: “Ana taeka te Atua Ana Boki Moomon? Ko kaoti ma Natim nakon Iotebwa Timiti? Bon ana Ekaretia aio Iesu Kristo ae koaua? E tau arou n riki bwa te membwa?”
Kaekaan au titiraki aikai a roko bwa te wirikiriki nakon tamneiu—“Eng”—aua te tai. Wirikiriki aikai a raonaki ma namakinan te rau ma te miimi.
Ma atuu ae bobaraaki, I katorobubua n tataro ao n roto n ranin matau, I takarua: “Ngkana aio te kaeka ae Ko anganai, Nna butimwaia ao n kawenea maiu nakoim ao te euangkerio ae Ko kaotia nakou aio.” Akea taeka aika kona ni kabwarabwara te iango, namakin, ao koaua ake a rabwatai.
Te kakoaua are I karekea n te tairiki anne a bon aki kona ni ngurengureaki, ao e matoatoa ngkai n aron are ngkoa. Man te tai are I tataro iai, te Atua e a tia ni kakoauai au reke akekei nakoiu inanon irangaa angaa aika kamimi man koaua.
“Te Ekaretia bon te kakai,” e taku Randy, raweaki tamneina ikai teuana te namwakaina imwiin bwabetitoana. “Maiu n te Ekaretia e onrake n te kakai.”
Te Ai ae e Ura Inanou
Imwiin bwabetitoakiu n 1974, I kaea au moan maungatabu ni kabuta i Salt Lake City ma tariu ae, John. I kubanako ngke Unimwaane Boyd K. packer (1924-2015) man te Kooram n te Tengaun ma Uoman, are katiboo ngkoa ma ai tinau i New York City teniua te wiiki imwain te maungatabu, e taekinai ma John n ana marooro n te tetere ni moningabongin te Taabati.
N taekina ana taeka ai tinau, e taku Unimwaane Packer: “Uoman ai natiu mmwane a tia ni kaina te Ekaretia. I aki kona ni kakoaua te bitaki are e riki inanon maiuia.”
Man te bitaki ae akea n ai arona aio, (taraa Aramwa 5:14) te ai ae ura inanou ae I tangiria n tibwauaia. E aki maan imwina, ao I beku bwa te mitinare i Idaho. Inanon iteran au mition, tamau, are au kamoamoa ao raoraou e a motirawa. Tinau e tareboniia au beretitenti n te mition ao n bubuti bwa nna okira mwengara n anga au kabane n taeka n maten tamau. Ngke e a katikua nakoiu au beretitenti n te mition bwa nna oki ke nna aki, I tuangnga bwa I tangiria n tataro ao n aki mamatam inanon 24 te aoa imwain ae I karaoa au rinerine.
N te tairiki anne ao I mwii. E kaoti tamau nakoiu. Ibuakon au marooro ma ngaia ae kamimi man kakawaki, e tuangai, “Natiu, tiku n am mition.”
I ira ana reirei tamau ao I tiku.
Man te bitaki ae akea n ai arona are e iriana rairakina, “te ai ae ura inanou” Randy e tangiria n tibwaua anne ngkai e beku bwa te mitinare.
Onoua te namwakaina imwiin au mition, I taui bain tinau ngke e a anaa kabanean ikena. Irabwii te ririki imwina, kainabau, Lisa, e kunea aia reta au karo inanon teuana te bwaoki. Tamau e koreia ngke i mena n au mition ma e mate imwain kanakoana.
“Nanora a mena ao n teimatoa n onrake n te tangira ibukim. I kakoauaa bwa bwaai ni kabane aki nakoraoi, ma bon anne aron te maiu. … E aki kangai Kristo, “Iriirai ao e na bebete.’ E taku, “Tabeka [ami] kaibangaki, ao ke iriirai” [Mataio 16:24]. E uota te kaibangaki, ma ti bane n aneka iai. Tao ara tabo i karawa e kaineti nakon arora n uota tibwangara. Natiu, ti rang tangiriko.”
Are I Ukoukoria
N rikirakeu, I nakobuaka ma au karo, ma I aki nanououa n aia tangira ibukiu. Ngke I kunea te Ekaretia, I mwakuri korakora ni karabwaia ao ni karineia.
N Beberuare 17, 2018, uoua te wiiki imwain kainan te Washington D.C Tembora ibukin te onobwai, I kabaeaki nakoia tamau ma tinau, 42 te ririki imwiin motirawaia nakon iteran te rabuna nakon te maiu ae akea tokina. Natiu te mwaane are te ikawai, e tei n onea mwiin tamau, ao Lisa e tei ibukin tinau. I namakinna bwa au karo, ake a tia ni kabaeaki, a kaoti tamneia.
N te tembora ti kona n noori kabaebae aika a kabaeira n aki toki ma aika tangiraki iroura. I kakoaua raoi anne.
Ngke I kairake, I aki tangiria n iein ao n kariki. Ma n boong aikai ao kainabau, natiu, ao tibu bon kaubwaiu ae akea kabotauaia. Te Ekaretia bon te kakai, ao maiu n te Ekaretia bon te kakai. Ma Iotebwa Timiti, I kangai, “Ngke arona bwa I aki rinanon te bwai are I rinanona, N na bon aki kakoaua naba i bon irou.”
Nimabwii te ririki n nako, I mwakuri bwa te tia kateitei n te Washington D.C Tembora. I kakoaua bwa bon akea te kakaukurei inanon maiu nakon taai aika ana roko. N te bong aei, I beku bwa te tia mwakuri n otenati n te tembora naba anne, n tia n butimwaea ana kakao te Uea bwa nna Iriiria, ni karekea Ana kamaiu, butimwaea Ana otenati, ao ni kekeiaki n riki n ai Arona.
Randy ma kainaba, Lisa, a beku n te Washington D.C. Tembora, are e buoka ngkoa kateana 50 te ririki n nako.
Tamnei iroun Leslie Nilsson
Te Ekaretia ae tia ni kaokaki tiaki ti te iango, te koaua, ke te komiunite ke te katei. Aio ana Ekaretia ae koaua te Uea Iesu Kristo.
Ngai irou nna kunea te bwai are i ukoukoria i San Francisco. I bon aki. I kunea n Ana Ekaretia Iesu Kristo ibukiia Aika Itiaki ni Boong aika Kaitira, “atiibun Kaokan te Ekaretia ae boobuaka.”