Antai ae Kaona te Tabo n Bwabetito?

Kamataata n te tamnei iroun David Miles

Imwiin kitanara n te bwati i Nairobi, Kenya, ngai ma toau tia rineia bwa tinang tibwauaa te euangkerio ma aomta ake ti kaitiboo ma ngaiia n te aono aio imwain manga rokon te buti are imwina. Ti marooro ma ae riaon 400 te aomata.

Temanna mai ibuakoia bon Benard, are e mwakuri n te kateitei ae uakaan. Ti anganna Ana Boki Moomon ao ni kaungaa bwa e na warekia ao ni butia te Atua koauana.

Aua te namwakaina imwiina, I kamwaingaki nako Nairobi. N au moan bootaki n toa ikekei, I noora Benard. E a tia ni bwabetitoaki ao n katabuaki nakon te Nakoanibonga ae te Aaron.

E kaoira Benard bwa tina kawara mwengana ao n reireina kainaba, Megan. Ngke ti kaitiboo ma Megan, ti rootaki n korakoran ana onimaki. Ngke e tataro n kan ataa koauan ara rongorongo, e kaekaki ana tataro iroun te Atua.

Ti kaoa Megan bwa ena bwabetitoaki n te Tabati are imwiina. N te wiiki anne, e ngae n anne, te kaawa ae Nairobi e katanoataa bwa ena aki tii te ran inanon 10 te bong! Imwiin ana intawiu n bwabetito Megan n te Kaonobong, ngai ma toau tia tataro bwa e na nakoraoi ana bwabetito nakon te bong are imwina.

Ti aki mamatam, ti marooro ma ara taan kairiiri, ao ni kakaei anga ni karekea te ran—ma a bon aki mwakuri. N te taiiki anne ao tia katauraoi imwain te bwabetito. Ti katorobubua ao n tataro riki. Ti karekea te wirikiriki bwa tina kanimwa tabon ara ooti nakon te taebi n ana umwanikuuka ara autinibootaki ao tabona are teuana nako nanon te tabo ni bwabetito. Ti manga tataro riki, ti rokana te autinibootaki, ao n okira mwengara.

N te ingabong are imwina ti nakon te autinibootaki, ao ti kubanako ngke ea onrake te tabo ni bwabetito n te ran! Ti tuoa te taebi n te umwanikuuka, ma bon akea te ran ae tii. Akea kain ara mwaanga ae ataia bwa e kanga n reke ranin te tabo ni bwabetito.

E bwabetitoaki Megan n te bong anne. E bwanin te uoote n roko n kakoauaa bwabetitoana ao butimwaeana nakon te Ekaretia. E teimatoa n akea ranin te taebi, ma a mwaimwai mataia aomata n te kakaitau.

E reirei Beretitenti Russell M. Nelson, “Te Uea e na kakabwaiako ma kakai ngkana kam Kakoaua, “ao akea te nanokokoraki.’ [Moomon 9:21]. Karaoa ae raoiroi n ukori kakai.” I ataia bwa bukina ngai ma toau ti karaoa te mwakuri n rabwata ao n tamnei—tataro, katai aanga aika kakaokoro, ao n iraa nanon te wirikiriki—ti noora te kakai mairoun te Uea.