“N Riki bwa Kaain ana Babaire te Atua ao inanon te Tembora,” Riaona, Maati. 2025.
N Riki bwa Kaain ana Babaire te Atua ao inanon te Tembora
Teniu tuua ake a kauringiira bwa ti bane ni kona ni karekei ana kakabwaia te Atua ake E anganiia natina.
Tamnein te Barranquilla Colombia Tembora iroun Leslie Nilsson
I tekateka n te kurubu aika kaain te Ekaretia. Ti bon tuai man kakaitibo mai imwaaina, ma teuana te bwai ae ti te arona arora iai: ti bane n tuai n iein.
Ngkai, I tangiria n kaokai teutana. N ana Ekaretia Iesu Kristo, ti aki kabwarabwaraaki aron taraakira bwa antai ngaira. Kinaakira ni koaua, e reirei Beretitenti Russell M. Nelson, ngaira bon “natin raoi te Atua n tamnei.” I ataia bwa ibukin riaina ti araniia tabeman kaain te Ekaretia bwa a tuai n iein. Bon iai bukina ae riai n aron anne. Ma n tabetai, n aron ae tima e a riki bwa te keiti n te aro aei, e kona n anganiia kaain te aro te namakin ae ianena ngaiia. E na kona naba ni kangaanga aei irouia ao n namakina te katinanikuaki man ana kakabwaia te Atua ibukin te kamaiuaki ao te karietataaki.
Ko nooria, ti maroroakina taekan te tembora—ao tabeman aomata n te kurubu a namakinna bwa ngkai a tuai n iein a katinanikuaki man karekean bwaninin kakabwaia man te tembora. I ataia ae ngkana ko aki mare inanon te ekaretia ae boboto iaon te utu, e kona ni kanganga nooran ae tau iai. Ma I ataia naba bwa te Uea e aki motikitaeka ngkana e tau te aomata ke aki ni karekei kakabwaia ake a tia ni beritanaki ni boboto iaon taraakin te aomata itinanikuna ke n taraaki bwa antai ngaia. E “tatara te nano” (1 Tamuera 16:7) ao e katauraoi ana kakabwaia nakoia ni kabane akea a rineia bwa a na Iriiria. I kakoaua aei ma nanou ae bwanin. Ngaia are, ni kaaki anne inanom, aikai teniua tuua ni buokiia Aika Itiaki ake a tuai n iein n ataia bwa ngaiia bon kaain ana babaire te Atua ao inanon te tembora.
1. E karaoa ana babaire te Atua ibukiia natina ni kabane.
Ibukina ngkai e kainnanoaki te mare inanon te beriita ae boou ao ae akea tokina, ibukin te karietataaki, e taraaki bwa ana babaire te Atua e aki karaoaki ibukiia naake a tuai n iein (taraa Reirei ao Berita aika Tabu 131:1–3). Ma e reirei Unimwaane Patrick Kearon: “Ana babaire ae tamaroa Tamara are i Karawa, ae bon Ana ‘babaire ae moan te kamiimi’ e baireaki ibukin okim nakon mwengam, ao tiaki kaotinakoaki. Akea ae e a tia ni katea tuukan te kawai ao ni kaaki temanna n te tabo anne bwa e na kaokiko ao ni kanakoko. Ni bon koauana, bon kaitaraana raoi. E reitinako te Atua ni kan rereitaki ma ngkoe. E “tangiriia Natina ni kabane bwa a na rineia ni manga oki Nakoina,” ao E karaoi bwaai ni kabane ni buokiira ni kaokiira nakon mweengana.
Tiaki nanon te Atua bwa e na kanakoia naake a tuai n iein n aki karekei kakabwaia ake E anga. E reireiniira Beretitenti M. Russell Ballard (1928–2023), te Bonomwii ni Beretitenti n te Kooram n Abotoro ake Tengaun ma Uoman, “E kamatoaaki ni Koroboki aika Tabu ao irouia burabeti ni boong aika kaiitira bwa aomata ni kabane ake a kakaonimaki ni kawakini berita aika tabu n te euangkerio e na reke aia tai ibukin te karietataaki.” Aomata n tatabemaniia nako iai kakawakiia imatan Tamara are i Karawa—n te aro ae moan te korakora ngaia are E a kanakoa natina ae Ana Riki Temanna bwa e na mate ao ni kabooi maiura man te bure bwa ti aonga ni karekea te bwaintangira ae te maiu are akea tokina (taraa Ioane 3:16–17; Reirei ao Berita aika Tabu 18:10–12).
Ngkana e riki te maiu n te aro ae kakaokoro nakon are e kantaningaaki, ti na kona ni kuneira n titiraki tera oin bukin maiura n ana babaire te Atua. Ma Ana babaire e aki ataia raoi ngkana maiura a na kona n taraa n titearona. Ti aki ataia tera te kakukurei, karawawata, tokanikai ke uruakinnano ake a na kona ni kaoti inanon kawaira. E taku Beretitenti Dallin H. Oaks, Te Moan Kauntira n te Moan Beretitentii, A mwaiti baike tiaki ataia ma are ti kakoaua bon ti Onimakinan te Uea ao Ana tangira nakoia Natina.”
Ti bae n aki ataia bukin tera ngkai kawaira e riki n arona ae ngkai n te tai aei. Ma onimakinan te Atua ao Ana kaantaninga e na uota te atatai ae itiaki bwa E kanga ni karaoa Ana babaire ibukiia Natina ni kabane—n ikotaki ma ngkoe.
Tamnein nanon te Rome Italy Tembora Te Tienta ibukiia Iruwa iroun Massimo Criscione
2. Te tembora e kamatoai kakabwaia aika a onoti ibukiia aomata ni kabane.
Ti bae n iangoia bwa te kabaeaki e bon tii kaineti nakon te buu te mwaane ao te buu te aine. Ma irarikin anne ibukin katiteuanakiia taanga ma te Uea, te kabaeaki e ikotiia utu n te maiu are akea tokina. Rinanon te kabaeaki, natin te Atua ni kabane a kona ni karekei kakabwaia aika akea tokina ngkana a kawakin aia berita aika tabu.
Te mwaaka ni kabaebae e kamatoai otenanti ni kabane n te nakoanibonga i karawa ao i aon te aba. E reirei Unimwaane D. Todd Christofferson man te Kooram n Abotoro ake Tengaun ma Uoman: “[Te mwaaka ni kabaebae] e karaoaki ibukin kamauakiia aomata n tatabemaniia ao karietatakiia utu n te aonaaba are e tauraoi ibukiia natin te Atua ao taai ake a tia ni maeka iai iaon te aba. Akea riki te tua ke te iango n rabakau ke te kariaiakaki ae kona ni bootau ma tibwanga ae tabwanin arona ni kabane. Te mwaaka ni kabaebae aio bon kaotan raoi te motiraoi, nanoanga, ao ana tangira te Atua.” Kakabwaia ake e anga te Uea bon ibukiia ni kabane ao a tauraoi nakoia aomata n tatabemaniia nako ake a karaoi ao ni kawakin berita aika tabu ma Ngaia.
Ti na kona ni mataata raoi n aron ana babaire te Atua bwa bon ibukiia ni kabane ngkai ti nebonebo n ana auti te Uea. E reirei Beretitenti Nelson,ni kabanea am tai n te tembora “e na buokiko n iango n Tiretio ao ni karekea te mi ni burabeti bwa antai raoi ngkoe, antai ae ko kan riki n arona, ao te aeka ni maiu are ko kan maiuakinna n akea tokina.” E kabwarabwara naba bwa te nebonebo n te tembora e na anganiira te kamanoaki, ni kakorakora ara koaua, raunnano, te kaotioti ae onoti, rikiraken te rabakau ao te mwaaka, ao te atatai ae korakora ibukin ana babaire te Atua.
Ngkana ti a tia ni mare ke ti tuai, te tembora e kamatoai tibwanga aika onoti n te tamnei ibukira ni kabane—bon te tabo are e anga te korakora ao te kakorakoraaki nakoia ni kabane ake iai nanoia ni kaaniaki ma te Atua. Ibukin rongorongona riki, taraa te sidebar “Kakorakoraaki man te Nebonebo n te Tembora.”
3. Inanon te tembora, ti kona ni kamatoa ara reitaki ma Iesu Kristo.
Inanon te tembora, boton ara iango bon i aon Iesu Kristo. Bon Ngaia boton ana babaire te Atua ao bon ngaia oin bukin are ti a kona ni karekea te kamaiuaki ao te karietataaki. E reirei Unimwaane Nelson: Umwan te Uea bon te umwa n reirei. Ikanne are e reirei te Uea oin ana kawai. Ikanne are otenati nako a reirei taekan te Tia Kamaiu. Ikanne are ti reiakinna arora ni katabwena te rabuna ao ni reitaki ma karawa n te aro ae itiaki riki. Ikekei, ti reiakinna arora ni boa te tia kakaitara ao ni karekea mwaakan ana nakoanibonga te Uea bwa e na kakorakoraira ao nake ti tangiriia. Aron ingaingain nanora n tatabemaniira n ukora te kamanoaki ikekei.”
Ti kona ni karekea te kamanoaki ao n riki bwa kaain te tembora man ukoukoran te Tia Kamaiu inanon otenanti ao berita aika tabu. Ni karaoan aei, ti na kunea te kakoaua bwa E tangiriira ao bwa “titebo aroia ni kabane imatan te Atua” (taraa 2 Nibwaai 26:33). Ibukin Ana tangira ibukira, E tangiria bwa ti na katea “te reitaki ae akea tokina” ma Ngaia ao ni kona ni karekea te “aeka n tangira ao n nanoanga ae onoti” rinanon ara berita aika tabu. Ngkana ti karaoi ao ni kawakin berita aika tabu n te tembora, ti kona ni kakorakora ara teitaki ma Ngaia, n anganiira “te kantaninga, kimwareirei ao te aki nanokokoraki rinanon maiura ae bwanin”—n arora nako are ti mena inanona.