E Kan Taetae Nakoim Tamara are i Karawa

Nakon Atam ao Ewa ma taan iririia, e anga te kaetieti te anera ni kangai “raira nanom ao ni wetea te Atua n aran te Nati n aki toki.” (Mote 5:8).

E a tia ni berita te Uea, “Bubuti, ao ane kam na anganaki; kam na ukeuke, ao ane e na reke iroumi; kam na karebwerebwe, ao ane e na kaukaki nakoimi” (Mataio 7:7). “Ngkana ko tataro, … tataro nakon Tamam … ae raba” (Mataio 6:6). Ao aio aron am tataro: Tamara are i karawa, e na tabuaki aram” (Mataio 6:9).

E teimatoa n tatataro Iesu nakon Tamana. “E nako n te maunga ba E na tataro, ao e kangaina n tataro nakon te Atua” (Ruka 6:12). “Ao … e nako n te maunga bva e na tataro” (Mareko 6:46). “Ao a roko n te tabo ae arana Ketetemwane: ao e taku nakoia ana reirei, Kam na tekateka ikai, ba N na tataro” (Mareko 14:32). Ngke mena i aon te kaibangaki, ao e tataro ibukia tautia ake a tauria: “Tamau, Ko na kabara aia bure; ba a aki ata ae a karaoia” (Ruka 23:34).

Booki aika tabu a reireiniira bwa ti na “tataro n tainako” (Ruka 21:36; 2 Nibwaai 32:9; 3 Nibwaai 18:15; Reirei ao Berita aika Tabu 10:5; 19:38; 20:33; 31:12). “Reitaki ma te Uea n am waaki ni kabane, ao e na kairiko nakon ae raoiroi” (Aramwa 37:37). Ni kairia ma anne, ti “anga ara kaaitau ma kamoamoa ni kabane ake a reke [nakoira]” (Motiaea 2:20).ni kinai bwaai ni kabane ake e karaoi te Tama ibukira.

E kabwarabwara Beretitenti Russell M. Nelson: “Kakawakim i bon iroum n te tamnei e moanaki ma te atatai ae katoa ingabong koraki ae boou bon te bwaintangira mairoun te Atua. … E kawakiniira man te bong teuana ma teuana ao e boutokaira man te tai teuana ma teuana (taraa Motiaea 2:21).”

E taku Nibwaai, Bwa ngkana kam ongeaba nakon te Tamnei are reireinia aomata aron te tataro, ao kam na ataia ae kam riai n tataro; bwa te tamnei are e buakaka e aki reireinia aomata bwa a na tataro, ma te tamnei ae buakaka e reireina te aomata bwa e na aki tataro” (2 Nibwaai 32:8).

Rongorongo man E Kateirakea Man te Mate Natin Iairo te Aine Kristo, iroun Greg K. Olsen

Ma ana banna ni katooto ara Tia kamaiu ao aia reirei anera ao burabeti rinanon bubua n ririki, ti ataia n ae itiaki bwa ti na tataro ni katoa bong ni kaota ara kakaitau ibukin ara kakabwaia, ao n teimatoa ni kawakina ara tataro inanora. Iai mwiokoara bwa ti na reitaki ma Tamara.

Ma te bwai ae rangi ni mimitong, bwa e kaekai ara tataro Tamara are i Karawa. Te titiraki n te aonaaba aei ae mamate bwa ti na kanga n ataia bwa te kaeka, te kairi, ke te rau n nano a roko mai iroun te Tama?

Rinanon maiu ae riaon itibwi te ririki, I ataia bwa Tamara e taetae nakoira. Ma ti aki tii ngaira. Kaain karawa a tararuaira ao ni buokiira ngkai ti ukoria ni kan iriira te Tia Kamaiu.

Karekean te kaeka nakon ara tataro e bon moa man te onimaki iroun te Tama are i Karawa ao Natina, Iesu Kristo. E taku Iesu, “Tai maku, ko na ti onimaki naba” (Mareko 5:36). Ti onimakina, ao ni kabanea ara kona ni kawakin tua, ao n ukora baina ni ibuobuoki inanon bwaai ni kabane. “Akea te bwai ae e na karaoia te aomata ae e na kauna te Atua iai, ke akea ae e na kauraki unna nakoia, ma ti naake aki kakoauai ana mwakuri ni bwaai ni kabane, ao a aki ongeaba n ana tua” (Reirei ao Beirta aika Tabu 59:21).

Bain te Atua inanon maiura e aki nanonaki bwa E karika te buakaka ke te kabuanibwai ae kakamaaku ake a mena n ara aonaaba. E ngae n anne, e bon nanonaki bwa inanon am tai ni kangaanga ao ni katanginano, E na tei irarikim, ni kakorakora am konabwai, ni kabebetea nanom, ao n onea karawawatam nakon taian kakabwaia ibukim” (2 Nibwaai 2:2).

Ngkana ti kamwakura ara onimaki iroun te Atua ao ni kawakin Ana tua, ti na kona n ongo n Ana taeka.

N Tebetembwa 1993, n au moan ririki ngke I riki bwa te Mataniwi ni Kabuta, Beretitenti James E. Faust (1920–2007), ngkanne ngke kaain te Kooram n Abotoro ake Tengaun ma Uoman, e kaoai ma kainabau ae, Kathy, bwa ti na iria nakon te bwabwaro are karaoaki n te Bringham Young University. Uringnga, 1993 bon imwaain ae a kabonganaki taian tareboon, bwaai n reitaki, ao te intanete.

N ana marooro, are e atuunaki “Bwanaan te Tamnei” e anga ana kauring Beretitenti Faust: “N am roro ao ko na kaitara ma bwana aika uanao ake a na tuangko arom ni waaki inanon maium, arom n tabeakina rawawatam, ao arom ni karekea are ko kantaningaia. Ko na konaa n karekea nimabubua ni waerake mwaitin ana channel te terewition man tii tabon baim. E na mwaiti aekan nako te tiaobutuwea, modem ibukin kaombiuta, database, ao raubaba ibukin katekean katanoata; a na iai destop ibukin bwaai ni booreti, tiateraite ibukin karekean burokuraem, ao te reitaki iaon rabakau aika boou are a na katabeaianga am iango n taian rongorongo. … Te bwanaa are ko riai ni kina bon bwanaan te Tamnei.”

Beretitenti Boyd K. Packer (1924–2015), te Beretitenti n te Kooram n Abotoro ake Tengaun ma Uoman, e reirei i aon taekan, te bwanaa ae maraara, bwanaan te Tamnei ni karakina rongorongon te bwai are e rinanona John Burroughs, ae mwaatai i aon bwain te aonnaba, ngke e tabe n rianna ma raoraona rinanon te tabo ni kaukiang ae onrake kaaina. Aikai ana taeka Beretitenti Packer:

“Ietan te bwanaan te kaawa ae maeureirei [Mr. Burroughs] e ongo ana anene te manikiba.

“E tei ao e kakauongo! Uake raona aki ongo. E taratara nako. Akea temanna ae e ataia.

“E tabeaianga nanona kai ni kabane aki ongo te bwai ae rangi n tamaroa.

“E buuta te koin man ana buua ao ni kakibaa nako karawa. E bwaka i aon te kawai ma tangina, ae aki rang korakora nakon ana anene te manikiba. Ma a bane n rairaki; ao a ongo anne!

“E bon kanganga kamaenakoan tangin ana anene te manikiba man tangitangin taian kaa inanon kawain te kaawa. Ma ko bon kona n onga. Ko kona n ongo n tangina ae itiaki ngkana ko kataneiaiko ni kakauongo iai.”

Ana anga reirei Beretitenti Packer i aon te Tamnei ae Raoiroi e riki n 1979, n te tai are e rangi n rau te maiu ao kamangaongao n te aonaaba a karako riki nakon ae ngkai.

E reirei Beretitenti Nelson, “Ngkana ko tabeakin riki bwana aika nako man bwaai ni kaongora nakon ana wirikiriki te Tamnei ae Raoiroi, ko bon uotiko nakon kamamaran tamneim.”

E taku Beretitenti Faust, “Ngkana ti na kakauongo ni bwanaan te Tamnei, ti riai naba ni kauka taningara, n raira matara n onimaki nakon te tabo are nako mai iai te bwana,, ao ni kamatoa ara taratara nako karawa.”

E na roko bwanaan te Tamnei iroura n ara iango ao n ara namakin. “N na tuangko n am iango ao inanom, man te Tamnei ae Raoiroi, are e na roko i roum ao are e na maeka inanom” (Reirei ao Berita aika Tabu 8:2). Kakauongo nakon bwanaan nanom—anne bon te moan mwaneka ni karekean te kaotioti.

Tataro ma Nanom ni Koaua

Kaeka ao namakin a bon aki konaa n kairoroaki rekeia. Ti tataro ao n tataninga ma nanora ae onimaki. A kona n aki roko kaeka n te maiu aei, ma nakoia aika raoiroi, e na teimatoa te Uea anganiia Ana rau (taraa Ioane 14:27). N angin te tai ao a roko kaeka ngkana ti tataro bwa ti na buokiia naake a mena irarikira. Taai tabetai, a roko kaeka “teutana imwiin teutana, te reirei teuana imwiin teuana” (Reirei ao Berita aika Tabu 98:12).

E kona n roko nakoira te bwanaa mai karawa n taai aika aki kantaningaaki ao n taabo aika aki kantaningaaki, ma ti kunei tibwangara aika a kona n nooraki n taabo aika a rau ao taabo aika a tabu. I kunei kakabwaia kamimi, ngkana I tataro n te moaningabong ao n karaurau n iango. Ara kamatebwai n koroboki aika tabu, i bon iroura, ni katoa bong, e kona n uota bwanaan te Tamnei ae Raoiroi nako nanora n aron te ai n taai tabetai.

N te tai teuana ma teuana, namakin a onoti n roko man te bwai are ti warekia, n taai tabetai, bwaai ake ti iangoi inanora a uota kaekaan te tabeiaianga ae moan te kaokoro. Uringa ana taeka Unimwaane Robert D. Hales: “Ngkana ti tangiria n taetae ma te Atua, ti na tataro. Ao ngkana ti tangiria bwa E na taetae nakoira, ti na ukori booki aika a tabu.”

Ngkai ti katobibiaki ma bwana ao kamangaongaon te aonaba, e tua te Uea nakon Ana burabeti bwa e na katei tembora aika mwaiti. N ana auti te Uea aika tabu aikai, ngkana ti katikui ara kanganga i tinaniku ao n rinnako ma ara tataro ao tabeaiangara, ti na bon reiakin koauan te maiu are akea tokina.

N te ririki ae nako, e anganiira Beretitenti Nelson te berita ae kamiimi aei: “Tariu ao mwaaneu aika tangira, aio au berita. Akea te bwai ae na kona ni buokiko riki n taua ni kamatoa te kai te biti irarikin te nebonebo i nanon te tembora ni katoatai nakon are ko bon kona. Akea te bwai ae na kamanoko riki n am tai ni kaitibooaki ma bubu n nang ae rootongitong man te aonaaba. Akea te bwai ae na kakorakora am kakoaua iroun te Uea Iesu Kristo ao Ana Mwakuri ni Kamaiu ke ni buokiko ni kamataata rikiana babaire te Atua ae tamaroa. Akea te bwai ae na kabebetea riki tamneim i nanon taai ni maraki. Akea te bwai ae na kauka rikikarawa. Bon Akea!”

Ni katoa maungatabu ni kabuta a uota kakabwaia aika mwaiti riki. N te namwakaina ae nang roko ae Eberi, ti na manga kaitibo naba n te maungatabu ni kabuta ao n ongora ni bwanaan te Uea. Ti roko n te maungatabu ni kabuta ma te tataro ao te tauraoi. Ibukira n tatabemaniira nako, a mwaiti iroura katabetabe ni iango ao taian titiraki. Ti tangiria ni kaboui ara onimaki inanon ara Tia Kamaiu, Iesu Kristo, ao ni kakorakorai ara konabwai n totokoi kariiri. Ti roko bwa ti na reireiaki mai eta. I berita bwa ngkana ko roko n tauraoi ao tataromwaaka imwain te maungatabu ni kabuta, ko na kunei kaekaan am raraoma ao n ataia bwa ko mwaneaki “mai karawa”

Onimaki bwa e na taetae nakoim Tamam are i Karawa. E na bon! Am onimaki Irouna ma natina ae Tangiraki e na buokiko inanon ana mwakuri ao ni kina bwanaan te Tama. I kakoauaa bwa E mena ikekei ao n tangiriko ma nanona ni kabane.