I Kona n Onimakina Raoi ana Kairiiri te Burabeti?

I tangiria n taainako bwa N na nako ni karaoa au mwakuri ni mitinare ao n rangi ni mwakuri korakora ni kakoroa nanon te kouru anne. E kangaanga aron te karekemwane, ma e reke au mwakuri are e buokai ni karekea ae bon tau ibukin au mition. Ngke I a kauka au meeri ibukin te wewete nakoiu, iai te namakin ae kakukurei ao I ataia bwa bon mairoun te Atua.

Ngkanne, ibukin butin te aoraki ae te COVID-19, I a manga moan mwiokoaki n nakon te mition i Utah inanon ruaiwa namwakaina imwaain ae I kiba nako tinaniku nakon te tabo raoi are I mwikokoaki bwa N na beku iai. I namakina te kabebeteaki ao n rangi ni kukurei n tokin te tai ngke I a mena raoi n te tabo are e weteai te Atuai nako iai.

Ngkanne, tabeua te namwakaina imwiin menau ikekei, I a waekoa n anaaki mairouia aomata ao te aba are Ia tangiria. I namakinna bwa kanga a bane n anaaki bwaai ma irou.

I namakina te uruaki n nano. I titiraki raoi ma nanou ngkana bon aio te rinerine man ana kairi te tamnei.

I kiba n okira mwengau Texas, ma te aki rau n nano. E bon karina aron kamwaingakiu n oki n te aro are tamau ma tariu ao mwaaneu a bon aki mena n te marae ni waanikiba ni butimiwaea okiu.

Tabeua te bong imwiin kitanan au mition, I bon rangi ni miimi ngke iai te kabuanibwai ae riki ni uakaan ma te tabo are I karaoa iai au mwakuri ni mitinare. N tai anne, I ataia bwa iriiran te burabeti e bon kamanoai n te kawai ae rangi ni koaua. E kaonaki nanou n te kakaiau ae bati ibukin te burabeti ao ana kairi.

I karaoa au berita i bon irou bwa n taainako ao N na riai n ongo n ana taeka te burabeti, e ngae ngke eaki matata nanona.

N te tai ae nako ao e taku Unimwaane Ulisses Soares man te Kooram n Abotoro ake Tengaun ma Uoman: “Ngkai iai burabeti bon kanikinaean Ana tangira te Atua ibukiia Natina. A kaoti berita ao aron te Atua ni koaua ao Iesu Kristo nakoia Aia aomata.”

I kakoaua raoi bwa Beretitenti Russell M. Nelson bon te tia taetae ibukin te Uea. E mwakuri ni kaineti ma Tamara are i Karawa ao te Tia Kamaiu ni kairiira nakon te kamanoaki ao n anganiira te kaantaninga ao te kaetieti inanon taai ni kataaki.

Ngkana ko teimatoa ni miimi ngkana te burabeti e bon weteaki mairoun te Atua, au taeka n reirei bwa ko na mwakuriia ana kakao. Kataia manga moan wareka ana marooro Beretitenti Nelson n te maungatabu ae nako ao kamatebwai koroboki aika tabu ake e anga. Mwakuriia ana kakao ao kamatebwai taian kakabwaia ake e beritani irarikin kakao akanne.

E reirei naba Unimwaane Soares, “man iriirakiia [burabeti], a na rangi ni kakukurei maiura ao n aki mangaongao, ara kanganga ma nakobuakara a na kabebeteaki, ao ti na karekea katanan tamneira ni katobibira.”

I a tia n noori kakabwaia aikai inanon maiu ngkai I iriira ana reirei te burabeti. I ataia bwa kakabwaia aikai a tauraoi nakoia aomata ni kabane ake a onimakina te Atua ao Ana burabeti.