“Anga n Reitaki mai Karawa,” Riaona, Maati. 2025.
Anga n Reitaki mai Karawa
E taetae te Atua nakoira n anga aika kakaokoro. Iai bwaai aika ti kona ni karaoi ni kateimatoa te reitaki aio.
Kamataata n te tamnei iroun David Green
Ngkai I katauraoai ibukin au moan marooro n te maungatabu ni kabuta, I kunea bwa e kanako nano te tibwanga aio! Taan taetae n te maungatabu ni kabuta aki anganaki atuun aia marooro, ngaia are Nna kataia ni karekea i bon irou bwa tera ae tangiria te Uea bwa nna taekinna.
I tataro ao n taningaa kairakiu. Imwiin tabeua te tai, kainabau, Isabelle, ae e rabakau man kinaai raoi, e noria bwa I tuai man waaki.
“Taraia, ko riai n karaoa te bwai teuana,” e taku. “Waaki ao koroboki!”
Ao anne te bwai ae I karaoia. Inanon au waaki, I korei onoua nakon itiua marooro ae I kona n taekinii. Ma ngke I tabe n iangoia, I namakina te mwengaraoi ma teuana ibuakoia ao I namakinna bwa anne te marooro ae nna riai n tibwauaia. Te Tamnei e roko n au iango, ao e butiraoi korean au marooro.
N te maungatabu ni kabuta n Okitobwa 2023, I tibwauaia bwa ngaira ni kabane natin te Atua. E tangiriira, e kinaira raoi, ao e atai aron maiura. E ongo ara tataro ao e tangiria n taetae nakoira.
Reiakinan aron te Atua n taetae nakoira bon te taneiai ibukin temanna ma temanna n tatabemaniira. Ma iai anga aika ti kona ni kamwakura te reitaki ma Tamara are i Karawa bwa e na kakabwaiai maiura.
Waaki Nako ma te Kakaonimaki ao te Onimaki
Kinaakina ngkana e taetae te Atua e kainanoa te kakaonimaki ao te onimaki. Te onimaki e atinrooaki iroun Iesu Kristo. Ti kainanoia bwa tina Onimakinna. E a tia n taekinna:
Eng, nooria, N na bon tuangko n am iango ao inanom, rinanon te Tamnei ae Raoiroi, are e na roko i aom ao are e na maeka inanom.
Ngkai, nooria, aio tamnein te kaotioti” (Reirei ao Berita aika Tabu 8:2–3).
Ma te kaotioti ao te kairi mai karawa e aki reke man tataningaan kaotin te tamnei. Ti riai ni mwakuri. N aron are e tuangai kainabau ma au marooro n te maugatabu, tabetai ti riai n bon “waaki.”
Ngke ngai ma Isabelle ti beku bwa taan kairiiri n te mition n te Buranti Lyon Mition, I tangiriia n ataia bwa ana nakea mitinare n tatabemaniia inanon te mition ngkana i karaoi aia tabo. I kunea bwa te Tamnei e kairai ngkana I tataro ibukin buokau ao imwina i kanakoa au kabanea n tamaroa ni moti. E roko kamatoakin au moti imwin te tai are a bane n roko bwaai n nneia.
N nakoau n te tai aio, I kanakoaki nakon titeiki n te Ekaretia bwa nna barongai beretitentii n te titeiki. Ngke ti karaoa te intawiu ma toau nakoia aomata n tatabemaniia, ti karekei iango, namakin, ao kaantaninga aika roko iroura. Rimwi ao ti marooro man tataro. N tokin te tai, e roko te kaotioti, ao te Uea e kamatoa nakoira bwa antai ae E tia ni weteia bwa e na beku.
Bon te waaki ae kona kinaa iai te tai ae taetae te Atua ao ni karekea Nanona. Ti riai n kaotia bwa ti kukurei n mwakuriia ma te kakaonimaki ao te onimaki.
Iriira te Burabeti
Teuana te kawai ae kakawaki ae na reitaki iai te Atua nakoia Natina bon rinanoia ana burabeti. Karekean te burabeti i aon te aba ni boong aikai bon te rongorongo ae kakukurei! E karekei kaotioti mairoun Tamara arei i Karawa ibukin te Ekaretia (taraa Amoti 3:7). Ti kona naba ni karekei kairiiri ma kawakinara man iriiran ana reirei. E bon aki bebete, ma te Uea e a tia ni kairiira bwa tina iriira te burabeti “ma te taotaonakin nano ao te onimaki ni kabanea” (Reirei ao Berita aika Tabu 21:5).
“Te Utu: Te Katanoata nakon te Aonaba,” te katooto, e a kaman taetae ni burabetiaki 30 te ririki n nako. E taekin kangaanga aika mwaiti ake ti aki ataia ae tina rinanona ao n anga te kairi ae ti aki ataia ae tina kainanoia—ma tia ataia ngkai. Ana kairi te burabeti tiaki te bwai ae kona tangiria ni kan ongongo n tainako. E na aki kaineti ma ana taratara te aonaaba. E ngae n anne, tina kairaki man kamanoaki ngkana ti iriira te burabeti.
Titiraki ao Ukora Kaekaia
N moan bongin Kaokan Bwaai, te Atua e aki toki n taetae ni kaekai titiraki ake mairoun te Burabeti Iotebwa Timiti ao tabeman riki. Ngke a mwakuri Iotebwa ma Oliver Cowdery i aon rairan Ana Boki Moomon, a roko n ana reirei te Tia Kamaiu i aon te bwabetito (taraa 3 Nibwaai 11;23-33). A tangiria n reiakina ae bati riki iaona ao a nakon te buakonikai n tataro. E aki maan, e kaoti Ioane te tia bwabetito ao ni kaoka te kariaia ni bwabetito man te kateboaki inanon te ran ibukin kabwaraan bure.
N te tai teuana, kainaban Iotebwa, Emma e kaota nanokawakina n mwiin aia moko ma aia baeke are a kangtia are e kabaereka nanon te autinibootaki. Iotebwa e uotarake aio nakon te Atua ao e karekea te kaotioti—“Tuan te Mauri” (Reirei ao Berita aika Tabu 89:1)—i aon waaki ni kamarurung ibukin rabwataia ao tamneia natin te Atua.
N taai aikai—ao aika mwaiti riki—e kauringiira bwa e Raoiroi ae iai am titiraki ngkana ko kan ukora rekena n kawaina ae riai. Ngkana ti angan te Uea ara titiraki, ti na karekei kaekaia. Tabetai a roko kaekaia n te tai naba anne. Angiin te tai, e roko “teutana imwiin teutana, te reirei teuana imwiin teuana, teutana ikai ao teutana ikekei” (2 Nibwaaii 28:30). Ti na kona n taninga te kaeka bwa buokara n reiakinaki ao n rikirake, ma te Atua e na bon anganiira nakon oin nanona, kawaina, ao ana tai.
Uringii Taneiai ake Mai Mwaina
Ngkana ti tataninga te Atua bwa e na taetae nakoira, e kakawaki bwa ti teimatoa nakon are ti ataia ao ara taneiai ake ti a tia n rinanona. A kona ni bua mairoura. Ti riai n aki nanououa n ara taneiai ma te Tamnei ti bukin ae tia rinanon te kangaanga. N taai aikane, ti riai n okirikaaki n ara iango ao n uringii namakin ake ti namakinii ngke ti kaan ma te Atua.
E titirakinii titiraki n aron aikai Aramwa nakoia te botanaomata i Taraemera:
“Kam a tia ni bungiaki n te tamei mai iroun te Atua? Kam a tia ni karekea tein tarakina i moami? Kam a tia n rinanon te bitaki ae korakora aio inanomi? …
Ao ngkai nooria, I taku nakoimi, … ngkana kam a tia n rinanon te bitaki n nano, ao ngkana kam a tia n namakina te kan anenea kunan te tangira ni kabomwi, I kan titirakiningkami, kam kona n namakinna ngkai?” (Aramwa 5:14, 26).
Ti riai n uringi ara taneiai n tamnei ao n aki mwaninga. Ti riai n titirakiniira n tainako, “ Nna kona n namakinna naba ngkai?” Aio e kakorakoraira n taai are e tuai kaeka iai te Atua. Ti kona ni katamaroa ara konabwai ni kinai taai ake E taetae iai nakoira.
Teimatoa n Reitaki
Te reitaki ma Tamara are i Karawa bon te bwai ae maiu. Ti karaoa tabera ni kateimatoaa man taraakin ma kakaean te tibwanga n karekea te reitaki mai karawa. Ti kona n tataro ma nanora ni kabane ni katoa bong nakon te Atua ibukin te rau, te karaunano, ao te kairi. Ti kona ni kamatebwaia Ana taeka n koroboki aika tabu man namakina ana kairi te Tamnei. Ti kona naba n irii aia kairi burabeti.
Ngkana ti teimatoa n reitaki ma Tamara are i Karawa ae tatangira, ti kona n riki bwa Baina ni Buokia n Ana mwakuri ae korakora. Man kakauongora nakon iango ma wirikiriki ake ti karekei, ti kona ni buokiia aomata n namakinna bwa te Atua e kinaia man tangiriia ao n tangiria n reitaki nakoia.
Kakoauaan raoi bwa te Atua e ongo man taetae nakoia Natina bon te kakabwaia ae korakora. Te reitaki ma Ngaia ni katoabong e katauraoi kairiiri bwa tina nakea inanon maiura.