E Taetae te Atua nakoia Aika Itiaki Ake Ngkoa—E Taetae nakoiu?

Ana Tataro Iotebwa ae Mangori

E waaki ma te titiraki. Ao e a riki n aron te bwai are e kabwarabwara Unimwaane Alexander Dushku man te Itingaun n “ai te ota ao te koaua ae taonako n aki konaa aona.” Ana tataro ae mangori Iotebwa Timiti e kairia n nakon te roko mairoun Tamara are i Karawa ao Iesu Kristo (taraa Iotebwa Timiti—Rongorongo 1:14–17). N aron te kamiimi ae kona n reke n taetae n itaramata ma te Atua, taneiai aikai aki bati n riiriki ao a bon tabu.

Ngkai tiaki tii te arona aron tibwangara ni kabane n aron Iotebwaa, ti kona naba ni karekei oin ara boua ae te oota—teuana te oota nte tai teuana” Ngkana ti tabeka ara titiraki ao ni katorobubua n tataro, ti na karekea te kaeka mairoun te Atua rinanon te Tamnei ae Raoiroi.

Tamnein te nei ni bwabetito n te Ogden Utah Tembora

Mwaakan te Tembora

Aika Itiaki i Kirtland, Ohio, a kabanea aia tai, aia mwane ao ni beku ni katea ana auti te Uea. N tain katabuan te Kirtland Tembora, e tataro Iotebwa Timiti bwa te Atua e kakabwaiaiia Aika Itiaki aika a kakaonimaki ma te mwaaka ngkai a rin ao n nebonebo (taraa Reirei ao Berita aika Tabu 109:13). E na riki te tembora bwa “te auti aei e aonga n riki bwa te auti n tataro, te auti n aki mamatam, te auti n onimaki, te auti ni mimitong ao ana auti te Atua” (Reirei ao Berita aika Tabu 109:16).

Ni boong aika kaitira, ti kakabwaiaaki ma taian tembora ni katobibia te aonaaba. Ti anganaki te berita bwa ti na karekea te kaotioti ngkai ti nanako n te tembora. E taku Beretitenti Russell M. Nelson n te tai ae nako bwa “inanon te tembora ti na kona n karekea bwaninin te Tamnei ae Raoiroi’ [Reirei ao Berita aika Tabu 109:15]. Iangoia bwa tera nanon te berita anne ni kaineti ma karekean kaotioti mai karawa iroun are e ukora mwaakan te koaua ae akea tokina.”

Ana Titiraki Hyrum nakon te Burabeti

Ko a tia ni miimi bwa kanga aekakira ngkana ko a bubutia te burabeti bwa e na taetae te Atua ibukim? Hyrum, tarin te Burabeti ae Iotebwa, e bon tii karaoa anne. E karekea te reirei aei mairoun te Uea rinanon Iotebwa: “Nooria ngkoe ae Hyrum, ae natiu; ukoukora uean te Atua, ao a na bane n raonaki baikai ni kaineti nakon bwaai aika a eti” (Reirei ao Berita aika Tabu 11:23).

N tabetai, e aki roko te kairiiri rinanoia aomata tabeman. E reireiniira Beretitenti Russell M. Nelson n “ukori kairiiri man bwanaa aika ko onimakini raoi—mai irouia burabeti, taan mamata, ao taan karekei kaotioto ao bon ana wirikiriki te Tamnei ae Raoiroi.” Ngkai ti aki kona ni tabeki ara titiraki ni kainetia nakon te burabeti, ti kona ni karekea kaekaan ara titiraki aika a onoti.

Tamnein Oliver Cowdery,iroun Lewis A. Ramsey

Ana Kamatebwai Oliver ibukin te Onimaki

Oliver Cowdery bon ana tia ibuobuoki Iotebwa ae rangi ni bongana ibukin rairan ana Boki Moomon. Ma n 1829 e rootaki n te bwarannano. Bukin tera ngkai e aki kona n rairairi? Te Uea e angan Oliver tabeua taeka n reirei aika a onoti bwa e na kanga ni karekea kaekaan ana titiraki—te reirei are e kaineti nakoira ni kabane ni boong aikai.

Ngkana iai ara titiraki, ti kaungaaki n kamatebwaia, n iai ara onimaki, ao n onimakin namakin aika eti (taraa Reirei ao Berita aika Tabu 9:6–9). A kona n roko ara namakin man ara iango, namakin aika a buee, ke raun te nano. N aron ae taku Unimwaane Mathias, “Ngkana [rinanon ara namakin ao ara iango aika a raraoi ao ana kairi te Tamnei ae Raoroi] ngkanne n ikotaki inanon tamneira teuana te tamnei ae bwanin e kaota koauan bwaai n te kawai are bon ngaia ni koaua.”

Tamnei iroun Craig Alan Shelley

Aia Kakabwaia te Utu ae Smiti mairoun te Tamanuea

Taian kakabwaia mairoun te Tamanuea a riki bwa mwakoron te Ekaretia inanon tain te O Tetemanti (taraa Karikani Bwaai 48). Ngke e kateaki te Ekaretia ni boong aika kaitira, e tua te Atua nakon Iotebwa bwa e na rinea tamana, ae Joseph Smith Sr., bwa te tamanuea n 1834. Tenibong te bong imwiina, a ikotaki te utu ae Smith bwa e aonga Joseph Smith Sr. n anga ana kakabwaia n tamanuea nakoia natina ni kabane ma buuia. Kakabwaia aikai a anga taeka n reirei ao te raunnano ibukin maiuia.

N reitaki ma kabwarabwaraana bwa te kanoa raa ae a nako mai iai, te kakabwaia mairoun te tamanuea bon te koroboki ae tabu nakoim .” ;Ngkana ti katoa tai ni kamatebwai oin ara kakabwaia mairoun te tamanuea, ti riai ni kawakin taekana, n iangoia raoi, ao n maiu n ae tamaroa ni karekei berita ake a beritanaki n te maiu aei ao n are akea tokina.”

Tamnein Emma Timiti, iroun Lee Greene Richards

Kairan Emma ae Onoti mairoun te Atua

Ngkai e riki bwa buun te burabeti, n angin te tai ao e korakai Emma Timiti ma taian kataaki ao kamangaongao ake a tuangaki ana utu bwa a na keiaki ni kaitarai. N Reirei ao Berita aika Tabu 25, ti kona ni wareka ana taeka Tamara are i Karawa ni karaunano ao ni kakorakora nakon Emma.

Ngkana ti ukoukori oin ana rongorongo ni karaunano Tamara are i Karawa, ti kona ni bubuti ibukin kakabwaia n te nakoanibonga. Ngkai e reireiniira James E. Faust (1920–2007), te Kauoman ni Kauntira n te Moan Beretitentii: “Kakabwaia n te Nakoanibonga a kona ni buokiira inanon babaire aika a uarereke man korakora inanon maiura. Ngkana, rinanon ara kakabwaia n te nakoanibonga, ti kona ni karekea bon tii mwakoron te aomata are e baireira te Atua bwa ti na riki n arona, e na bua maakura ao n aki manga nanououa.”

Tamnein Joseph F. Smith, iroun Albert E. Salzbrenner

Ana Kamatebwai Joseph F. Smith ni Booki aika Tabu

Ngkai te aoraki, te buaka, ao te mate e roota te aonaaba n 1918, te burabeti ae Joseph F. Smith rairaki nakon booki aika tabu ibukin te kaeka. Imwiin kamatebwaian ana taeka Betero n te Nu Tetemanti, e moanna ni karaurau n ururing riikaaki ao n iangoia inanona. E kairaki nako inanon te mii ni burabeti ibukin te Ekaretia ike e noora te Tia Kamaiu ni baronga te mwakuri ni mitinare n te aonaaba n tamnei. (Taraa Reirei ao Berita aika Tabu 138.)

Ngkai e reireiniira Unimwaane Robert D. Hales (1932–2017) man te Kooram n Abotoro ake Tengaun ma Uoman: “Ngkana ti tangiria ni kan taetae nakon te Atua, ti na tataro. Ao ngkana ti tangiria bwa E na taetae nakoira, ti na ukori booki aika a tabu.” Booki aika tabu bon ana taeka te Atua a kawakinaki n te koroboki, ao inanon ara roro n rabakau aika boou,, a baikoa man kai reke iroura ngkai. Ngkai ti wareka ao iangoi inanora koroboki aika tabu, ti na kunea te buoka mai karawa are ti kainnanoia.

Korotamnei iroun John McKinney

Konabwai Mai Nanora n Ongo Irouna

E reirei Beretitenti Russell M. Nelson: ”Ngkai ti ukoukoria n riki bwa ana reirei Iesu Kristo, ara kekeiaki ni kan ongo Irouna e riai raoi n nako mai nanora. E anaa te tatauraoi ao te kekeiaki n tainako ni kanoa maeura ni katoa bong ma Ana taeka, Ana reirei, ao Ana koaua.” Ti kona ni karekei rongorongo mai i karawa aika a onoti ao a koaua.

E taetae te Atua nakoia. E na taetae nakoira. Ti riai n ongo Irouna.