Kateimatoa te Reitaki ma te Tia Kamaiu

Kamataata n te tamnei iroun David Miles

N tain te kabuebue teuana n ara utu ti nako n motirawa i aon Tiaina Maiaki, ike ti a buti i aon baora ae te (ATV) rinanon te buakonikai ae korakora iai bwabwakan te karau. Ngke ti a roko n te tabo ni kaembwa, ti a bon miimi irouia taan kaneweaba ngke a anganiira kunnikai ibukin kamanoan rabwatara ma taian bwara ibukin otangan te atuu ao kamanoan matara. E taraa n kabubura ni bwai ibukiia taan mwamwananga aika a tuai n mwatai n arora n bong ae kabuebue, ao n aomwaimwai, ma ti bon bwaini naba.

Imwiin karekean kaetieti ibukin te mwananga, ti a butinako ao n tokin te tai ti a roko n te tabo ae tabuki inanon mwanangara. Ti tiku teutana ni mooi n te ran ao ni kaoi maonora mai iaon ubura.

Ngkanne e a kabwarabwara nakoira ara tia kaneweaba bwa te ruorikaaki e kanganga riki. Ti na riai n bane n ikotaki ni katenaira ao ni karaoa tein te turein ae te ATV, ma ATV n tatabeua a na tena ma moan ao bukin aia kaa ma are moaia ao ibukia bwa e aonga n mwaneaua raoi te kurubu.

Ngkai ti nang moanna n ruo nako naano, ti wetea temanna ma temanna bwa ti bairea raoi aron ruorikaakira. Ti karaurau ni maenako, ma e ngae n anne, iai teutana te marena imarenan au kaa ao te ATV are e toka iai tamau ao tariu ae uarereke ae, Vivi. N te tai ae waekoa Vivi ao tamau a bon kibanako naba mai iaon aia kaa! E kiba tamau nako aon Vivi n te tai raoi anne ni kamanoa bwa e aonga n aki rabino te kaa nako aona.

Ti anganaki te kabebeteaki n te aro ae kamiimi ngke ti a noora tamau ao Vivi ngke a tei ao a tanaki n taetaea barekan aia kawaerake. Te kakaitau ae moan te bati ni bwaai ni kamanomano ake a bwainii, tamau bon tii teutana ikoakina ae urarereke. E taonaki n te maaku Vivi ma bon akea teutana naba ikoakina. Ngke ea manga moan ikotaki ara kurubu, e kauringiira te tia kaneweaba n te bwanaa ae matoa bwa ti riai ni kamatoai ao ni katenai raoi ara ATVs ngkana tiaki tangiria bwa ti na rabinobino man te tabuki riki.

N te maiu aei n tabetai ti kariiriaki n iango bwa ti ko na ni karaoi bwaai i bon iroura. Ti taku n ara iango bwa ti aki kainnanoa ana otanga ni kamanomano te euangkerio, are e kona ni karika te aki mweengaraoi. Ai aron naba anne, ti na kona ni kunea bwa e na kona ni kangaanga n tabetai te teimatoa n reitaki ma Tamara are i Karawa. Ngkana ti kabwaka ni karaoan aei, ti bon karika te kangaanga inanon borauakinan kawain te aonaaba ae kakamaaku ma ni kamwaamwane, ni kai rootaki ni kabwuanibwai ao ni kaikoakii tamneira.

Ngkana ti kabonganai bwaai ni kamanomano ake e anga te euangkerio ni kateimatoa te reitaki ma Tamara are i Karawa ao Iesu Kristo, ti kona ni kaitarai kakaewenako ake a mena imatara inanon maiura. N aki taraia ngkana e kakamaaku ke n kangaanga te kawai, ti kona n tokanikai ngkan iai Ngaiia.