Iriira te Burabeti

N 600 BC, imwiin bwakan Ierutarem iroun Nebukaneta, uean Baburon, te kurubu ae uarereke man te baronga are Iuta a kariaiakaki bwa ana tiku n te aba, ao nikiraia a kairakinako bwa buure nako Baburon. Ibuakoia ake a tiku bon Ieremia te burabeti ao Ionatan, natin Karea, te tia kairiiri n te taanga ni buaka.

Aomata a kaitara ma te babaire ae kakawaki, bwa a na tiku i Ierutarem, ke, n aroia ake a mwaiti are a tia n rineia, ke a na nako ni maeka i Aikubita? Ni kakaean buokaia, Ionatan ma ana botanaomata a nakon Ieremia n tuanga bwa ena titirakina te Uea ibukiia, ni kangai, “Bwa E na kaota te kawai ae ti na nakonako iai Iehova ae Atuam, ma te bwi ae ti na karaoia” (Ieremeia 42).

E kariaia Ieremia, man taku, “N na tataro nakon Iehova ae Atuami n ai aron ami taeka; ao te taeka ae E na kaekaingkami Iehova iai, N na kabanea n tuangingkami; N na aki karaba te taeka teuana nako imi.” A berita aomata, “E na riki Iehova bwa te tia kakoaua ae aki kewe ae kakaonimaki i buakora, ngkana tao ti aki kakairi n te taeka ni kabanea ane E na kanakomaiko Iehova ae Atuam nako ira iai. Ngkana tao te taeka ni kakabwaia te aba, ke tao ni karekea kaira, ao ti na ira nanoni bwanan Iehova ae Atuara.”

Ieremia e ukora ana reirei te Uea, ao Ionatan ma ana botanaomata a berita bwa ana ongeaba nakon are e kaotia te Uea. Imwiin tebwina te bong, Ieremia e a karekea ana taeka te Uea. “E bootia te botanaomata ao e kanakoa te rongorongo: “E kangai ana taeka Iehova … Ngkana tao kam boni maeka naba n te aba aei, ao N na kateingkami, ao N na aki kabwakaingkami, ao N na unikingkami, ao N na aki taekingkami … Kam na tai maku iroun ueani Baburon, are kam boni mamaku i rouna; … bwa I boni memena i roumi ni kamaiungkami, ma n rawei maiumi mai nanoi baina … Kam na tai nako Aikubita: kam na bon atai bwa I a tia n tuangngkami n te bong aei n reireingkami” (Ieremia 42–43)

Tera aia kaeka aomata nakon ana reirei te Uea ae kanakoa rinanon Ana burabeti? Te kananokawaki, bwa e a bon kaman tia aia iango. A bon ti kakaea kamatoaan aia iango ao tiaki te kairi ni koaua. Ataria, Ionata, ao taan kairiiri aika kainikatonga a bukina Ieremia bwa e kewe, ni kangai, “Ko atonga te kewe: E aki kanakomaiko Iehova ae Atuara bwa ko na kangai, Kam na tai nako Aikubita ni maeka iai.” Ni katinanikua ana kaetieti te Uea, Ionatan, taian kaaben, ao aia botanaomata aki ongo ao a nako Aikubita. N aron are taetae ni burabetiiaki, a tiringaki ngke Baburon e tokanikai iaon AIkubita (Ieremia 43).

Ti na kanga ni kaekai aia taeka burabeti aika maiu? Te Uea e ongo aia tataro kanoan Iuta ao e kaekaia rinanon Ana burabeti. N boong aikai, E teimatoa n taetae rinanoia burabeti aika maiu ao ake a tia ni weteaki bwa ana kairiiri. E tia n taku te Uea, “E ngae man oin bwanaau ke bwanaia au tia mwakuri, bon titebo” ao e birta bwa “ao bwaai nako are a na taekinna ngkana a kairaki iroun te Tamnei are Raoiroi a na riki bwa koroboki aika tabu, ana kantaninga te Uea, ana iango te Uea, ana taeka te Uea, e na riki bwa bwanaan te Uea, ao mwaakan te Atua nakon te kamaiuaki” (Reirei ao Berita aika Tabu 1, 68).

N boong aikai, ti katobibiaki n bwanaa aika bati, ai taekin oin aia koaua ao iango. N ai aron Koria, n ana Boki Moomon, e bati irouia bwanaa aikane aiak taku bwa akea Kristo, bwa ake ae ataa kanoan boong aika imwaira, bwa ti aki kona n kakoaua bwaai aika tiaki noori, ao bwa ni kabane aomata a rikirake nakon oin wanawanaia ao n tokanikai nakon oin korakoraia (taraa Aramwa 30). Irirana aeka ni bwanaa aikai ana kairiko nakon ae kairua. E ngae n anne, nake a korakora tamneia ao n ongo nakon ana wirikiriki te Tamnei ae Raoiroi a na bon aki mwamwanaaki. Te kangaanga ae korakora e na kona n roko man karinan iango aikai, ake a na karika te kai kairakinako ao ni manikangarea rikira bwa taan iriira Iesu.

N Ana Ekaretia te Uea ae tia ni Kaokaki,, ti kakabwaiaaki ni karekean te kairiiri mairoun te burabeti ae maiu, Beretitenti Russel M. Nelson. N iangoan ana kairi ae roko mai ieta: karika te Taabati bwa te kakukurei, kariaia te Atua bwa boton am iango inanon maium, “Ongo Irouna,” iango te tiretio, karaoi mwakuri n tamnei ni karekea oin am kaotioti, kamwakura mwaakan karaoan ae raoiroi, kabongana aran te Ekaretia ae eti, kamatebwaia ana Boki Moomon, riki bwa te tia raoi, ao kabanea riki am tai ni nebonebo n te tembora.

Beretitenti James E. Faust e reireiniira, “Ti a tia ni beritanaki bwa te Beretitenti n te Ekaretia e na karekei kairiiri ibukira ni kabane bwa te tia karekei kaotioti ibukin te Ekaretia. Maiurira e reke man ongeabara nakon are e taekinna ao iriiran ana reirei.” Ti a bane n iriira te burabeti ao ni karekei kakabwaia mai karawa.