Te tāvinira’a a te Peresidenira’a Mātāmua

I roto i te hō’ē poro’i i ni’a i te ha’apararera’a tōtiare tei piahia i te 14 nō Fepuare 2024, ’ua ani te peresideni Russell M. Nelson i te mau ta’ata ato’a ’ia fa’a’ohipa i te Mahana o te Here ’ei hō’ē ha’amana’ora’a nō te fafau fa’ahou ’ia here i tōna ta’ata tupu. ’Ua parau te peresideni Nelson ē, ’o te mahana teie e fa’ahanahana ai te mau ta’ata nā te ao ato’a nei i te here. Noa atu te here e riro i te tahi taime ’ei fa’a’itera’a nā roto i te tiare, te totora ’e te tao’a hōro’a, « tē ha’api’i nei te piti o te ture rahi i te hō’ē atu huru here—’oia ho’i, te here-tāmau-ra’a i tōna ta’ata tupu ».

I te 15 nō Fepuare, ’ua fa’ari’i poupou te peresideni Nelson ’e tōna nā tauturu i te peresideni nō te nūna’a Navajo, ’o Dr. Buu Nygren ’e tāna vahine, te vahine rahi mātāmua Jasmine Blackwater-Nygren, i Temple Square. ’Ua fafau Dr. Nygren e hōpoi i te mau mea mātāmua e hina’arohia mai te pape, te uira ’e te purūmu maita’i i te mau fare Navajo ato’a. I te mau matahiti i ma’iri a’enei, ’ua tauturu atu te ’Ēkālesia a Iesu Mesia i te ’āfa’ira’a atu i te tahi o teie mau mea i te nūna’a Navajo.

I roto i te ha’apurorora’a Hoa e Hoa i te 9 nō Māti, ’ua paraparau te peresideni Dallin H. Oaks, tauturu hō’ē i roto i te Peresidenira’a Mātāmua, ’e tāna vahine fa’aipoipo ’o Kristen ’e e hitu o tā rāua mau hina nō te matahiti o te Paraimere rātou, e nāhea ’ia fa’aro’o i te Vārua Maita’i ’e e aha tā te Vārua Maita’i e rave—e fa’aara, e tāmāhanahana, e fa’a’ite pāpū, e arata’i, e ha’api’i, ’e e rave rahi atu ā.

« E fa’aro’o te mau pipi a Iesu Mesia ia Iesu Mesia », ’ua parau te peresideni Oaks. « I te tahi taime, e hōro’a mai ’oia ia tātou i te hō’ē nino’a mana’o, i te tahi taime i te hō’ē mana’o. I te tahi taime e fa’aro’o tātou i tōna reo. ’Ua ani mai te peresideni Nelson, tō tātou peropheta, ia tātou ’ia fa’aro’o i tō tātou Fa’aora ’e ’ia fa’aro’o iāna ».

I muri a’e e 61 matahiti fa’aipoipora’a, ’ua fa’atae te peresideni Henry B. Eyring, tauturu piti i roto i te Peresidenira’a Mātāmua, i tōna tāpa’o aroha poto i tāna vahine, ia Kathleen, tei pohe i te 15 nō ’Ātopa 2023. ’Ua parau te peresideni Eyring : « ’Ua riro noa Kathleen ’ei ta’ata tei hōro’a noa mai iā’u i te hina’aro ’ia hōro’a i te mea maita’i a’e i roto iā’u ».

I te 24 nō Māti, ’ua ha’amo’a te peresideni Eyring i te hiero nō Red Cliffs, Utaha i St. George, Utaha, Marite. « E ’ite mai ’outou te ’oa’oa i roto i tā ’outou tāvinira’a i’ō nei, e ’ore roa te reira e roa’a i te tahi atu vāhi » tāna ïa i parau i roto i te purera’a ha’amo’ara’a.