Te mana o te mau vahine

E au mau tuahine here nō te Sōtaiete Tauturu, e ’oa’oa rahi tō’u ʼia paraparau ia ʼoutou i teie mahana. Tei roto pinepine ’outou i tō’u mau mana’o. E māuruuru rahi tō’u ia ’outou, mai te mea ra ē, e tārahu tā’u ia ’outou. Hō’ē tuha’a rahi o te maita’i tā teie ’Ēkālesia e rave nei—’e hō’ē tuha’a rahi o te maita’i e tupu nei i roto i te ao nei—tē tupu nei ïa maoti ’outou ! Māuruuru nō tā ’outou pūpūra’a i te Fatu ’e nō tā ’outou tauto’ora’a nō te fa’ahanahana ia vetahi ’ē. ’Ua ’ite au i te here rahi o te Fatu ia ’outou ’e tāna tūru’ira’a i ni’a ia ’outou.

Tē fa’ahiahia nei au i tō ’outou fa’aro’o ’e i tō ’outou ’ā’au mahora i te mau mea o te Vārua. E fa’aurura’a nō’u tō ’outou itoito, tā ’outou fa’aterera’a pāpū, ’e tō ’outou ’aravihi ’ia ’ite i te hina’aro ’e ’ia pāhono i te reira. Te ’ite ’ore i te tai’o, te nava’i ’ore i te tāmā’a, te mau fifi i te pae o te ferurira’a ’aore rā te mau hina’aro nō te mahana tāta’itahi o te ta’ata, tē ha’apa’o nei ’outou i te mau fifi mau o te orara’a ma ’aravihi, te aumihi, te ’itera’a ’e te here ta’a ’ē. Nā ’outou e ha’apūai nei i te ’ohipa tā’āto’a a te ’Ēkālesia a te Fatu.

E te mau tuahine, e hōro’a hanahana tō ’outou e taui roa te mau orara’a ia ’outou ! E parau ti’a roa te reira ’a ha’a rū nei tātou i roto i te ’ohipa hanahana o te ha’aputuputura’a ia ’Īserā’ela. ’Ia tauturu noa atu tātou i te ta’ata ’ia ’ite i te ’ē’a nō te fafaura’a ’e ’ia vai noa i reira, tē tauturu ra ïa tātou ’ia ha’aputuputu ia Iseraela. ’Aore e ta’ata maita’i a’e ia ’outou nō te reira—’ei metua vahine, ’ei fa’atere, ’ei ’orometua, ’ei tuahine, ’e ’ei hoa. Tē fa’aineine nei ’outou i te mau u’i nō ananahi o te ’Ēkālesia a te Fatu ’e o te ao nei !

’Ua fa’aro’o a’enei mātou i te ’ā’amu o te hō’ē tamāhine iti e toru matahiti tei ara mai i tāna tā’oto’otora’a. Nō te fa’a’ana’anatae iāna, ’ua hōro’a tōna taea’e i te ’ānimara ha’avare, te tahi i muri i te tahi. E aha ïa te mea tei fa’a’oa’oa iāna i te pae hope’a ? Tāna iho ïa Buka a Moromona ! E hi’o noa teie tamāhine i tōna metua vahine ’ia tai’o i te Buka a Moromona i te mau mahana ato’a. ’Ua hina’aro ’oia ’ia riro mai tōna metua vahine !

E’ita e nehenehe e fāito i te fa’aurura’a ha’amaita’i orara’a a te mau vahine o te fafaura’a a te Atua. ’Ua here au i tō’u mau taea’e ’e tē poihere nei au i te fana’ora’a ’ia ’ohipa ’e ’o rātou. Terā rā, nā ta’ata e piti i ni’a i te fenua nei tei fa’auru rahi roa a’e iā’u ’o tā’u ïa vahine ’o Dantzel, te metua vahine nō tā māua nā tamari’i hō’ē ’ahuru, tei pohe tā’ue i te 78ra’a o te matahiti, ’e, ’a 18 matahiti i teienei, tō’u ïa hoa fa’aipoipo nehenehe ’o Wendy.

I te roara’a o tō’u ma’i i muri a’e i tō’u topara’a, ’ua aupuru ’o Wendy iā’u ma te rohirohi ’ore i te pae tino ’e i te pae vārua. ’Aita e fa’aaura’a tāna i rave. E’ita e nehenehe e parau te fa’aurura’a rahi a Dantzel ’e a Wendy i ni’a iā’u. ’Ua taui rāua i tō’u orara’a ! ’Ua fa’ati’a hau roa atu rāua i tō’u orara’a.

Tei rōpū roa te mau vahine i te fa’anahora’a a tō tātou Metua i te ao ra mai te ha’amatara’a mai ā. Tei ni’a te manuiara’a o te fa’anahora’a nō te fa’aorara’a a te Atua i te ’ohipa a nā ’aito vahine itoito ra e piti—’o Eva, « te metua vahine nō te mau ta’ata ora ato’a », ’e ’o Maria, te metua vahine o te Fatu ’o Iesu Mesia.

E te mau tuahine, ’eiaha roa atu e ha’afaufa’a ’ore i te mana fa’ahiahia i roto ia ’outou nō te fa’auru i te ta’ata nō te maita’i. E hōro’a tā tō tātou Metua i te ao ra i tu’u i roto i te vahine tāta’itahi o te fafaura’a. ’Ei tamāhine nō te fafaura’a nā te Atua, e mea matara ’outou i te Vārua ’e e ’avei’a mōrare rahi ’o tē fa’afāna’o ia ’outou i te ’aravihi ’ia fāri’i i te heheura’a nō ’outou iho ’e ’ia hāro’aro’a i te parau mau ’e te parau tano ’ore. I teie parau, ’aita ïa vau e ’īriti nei i te hōpoi’a a te mau tāne ’ia hāro’aro’a i te maita’i ’e te ’ino ’aore rā ’ia rave i te ’ohipa vārua nō te fāri’i i te heheura’a. Terā rā, mai te mea ē e mo’e te huru ti’a mōrare o te mau vahine o teie ao, e’ita ïa te ao e ora fa’ahou mai.

E te mau tuahine, tītauhia tō ’outou mau reo nō te ha’api’i i te ha’api’ira’a tumu a te Mesia. Tītauhia tō ’outou ’aravihi ’ei vahine, nō te ’ite i te fa’ahemara’a ’e nō te parau i te parau mau. Tītauhia tō ’outou pa’ari fa’auruhia i roto i tā ’outou mau ’āpo’ora’a ’utuāfare, pāroita, ’e titi, ’e i te tahi atu mau vāhi mana o te ao nei. Tītauhia ’outou nō tō ’outou ’utuāfare, te ’Ēkālesia ’e te ao ! E au mau tuahine ē, ’aore e ta’ata e nehenehe e rave i te mau mea ato’a, ’e ’eiaha ’outou e tāmata atu. Terā rā, ’ua ’ite au i te faufa’a rahi o tā ’outou ’ohipa i roto i te patura’a i te bāsileia o te Atua.

Nō reira, i teie mahana, tē ani nei au ia ’outou ’ia fa’ariro i te mau pāpa’ira’a mo’a ’ei Liahona nō ’outou, i te hiero ’ei vāhi ha’apūra’a ’e te fa’a’āfarora’a nō ’outou, ’e tā ’outou mau pure ta’ata hō’ē ’ei rāve’a nō te ’ite i te vāhi e hina’aro te Fatu ia ’outou i te reira mahana. I te roara’a o te tau, e māere ’outou i tōna arata’ira’a ia ’outou i te vāhi mau e nehenehe ’outou e fa’atere, e arata’i ’e e ’āpe’e i te ta’ata tei hina’aro ia ’outou.

Nō reira, tē ha’amaita’i nei au ia ’outou i te hāro’aro’ara’a pae vārua ’e i te ’aravihi ’ia ’ite i te ’oa’oa i te pūpūra’a i te tauturu ia vetahi ’ē. Tē ha’amaita’i nei au ia ’outou i te pa’ari nō te hāro’aro’a i te mea e hina’arohia ’e ’eiaha e horo vitiviti atu i tō ’outou ’ā’au. Tē ha’amaita’i nei au ia ’outou i te itoito ’ia ora i te fāito o tō ’outou mau ha’amaita’ira’a hanahana ’ei tamāhine nō te fafaura’a a te Atua. Tē ha’amaita’i nei au ia ’outou ’ia ’ite pāpū ’outou ē, ’ua ’ite ’e te here nei te Metua i te ao ra ’e tāna tamaiti ’o Iesu Mesia ia ’outou. ’Ua tono mai ’oia ia ’outou i te fenua nei i teienei nō te mea e mea faufa’a ’outou nō te bāsileia o te Atua i teienei ! Tē ha’amaita’i nei au ia ’outou ’ia ’ite ē, i tā ’outou mau hōro’a hanahana ’ei tamāhine nā te Atua ’ua fāna’o ’outou i te mana nō te taui i te ao nei ’eiaha te mau orara’a noa !

’Ua here au ia ’outou e au mau tuahine here. E parau mau teie mau mea. Tei roto tātou pā’āto’a i te ’ohipa a te Fatu. Tē parau pāpū nei au ē, tē ora nei Iesu Mesia ! Te ti’a nei ’oia i te upo’o o te ’Ēkālesia. Nā roto i te i’oa o Iesu Mesia ’āmene.