Elder Gregorio E. Casillas

’Ua fānauhia Gregorio Enrique Casillas i Tijuana, Baja California, i Mēhiko, i te 26 nō ’Ātete 1975. ’Ua ora ’oia i reira ē tae roa i te taime ’a tāvini ai ’oia ’ei misiōnare rave tāmau i roto i te misiōni nō Tampico (Mēhiko).

’Ua tā’atihia ’oia ’e ’o Alama Angelina Obeso Gonzalez i roto i te hiero nō San Diego Carifonia i te ’āva’e Tiunu 1999. E nā metua rāua nō e toru tamari’i.

Hou tō rāua fa’aipoipora’ahia, ’ua ora rāua e 161 km i te ātea te tahi ’e te tahi, ’a haere ai te tāne i te fare ha’api’ira’a i Tijuana, ’e te vahine i te fare ha’api’ira’a i Mexicali. I roto i te mau ’āva’e hou tō rāua fa’aipoipora’a, ’ua pure rāua ’e ’ua ha’apae i te mā’a nō te ’ite i hea e ora ai ’e e ha’amau ai i tō rāua ’utuāfare. Tē ha’amana’o ra Elder Casillas i te nino’a mana’o nō ’ō mai i te Vārua Maita’i ra.

« Tē ha’amana’o nei au ē ’a ha’apae ai māua i te mā’a, ’ua fa’aro’o vau i te Fatu i te paraura’a ē, ‘mai te mea o te La Rumorosa [te hō’ē mou’a rarahi e vai ra i rotopū i nā ’oire e piti] tō ’oe mou’a, e ’īriti ’ē atu vau i te reira’ », te parau ïa a Elder Casillas.

’Ua parau ’oia ē, ’ua ’īriti te Fatu i te ’ē’a o nā ta’ata fa’aipoipo ’ia nehenehe iāna e haere atu i Mexicali, ’a fa’ari’ihia ai ’oia i te fare ha’api’ira’a teitei ma te mana’o-’ore-hia, ’ei pīahi tei fa’anu’uhia.

I Mexicali, « ’ua fārerei atu māua i te mau ta’ata tei tītauhia ia māua e fārerei atu. ’E ’ua tāvini māua i roto i te mau pi’ira’a i te vāhi e ti’a ai ia māua e tāvini », ’ua parau ’oia.

’Ua fa’ata’a teie ’ohipa i tupu i te hō’ē hōho’a nō tō rātou orara’a ’āmui. « ’Ia tu’u ana’e tātou i te Atua nā mua roa, e ’ite mai te tahi atu mau mea ato’a i tō rātou vāhi », ’ua parau Elder Casillas. « E tītau te reira i te tahi ma’a fa’aro’o ’e te tahi ma’a ’ohipa, ’e i muri iho e toro mai te Fatu i tōna rima nō te ha’amaita’i ia tātou ».

’Ua roa’a ia Elder Casillas te parau tū’ite nō te ihi ’ohipa tīvira nō Universidad Autónoma de Baja California. ’Ua roa’a ato’a iāna te parau tu’ite ’āpī tuatoru nō te fa’aterera’a i te ’ohipa ’imira’a faufa’a i te fare ha’api’ira’a teitei nō Xochicalco. ’Ua rave ’oia i te ’ohipa i roto i te fa’aterera’a i te mau ’ohipa patura’a ’e ’aita i maoro a’enei ’ei fa’atere nō te mau vāhi patura’a o te hiero nō te ārea nō Mēhiko a te ’Ēkālesia.

’Ua tāvini Elder Casillas ’ei Hitu ’Ahuru ārea, ’ei peresideni misiōni nō te misiōni nō Mexico City South (Mēhiko), ’ei peresideni titi, ’ei ’episekōpo, ’ei melo nō te ’āpo’ora’a teitei, ’ei peresideni nō te pupu peresibutero, ’e ’ei peresideni nō te feiā ’āpī tamāroa o te pāroita.