Elder D. Martin Goury

’Ua pa’ari ai ’oia i roto i te hō’ē ’oire na’ina’i nō te Fenua ’Īvori, ’ua moemoeā Elder D. Martin Goury ’ia riro mai ’ei melo nō te au’orometua ’e ’ia tāvini ia vetahi ’ē.

I te ’āva’e ’Ātopa 1992, tei Lonedona, i Peretāne ’oia, e ha’api’i ra i te reo peretāne ’e tē haere ra i te ha’api’ira’a, ’ua fārerei ’oia i te mau misiōnare feiā mo’a i te mau mahana hope’a nei. ’Ua hōro’a te mau misiōnare, te hō’ē ’o ’ōna ana’e te misiōnare e parau i te reo farāni i Lonedona, ia Elder Goury i te hō’ē Buka a Moromona nā roto i te reo farāni.

’Ua ha’amata ’oia i te tai’o i te buka ’e ’aita i maoro roa ’ua fa’ari’i i te hō’ē ’itera’a pāpū nō te parau mau o te buka. I te haerera’a mai e piti misiōnare ’āpī i tōna fare tau ’āva’e i muri iho, ’ua tomo mai ’oia i roto i te ’Ēkālesia. « Tē ha’amana’o nei au i tō’u ’oa’oa rahi », ’ua parau ’oia.

’Ua mara’a noa tōna ’oa’oa ’a ha’api’i ai te mau misiōnare iāna nō ni’a i te autahu’ara’a. « ’Ua fa’ata’a mai rāua i te aura’a o te autahu’ara’a ’e e nāhea vau i te fa’a’ohipa i te reira nō te tāvini i te tahi atu mau ta’ata. Nō’u nei, ’o tō’u ïa moemoeā i te rirora’a mai ’ei parau mau » te parau ïa a Elder Goury. « E ’oa’oa rahi tō’u ».

’Ua fānauhia Dalébé Martin Goury i te 30 nō Tēnuare 1964, e Yoro Goury Maurice ’e e Bame Gaby Odette. ’Ua pa’ari ’oia i roto i te hō’ē ’oire tei pi’ihia Lehipa ’e te mau ’oire nō Oume ’e Gagnoa. ’Ua fa’aipoipo ’oia ia Ruth Simone Kennington i roto i te hiero nō Lonedona i Peretāne i te 8 nō ’Ēperēra 1995. Tē ora nei rāua i Abidjan, Côte d’Ivoire, ’e e maha tamari’i tā rāua.

’Ua roa’a ia Elder Goury te parau tū’ite nō te ha’api’ira’a nō roto mai i te CAFOP (Pū arata’ira’a ’e ha’api’ipi’ira’a i te pae o te ha’api’ira’a) nō Man i te matahiti 1988 ’e nō te ’ī’ite i te pae tāta’ira’a mātini nō te fare ha’api’ira’a tuatoru nō Lonedona Apato’a i te matahiti 1997. ’Ua ’ohipa ’oia ’ei ’orometua ha’api’i nō te fare ha’api’ira’a tuatahi, ’ei ’aivāna’a nō te hāmanira’a, ’ei fa’atere nō te ’ōpuara’a rahi ’e ti’a fa’atere nō te mau ’ōpuara’a ’ohipa nō Cameron, ’ei ti’a fa’atere rahi nō te mau ’ohipa nō Nigeria nō te mau pū OneSubsea, ’e ’ei fa’atere nō te mau ’ohipa o te fenua nō Schlumberger. ’Aita i maoro a’enei, ’ua ’ohipa Elder Goury nō te ’Ēkālesia ’ei ti’a fa’atere ’e ’ei ta’ata fa’aau nō te pāturura’a i te melo.

Tē tāvini ra ’oia ’ei Hitu ’Ahuru ārea nō te ārea ’Āfirita Tō’o’a o te rā i te taime ’a pi’ihia ai ’oia. Nā mua atu ’ua tāvini ’oia ’ei peresideni misiōni nō Benin Cotonou, ’ei ’episekōpo, ’ei tauturu nō te ’episekōpora’a, ’ei peresideni ’āma’a ’e ’ei peresideni pupu peresibutero.