Elder Sergio R. Vargas

I tō Elder Sergio R. Vargas fa’ahina’arora’a ia Andrea Sanchez, ’ua mana’o ’oia e rāve’a ’ōhie tāna nō tō rāua ha’apa’ora’a fa’aro’o ta’a ’ē : E fa’anaho rāua hō’ē fa’aipoipora’a i roto i tāna ’ēkālesia nō tōna ’utuāfare ’e te hō’ē fa’aipoipora’a i roto i te ’ēkālesia a tāna vahine nō tōna ’utuāfare.

’Ua ’ite ’oi’oi rā ’oia ē, e ’ere te reira i te mea ’ōhie. E melo Andrea nō Te ’Ēkālesia a Iesu Mesia i te Feiā Mo’a i te mau Mahana Hope’a nei, ’e ’ua hina’aro ’oia e fa’aipoipo i roto i te hiero. Nō reira ’ua ani Andrea iāna ’ia ha’api’i rahi mai nō ni’a i tōna fa’aro’o nā roto mai i te mau misiōnare.

’Ua fa’ari’i Elder Vargas i te anira’a, nā te reira i taui i tōna orara’a.

Tē ha’amana’o nei ’oia i taua taime ra tē rave ra ’oia i te ’ohipa nā te hō’ē taiete hāmanira’a tāmono, i reira e tauturu ’oia i te utara’a i te mau i’a ora nā te moana. I roto i te hō’ē rāterera’a e 25 hora te maoro, ’ua ’itehia mai iāna te hō’ē vāhi ’ōmo’e nō te tai’o i te Buka a Moromona ’e nō te ui atu i te Metua i te ao ra nō ni’a i te ’evanelia. ’Ua riro te reira ’ei tauira’a pae vārua.

’Ua fānauhia Elder Vargas i te 2 nō Novema 1976, i Puerto Varas, te fenua Tīreni, i reira ’oia ’e tōna nā taea’e ’e tuahine i te pa’arira’a. E ha’apa’o noa tōna metua vahine, ’o Gladys Barria, i te fare ’āre’a rā tōna metua tāne, ’o Renato Vargas, e tāpe’a ïa ’oia te hau ’ei mūto’i. Noa atu ā te mau fārereira’a ’e te mau misiōnare i tōna ’āpīra’a, mea ’ana’anatae rahi a’e nāna i te ha’uti i te taorara’a pōpō i roto i te ’ete i te ha’api’ira’a mai i te ’evanelia.

I te taime noa ’a fārerei ai Elder Vargas i te tuahine Vargas ’a ineine ai ’oia i te fa’aro’o i te mau misiōnare ma te mana’o ’e te ’ā’au matara, ’ua parau ’oia. ’Ua fa’aipoipohia rāua i te 26 nō Tiurai 2003, ’e ’ua tā’atihia rāua i muri iho i roto i te hiero nō Santiago i Tīreni. E toru tamari’i tā teie nā ta’ata fa’aipoipo.

I te pi’ira’ahia ’oia ’ei Hitu ’Ahuru huimana fa’atere rahi, tē tāvini ra Elder Vargas ’ei Hitu ’Ahuru ārea i roto i te ārea apato’a nō Amerika apato’a. Tōna mau pi’ira’a i roto i te ’Ēkālesia nā mua atu ’oia ho’i, e melo ’āpo’ora’a teitei, e peresideni ’āma’a ’e e peresideni titi.

’Ua fa’aoti Elder Vargas i te hō’ē parau tū’ite tuatoru tuha’a rua nō te mau faufa’a i roto te moana nō te fare ha’api’ira’a teitei nō Los Lagos i te matahiti 1999 ’e te hō’ē parau tū’ite nō te fa’aterera’a i te mau ’ohipa nō te fare ha’api’ira’a tuatoru nō Auteraria i te matahiti 2002. ’Aita i maoro a’enei, ’ua rave ’oia i te ’ohipa ’ei ti’a fa’atere nō te hāmanira’a ’e te fa’a’ohipara’a nō Ventisqueros, ’ei melo nō te pupu heremani Schörghuber Corporate.