Elder Aroldo B. Cavalcante

I te anira’a a te hō’ē taea’e fēti’i, ’ua haere atu Aroldo B. Cavalcante 18 matahiti, i te hō’ē ’āmuira’a retiōni i te matahiti 1988, ’e tei reira te peresideni Gordon B. Hinckley (1910–2008), e tāvini ra ’ei tauturu hō’ē i roto i te Peresidenira’a Mātāmua.

« ’Ua putapū vau i te hō’ē mea pūai mau », tē fa’ati’a ra ’oia. « E nehenehe iā’u e ’ite i te hō’ē māramarama i te peresideni Hinckley ».

Noa atu ē, ’ua haere ’oia i te purera’a i nā matahiti e toru i muri mai, ’aita ’oia i bāpetizohia. I te hō’ē mahana, ’ua pātōtō te mau misiōnare i tōna ’ōpani. Ma te tāpe’a i tā rātou buka ārea, ’ua tai’o rātou i te mea tā te mau misiōnare tahito i pāpa’i nō ni’a iāna. Te mea tāna i maere ’o te pereota hope’a ïa : « ’Aita ’oia e hina’aro e fafau iāna ia Iesu Mesia ».

’Ua fa’ati’a Elder Cavalcante : « ’Ua mana’o vau, ’ua fafau roa vau iā’u ia Iesu Mesia, ’e e mea pūai roa taua rēni ra nō’u ».

Ma te uiui ’o terā ato’a ānei tā te Fa’aora i feruri nō ni’a iāna, ’ua uiui ’oia : « E aha tā’u e nehenehe e rave nō te taui i te reira, e te mau Elders ? »

’Ua ha’amata te mau misiōnare i te ha’api’i iāna, ’e ’ua bāpetizohia te taure’are’a e 21 matahiti ’ahuru mahana i muri iho. Mai reira mai, ’ua fafau Elder Cavalcante iāna i te ’evanelia a te Fa’aora.

« E ’ere teie ’ohipa nō ni’a ia tātou. Nō ni’a rā i te Fa’aora. ’E tē tāmata nei au i te rave maita’i roa a’e nōna, ’eiaha nō’u », tē parau ra Elder Cavalcante.

’Ua fānauhia Aroldo Barreto Cavalcante Filho i te 22 nō Novema 1970, i Fortaleza, Ceará, Peretīria. ’Ua tā’atihia ’oia ia Christiana Ramalho Bezerra Leite i roto i te hiero nō Recife Peretīria i te 21 nō Tēnuare 2004. E metua rāua nō e maha tamari’i.

’Ua fa’ari’i Elder Cavalcante i te hō’ē parau tū’ite fāito toru i te pae nō te ture fa’aterera’a a te Federal University i Ceará i te matahiti 1997. ’Ua rave ’oia i te ’ohipa ’ei pāruru nō te Procuradoria Geral do Município mai te matahiti 1997 tae atu i te 2005 ’e ’ei hoa ti’a fa’atere nō Barreto Cavalcante Advogados mai te matahiti 1999.

Hou tōna pi’ira’a ’ei Hitu ’Ahuru huimana fa’atere rahi, ’ua tāvini Elder Cavalcante ’ei peresideni misiōni i Peretīria. ’Ua tāvini ato’a ’oia ’ei Hitu ’Ahuru ārea, ’ei peresideni titi, ’ei ’episekōpo ’e ’ei tauturu nō te ’episekōpora’a.