’Auvahara’a reo nō te ’āmuira’a rahi

Hō’ē hora nā mua a’e te tuha’a purera’a tāta’itahi o te ’āmuira’a rahi, e putuputu e rave rahi hānere ta’ata ’aravihi nō te reo i roto i te hō’ē piha rahi nō te fa’a’āfarofaro i te mau a’ora’a o te ’āmuira’a, ’o tei ’īritihia ’e ’o tē ’auvahahia nā roto e 103 reo.

’Ia ha’amata ana’e te ’āmuira’a, e fāna’o rātou hō’ē taime. Tītauhia ’ia maita’i ’e ’ia maita’i i te taime mātāmua. E tītau te ’auvahara’a maita’i i te fa’atomara’a, te ta’ira’a reo, te ha’apāpūra’a te parau ma te māramarama ’e te pāpūra’a i te reo, ma te fa’ataera’a atu te fa’a’oa’oa ’e te ’ōpuara’a a te ta’ata a’o i te pūpiti, i roto i te hō’ē ā vārua ’a fa’aineinehia ai te poro’i.

’Ua hau i te 800 ta’ata nō te fenua iho ’e te mau misiōnare tei ho’i mai tei ’auvaha i te mau tuha’a o teie ’āmuira’a rahi. Fātata te ’āfara’a ’o tei hōro’a i te mau parau poro’i nā Roto Miti atu, Utaha, Marite ’āre’a rā te tahi atu ’āfa ’ua ’auvaha mai ïa nā tō rātou iho fenua. ’Ua ’āmui ato’a mai te tahi pae i roto i te ’īritira’a i te mau a’ora’a o te ’āmuira’a i roto i te mau hepetoma hou te ’āmuira’a rahi.

I roto i te ha’apurorora’a, e ’ohipa tāpupu te mau ’auvaha i te rahira’a taime mai te maha e tae atu e ono ta’ata nō te tuha’a purera’a tāta’itahi, e tai’o rātou i te poro’i tāta’itahi i roto i te hō’ē piha maniania ’ore e vai ra i roto i te mau fare ’ohipara’a a te ’Ēkālesia ’aore rā i te mau vāhi i fa’ata’ahia nā te ao nei. Ma te tāmau i te fa’aro’o tari’a nō te fa’aro’o i te mau a’ora’a nā roto i te reo peretāne, e hi’o te mau ’auvaha i te hō’ē mātini hi’opo’a nō te fa’atano i tā rātou ’auvahara’a parau ’e te ta’ata a’o. E ti’a i te mau ’auvaha e tāpe’a e piti ’āparaura’a—nā roto i te mau reo ta’a ’ē—’oia ato’a i te hō’ē ā taime i roto i tō rātou upo’o.

Tē parau nei te ta’ata ’auvaha ’o Jonas Prasad ē, e hina’aro rahi tō te mau melo o te ’Ēkālesia e parau nei i te reo hiniti i Fītī, e fa’aro’o i te mau peropheta nā roto i tō rātou reo. Ma te fa’a’itera’a mai i te hō’ē tuahine, ’ua nā ’ō ’oia : « E rave rahi matahiti, te mau purera’a e vai ra a te ’Ēkālesia tāna e haere atu e mea nā roto ïa i te reo peretāne. Noa atu ’aita ’oia e parau i te hō’ē parau, e haere mai ’oia ’e e pārahi ma te hau nō te putapū noa i te Vārua. I teienei, tē ’oa’oa nei ’oia ’ia fa’aro’o i te ’evanelia nā roto i tōna reo ».