Elder Karl D. Hirst

Tē fa’ariro nei Elder Karl D. Hirst iāna mai « te hō’ē ta’ata mātarohia ma te hō’ē pi’ira’a fa’ahiahia mau ».

Tē fa’ariro ato’a nei te Hitu ’Ahuru huimana fa’atere rahi ’āpī i tōna ’itera’a pāpū ’e tōna mau ha’apāpūra’a mai te huru mātaro-ato’a-hia. « ’Aita hō’ē fārereira’a, e ’ere roa atu i te mea fa’ahiahia roa i te pae vārua—’e ’ua fa’aea vau i te ha’ape’ape’a nō te reira nō te mea ’ua fa’a’ī-roa-hia vau ma te rāve’a ’o tā te Atua i mā’iti e paraparau mai iā’u, noa atu ē ’ua mā’iti ’oia e paraparau ’ia vetahi ’ē ma te hō’ē ravera’a ta’a ’ē », ’ua parau Elder Hirst. « E ’ere i te mea fa’ahiahia, e mea rahi rā ».

E faretoa iti noa tā te metua tāne o Elder Hirst, ’o Jack. ’Ua fa’aro’oro’o ’oia i te parau nō Te ’Ēkālesia a Iesu Mesia i te Feiā Mo’a i te mau Mahana Hope’a nei nā roto mai i te mau hōani ’e ’ua tomo mai i roto i te ’Ēkālesia e rave rahi matahiti i muri a’e i te fānaura’ahia mai ’o Karl, i te 28 nō Fēpuare 1972, i Bury, Lancashire, i Peretāne.

’Ua ha’amata te ’itera’a pāpū o Elder Hirst nō Iesu Mesia i te taime ’a ha’api’i mai ai ’oia i te mau ’ā’amu nō ni’a i te Fa’aora ’e te hīmenera’a i te mau hīmene, ’a haere ai ’oia i te Ha’api’ira’a Sābati i roto i te tahi atu ’ēkālēsia ’ei tamari’i ā ’oia ’e tōna metua vahine, ’o Vivien Ruth Meakin Hirst ’e tōna māmā rū’au.

I muri iho, ’ua ’āmui atu te taure’are’a Karl i te mau purera’a a te feiā mo’a i te mau mahana hope’a nei ’e ’ua fa’ari’i i te hō’ē anira’a a te hō’ē ’orometua o te Paraimere ’ia bāpetizo iāna, ’o tāna i fa’ari’i i te 10ra’a o tōna matahiti. I te roara’a e pae ’ahuru matahiti o tōna orara’a, ’ua tāpe’a noa Elder Hirst i tōna fa’aro’o ’e tōna ’itera’a pāpū tamari’i.

« ’Ua paraparau mai te Atua iā’u i roto i tō’u māfatu mai tāna i rave i te taime ’a haere ai au i te Paraimere ’e mai tāna i rave ’a haere ai au i te Ha’api’ira’a Sābati », ’ua parau Elder Hirst.

’Ua fa’aipoipohia ’oia ia Claire Elizabeth Wright i te 29 nō Mē 1993, i Burnley, Lancashire. ’Ua tā’atihia rāua i muri iho i taua mahana ra i roto i te hiero nō Lonedona i Peretāne.

’Ua fa’ari’i Elder Hirst i te hō’ē parau tū’ite tuatoru nō te ture i te matahiti 1996 i te fare ha’api’ira’a tuatoru nō Lancaster ’e te hō’ē parau tū’ite tuatoru tuha’a toru nō te fa’aterera’a faufa’a i Alliance Manchester Business School i te matahiti 2016. Mai te matahiti 1997, tē rave nei oia i te ’ohipa ’ei barrister (pāruru).

E nā metua nō e ono tamari’i, tē noho nei Hirsts mā i Bolsover, Chesterfield, Peretāne, ’e tē tāvini nei ’ei ti’a fa’atere nō te tuha’a Nō te Pūai o te Feiā ’Āpī i te taime ’a pi’ihia ai ’oia.