Elder Steven D. Shumway

E piti matahiti i muri a’e i tōna ’ohipara’a i Exxon Chemical Co. i Houston, Texas, Marite, ’ua ha’api’i mai Elder Steven D. Shumway ē ’ua pi’ihia tōna nā metua e peresideni i te hō’ē misiōni i Bolivia ’e tē hina’aro nei i te tauturu nō te taiete a te ’utuāfare i Arizona.

« ’Aita vau e hina’aro e fa’ahepo ia ’oe ’ia ho’i mai », ’ua parau tōna metua tāne iāna. « Terā rā mai te mea e’ita ’oe e ho’i mai, tē ha’ape’ape’a nei au i te ’ohipa e tupu i te taiete ».

E fa’aotira’a fifi mau te reira nō te rave, ’ua parau Elder Shumway.

’Ua rātere ’oia ’e tāna vahine e pae hora e tae roa i te hiero nō Dallas Texas ’e ’ua fa’aea i reira i tera mahana ma te fa’ari’i ’ore i te pāhonora’a. I muri iho, ’ua haere atu rāua e māta’ita’i i te hō’ē fare vaira’a buka ’e ’ua ’ite mai i te ’ā’amu fa’atietie o te peresideni Gordon B. Hinckley (1910–2008), ’A haere i mua ma te fa’aro’o.

« ’Ua putapū māua to’opiti i te Fatu i te paraura’a ‘’e ti’a ia ’ōrua ’ia haere i mua ma te fa’aro’o ma tō’u haere’a, ’eiaha rā i tō ’ōrua’ » ’ua parau Elder Shumway. « Nō reira ’ua fa’anu’u atu māua i Arizona, ’o tei riro ’ei hō’ē o te mau tauira’a faufa’a roa a’e ’e te nehenehe mau i roto i tō māua orara’a ».

Hō’ē o te mau mea maita’i roa a’e ’o tā rāua i ha’api’i mai i roto i tō rāua fa’aipoipora’a, ’ua parau Elder Shumway, ’oia ho’i « ’ia fa’ari’i ana’e ’outou i te anira’a [a te Fatu], e manuia ’outou. E haere ’outou i mua. E maita’i a’e te mau mea ’āhani e tāmata ’outou i te rave mai tā ’outou iho hina’aro ».

’Ua fānauhia Steven D. Shumway i te 30 nō Tīunu 1970, i Springerville, Arizona, Marite, e Wilford Douglas ’e e Dixie Ann Shumway, ’e ’ua pa’ari i Eager, Arizona. ’Ua fa’aipoipo ’oia ia Heidi O’Brien i roto i te hiero nō Roto Miti i te 29 nō Tītema 1994. E mau metua rāua nō e maha tamari’i ’e tē ora nei i Pinetop, Arizona.

E parau tū’ite nō te ’ī’ite tāra’aura’a tā Elder Shumway nō te fare ha’api’ira’a tuatoru Brigham Young i te matahiti 1996, ’ua ’ohipa ’oia i Exxon Chemical Co. mai te matahiti 1996 e tae atu i te matahiti 1998, ’e ’ua riro ’oia ’ei peresideni fa’atere rahi nō Whiting Brothers Investment Co. mai te matahiti 1998.

I te taime o tōna pi’ira’a, tē tāvini ra ’oia ’ei Hitu ’Ahuru ārea. ’Ua tāvini ’oia ’ei peresideni nō te misiōni i Illinois Chicago, ’ei peresideni titi, ’ei ’episekōpo, ’ei peresideni nō te pupu peresibutero, ’ei ’orometua ha’api’i nō te fa’aineinera’a nō te misiōni o te titi, ’e ’ei misiōnare rave tāmau i roto i te misiōni nō Pennsylvania i Philadelphia.