Elder David L. Buckner

’Ua fānauhia Elder David L. Buckner i te 27 nō Tetepa 1963, i Ogden, Utaha, i Marite, ’ua « pa’ari » rā ’oia ’a ora ai ’oia e toru matahiti i Sacramento, Califonia, i te fenua Marite.

’O te tamari’i ’āpī roa a’e teie o nā tamari’i e pae a Melba ’e a E. LaMar Buckner, ’o David e 11 matahiti, ’a fa’anu’u ai tōna ’utuāfare i Califonia i te taime ’a pi’ihia ai tōna metua tāne ’ia peresideni i te misiōni a te ’Ēkālesia i Sacramento. I te ātea i tōna mau hoa tei ha’amau-maita’i-hia i Utaha, ’ua ha’api’i mai ’oia i te fa’ahoa i te mau hoa ’āpī ’e ’ia ’ite mai e « 300 taea’e ’e tuahine pa’ari » i rotopū i te mau misiōnare rave tāmau.

Te mea faufa’a roa atu ā, ’ua a’ahia tōna ’itera’a pāpū nō te ’evanelia a Iesu Mesia. « Teie ’ohipa misiōnare i tupu, ’ua taui roa te mau mea ato’a nō’u », ’ua parau ’oia.

I muri a’e, ’ua tāvini ’oia i roto i te misiōni nō Ecuador Guayaquil. E toru noa ’āva’e i te ’ōmuara’a o tāna misiōni, tē tāvini ra ’oia ’ei peresideni ’āma’a i roto i te ’oire nō Jipijapa, ’ua heva ’oia ’e te mau melo o te ’āma’a ’e te tahi mau ta’ata i muri a’e i te paremora’a te hō’ē tamaiti e 11 matahiti, ’o tei ’āmui mai i te hō’ē ’ātivite a te ’Ēkālesia.

’A tāparu ai ’oia i te Metua i te ao ra i roto i te mau hepetoma ’e te mau ’āva’e i muri mai, ’ua noa’a iāna te hō’ē ’itera’a pāpū ’āueue ’ore nō te fa’anahora’a o te fa’aorara’a. ’Ua riro ato’a ’oia ’ei ’ite nō te aroha o te Fatu ’a tauahi ai vetahi mau ta’ata o te ’oire i te ’evanelia. ’Ua māramarama ’āmui rātou i te nātura mo’a o te orara’a ’e te mana o te aroha o te Fatu.

I muri a’e i tāna misiōni, ’ua haere atu Elder Buckner i te fare ha’api’ira’a tuatoru Brigham Young, i reira tōna fārereira’a ia Jennifer Romney Jackson. ’Ua fa’aipoipohia rāua i te 30 nō ’Ātete 1990, i roto i te hiero nō Roto Miti. ’Ua pa’ari te tuahine Buckner i New York, i te fenua Marite, i reira nā ta’ata fa’aipoipo i te fa’anu’ura’a atu i muri a’e i tō rāua fa’aipoipora’a. ’Ua aupuru rāua i tā rāua nā tamari’i e pae i Manhattan, i reira tō Elder Buckner ti’ara’a atu nō te ’Ēkālesia, i roto i te tōmite teitei o te feiā fa’atere ha’apa’ora’a fa’aro’o.

’Ua fa’ari’i Elder Buckner i te hō’ē parau tu’ite tuarua nui nō te ihi i te pae faufa’a moni nō BYU i te matahiti 1988, ’e hō’ē parau tū’ite ’āpī tuatoru nō te fa’aterera’a i te mau ’ohipa i te fare ha’api’ira’a teitei nō Durham i te matahiti 1991. ’Ua fa’ari’i ato’a ’oia i te parau tū’ite ’āpī tuatoru nō te tā’aira’a i rotopu i te mau hau fenua i BYU i te matahiti 1995 ’e te parau tū’ite tahu’a tuatoru nō te ’ohipa i te pae o te ture i BYU i te matahiti 1996. ’Ua riro na ’oia ’ei ’orometua ha’api’i i te fare ha’api’ira’a tuarua ’e, mai te matahiti 1999, ’ei peresideni nō te taiete Bottom Line Training and Consulting. ’Ua tāvini na Elder Buckner ’ei Hitu ’Ahuru ārea, ’ei peresideni titi, ’ei melo nō te ’āpo’ora’a teitei ’e ’ei ’episekōpo.