Elder Sandino Roman

’Ua fa’aōhia mai Elder Sandino Roman i te ’evanelia a Iesu Mesia i tōna tamari’ira’a. I te mau sābati ato’a, e ’āfa’i mai te hō’ē hoa o tōna metua vahine iāna ’e tōna tuahine e fārerei i nā 15 atu mau melo nō Te ’Ēkālesia a Iesu Mesia i te Feiā Mo’a i te mau Mahana Hope’a nei, i roto i te hō’ē fare purera’a na’ina’i i Mēhiko. 

E pure te tamari’i e pae matahiti i te mau mahana ato’a, ’ia fa’afāriuhia tōna ’utuāfare i te ’evanelia. E piti matahiti i muri mai, ’ua bāpetizohia tōna metua vahine ’e tōna metua tāne. Hō’ē matahiti i muri iho, ’ua bāpetizo tōna metua tāne iāna. « Nō te reira tumu, ’ua ’ite au tē fa’aro’o nei te Fatu i te mau pure a te mau tamari’i », ’ua parau Elder Roman.

’Ua fa’atupu te tauahira’a i te ’evanelia ’e te tāvinira’a i roto i te ’Ēkālesia i te hō’ē tauira’a rahi i ni’a i tōna ’utuāfare. « ’Ua ’ite mata vau i te hope’ara’a tā te ’evanelia e hōpoi mai i roto i te orara’a », ’ua parau Elder Roman. « ’Ua ’ite au e hōpoi mai te reira i te ’oa’oa ’e te tīa’ira’a ».

’Ua fānauhia Sandino Roman i te 7 nō ’Ātete 1973, e Lidia Corral ’e Prometeo Roman i Iguala, Guerrero, Mēhiko. ’A ha’uti ai ’oia i roto i te pupu paira’a pōpō nō te fare ha’api’ira’a tuarua Benemérito de las Américas, e fatuhia e te ’ĒKālēsia, ’ua fārerei atu Roman ia Guadalupe Villanueva Rojas. ’Ua tā’atihia rāua i roto i te hiero nō Mexico City (Mēhiko) i te 19 nō Tītema 1998. E maha tamari’i tā rāua.

’Ua noa’a ia Elder Roman i te hō’ē parau tū’ite nō te ihi nō te fa’anahora’a rorouira o te ITESM (te fare ha’api’ira’a tuatoru nō te ihi anoha’a ’e te ha’api’ira’a teitei i Monterrey) i te matahiti 2000 ’e te hō’ē parau tū’ite ’ai’ihi tuatoru nō te fa’aterera’a faufa’a i te fare ha’api’ira’a tuatoru nō Brigham Young i te matahiti 2006. ’Ua rave ’oia i te ’ohipa ’ei ti’a fa’atere tapiho’ora’a nā Johnson & Johnson ’e nō te ’Ēkālesia ’ei ti’a fa’atere nō te pū tauturura’a ’Ārea nō Mēhiko.

I te taime o tōna pi’ira’a, tē tāvini ra ’oia ’e tāna vahine ’ei feiā fa’atere nō te misiōni i Ecuador Quito Apato’erau. ’Ua tāvini ato’a Elder Roman ’ei Hitu ’Ahuru ārea, ’ei tauturu peresidenira’a titi, ’ei ’episekōpo, ’ei melo ’āpo’ora’a teitei ’e ’ei peresideni nō te pupu peresibutero.

’Ua parau Elder Roman ē, tāna fā tumu rahi i roto i te orara’a, nā te mau vāhi ato’a tāna e tāvini, ’o te noa’ara’a ïa te ti’aturira’a a te Fatu. « Tē hina’aro nei au ’ia ’ite ’oia ē, e nehenehe ’oia e ti’aturi iā’u nō te rave i teie ’ohipa », ’ua parau ’oia.