Elder I. Raymond Egbo

’A haere ai ’oia i te hō’ē fare ha’api’ira’a nohora’a ha’apa’ora’a fa’aro’o i Nigeria, ’ua tāmau noa te tuahine pa’ari o Elder I. Raymond Egbo i te ani iāna ’ia « haere mai e hi’o » i te mea tā Te ’Ēkālesia a Iesu Mesia i te Feiā Mo’a i te mau Mahana Hope’a nei e pūpū nei. I te 14ra’a o tōna matahiti, ’ua ha’amata ’oia i te haere i te seminaire i te pō.

’A tai’o ai ’oia i te buka ha’api’ira’a nō te seminaire, ’ua tae Elder Egbo i ni’a i Te Ha’api’ira’a Tumu ’e te mau Fafaura’a 135 ’e te maratirira’a o Iosepha Semita.

« ’Ua ha’aputapū hōhonu roa te hō’ē mea iā’u ’e ’ua ’ite a’era vau ē, te peropheta Iosepha Semita ’o te peropheta ïa a te Atua. ’Ua ’ite au ’ua taparahi-pohe-hia ’oia nō te parau mau », ’ua parau Elder Egbo, tei tomo ’oi’oi mai i roto i te ’Ēkālesia. « Tē putapū noa nei ā vau i teienei i te mea tā’u i putapū i taua mahana ra ’a tai’o ai au i te reira ».

I muri a’e, ’ei pīahi nō te fare ha’api’ira’a teitei, ’ua fa’aitoito tōna tuahine iāna ’ia tāvini i te hō’ē misiōni. ’Ua riri roa tō rāua metua tāne iāna nō tōna fa’aru’era’a i tāna ha’api’ira’a, ’ua tāmau noa rā Elder Egbo i te pāpa’i iāna i te mau rata ma te fa’ata’a i te mau mea ato’a tāna e rave ra ’e te mea tāna e ha’api’i ra.

Ma te māere rahi o Elder Egbo, i te fātatara’a tāna misiōni i te hope’a, ’ua tai’o atu tōna peresideni misiōni iāna i te hō’ē rata a tōna metua tāne e parau ra ē, ’ua bāpetizohia ’oia. « ’A parau iāna ē, e tīa’i au iāna », ’ua pāpa’i tōna metua tāne.

’Ua fānauhia Elder Idyo Raymond Egbo i Port Harcourt, Rivers State, Nigeria, i te 25 nō Tiunu 1974, e Udo Idio Egbo ’e Veronica Ukamaka Egbo. ’Ua fārerei atu ’oia ia Comfort Ikip Ese ’a fa’anu’u ai tōna ’utuāfare i roto i tāna ’āma’a i te matahiti 1994. ’Ua fa’aipoipohia rāua i te 15 nō Mē 2003 i Calabar, Nigeria. E toru tamari’i tā rāua.

E parau tū’ite tā Elder Egbo i pae o te ha’api’ira’a, te fa’anahora’a retioni ’e te fa’aterera’a faufa’a i roto e toru fare ha’api’ira’a tuatoru. ’Ua ’ohipa ’oia i roto i te séminaire ’e te Institut nō te ha’api’ira’a ’evanelia mai te matahiti 2002, i roto i te mau ti’ara’a rau, i roto iho ā ra i te rirora’a ’ei ti’a fa’atere nō te fenua ’e te ti’a fa’atere nō te ārea.

I te taime ’a pi’ihia ai ’oia, tē tāvini ra Elder Egbo ’ei Hitu ’Ahuru ārea i roto i te ārea nō ’Āfirita To’o’a o te rā. ’Ua tāvini ’oia ’ei peresideni nō te misiōni nō Nigeria Calabar ’e ’ua riro na ’oia ’ei tauturu i roto i te peresidenira’a titi ’e ’ei melo nō te ’āpo’ora’a teitei. ’Ua tāvini ’oia i te hō’ē misiōni rave tāmau i roto i te misiōni nō Nigeria Lagos.