Taea’e Gabriel W. Reid

Nō Gabriel W. Reid, te hō’ē o te mau huru faufa’a roa a’e nō te ’ohipa ’ei ta’ata fa’atere misiōni, ’o te hi’ora’a ïa i te mau misiōnare « ’ia pōpou i te parau a te Mesia », ’ia fa’ananea i te hō’ē here nō te mau pāpa’ira’a mo’a, ’e te hina’aro ’ia riro hau atu mai te Fa’aora te huru.

« Mai te mea e tāpae mau ’outou ’ia fa’ariro i tā ’outou ’imira’a maita’i i te ’evanelia ’ei ‘mea ’oa’oa roa’ nō ’outou, mai tei parauhia i roto i te mau pāpa’ira’a mo’a [hi’o Alama 32:28], tera ïa te taime e taui ai tō ’outou orara’a », ’ua parau te taea’e Reid, tei fa’aoti i tāna tāvinira’a ’ei peresideni misiōni nō Auteraria Sydney i te ’āva’e Tiurai.

’Ua fānauhia te taea’e Reid i Pago Pago, Hāmoa Marite. Tē paraparau nei ’oia i te reo hāmoa, te reo pāniora ’e te reo peretāne. I Hāmoa, ’ua parau ’oia, ’ua ’īritihia te ta’o fa’a’amua i roto i te Buka a Moromona ’ei « taumamafa fiafia » ’e nā roto i te reo pāniora ’ei « deleitar ». Tē parau nei ’oia tē fa’a’ite nei nā ta’o e piti i te ’oa’oara’a.

’Ei tauturu i roto i te peresidenira’a rahi ’āpī o te Ha’api’ira’a Sābati : « Tē ’oa’oa nei au i te tauturu ia vetahi ’ē ’ia hi’o i te ’oa’oa rahi ’ia ’ite mai i te mau pāpa’ira’a mo’a », tāna ïa i parau.

’Ua fānauhia Gabriel « Gabe » Walter Po’u Reid i te 28 nō Mē 1977, e Eugene ’e e Tupu Reid ’e ’ua pa’ari i roto i te ’oire nō Leone i Hāmoa Marite. ’Ua ha’amata tona here ’e tōna hina’aro ’ia tu’u i mua roa i te Atua i tōna ’āpī-roa-ra’a ’e ’ua pāturu te reira iāna ’a ha’uti ai ’oia i te fa’ahoro pōpō nō te fare ha’api’ira’a tuatoru nō Brigham Young mai te matahiti 1999 ’e tae atu i te matahiti 2002, i muri iho ’ua tāmau noa i te hō’ē tōro’a ’ohipa i roto i te tā’atira’a fa’ahoro pōpō mai te matahiti 2003 ’e tae atu i te matahiti 2006.

I roto i taua tau o tōna orara’a, ’ua ha’api’i mai ’oia i te hō’ē ha’api’ira’a faufa’a rahi mau : « ’Ia parau ana’e mai te Fatu ia ’outou i te hō’ē mea, ’a tu’u atu ia ’outou tā’āto’a’ ».

’Ua fa’aipoipohia te taea’e Reid ia Heather Lynn Sasse i roto i te hiero nō Bountiful (Utah, Marite) i te 24 nō Tiunu 2000. E maha tamari’i tā rāua. I te matahiti 2002, i BYU, ma te hō’ē parau tū’ite i roto i te tā’aira’a i rotopū i te mau fenua. I teie mahana, tē fatu nei ’oia i te hō’ē taiete fa’aterera’a patura’a fare.

Hau atu i te peresidenira’a i te misiōni nō Auteraria Sydney, ’ua tāvini na te taea’e Reid ’ei tauturu i roto te peresidenira’a titi, ’ei melo nō te ’āpo’ora’a teitei, ’ei ’episekōpo, ’ei peresideni nō te Feiā ’Āpī Tamāroa nō te pāroita, ’ei rave ’ohipa nō te ’ōro’a hiero, ’e ’ei misiōnare rave tāmau i roto i te misiōni nō Tireni Santiago Apato’a mai te matahiti 1996 e tae atu i te matahiti 1998.