Elder Christopher H. Kim

I te 14ra’a o te matahiti o Elder Christopher H. Kim ’e ’a fāna’o ai ’oia i te fa’a’ite i te ’evanelia i te mau hoa, ’ua ’ite a’era ’oia ē, e ti’a iāna ’ia ’ite i te parau mau o te Buka a Moromona ’ia ti’a iāna ’ia parau ma te ti’aturi pāpū.

« ’A pure ai au nō ni’a i te Buka a Moromona, ’ua putapū vau i te hō’ē nino’a mana’o tāmāhanahana », tē ha’amana’o ra ’oia. « ’E i terā iho taime, ’aita hō’ē a’e uira’a ’aita ato’a e fē’a’ara’a nō ni’a i te Buka a Moromona ». Nō te taime mātāmua roa o tōna orara’a, ’ua parau fa’ahou ’oia : « ’Ua putapū mau vau i te Vārua, ’ua ’ite au i te parau mau nō ni’a i te Buka a Moromona, ’e ’ua ’ite au ē, e peropheta Iosepha Semita nā te Atua. »

’Ua fānauhia Christopher Hyunsu Kim i te 18 nō Novema 1965, i Daegu, Korea Apato’a, te matahiapo o nā e maha tamari’i a Chinho Kim ’e ’o Kuncha Kim. ’Ua riro mai tōna nā metua ’ei melo nō te ’Ēkālesia e tamari’iri’i noa ai ’oia. ’Ua ora Elder Kim i Daegu e tae roa i te taime ’a roa’a ai tāna parau tū’ite nō te fare ha’api’ira’a tuarua ’e ’ua tomohe’e atu tōna ’utuāfare i te fenua Marite, ’ua fa’aea roa atu i Califonia Apato’a.

’A tāvini ai ’oia i roto i te misiōni nō Washington Seattle, tē tāvini ra ïa te tuahine Seongmi (Sue) Hong i roto i te misiōni nō Los Angeles i Califonia. I reira, ’ua ha’amātau atu te tuahine Hong i te metua vahine o Elder Kim. I muri iho, i te fa’aotira’a Elder Kim ’e te tuahine Hong i tā rāua misiōni, ha’amata a’era rāua i te arapae. ’Ua fa’aipoipohia rāua i te 7 nō Tītema 1991, i roto i te hiero nō Los Angeles i Califonia. E hō’ē tamaiti ’e e toru tamāhine tā rāua.

’Ua roa’a tā Elder Kim te parau tū’ite nō te fare ha’api’ira’a tuatoru Brigham Young ’e te parau tū’ite tuatoru tuha’a rua i te pae tōtiare i te matahiti 1995 ’e te parau tū’ite ’āpī tuatoru nō te fa’aterera’a i te ’ohipa putu faufa’a i te matahiti 1997. I muri a’e tāna tau ha’api’ira’a, ’ua ’ohipa ’oia i te fenua Marite, i Thailande ’e i Korea Apato’a. Mai te matahiti 2005, e ta’ata rave ’ohipa ’oia na Unicity International, hō’ē taiete e ho’o i te mā’a e au i te fa’a-ātere-ra’a ’e te mau mea fa’a’una’una i te tino tei ha’amauhia i Utaha, ’aita i maoro a’e nei ’ei peresideni nō te mau makete nā te ao nei, tei ha’amauhia i Seoul, Korea Apato’a.

’Ua riro Elder Kim ’ei Hitu ’Ahuru ārea mai te matahiti 2019. ’Ua rito ato’a na ’oia ’ei peresideni titi, ’ei tauturu i roto i te peresidenira’a titi, ’ei peresideni misiōni nō te titi, ’e ’ei melo nō te ’āpo’ora’a teitei.