Taea’e Chad H Webb

I tōna ’āpīra’a, tē haere ra Chad Webb i te fare ha’api’ira’a tuatoru nō Eastern Utah (i teienei Utah State University Eastern), ’a ora ai ’oia i te hō’ē ’itera’a pae vārua niu tei fa’ahōhonu i tōna ’itera’a pāpū nō ni’a i te ’evanelia. ’Ua ha’amata teie ’ohipa i tupu ma te hō’ē hina’aro e fa’ahōhonu i tōna fa’aro’o.

Ma te ravera’a i tāna ’ohipa ha’api’ira’a ’e te ha’utira’a i te tāora i te pōpō i roto i te ’ete nō tāna pupu fare ha’api’ira’a tuatoru, ’ua ’imi maita’i te taea’e Webb i te mau pāpa’ira’a mo’a, i te purera’a ’e te ferurira’a i te hō’ē ’ohipa mātāmua roa, ’a fa’aineine ai ’oia nō te tāvini i te hō’ē misiōni rave tāmau i Veracruz, Mēhiko.

I te hō’ē pō to’eto’e, ’ua rave ’oia i te hō’ē hāhaere ātea ’ati a’e ia Price, i Utaha, ’e ’ua feruri i te mau mea ato’a tāna i ha’api’i mai. ’Ua tae mai te arata’ira’a a te ra’i ’a tomo ai ’oia i roto i te hō’ē vāhi tāpe’ara’a pere’o’o pau.

« Putapū a’era vau ē, ’ua tae mai te mau pāhonora’a ato’a i tā’u mau pure ’e tā’u mau uira’a, ’e ’ua putapū hōhonu roa vau nō te parau mau o te ’evanelia ’e te ’Ēkālesia », ’ua parau ’oia. « Ua tae mai teie mau parau mau ma te māramarama rahi i roto i tō’u ferurira’a, ma te ’āpe’ehia mai e te nino’a mana’o ē, ’ua ’ite maita’i roa te Metua i te ao ra iā’u. ’Ua putapū vau i tōna here ’e tāna arata’ira’a. ’O te hō’ē o te mau ’itera’a mātāmua pūai teie ’o tā’u i ora nō te fa’ahōhonu i tō’u ’itera’a pāpū ».

’Ua fānauhia Chad H Webb i Rexburg, Idaho, Marite, i te 18 nō Tītema 1964, e Larry George Webb ’e e Paige Webb. ’Ua pa’ari ’oia i te pae apato’a hiti’a o te rā nō Idaho ’e ’ua fa’aipoipo ia Kristi Ann Bronson i roto i te hiero nō Logan (Utah, Marite) i te 4 nō ’Ātete 1990. Tē ora nei rāua i Layton, Utaha, i Marite, ’e e ono tamari’i tā rāua.

’Ua noa’a te parau tū’ite a te taea’e Webb nō te fare ha’api’ira’a teitei Brigham Young, ’ua roa’a te parau tū’ite tuatoru tuha’a rua nō te reo pāniora ’e te parau tū’ite tuatoru tuha’a nō te fa’aterera’a ’e te mau niu i te pae ha’api’ira’a. ’Ua ha’api’i ’oia i te mau piha séminaire i Roto Miti ’e te mau piha institut i Virginia ’e Utaha, ’ua fa’aau i te mau fa’anahora’a a te institut i Washington, D.C., ’e ’ua hi’opo’a i te ha’api’ipi’ira’a ’e te mā’itira’a i te mau ’orometua nō te séminaire. Mai te matahiti 2008, e ta’ata fa’atere ’oia nō te séminaire ’e te institut nō te ha’api’ira’a ’evanelia.

’Ua ha’amāuruuruhia te taea’e Webb i tōna ti’ara’a ’ei peresideni titi nō Layton Utaha Valley View, hou iti noa a’e o tōna pi’ira’a. Te mau pi’ira’a nā mua a’e, ’ua riro ’ei ’episekōpo, melo nō te ’āpo’ora’a teitei, ’e ’ei peresideni nō te pupu peresibutero.