Ang Nagabayad-Sala nga Gugma ni Jesucristo

Kon nakahimo ka sang seryoso nga mga sala kag ara sa proseso ukon may handum nga lubos nga maghinulsol kag mabatyagan ang indi mahambal nga kalipay, palihog hibaloa nga ining milagro nagahulat sa imo. Ang Manluluwas padayon nga nagapanawagan, “Magpalapit sa akon.”

Ang pagpabakod sang inyo pagtuo sa aton Manluluwas nga si Jesucristo, magapapagsik sang handum sang inyo kalag nga kilalahon Sia, magpati sa Iya, kag itugyan ang inyo tagipusuon sa Iya. Namangkot si Enos parte sa iya kaugalingon nga kapatawaran, “Ginuo, paano ini nahimo?” Nagsabat ang Ginuo, “Tungod sang imo pagtuo kay Cristo, nga wala pa gid nimo sadto nabatii ukon nakita.”

Kag dugang ni Moroni, “Kon inyo dumilian ang inyo mga kaugalingon sang tanan nga pagkadi-diosnon, kag palanggaon ang Dios sa inyo bug-os nga ikasarang, kaisipan kag kusog, gani ang iya grasya nagakaigo para sa inyo.”

Ang pagtalikod sa sala, pagbalikid sa Dios, kag pagpabakod sang inyo pagtuo kay Jesucristo isa ka matahum nga panugod. Upod sa mapainubuson nga pagpaidalom sang inyo pagbuot sa Dios ang pagkilala sang seryoso nga sala sa inyo bishop ukon branch president,pero ang lubos ninyo nga kapatawaran magahalin sa Manluluwas. Ang kapatawaran isa ka diosnon nga regalo nga ginatanyag paagi sa grasya ni Jesucristo.

Ang handum nga matuod nga magbalik sa Dios ginaupdan sang determinasyon nga mangin tampad gid sa inyo Amay nga Langitnon, sa inyo kaugalingon, sa mga nahalitan, kag sa inyo lider sa priesthood. Nagakalipay ang inyo Amay nga Langitnon sa inyo desisyon nga magpalapit sa Iya nga may masinulub-on nga tagipusuon kag mahinulsulon nga espiritu. Ang pag-angkon sang mahinulsulon nga espiritu amo ang pagpaubos sang inyo kaugalingon sa idalom sang Dios; ang pag-angkon sang masinulub-on nga tagipusuon nagadala sang ginalaragway ni Apostoles Pablo nga “diosnon nga kasubo,”isa ka dako nga handum nga magbalik sa Iya bisan ano ang kabaylo.

Ang inyo paghandum nagatulod sa ino nga kay-uhon ang imo naguba Pero may mga butang nga indi ninyo makay-o, kag ginapangamuyo ninyo, kon kaisa sa malawig nga tinuig, nga ang Ginuo, paagi sa Iya grasya, magabulig sa inyo nga ayuhon ang mga nasakitan sang konsikwensya sang inyo mga ginhimo.

Ang resulta sang seryoso nga mga sala sa iban kasami mabudlay kaayo nga malampuwasan. Ginasunod bala ninyo ang ehemplo sang mga anak ni Mosias, nga “matutum nga nagatinguha sa pagkaayo sang tanan nga kahalitan nga ila nahimo”? Makighambal sa mga tawo nga inyo ginarespeto parte sa mga butang nga mahimo wala ninyo makita.

Samtang ginahanda ko ining mensahe, nakabaton ako sang wala ginapaabot nga email halin sa tawo nga ara sa proseso sang paghinulsol kag nagahandum nga magbalik sa Simbahan. Ang iya asawa sadto nagaantos pa sa pagkaguba “sang [ila] wala katapusan nga pag-asawahay, [mga kabudlayan sa kabataan], pagkadula sang pinansyal nga seguridad, … sa [kabudlayan] sa pagbayad sang mga balayran, [kag] sang makalumos nga balatyagon sang pagluib.”

Gin-istorya niya sa akon kon paano ang iya lider sang priesthood “[nagpangabay sa iya] nga pamensaron sang mainampuon kon ano [pa ang pwede niya himuon para sa iya asawa sadto kag kabataan].” Upod ang iya permiso, ipakigbahin ang isa ka parte sang iya email.

“[Primero] abi ko ang [kuwarta] nga ginhatag ko sa amon pagdiborsyo dako na, pero ginpaisog ako sang akon branch president nga magpuasa kag pangamuyoan ini. …

“Sang primero, nabudlayan ako sa ideya sang dugang nga pagpakig-uli. Tungod ang akon mga sala indi pinansyal, ginbinagbinag ko kon ano gid ang buot silingon sang ‘maalwan nga pagpakig-uli’…[pero] narealisar ko nga indi ini parte sa kuwarta.

“Nakigkita ang akon mga lider sa priesthood sa [asawa ko sadto] kag sa akon kabataan kag nakita nga nabudlayan sila gihapon kag wala pa mag-ayo.”

“Ang bag-o ko nga tuyo amo nga mag-abante nga may pagtuo. … Ginhambal ko lang ang akon handum nga magbulig nga wala sang ginapangayo nga balik. … Nagdesisyon ako nga [padalhan ang asawa ko sadto sang partikular nga balor] kada sweldo, nga dako gawa nga bahin sa akon neto nga sweldo. Antes lang gid ko magpadala sang una nga bayad, [gintatak sang Ginuo sa akon hunahuna nga kinahanglan ko] maghatag [sang doble sina nga balor].

“Natun-an ko nga ang pagpasag-uli indi parte sa kuwarta. Parte ini sa pagdedikar sing mapainubuson sang akon kabuhi sa Ginuo. … Ang kuwarta nagabulig lang balik sang ginkuha ko sa akon pamilya tungod sa pigaw ko nga mga pagpili. Parte ini sa paghimo kag pagtuman sang mga promisa nga wala nagapaabot sang balik kag pagbulig sa iya nga indi magkabalaka sa mga balayran para mapangita niya ang Espiritu.”

Mahimo nga ang inyo mga pagpaninguha nga ibalik ang inyo ginguba wala sang kaangtanan sa kuwarta, pero kon mapainubuson kamo nga magpalaygay sa Ginuo, posible nga makita ninyo nga may mahimo pa kamo.

Samtang ginapangayo ninyo ang kapatawaran sang Ginuo, mangin pasensyoso samtang ginahulat ninyo ang bug-os Niya nga pag-apruba. Binagbinaga ining balaan nga kasulatan:

“Ila … ginpaubos ang ila mga kaugalingon … sa kadalumon sang pagpaubos; kag … nagpakitluoy sila sing tuman sa Dios; huo, bisan sa bilog nga adlaw. … [Pero ang] Ginuo mahinay sa pagpamati sang ila pagpakitluoy tungod sang ila mga kalainan.”

Bisan pa amo sini ang Ginuo nagpamati sang ila mga pagpakitluoy, kag nagsugod sa … pagpamag-an sang ila mga palas-anon; … kag … nagsugod sila sa pag-uswag sing hinay-hinay.”

Mangin pasensyoso samtang ginahatagan kamo sang Ginuo sang Iya bugay kag pag-apruba sing amat-amat

Sa oras sang Ginuo, mabatyagan ninyo ang Iya tingug nga nagahambal sa inyo, “Indi ka na magpatublag sa sining mga butang.” Pila ka adlaw, samtang padayon kamo nga nagadangop sa Manluluwas, ang inyo Amay nga Langitnon “[magakakas sang] kabasulanan halin sa [inyo mga tagipusuon], paagi sa mga merito sang iya Anak.”

Sa inyo nga indi patas nga naapektuhan sang seryoso nga mga sala sang iban, gusto ko ipakigbahin ang pagpalangga kag kaluoy sang Manluluwas, ang Iya pagpaumpaw kag paghidaet.

Ang kasubo nga inyo nabatyagan, ang kasakit, ang pagkaguba, ang makalumos nga balatyagon sang pagluib, ang pagbaliskad sang kabuhi nga inyo ginahandum—ginahatag ko sa inyo ang akon bug-os nga pasalig, kilala kamo kag palangga kamo sang Manluluwas. Magdangop sa Iya. Sia ang inyo kaumpawan kag kusog; ipadala Niya ang Iya mga anghel para alsahon kamo. San-o madula ang inyo kasakit, magtahaw ang inyo kasubo, malimtan ang indi manami nga mga handumanan? Wala ako makahibalo. Pero ini ang nahibal-an ko: May gahum Sia nga maghatag sang katahum sa baylo sang mga abo sang inyo pag-antos.

Ang aton pinalangga nga kauturan sa Grand Blanc, Michigan, upod ang ila indi maidog nga pagtuo kay Jesucristo, upod ang ila kaisog kag kaalwan, nakabaton kag sigurado gid, sa sinemana kag binulan nga magaabot, bugana nga magabaton sang indi makumparar nga pagpalangga kag grasya sang Manluluwas.

Samtang padayon kamo nga nagasalig sa Iya, ang mga panganod sang kadulom kag ang inyo pagbalakhuon sa kagab-ihon mabuslan sang mga luha sang kalipay kag kalinong sa kasanag sang kaagahon. “Ang inyo kasubo pagabayluhan sang kalipay. … Ang inyo kalipay nga [wala] sing may makakuha sa inyo.” Magaabot ina nga panahon. Nagapamatuod ako nga maabot ina.

Ang nagabayad-sala nga gugma ni Jesucristo makita sa pinakabudlay nga mga sitwasyon, pero kinahanglan naton pirme ang nagabayad-sala nga grasya sang aton Manluluwas. Gintudlo ni Pangulong Dallin H. Oaks: “Bangud sang Iya nagapasag-uli nga inagihan sa mortalidad, ang aton Manluluwas sarang magpasulhay, magpaayo, kag magpabakod sang tanan nga mga tawo bisan diin, apang ako nagapati nga ginahimo Niya lamang ini sa ila nga nagapangita sa Iya kag nagapangayo sang Iya tabang. Si Apostol Santiago nagtudlo, “Ipakubos ang inyo mga kaugalingon sa atubang sang Ginuo, kag siya magatib-ong sa inyo” (Santiago 4:10 ). Kwalipikado kita sa sinang bugay kon kita nagapati sa Iya kag nagapangayo sang Iya bulig.”

Nakabaton ako sang permiso halin sa pinalangga ko nga abyan kag emeritus nga General Authority, si Elder Robert E. Wells, 97 anyos na karon, para ipakigbahin ang iya eksperiyensya mga 60 katuig na ang nagligad.

Sang nagaestar sila sa Paraguay sang 1960 kag nagatrabaho bilang international nga banker, si Robert Wells, nga 32 anyos pa lang sadto, kag ang iya asawa, si Meryl, mga piloto sa lainlain nga eroplano, nga nagapapuli halin sa Uruguay pakadto sa Paraguay. Tungod sa madamol nga mga panganod, wala na magkit-anay kag nawad-an si Robert kag Meryl sang kontak sa kada isa. Madasig nga naghugpa si Robert, kon diin nabalitaan niya nga nag-crash ang eroplano sang iya asawa. Napatay ang iya asawa kag ang duha nila ka abyan nga nagasakay upod sa iya. Ang ila kabataan, nga ara sa ila balay sa Asunción, nagaedad pito, lima, kag duha ka tuig.

Hambal ni Elder Wells parte sa iya kalisod:

“Indi ko gid mapabutyag sa tinaga bisan san-o ang kasakit nga nagpuno sa akon, nga nagpangibabaw sa akon mga emosyon kag nagpakunol sang akon pamatyagon. Ang sa kadamo nga luha sang kasubo wala gid nagauntat. Ang malain pa, kay mientras nga ginatinguhaan ko nga atubangon ang kamatuoran sang pagtaliwan sang akon asawa, ginakaon ako sang grabe nga pagkakonsensya nga ako ang responsable sa pag-crash sang eroplano.”

Ginbasol ni Robert ang iya kaugalingon nga waay niya ginpainspeksyon sang mas maayo ang eroplano kag wala niya ginhatagan ang iya asawa sang mas maid-id nga instruksyon sa pagpalupad sini. Pamatyag niya sia ang balasulon sa pagpatumbaya.

Siling ni Robert:

“Ginkaon sang kadulom ang akon panghunahuna. … Nabuhi ako—[para na lang gid sa mga bata,] wala na sang iban nga rason.”

“Nawad-an na … ako sang handum nga magpadayon.”

Wala madugayi, ginbugayan si Robert sang dako nga espiritwal nga eksperiyensya. Siling niya:

“Isa ka gab-e, mga isa ka tuig ang nagligad, samtang nagaluhod ako sa pagpangamuyo, may natabo nga milagro. Samtang nagapangamuyo kag nagapakitluoy sa akon Amay nga Langitnon, nabatyagan ko nga daw nagtupad sa akon ang Manluluwas kag nakabati ako sang tingug nga nagahambal sini sa akon kalag kag dulunggan: ‘Robert, ginbayran sang akon nagabayad-sala nga sakripisyo ang imo mga sala kag ang imo mga kasaypanan. Ginapatawad ka sang imo asawa. Ginapatawad ka sang imo mga abyan. Alsahon ko ang imo ginapas-an. …’

“Sina nga tion, ang ginapas-an ko nga pagkakonsensya [kag kalisod] naalsa sa akon. Ginsalbar Niya ako! Insigida naintiendihan ko ang kadako sang gahum sang Pagbayad-Sala sang Manluluwas kag … magamit ko ini mismo. … Naeksperiyensyahan ko … ang kasanag kag kalipay nga wala ko pa maagyi sadto. … Ginhatagan ako sang regalo nga wala ko ginpangabudlayi—ang regalo nga grasya sang Ginuo. … Indi ako angayan para sadto—wala ako sang ginhimo para mabaton ato, pero ginhatag Niya ato sa akon.”

Mga utod, kabay nga ang tagsa sa aton “[mangin] ginpakabalaan kay Cristo paagi sa grasya sang Dios, paagi sa pagpaagay sang dugo ni Cristo, … nga mangin balaan, nga wala’y mantsa.”

Nagapamatuod ako sa gugma, sa kaluoy, kag grasya sang aton Manluluwas kag Manunubos. Buhi Sia. Iya kita; mga anak kita sa kasugtanan. Kon magpati kita sa Iya, sundon Sia, kag magsalig sa Iya, alsahon Niya kita sa aton mga kasubo kag mga sala. Dayon, pagkatapos sining kabuhi, sa balay sang aton Amay, magapuyo kita upod sa iya hasta sa wala katapusan. Sa ngalan ni Jesucristo, amen.