Ginapadali sang Ginuo ang Iya Buluhaton

Bantog nga ginsugdan ni Charles Dickens ang iya klasiko nga nobela nga The Tale of Two Cities sa pahayag nga “pinakamaayo ato nga tinion; pinakamabudlay ato nga tinion.” Sa pila ka paagi, matuod ini sa aton panahon.

Nagakabuhi kita sa magarot nga panahon nga ang “bilog nga duta nagaginamo.” Ang laygay ni Pangulong Russel M. Nelson nga mangin mga makigdaeton bilang mga sumulunod ni Jesucristo, matahum nga ginpatalupangod sini nga aga ni Elder Gary E. Stevenson. Importante ini nga bahin sang pagpasanyog sang pag-isa, kalinong, kag pag-ayo sa “pinakamabudlay nga tinion.”

Nagakabuhi man kita sa “pinakamaayo nga tinion,” nga amo ang akon hatagan igtalupangod. Ang Ginuo, sa introduksyon sa Doktrina kag mga Kasugtanan, seksyon 1, nagpahayag nga ang kabug-osan sang ebanghelyo “mabantala … tubtob sa mga punta sang kalibutan.” Ang Ginuo matuod gid nga nagapadali sang Iya buluhaton sa aton panahon. Dapat kita magpasalamat sing daku para sa pagpadali, nga natabo kag nagakatabo wala sapayan sining mabudlay nga mga panahon. Nagakabuhi kita sa panahon nga ang mga sumulunod sang Ginuo may prebilihiyo nga mabatian ang Iya tingug kag makaresponde nga may bukas nga mga tagipusuon kag mga hunahuna. Ang mga miyembro sang Ang Simbahan ni Jesucristo sang mga Santos sa Ulihing mga Adlaw nga dedikado sa Manluluwas kag sa Iya mga kasugoan, nakakita sang katuyoan kag madalom nga personal nga kalinong.

Sa nagkalainlain nga tinion sa kasaysayan sang Simbahan, may daku nga pagsaka sa kadamuon sang mga nagsulod sa dalan sang kasugtanan. Isa sinang panahon natabo sa ulot sang 1837 kag 1850. Pila sang una nga mga Apostoles sa ginpanumbalik nga Simbahan sang Ginuo nagserbisyo sa mga misyon sa United Kingdom. Ining mga misyon nagresulta sa linibo nga nagpamiyembro sa Simbahan, kag pag-abot sang 1850 may mas madamo pa nga mga miyembro sa Simbahan nga nagaistar sa United Kingdom sangsa Estados Unidos. Sa sinang tion, ang Ginuo nagsugo sa sining mga Santos nga magtipon sa Utah. Isa ka lapnagon nga imigrasyon ang natabo, ang pila ginsuportahan sang mga pautang nga ginpatigayon sang Perpetual Emigrating Fund.

Nanamian ako sang istorya sa pag-abot sang madamo nga mga hinaylo sa Salt Lake Valley halin sa Inglatera kag Wales sang 1852. Ang grupo ginsugata sang Unang Pangulohan sa baba sang Emigration Canyon kag gintukaran sang Banda ni Captain Pitt. Ang Deseret News naglaragway sa ila bilang “grupo sang mga deboto [nga nagalakip] sang mga utod nga babayi kag kabataan, nagalakat, sunog ang panit sa init, gin-ulanan kag gin-initan pero indi masinulub-on; ang ila mga balatyagon mamag-an kag positibo, nga hayag nga makita sa ila masadya kag malipayon nga mga nawong.”

Sa ila “paglabay sa Temple Block, … linibo ka mga lalaki, babayi, kag kabataan, ang nagtipon halin sa nagkalainlain nga bahin sang siyudad, para mag-ugyon sa mahimayaon kag malipayon nga pag-abiabi.” Si Pangulong Brigham Young naghambal sa ila: “Kabay nga ang Ginuong Dios sang Israel magpakamaayo sa inyo. … Nagpangamuyo kami para sa inyo sing dalayon; linibo ka pangamuyo ang ginhalad para sa inyo, adlaw-adlaw, sa Iya nga nagsugo sa amon nga tipunon ang Israel, luwason ang mga anak sang katawhan paagi sa pagwali sang ebanghelyo, kag ihanda sila para sa pag-abot sang Mesias.”

Sa espiritu sinang malipayon nga okasyon, tugoti ako liwat nga pasaligon ang tanan nga bag-ong hinaylo kag inang mga nagabalik sa Simbahan sang Ginuo: palangga namon kamo; kinahanglan namon kamo; kinahanglan kamo sang Ginuo. Siguro indi namon kamo maabiabi nga may banda nga nagatukar, pero nagapangamuyo kami nga ang mga bugay sang langit magaupod sa inyo mga pagtinguha nga mag-uswag sa dalan sang kasugtanan nga nagapadulong sa Dios nga Amay kag kay Jesucristo sa selestiyal nga ginharian.

May klaro nga ebidensya nga ang pagtuo kay Jesucristo nagadugang sa aton panahon. Sa Ang Simbahan ni Jesucristo sang mga Santos sa Ulihing mga Adlaw, may talalupangdon nga pagdamo sang mga hinaylo kag ila partisipasyon. Sa nagligad nga 36 ka bulan, halos 900,000 ka hinaylo ang nagbuylog sa Simbahan. Ining mga hinaylo nagahuman sang mga 5 ka porsyento sang kabilogan nga mga miyembro sang Simbahan. Ginaabiabi namon ang bag-o nga mga miyembro sing may bukas nga mga butkon kag daku nga pag-apresyar sa dalan nga inyo ginpili.

Ining 900,000 nga hinaylo sang nagligad nga 36 ka bulan naglapaw sa kabilogan nga mga miyembro sang Simbahan sa iya sini ika-110 nga anibersaryo sang 1940, nga masobra lang 860,000 ka mga miyembro. Ini ang tuig nga natawo kami ni Elder Jeffrey R. Holland, kag Elder Dieter F. Uchtdorf.

Ining dalayawon nga bag-o nga mga hinaylo naghalin sa tagsa ka bahin sang kalibutan. Sa una nga anum kag bulan sini nga tuig, ang mga hinaylo nagsaka sing masobra 20 porsyento ikumparar sa nagligad nga tuig sa Europa, Aprika, Asia, Pasipiko, kag Latin America. Sa Norte nga Amerika nakakita kita sang 17 porsyento nga pagsaka. Ang buluhaton sang Ginuo padayon nga nagasulong sa gamhanan nga mga paagi. Ining nagasaka nga kadamuon klaro nga saksi nga ang ebanghelyo nagatandog sang mga tagipusuon kag nagabag-o sang mga kabuhi sa bisan diin.

Sa aton panahon, ining bilidhon nga mga hinaylo wala na nagatipon sa isa ka sentro nga lokasyon. Tungod sang pagtuo kag pagkonsagrar sang mga miyembro sang Simbahan, ang mga bulig matigayon para suportahan ang mga kongregasyon—paagi sa pagpatukod sang mga chapel kag mga templo—sa bilog nga kalibutan. Gamit ang kinahanglanon nga mga yabi sang priesthood kag ang mga bulig nga ginahatag, ang nagaluwas nga mga ordinansa matigayon na karon sa kalabanan nga bahin sang kalibutan.

Bisan diin man kita nagaistar, ang mga miyembro sa karon kinahanglan mag-abiabi sang ginatos ka libo nga bag-o nga mga miyembro pareho sang ginhimo naton sa mga Santos sang Inglatera kag Wales nga ginlaragway sa aton una nga kasaysayan. Nanamian ako sang ginhambal ni Elder Gerrit W. Gong sa sini nga sesyon sa diin gintudloan niya kita nga wala dapat sang may magpungko nga isahanon sa emosyonal man ukon espirituhanon.

Ang sagrado naton nga tulumanon amo ang batunon kag abiabihon ang bag-o kag nagabalik nga mga miyembro. Samtang ginapadali sang Ginuo ang Iya buluhaton, dapat naton palanggaon, atipanon, kag serbisyohan ang mga nagabaton sang Iya ebanghelyo. Mahimo kita magbulig pahamtang sang Sion nga katawhan, sa diin tanan kita “isa sing tagipusuon kag isa sing panghunahuna kag [nagapuyo] sa pagkamatarong.” Para mangin isa sa Ginuo, dapat kita mangin isa sa atubang sang Ginuo. Ang tanan nga miyembro bisan ano man ang petsa sang ila bunyag may responsibilidad nga mag-abiabi sang iban.

Ang laygay ko sa mga miyembro sang Simbahan amo nga magpakita sang pag-ulikid kag gugma para sining pinili nga katawhan nga nagbaton sang ebanghelyo ni Jesucristo.

Si Pangulong Gordon B. Hinckley nagtudlo sa aton nga ang bag-o nga mga hinaylo nagakinahanglan sang “abyan, responsibilidad, kag pagbatiti sa ‘maayong pulong sang Dios’ (Moroni 6:4).” Sarang kita mangin mga abyan nga nagapasalig sa sining bag-o nga mga hinaylo nga kaupod sila naton kag indi lang mga bisita. Pwede naton sila buligan nga intiendihon nga mga disipulo sila ni Jesucristo nga mahimo mag-alagad sa iban kag magbaton sang mga tawag sa pag-alagad. Dapat panumdumon sang bataon nga mga hinaylo ang magserbisyo sa full-time nga misyon. Ang tanan dapat determinado sa pagtinguha nga magpangabuhi sang Cristohanon nga kabuhi.

Madamo ang nagapabunyag sa Simbahan nga may daku nga personal nga sakripisyo kag nagakinahanglan gid sang pagpalangga kag suporta sang ila kapareho nga mga Santos.

Sa inyo nga bag-o ukon nagabalik sa pagtuluohan, may mga hangkat nga ayhan inyo ginaatubang. Magmangin pasensyoso sa inyo kaugalingon. Ang mga misyonero nagtudlo sa inyo sing labing importante nga doktrina kag nagpaathag sang mga kasugtanan kag mga ordinansa sang ginharian nga ginpahamtang sa balaan nga mga kasulatan kag sa Iwali ang Akon Ebanghelyo

Ang pagbaton sang mga ordinansa kag mga kasugtanan kag ang pagtuman sang mga kasugoan importante gid. Magtutok sa mga kasugtanan nga kinahanglanon para sa pangkahitaasan. Ang ebanghelyo nagahimo sang pangkahitaasan nga posible, nga nagapangayo sang paghimo kag pagtuman sang sagrado nga mga kasugtanan sa Dios. Luwas lang sa bunyag, pagkompirma, kag paghatag sang Melquisedec Priesthood para sa mga lalaki, ang mga kasugtanan nga aton ginahimo ginahikot sa templo. Para sa minatay, ang tagsa sining nagaluwas nga mga ordinansa ginahimo lamang sa templo. Tungod sini, ang paghanda sang imo kaugalingon para sa templo, pareho sang pirme ginatudlo ni Pangulong Russell M. Nelson, dapat mangin gilayon nga lalab-uton.

Kon kis-a makabatyag kamo nga kulang kamo sa ihibalo. Ang ihibalo sa ebanghelyo daku nga bugay nga maangkon sing amat-amat sa kadugayon, pero indi ini nagaluwas nga ordinansa. Ang pagsunod sa ebanghelyo wala ginatakos sa kadamuon sang aton nahibal-an sa ebanghelyo. Pero, si Pangulong Nelson nagpromisa, “Kon tun-an ninyo sing mainampuon ang Libro ni Mormon adlaw-adlaw, makahimo kamo sang mas maayo nga mga desisyon —adlaw-adlaw. … Samtang ginabinagbinag ninyo ang inyo ginatun-an, ang mga bintana sang langit magabukas, kag magabaton kamo sang mga sabat sa inyo kaugalingon nga mga pamangkot kag direksyon sa inyo kaugalingon nga kabuhi.”

Dugang pa, tagsa ka tuig bulos-bulos nga ginatalakay sang kurikulum sang Simbahan sa Domingo nga mga miting ang Daan nga Katipan, ang Bag-o nga Katipan, ang Libro ni Mormon, kag ang Doktrina kag mga Kasugtanan. Sing amat-amat, mangin mas may kompiyansa kamo samtang nagadugang ang inyo ihibalo sa ebanghelyo. Ang pirme nga pagtuon sang balaan nga mga kasulatan magabugay kag magapauswag sang inyo mga kabuhi paagi sa pagpadalum sang inyo pagkahaylo sa ebanghelyo ni Jesucristo.

Ang pagtuon sang puro nga doktrina ni Jesucristo bilog-kabuhi nga pagtinguha, alangay sa pag-intiendi sang doktrina kag Cristohanon nga pagpangabuhi. Ang importante gid nga mga kasugtanan nagapahamtang sang pundasyon nga ginatawag naton nga dalan sang kasugtanan. Ining mga prinsipyo mabaskog nga gintudlo ni Pangulong Nelson. Ang tanan nga miyembro, labi na gid inang mga bag-o kag nagabalik, mabugayan paagi sa pagtuon kag pagsunod sang mga mensahe sang propeta parte sa mga kasugtanan kag dalan sang kasugtanan.

Kon magpahamtang kamo sang lalab-uton nga mangin kaangay-angay sa pagbaton sang tagsa ka kinahanglanon nga kasugtanan para sa pangkahitaasan, mangin ara kamo sa dalan nga nagapadulong sa selestiyal nga ginharian. Ang templo kag mga ordinansa sa templo dapat mangin ang aton tutok. Kalabanan sa mga kasugtanan pwede matigayon sang tagsa ka indibidwal. Isa ka kasugtanan, ang wala katapusan nga pag-asawahay, nagapangayo sang pagtingob sang aton mga pagpaninguha sa isa ka kaupod. Ang aton lalab-uton amo ang makita inang wala katapusan nga kaupod.

Pero, indi magluya ang buot kon ang wala katapusan nga pag-asawahay indi posible sa sini nga tion. Ang mga propeta nagtudlo nga wala sang bugay nga idumili sa matutom nga mga miyembro nga nagatuman sang mga kasugoan. Isa ka propeta sa Libro ni Mormon, si Haring Benjamin, matahum nga naghambal sini: “Inang mga nagatuman sang mga kasugoan sang Dios … ginapakamaayo sila sa tanan nga butang, … kag kon … magpabilin sila nga tampad tubtob sa katapusan … mahimo sila nga magpuyo upod sa Dios sa isa ka kahimtangan sang di-matapos nga kalipayan.”

Makita ninyo, kon wala pa ninyo nadiparahan, nga ang mga miyembro indi perpekto. Ang ginpahayag nga doktrina nagaklaro nga sa aton pag-istar diri sa duta, makahimo gid kita sang mga sayop. Nagapangabuhi kita sa di-perpekto kag nahulog nga kalibutan, indi sa isa ka selestiyal nga kalibutan. Ini nga kabuhi tion sang pagtilaw, nga may dalayon nga mga oportunidad para maghinulsol kag probahan ang aton mga kaugalingon.

Tanan kita nagabatyag nga kulabos sa aton patinguha nga mangin pareho kay Jesucristo. Ang Iya Pagbayad-Sala nagatugot sa aton nga maghinulsol adlaw-adlaw kon magkulang kita. Pareho sang ginsiling ni Nefi, isa pa ka propeta sa Libro ni Mormon, “Kinahanglan gid nga magduso [kita] pasulong upod ang kalig-on kay Cristo, nga may perpekto nga kasanagan sang paglaum, kag gugma sa Dios kag sa tanan nga tawo. Gani, kon magaduso kamo pasulong, nga nagapaayaw sa pulong ni Cristo, kag magapadayon tubtob sa katapusan, tan-awa, amo ini ang ginasiling sang Amay: Inyo maangkon ang kabuhi nga wala’y katapusan.”

Sa paghunahuna naton sang mga hangkat sa aton panahon, dapat naton dumdumon nga ang Manluluwas, sa tion sang iya dutan-on nga pag-alagad, nagkabuhi man sa magamo kag masingki nga mga panahon. Ang Iya tutok indi sa mga hangkat sa politika sadto nga panahon; ara ini sa pagperpekto sang mga Santos.

Ang pagsunod sa Manluluwas kag Iya doktrina kag mga pinanudlo wala gid nangin mahapos sa kalibutan nga wala untat nga nagakinagula. Indi mahapos para sa Manluluwas nga magkabuhi sa pabag-obag-o nga kalibutan sadto, indi ini mahapos para sa una naton nga mga lider kag mga miyembro, kag indi ini mahapos para sa aton. Maayo lang, ang buhi nga mga propeta nagahatag sang paggiya nga kinahanglan gid naton sa aton panahon. Si Pangulong Dallin H. Oaks magapadayon sinang mabaskog nga espirituhanon nga palanublion.

Nagapamatuod ako nga ang doktrina sang Ang Simbahan ni Jesucristo wala katapusan kag matuod. Nagasaksi ako sing pat-od kag sigurado nga si Jesucristo buhi, kag tungod sang Iya Pagbayad-Sala, sarang kita mangin isa sa Iya. Sa sagrado nga ngalan ni Jesucristo, amen.