Si Jesucristo kag ang Bag-o Mo nga Panugod

Si Jesus “naglibot nga nagahimo sang kaayohan.” Mabasahan naton ina nga simple nga report sa libro sang Mga Binuhatan. Daw kagrabe nga pagpasimple! Matuod gid nga naglibot si Jesus nga nagahimo sang kaayohan! Sia amo ang mismo kahulugan—kag ginhalinan—sang kaayo! Ginhalad Niya ang bilog Niya nga mortal nga kabuhi sa paghimo sang kaayohan. Sia “maluluy-on kag mainayohon, indi madali mangakig, kag nagapakita sang dako nga gugma kag katutom.”

Ang bisan ano nga pagtinguha sa paglaragway ukon pagsuma sang Iya kaayo kag kaluoy mangin sobra nga pagpasimple! Matuod gid, pareho sa gusto nga ipahayag ni Apostoles Juan, kon tilawan naton nga isulat ang tagsa ka pagpakita sang kaayo sang Manluluwas, “indi mag-igo sa bug-os nga kalibutan ang mga libro nga pagasulaton.”

May pila ka partikular nga mga halimbawa nga mabasahan naton sa balaan nga kasulatan parte kay Jesus nga nagalibot nga “nagahimo sang kaayohan” nga nagapukaw sang aton pagdayaw, labi na kon pamensaron gid naton kon ano ayhan kon ara kita didto, nga makita ang Iya mga milagro, nga mabaton ang Iya mga pinanudlo, kag maeksperiyensyahan ang Iya pagpang-ayo. Nagpakighambal Sia sa mga sinikway sang sosyedad, gintandog Niya ang mga masakiton kag mahigko, ginpaumpawan Niya ang mga ginakapoy, nagtudlo Sia sang nagahilway nga kamatuoran, kag gintawag Niya ang mga makasasala nga maghinulsol. Sa tagsa ka aruon, bulag, kag makilahion nga babayi; sa lupog, sa bungol, sa apa; sa tagsa ka iloy nga ginasubuan, sa desperado nga amay, sa nagakalisod nga balo; sa ginkondenar, sa ginpakahuy-an, kag sa nagaantos; sa patay sa lawas kag sa patay sa espiritu, ang Iya gintanyag amo ang bag-ong panugod. Huo, isa pa gid nga ginpasimple nga paglaragway!

Tanan nga Iya ginhambal kag ginhimo naghatag sang bag-o nga panugod sa tanan nga Iya gin-ayo, gintudloan, kag ginhilway sa sala. Wala Sia magpalayo sa ila, kag indi gid Sia magpalayo sa inyo. Pensara ining tion nga mabatian ining nagahatag-kabuhi nga mga tinaga halin sa Iya:

“Anak ko, napatawad na ang imo mga sala.”

“Inday, nagasiling ako sa imo, bangon ka.”

“Mag-ayo ka.”

“Ako wala man nagakondenar sa imo. Lakat ka, pero indi ka na magpakasala liwat.”

“Anak ko, ang imo pagtuo nag-ayo sa imo. Maglakat ka sa paghidaet.”

Ang mga tinaga sang Manluluwas sa sining mga indibidwal malip-ot lang, pero sa ila nagpinta Sia sang malapad nga bag-ong mga palaabuton sang pagpatawad, pag-ayo, pagpanumbalik, kalinong, kag kabuhi nga wala katapusan. Kag ang mahimayaon nga balita amo nga, nagatanyag man Sia sang pareho nga bag-ong panugod sa inyo kag sa akon. Tanan kita sarang nga makaangkon sang bag-o nga panugod paagi, kag tungod kay, Jesucristo. Bisan sa inyo. Ang bag-o nga mga panugod amo ang sentro sang plano sang Amay para sa Iya kabataan. Ini ang simbahan sang bag-o nga mga panugod! Ini ang simbahan sang pagsugod liwat!

Paagi sa bunyag sa tubig kag sa Espiritu, kita “matawo liwat” kag “magkabuhi sang isa ka bag-o nga kabuhi.” Ano kadako nga paglaum ang ginadala sinang bag-ong panugod sa tawo nga nag-ubog sa kabug-at sang sala ukon nag-antos sang epekto sang magamo nga kabuhi kag indi maayo nga mga relasyon? Indi ni Jesus kinahanglan sang kapatawaran sang sala ukon sang bag-o nga panugod sa kabuhi, pero Sia Mismo ginbunyagan, nga ginapakita sa aton ang dalan padulong sa bag-o nga panugod nga ginhanda Niya para sa kada isa sa aton.

Kag ang bag-o ninyo nga panugod wala nagakatabo nga kis-a lang. Kasami abi naton nga ang aton bunyag isahay lang nga tsansa sa pagsugod liwat. Indi. Indi lang kaisa ang aton tsansa. Ining bag-o nga mga panugod pwede matabo adlaw-adlaw! Kag sigurado kada semana nagakaon kita sang gamay nga parte sang tinapay ukon nagainom sa gamay nga baso sang tubig para dumdumon ang dulot sang perpekto naton nga Manluluwas, nga napatay para gid sa katuyuan nga hatagan kita sang madamo nga bag-ong panugod nga kinahanglan naton! Ginahatagan kita ni Jesus sang madamo nga bag-ong panugod nga kinahanglan naton.

Upod ang debosyon kag papursige sa pangako nga bag-ong kabuhi kay Cristo, sarang kita nga mangin “bag-o nga tinuga,” kon diin ang daan nga mga butang wala na kag ang tanan nahimo na nga bag-o. Ano nga kaumpawan ang ginadala sang bag-o nga adlaw sa kalag sang tawo nga wala untat nga nagatinguha, paagi sa padayon nga pagpili nga magtuo sa gahum sang Manluluwas sa pagpaayo kag pagbalik, sa pihak sang masakit nga kabudlayan sang pagpangabuhi sa nahulog nga kalibutan? Ang Manluluwas wala gid magpangampo sa Iya pangako nga tumanon ang pagbuot sang Amay kag tapuson ang Iya diosnon nga misyon sang pagbayad-sala, bisan sa tunga sang kasakit nga nagapakurog sa Iya, nagpadugo sa tagsa ka buho-buho sang panit, kag mag-antos sa lawas kag espiritu, kag magpangamuyo nga tani ipahigad na lang ang mapait nga kopa. Sa liwat, ginapakita Niya sa aton kon ano ang halimbawa sang tampad nga pagpadayon sa Dios.

Upod sa tagsa ka kasugtanan nga aton ginahimo kag sa tagsa ka pagpaninguha naton nga tumanon ini, makabaton kita sang “bag-ong tagipusuon” kag sang mas dako nga parte sang “bag-o nga espiritu.” Amat-amat, kon mas ginaimbitar naton ang Iya kaayo sa aton mga tagipusuon kag ihaboy ang talawan nga mga tingug sa aton mga hunahuna, kita mangin Iya katawhan tungod ginahimo matuod naton Sia nga aton Dios. Gusto gid ni Jesus nga mangin aton Hari kag aton Manugbantay kag aton Prinsipe sang Paghidaet, kag pwede naton pilion nga mangin amo Sia sini sa aton mga tagipusuon kag kaisipan.

Ang paghinulsol nagabukas sang puwertahan sa bag-o naton nga mga panugod, pagsugod liwat, kag ikaduha nga mga tsansa. Ginklaro sang pinanudlo sang pinalangga naton nga Pangulong Russell M. Nelson ang sala nga mga pagpati parte sa diosnon nga dulot sang paghinulsol, kag sa banta ko amat na gid man naton nga naintiendihan ini.

Manami nga mabatian ang aton mga lamharon nga ginalaragway kon ano ang buot silingon sang paghinulsol sa ila. Nabatian ko sang nagligad lang ang isa ka dalaga nga nagsiling, nga nagayuhum, “Kon manumdom ako parte sa paghinulsol, gakabatyag ako sang dako kaayo nga kalipay kag paglaum. Nabatyagan ko ang pagpalangga kag kalipay sang akon Amay nga Langitnon kag akon Manluluwas. Wala ako nahadlok nga magpalapit sa Amay nga Langitnon sa pangamuyo kag magpangayo sang Iya bulig sa bisan ano nga ginabudlayan ako. Kabalo ako nga wala Nila ako ginatinguhaan nga dakpon nga nagahimo sang indi amo. Bukas ang ila mga braso. Amo ini ang paghinulsol para sa akon,” siling niya. Ining dalaga nakaintiendi nga tungod kay Jesucristo, mahimo sia nga makaangkon sang bag-o nga panugod!

Kinahanglan bala ninyo sang bag-o nga panugod? Makahimo bala kamo sang bag-o nga panugod, bisan kamo? Panumduma ang mga tawo nga gin-alagaran sang Manluluwas—ang mga tawo nga Iya gintudloan, ginpaayo, ginbanhaw, ginpatawad, kag ginpanumbalik. Ginpili bala Niya sila halin sa isa ka estado sang ekonomiya ukon pangabuhi? Ginpili bala Niya ang matarong kag makasasala? Ginapili bala Niya ang iban nga tawo tungod mas bagay sila ukon mas pinalangga? Wala.

Ang pila nagpalapit sa Iya nga may daku nga pagtuo, nga nagapati sa Iya gahum sa pag-ayo— pareho sang babayi nga may masakit sa dugo, ang Romano nga kapitan nga ang suluguon lapit na mapatay, ang aruon, si Jairo, kag ang bulag nga si Bartimaeus. Tagsa sa ila nagpakita sang ila pagtuo, nga nagalaum nga ang kaayo kag gahum sang manunudlo sang Nazaret makapabag-o sa ila mga kabuhi kag kapalaran. Kag ginhimo Niya. Gintugotan Niya ang Iya pagpang-ayo nga maglab-ot sa tanan.

Pero ginbendisyunan man ni Jesus ang mga nagapalya sa pagtuo, pareho sang tatay sang nagamasakit nga bata nga nagpakitluoy, siguro pareho man sa inyo, “[Ginuo] nagatuo ako, pero kulang pa. Dugangi ang akon pagtuo.” Kag Iya ginbubo ang Iya kaluoy sa mga wala gid magdangop sa Iya, pareho sang babayi nga nagapanglahi, ang balo sang Nain, ang lupog sa linaw sang Betesda, kag sa tawo nga nabata nga bulag. Nabatyagan mo bala Sia nga nagahimo sang kaayohan sa inyo kabuhi bisan wala ninyo Sia ginapangita ukon ginasunod?

Sa tagsa sining mga tawo sa balaan nga kasulatan, kag sa tanan nga mamati kag mag-aksyon, naghatag Sia sang bag-ong panugod, paagi sa kabuhi sang bag-ong ginpatawad sa sala, ukon sa bag-ong kabuhi nga nag-ayo sa balatian, ukon sang bag-o nga kabuhi nga ginbanhaw sa pagkapatay.

Ano ang buot silingon sini para sa inyo kag para sa akon? Ang Iya kaayo kag kaluoy kag mapinalanggaon nga pag-ulikid indi matupungan. Sentro sa plano sang Amay ang bag-o nga mga panugod! Ang bag-o nga panugod amo ang misyon sang Anak! Ang bag-o nga pamanag-banag, bag-o nga mga kapitulo, kag bag-o nga mga tsansa amo ang simple nga sentro sang maayong balita!

Dugay ka na bala nga napalayo sa imo mga kasugtanan para makabaton sang bag-o nga panugod? Indi. Nahimo mo na bala ini ukon ina sing madamo nga beses para mahatagan sang isa pa gid ka tsansa? Wala. Napahilayo ka na bala kaayo kay Cristo para buligan ka Niya nga maghimo sang bag-o nga istorya sumugod subong? Wala. Ang kaaway amo lang gid ang nagabenepisyo sa ideya nga wala ka na sang paglaum. Indi ka amo sina.

Kag ang bag-o nga mga panugod masobra kaayo sangsa aton mga sala kag kasaypanan. Paagi sa kaayo kag grasya sang Manluluwas, pwede kita magsugod liwat nga ginabag-o ang daan nga mga panghunahuna, malain nga mga pangginawi, masingki nga mga disposisyon, negatibo nga mga pamatasan, balatyagon nga wala-mahimo, kag kadasig nga magbasol sa iban kag paglikaw sa personal nga responsibilidad. Matuod gid nga sarang ninyo liwaton ang mga butang sa inyo kaugalingon nga nagapabug-at sa inyo sa sulod sang tinuig. Pwede kamo magsugod liwat paagi sa kusog sang Manunudlo sang bag-o nga mga panugod. Wala Sia nagakakapoy sa paghatag sa aton sang bag-o nga mga panugod.

Sa mga ginabudlayan sang pareho nga mga sala ukon sang pareho nga mga problema sing liwat-liwat, padayon lang. Wala Sia nagbutang sang sablag sa inyo dalanon. Wala Sia nagbutang sang limitasyon sa inyo ikaduha nga tsansa. Magpadayon gid. Magpadayon sa pagtinguha. Magpangayo sang bulig sa mga ara sa inyo palibot. Kag magsalig sa bag-o nga panugod nga ara para sa inyo tagsa nga magdangop kamo liwat sa inyo Amay nga may sinsero nga tagipusuon. Bayaan ta na ang hungod sa buot nga pagpakasala, kaswal nga pagsulit-sulit, kag bugalon nga pagrebelde, ibilin sa likod. Indi ninyo kinahanglan nga balikan kon ano kamo sang una. Batona ang inyo bag-o nga panugod, ang inyo ikaduha ukon ikatatlo ukon ikaapat—ukon ika-isa ka gatus—nga tsansa, nga ginatanyag sa inyo paagi sa nagabayad-sala nga dugo ni Jesucristo.

Dako gid kaayo ang akon pagpasalamat para sa bag-o nga mga panugod nga gintanyag sa akon kag sa mga itanyag pa lang sa akon.

Ang aton Manluluwas nagsambit sang isa ka katapusan nga tinaga nga kon waay sini wala kita sang rason nga maglaum ukon malipay sini nga adlaw. Pagkatapos sang mga pag-antos sa Getsemani kag sa pagtapos sang paglansang sa krus, simple lang gid Sia nga nagsiling, “Tapos na.” Natuman ang ginpropesiya sang mga propeta, kag ang bug-os nga kabayaran sang utang para sa kasal-anan kag pag-antos sang katawhan ginbayran na. Ginhambal Niya nga “tapos na” ang Iya wala dulonan kag wala katapusan nga halad. Pero ang Iya Pagbayad-Sala indi mangin kompleto kon wala Niya Mismo maeksperiyensyahan ang bag-o nga kabuhi sa ikatatlo nga adlaw, ang bag-o nga panugod bilang ginhimaya, nabanhaw nga persona paagi sa gahum sang Amay.

Tungod pirme Niya ginahimo ang mga butang nga makapahamuot sa Iya Amay, kag tungod Sia “nagsunod sa pagbuot sang Amay sa tanan nga butang,” ikaw kag ako sarang nga makaangkon sang bag-o nga mga panugod. Batona ang inyo bag-o nga panugod, bisan sining adlaw, karon mismo. Si Jesucristo ang Tagsulat kag Manugperpekto sang aton pagtuo, nga nagasulat sang indi maisip nga bag-o nga mga kapitulo upod sa aton. Sia ang Panugod kag ang Katapusan—ang katapusan sang aton kahuy-anan kag pag-antos, kag ang panugod sang bag-o nga kabuhi sa Iya, nga ginatugotan kita nga batunon ang Iya grasya, bayaan ang nagligad kag magsugod liwat nga may bag-o nga pamanag-banag, bisan pila ka beses nga kinahanglan naton. Matuod gid ang Iya “kaayo kag kaluoy magasunod sa [aton] sa tanan nga inadlaw sang [aton mga kabuhi].” Sa ngalan ni Jesucristo, amen.