Maghugyaw para sa Kada Isa

Sang nagligad lang nakabasa ako sang isa ka inagihan nga nagtandog gid sa akon. Natabo ini sa USA Masters Track and Field National Championship—isa ka kompetisyon para sa mga tigulang.

Isa sa partisipante sa 1,500-meter event amo ang 100-anyos nga si Orville Rogers. Siling sang tagsulat:

“Sang maglupok ang starter pistol, nagdalagan ang mga runner, kag si Orville madasig nga nabutang sa pangulihi, kon diin nga nagpabilin sia nga isahanon sa bilog nga palumba, nga nagasagnoy sang iya mga tiil. [Sang] nakatapos ang pinakaulihi nga runner magluwas kay Orville, si Orville may duha pa kag tunga ka tiyog nga himuon. Halos 3,000 ka tumalan-aw ang mahipos nga nagatan-aw sa iya, nga mahinay nga nagalibot sa track—lubos, malinong, kag nagaisahanon.

“[Pero] sang magsugod na sia sa iya katapusan nga tiyog, nagtindog ang tumalan-aw, nga nagahugyaw kag nagapamalakpak. Sang tion nga malapit na sia makainang, nagdaguob ang hinugyaw sang mga tumalan-aw. Tungod sa nagahugyaw nga pagpaisog sang linibo ka tumalan-aw, gingamit ni Orville ang nabilin niya nga kusog. Naghugyaw sa kasadya ang mga tumalan-aw sang nalambot niya ang finish line kag ginhakos sia sang iya mga kontra sa palumba. Mapainubuson kag mapinasalamaton si Orville nga nagkaway sa mga tumalan-aw kag naggwa sa track upod ang bag-o niya nga mga abyan.”

Ini ang ika-lima nga palumba ni Orville sa kompetisyon, kag sa iban nga mga event, sia man ang pinakaulihi. May mga matentar nga husgaran si Orville, nga kuntani wala na sia mag-entra sa palumba sa edad niya—nga indi na sia bagay sa palumba tungod ginapadugay lang niya ang iya mga event kag apektado ang tanan.

Pero bisan ulihi sia pirme makatapos, nakahimo si Orville sang lima ka world record sina nga adlaw. Wala sa mga nagatan-aw sa palumba ang mapati nga posible ini, pero indi man ang tumalan-aw ukon ang iya mga kontra ang hurado. Wala sang ginlapas nga patakaran si Orville, kag wala ginpanubo sang mga opisyal ang ila pagsulundan. Nagdalagan sia sa pareho nga palumba kag gintuman ang pareho nga ginapangayo sa iban pa nga mga nagpalumba. Pero ang iya lebel sang kabudlay—sa sining kaso, ang iya edad kag limitado nga pisikal nga kapasidad—ginkwenta paagi sa pagbutang sa iya sa masobra-100 nga age division. Kag sa sina nga division, nakahimo sia sang lima ka world record.

Pareho nga ginkinahanglan ni Orville sang dako nga kaisog para maglapak sa track tagsa ka tion, nagakinahanglan man sang dako nga kaisog ang iban naton nga mga sister kag brother para maglapak sa arena sang kabuhi kada adlaw, nga nakabalo nga pwede sila husgaran bisan pa nga ginahimo na nila ang tanan batok sa dalagko nga mga hangkat para magsunod sa Manluluwas kag tahuron ang ila mga kasugtanan sa Iya.

Bisan diin man kita nagaestar sa kalibutan, bisan ano pa ang aton edad, tig-una nga kinahanglanon sang tawo nga tanan kita makabatyag nga parte kita, nga gusto kag kinahanglan man kita sang iban kag ang aton kabuhi may katuyoan kag kahulugan, bisan ano man ang aton sirkumstansya ukon limitasyon.

Sa katapusan nga tiyog sang palumba, mabaskog nga naghinugyaw ang mga tumalan-aw para kay Orville, nga naghatag sa iya sang kusog nga magpadayon. Wala kaso kon sia ang pinakaulihi nga nakatapos. Para sa mga nag-ilentra kag sa kadam-an, masobra pa ini sa kompetisyon. Sa madamo nga pamaagi, isa ini ka matahum nga halimbawa sang ginapangabuhi nga gugma sang Manluluwas. Sang makatapos si Orville, tanan sila ululupod nga nagpangalipay.

Pareho sa Masters Championship, ang aton mga kongregasyon, kag mga pamilya pwede mangin mga tilipunan nga maghugyaw para sa kada isa—mga komunidad sa kasugtanan nga ginapabaskog sang gugma ni Cristo sa isa kag isa—nga ginabuligan ang kada isa nga malampuwasan ang bisan ano nga hangkat nga aton ginaatubang, nga ginahatagan ang kada isa sang kusog kag pagpaisog nga wala ginahusgaran ang kada isa. Kinahanglan naton ang kada isa. Ang diosnon nga kusog nagahalin sa pag-isa, kag amo ina kon ngaa handum gid ni Satanas nga tungaon kita.

Ang masubo, para sa iban sa aton, mabudlay kon kaisa ang pagsimba sa madamo nga rason. Mahimo nga may ara sang mga may pamangkutanon parte sa pagtuo ukon may social anxiety ukon depresyon. Mahimo nga may halin sa iban nga pungsod ukon rasa ukon tawo nga lain ang mga inagihan sa kabuhi ukon pamaagi sa pagtan-aw sang mga butang amo nga pamatyag nila lain sila sangsa kadam-an. Mahimo nga ini sila ang kulang-sa-tulog kag ginabudlayan nga mga ginikanan sang magagmay nga kabataan ukon mga kabataan ukon wala bana/asawa sa kongregasyon nga puno sang mga mag-asawa kag pamilya. Mahimo nga isa man ini ka tawo nga nagatipon pa sang kaisog para magbalik pagkatapos sang tinuig nga pagpalayo ukon tawo nga pamatyag nila indi sila bagay kag indi gid sila mangin angayan.

Siling ni Pangulong Russell M. Nelson: “Kon may mag-asawa sa inyo ward nga nagbulagay, ukon isa ka lamharon nga misyonero nga nagpuli temprano, ukon tin-edyer nga nagaduhaduha sa iya testimonya, indi nila kinahanglan ang inyo paghusga. Kinahanglan nila maeksperiyensyahan ang putli nga gugma ni Jesucristo sa inyo mga tinaga kag mga aksyon.”

Ang aton eksperiyensya sa simbahan gintuyo nga makahatag sang importante nga koneksyon sa Ginuo kag sa kada isa nga kinahanglan kaayo para sa aton espiritwal kag emosyunal nga ikaayo. Upod sa mga kasugtanan nga aton ginhimo sa Dios, sumugod sa bunyag, amo ang aton responsibilidad nga palanggaon kag atipanon ang kada isa bilang mga miyembro sang pamilya sang Dios, mga miyembro sang lawas ni Cristo, kag indi lang para tsekan ang kahon sang mga dapat naton obrahon.

Ang Cristohanon nga pagpalangga kag pag-atipan mas mataas kag mas balaan. Ang putli nga gugma ni Cristo amo ang gugma sa isigkatawo. Sa ginsiling ni Pangulong Nelson, “Ang gugma sa isigkatawo nagatulod sa aton nga ‘magpas-an sang palas-anon sang isa kag isa’ [Mosias 18:8] imbes nga magdugang sang palas-anon sang kada isa.”

Siling sang Manluluwas, “Sa sini ang tanan nga tawo makahibalo nga kamo mga disipulo ko, kon maghigugmaanay kamo.” Gindugang ni Pangulong Nelson: “Ang gugma sa isigkatawo amo ang mayor nga kinaiya sang tunay nga sumulunod ni Jesucristo.” “Ang mensahe sang Manluluwas maathag: Ang tunay Niya nga mga disipulo nagapabakod, nagapataas, nagapaisog, nagakumbinsi, kag nagapapagsik. … Kon paano kita makighambal sa kag parte sa iban … importante kaayo.”

Ang pinanudlo sang Manluluwas parte sini tama ka simple. Ginpalip-ot ini sa Bulawanon nga Pagsulundan: Himoa sa iban ang gusto mo nga himuon sang iban sa imo. Ibutang ang imo kaugalingon sa lugar sinang tawo kag kabiga sila sa paagi nga gusto mo nga kabigon ka kon ara ka sa ila lugar.

Ang Cristohanon nga pagtrato sa iban indi lang para sa mga ara sa aton mga pamilya kag mga kongregasyon. Upod diri ang aton mga utod sa iban nga pagtuluohan ukon ang mga wala gid nagatuo. Upod sina diri ang aton mga utod nga halin sa iban nga lugar kag mga kultura, amo man ang mga lain ang ginapatihan sa pulitika. Kita tanan parte sang pamilya sang Dios, kag palangga Niya ang tanan Niya nga kabataan. Ginahandum Niya nga palanggaon Sia sang iya kabataan kag amo man ang kada isa.

Ang kabuhi sang Manluluwas isa ka ehemplo sang pagpalangga, pagtipon, kag pag-alsa bisan ang mga ginhusgaran sang sosyedad bilang mga sinikway kag mahigko. Ang iya ehemplo amo ang ginasugo sa aton nga aton sundon. Ari kita diri para magpatubo sang Cristohanon nga mga kinaiya kag sa ulihi mangin pareho sa aton Manluluwas. Ang Iya ebanghelyo indi ebanghelyo sang mga listahan; ebanghelyo ini sang pagtubo—nga mangin pareho sa Iya kag magpalangga pareho sa Iya ginahimo. Gusto Niya nga mangin katawhan kita sang Sion.

Sang masobra 25 na ang akon edad, nakaeksperiyensya ako sang panahon sang grabe nga depresyon, kag sa sina nga tion, daw pareho bala nga ang realidad nga may Dios gulpi lang nga nadula. Indi ko maeksplikar sang maayo ang akon nabatyagan magluwas nga daw lubos gid ako nga nadula. Halin sang gamay pa ako, nabal-an ko na nga ara ang akon Amay sa Langit kag pwede ko Sia istoryahon. Pero sa sina nga panahon, waay na ako makahibalo kon may ara gid man sang Dios. Wala ko pa ini maeksperiyensyahi sadto sa akon kabuhi, kag pamatyag ko ang bilog ko nga pundasyon daw nagakarusdak.

Bilang resulta, nangin mabudlay para sa akon ang pagsimba. Nagsimba ako, pero tungod lang kay nahadlok ako nga mabansagan nga “inactive” ukon “less faithful,” kag nahadlok ako nga mangin gin-asayn nga proyekto sang iban. Ang kinahanglan ko gid sang amo sadto nga panahon amo ang tunay nga gugma, pag-intiendi, kag suporta sang mga nagapalibot sa akon, indi paghukom.

Pila sa mga ginakahadlukan ko nga ihambal sang iban parte sa akon, ginhambal ko man mismo sa iban sang wala sila nagasimba pirme. Ina nga masakit nga personal nga eksperiyensya nagtudlo sa akon sang bilidhon nga mga leksyon parte sa kon ngaa ginsugo kita nga indi maghukom sa kada isa sang indi matarong.

May ara bala sa aton mga kaupdanan nga nagaantos sing mahipos, nahadlok nga mabal-an sang iban ang ila ginatago nga mga kabudlayan tungod waay sila kabalo kon ano ang mangin reaksyon?

Ang Ginuo lang gid ang lubos nga nakahibalo sang lebel sang kabudlayan nga ginadalagan sang kada isa sa aton sa palumba sang kabuhi—ang mga palas-anon, ang mga hangkat, kag mga kabudlayan nga aton ginaatubang nga indi dayon makita sang iban. Sia lang gid ang nakaintiendi sang makaliwat-sang-kabuhi nga mga pilas kag trauma nga mahimo naeksperiyensyahan sang iban sadto nga nagaapekto gihapon sa aton sa karon.

Kasami ginahusgaran man naton ang aton kaugalingon sing grabe, nga nagapamensar nga dapat mas malayo na kita sa track. Ang Ginuo lang gid ang lubos nga nakahibalo sang aton mga limitasyon kag ikasarang, kag tungod sina, Sia lang gid ang lubos nga kwalipikado nga maghusgar sang aton pagpasundayag.

Mga kauturan, magmangin pareho kita sa mga tumalan-aw sa istorya kag paisugon ang kada isa sa aton pagpanglakaton sa pagkadisipulo bisan ano pa ang aton mga sirkumstansya! Wala ina nagapangayo nga supakon naton ang mga patakaran ukon panubuon ang aton mga panindugan. Amo gani ini ang ikaduha nga dakong sugo—nga palanggaon ang aton isigkatawo pareho sa aton kaugalingon. Kag pareho sa hambal sang aton Manluluwas, “Sa bagay nga ginhimo ninyo ini sa isa sang labing kubos sini … , ginhimo ini ninyo sa akon,” sa kaayuhan ukon sa kalainan. Ginhambalan man Niya kita, “Kon indi kamo isa indi kamo akon.”

May mga tiyempo sa tagsa naton ka mga kabuhi nga kita ang magakinahanglan sang bulig kag pagpaisog. Mangako kita subong nga pirme ina himuon sa kada isa. Kon himuon naton ini, magadako ang aton pag-isa kag magapatigayon sang lugar para mahimo sang Manluluwas ang Iya sagrado nga buhulaton sang pagpang-ayo kag pagbag-o sang kada isa.

Sa kasa isa sa inyo nga pamatyag ninyo malayo na kamo kaayo sa sining palumba sa kabuhi, sa sining pagpanglakaton sa duta, palihog magpadayon lang. Ang Manluluwas lang gid ang makahusga sa aton sing lubos kon diin na kita dapat sa sining punto, kag maluluy-on Sia kag patas. Sia ang Dakong Hukom sa palumba sang kabuhi, kag ang solo nga nakaintiendi sing lubos sang lebel sang kabudlayan nga imo ginadalagan ukon ginalaktan ukon ginadagon-dagon. Kabigon Niya ang inyo mga limitasyon, ang inyo ikasarang, ang inyo nga inagihan sa kabuhi, kag ang mga palas-anon nga ginakarga ninyo sa tago, amo man ang mga handum sang inyo tagipusuon. Mahimo nga nagahimo ka man sang simboliko nga mga world record. Palihog indi magdula sang paglaum. Palihog magpadayon! Palihog pabilin diri! Diri ang imo lugar! Kinahanglan ka sang Ginuo, kag kinahanglan ka namon!

Bisan diin man kamo nagaestar sa kalibutan, bisan ano pa kalayo, palihog tandai nga ang inyo Amay sa Langit kag ang inyo Manluluwas nakakilala sa inyo sing lubos kag palangga kamo sing lubos. Wala kamo Nila nagakalimtan. Gusto kamo Nila dal-on pauli.

Padayon nga magtulok sa Manluluwas. Sia ang inyo salsalon nga kalaptan. Indi magbuya sa Iya. Nagapamatuod ako nga Sia buhi kag mahimo ninyo Sia nga saligan. Nagapamatuod man ako nga nagahugyaw Sia para sa inyo.

Kabay nga sundon naton tanan ang ehemplo sang Manluluwas kag maghugyaw para sa kada isa ang akon pangamuyo sa ngalan ni Jesucristo, amen.