Agud ang Tanan Mapasanagan

Bilang mga miyembro sang Ang Simbahan ni Jesucristo sang mga Santos sa Ulihing mga Adlaw nga nabugayan sang malahalon nga pagpakig-upod sang isa ka miyembro sang Pangulohan sang Dios, mahimo naton maangkon ang bulig sang perpekto nga tutor. Ang Balaan nga Espiritu nakahibalo sang tanan nga butang, nagatestigo sa kamatuoran, kag “magapahanumdum sa [aton] sang tanan nga butang.” Si Pangulong Russell M. Nelson nagahambal pirme parte sa importansya sang pagpamati sa tingug sang Ginuo. Gintudloan Niya kita kon paano imbitaron ang paggiya sang Balaan nga Espiritu kag sulit-sulit nga nagpangabay sa aton nga dugangan ang aton espirituhanon nga ikasarang nga magbaton sang rebelasyon.

Subong ginaagda ko kamo nga binagbinagon ang papel sang Balaan nga Espiritu, kapin pa inang angot sa pagtuon kag pagtudlo sang ebanghelyo sa balay kag sa simbahan. Ang Balaan nga Espiritu ginahatag paagi sa pangamuyo sang pagtuo kag samtang nagatinguha kita nga magpangabuhi nga kaangay-angay sa sining malahalon nga regalo. Ang inspirado nga manwal sang Simbahan nga Pagtudlo sa Paagi sang Manluluwas nagapaathag sang dugang nga mga prinsipyo nga ginpahamtang sang Ginuo para magbulig tigayon sang impluwensya sang Balaan nga Espiritu.

Isa sa sining mga prinsipyo amo ang ipatigayon ang matutom nga pagtuon. Sang una, ayhan ginapanumdum naton nga ang pagtudlo tsansa para sa ginikanan ukon titser nga agdahon ang Espiritu sa ila kaugalingon nga preparasyon kag dayon ipakigbahin ang ila natun-an sa kabataan ukon mga miyembro sang klase, nga ang papel amo ang mamati. Pero mas epektibo pa gid kon kita, bilang mga manugtuon, magkadto man nga handa kag ang mga titser nagapatigayon sang mga eksperiyensia sa pagtuon nga nagapasanyog sang personal nga rebelasyon direkta sa aton mga balatyagon kag mga hunahuna. Dayon, samtang ginahatagan kita sang mga oportunidad nga ipakigbahin ang aton nahibal-an paagi sa aton pagtuon kag halin sa Balaan nga Espiritu, ginabuligan naton ang isa kag isa nga matudloan kag mapabakod Kon ginagamit naton inang mga prinsipyo sang ebanghelyo, ang Espiritu makatigayon liwat sa pagsaksi sang ila pagkamatuod.

Pareho sang sa tanan nga butang, si Jesucristo ang perpekto nga ehemplo. Ginaimbitar Niya ang tagsa sa aton nga mangin matutom nga mga manugtuon kag tatapon ang aton mga testimonya. Gin-imbitar Niya ang iya mga disipulo nga maghanda sa pagtuon, ipakigbahin ang ila natun-an, kag mag-akto nga may pagtuo. Nagpangamuyo Sia para sa ila, nakita ang ila diosnon nga potensyal, nagpamati sa ila, kag ginbuligan sila nga mahibal-an nga ginapalangga sila kag ginakinahanglan.

Mahimo kita nga mas magtutok sa progreso sang manugtuon, sa pagsabat sang ila mga panginahanglan, kag sa pagbulig sa ila nga magpatubo sang espirituhanon nga pamatasan sang bilog-kabuhi nga pagkadisipulo. Bilang mga manugtuon, kon gamiton naton ang aton kabubut-on sa proseso sang pagtuon, ginapakita naton sa Balaan nga Espiritu ang aton kahanda nga Iya matudloan.

Nagapasalamat ako sa isa ka titser nga nag-agda sa akon nga mangin mas maayo nga manugtuon. Pagsugod ko sa kolehiyo, sayop ako nga naghunahuna nga ang eskwelahan lugar nga dapat agwantahon para makahampang sang isports. Isa ka adlaw, pagkatapos basa sang akon sinulatan sa isa ka topiko, nagsiling ang akon propesor nga nagapati sia nga may natural ako nga abilidad sa analitiko nga pagpamensar. Wala gani ako nakahibalo kon ano ang buot silingon sina. Siling niya nga kon may mas nakatutok nga pagtinguha pwede ako mangin maayo nga estudyante. Wala gid ina nagsulod sa akon hunahuna. Ang iya interes, pagpaisog, kag imbitasyon nagbag-o sang direksyon sang akon edukasyon kag nagbugay sing daku sa akon kabuhi.

Isa pa ka prinsipyo nga mapuslanon sa pag-imbitar sang Balaan nga Espiritu amo ang itudlo ang matuod nga doktrina. Buot silingon nga ang aton pagtuon kag pagtudlo sang ebanghelyo napasad sa pulong sang Dios kag wala naton ginapasobrahan ukon ginahaumhaum ang wala ginpahayag sang Ginuo. Sa baylo, nagatutok kita sa importante kag wala katapusan nga mga prinsipyo sang ebanghelyo, nga nagatugot sa Espiritu nga magsaksi sa kamatuoran. Sa liwat, ginasunod naton ang ehemplo sang Manluluwas. Siling Niya, “Ang akon pagtulon-an indi akon, kundi iya sang nagpadala sa akon.”

Ang matuod-tuod nga doktrina makita sa balaan nga mga kasulatan kag sa mga pinanudlo sang moderno nga mga propeta. Ang laygay sang Ginuo nga tun-an ang balaan nga mga kasulatan sing indibidwal kag bilang mga pamilya kag magsimba kada semana para magtuon sang Iya ebanghelyo nagahatag sang dalayawon nga pundasyon para hibal-on ang Iya doktrina kag pamatian ang Iya tingug. Ginausisa naton ang balaan nga mga kasulatan para maintiendihan ang istorya, ang mga prinsipyo nga ila ginatudlo, kag ang paggamit sining mga kamatuoran sa aton mga kabuhi. Daku nga bugay nga ang pulong sang Dios mahapos naton matigayon. Pamensara si Adan kag Eva, si Abinadi, ukon bisan pa gani ang Dakung Manunudlo nga si Jesucristo nga nagabisita sa aton mga balay ukon mga klase para tudloan kita. Mahimo nila ini kon magpaayaw kita sa pulong sang Dios. Upod ang sige-sige nga pagtinguha, mahimo naton matun-an nga intiendihon kag palanggaon ang balaan nga mga kasulatan kag magsalig nga may sabat ang mga ini sa mga pamangkot sang kalag.

May tiempo antes kami ginkasal, nga nabudlayan ang akon asawa nga si Kristi nga mabatyagan ang pagpalangga sang Amay nga Langitnon kag maintiendihan ang Iya plano para sa iya. Sang nagpangamuyo sia para sa giya, nabatyagan niya nga dapat sia mag-attend sa institute, gani nag-enroll sia sa klase sa Bag-ong Katipan. Ang paagi nga ang iya titser sa institute nagtudlo halin sa balaan nga mga kasulatan, bisan pa gani ang paagi nga iya ginakaptan ang mga ini, nagpakita kon ano niya ka palangga ang pulong sang Dios. Sa iya pagsulod sa klase, ang Balaan nga Espiritu naghutik sa iya nga ara sa balaan nga mga kasulatan ang iya ginakinahanglan. Ang gugma sang iya titser sa balaan nga mga kasulatan kag ang mga pagpabatyag sang Balaan nga Espiritu nagpukaw sang iya kaluyag nga sugdan ang serioso nga pagtuon sang pulong sang Dios—nga nangin bilog-kabuhi nga pagtinguha para sa lubos nga pagbag-o kag nakonsagrar nga pag-alagad.

Katapusan, pareho sang ginapanugyan sa Pagtudlo sa Paagi sang Manluluwas, ang aton pagtudlo kag pagtuon dapat nakatutok pirme kay Jesucristo. Pwede kita maghambal sing mas pirme kag mas matinahuron parte sa Iya kag magpangita sing mas madamo nga mga oportunidad nga magpabutyag sang panaksihon, pagpasalamat, kag pagpalangga para sa Iya. Bisan ano man ang sitwasyon, kon dumdumon naton Sia, mahimo naton maangkon ang “iya Espiritu sa pag-upod sa [aton].”

Isa ka paagi nga iplastar si Jesucristo nga sentro sang aton pagtudlo amo ang pagpatalupangod nga Sia ang perpekto nga ehemplo, ang simbolo kag ekspresyon sang tanan nga prinsipyo sang ebanghelyo. Bisan pa kon indi Sia direkta nga ginatumod sa istorya sa balaan nga kasulatan, mahimo gihapon naton Sia itudlo bilang ehemplo sang prinsipyo nga ginatudlo. Pwede kita magpamangkot, “Makapensar ka bala sang tion nga ginpakita ni Jesucristo ini nga prinsipyo?”

Mahimo man kita magtutok sa Iya paagi sa pagtuon sang Iya mga titulo, mga papel, kag mga kinaiya, nga nagatinguha nga hibal-on indi lang kon ano ang Iya nahimo kundi para mas maintiendihan man kon sin-o Sia. Halimbawa, kon nagatuon sang prinsipyo sang paghinulsol, importante nga intiendihon kon paano maghinulsol. Pero importante man nga dumdumon ang ginhimo ni Jesucristo para mangin posible ang paghinulsol kag maintiendihan kon ano ang ginatudlo sa aton sang paghinulsol parte sa Iya, parte sa Iya matuod-tuod nga kinaugali kag mga kinaiya. Ano ang ginapabutyag sang aton oportunidad nga maghinulsol parte sa Iya gugma, pagpasensya, kag kaluoy, Iya pagpati sa aton diosnon nga potensyal, Iya kahanda nga magbayad para sa aton mga sala, kag ang Iya kalipay sa pagpatawad? Kag ang pag-intiendi sang Iya mga titulo—pareho sang Cordero sang Dios, Manunubos, kag Manugbulong—nagabulig nga makita naton nga ang paghinulsol Iya imbitasyon para tinloan, bag-ohon, kag ayuhon kita. Ang pagtutok sa kon ano ang Iya nahimo para sa aton kag kon ano ang ginapabutyag sini parte sa kon sin-o Sia makabulig sa aton nga makaangkon sang “pagtuo padulong sa paghinulsol.”

Kon kaisa, indi naton dayon makita ang mga kinaiya sang Manluluwas nga ginaisaisa sa istorya sa balaan nga kasulatan. Halimbawa, kon magbasa parte kay Nefi nga nagapasad sang barko, mahimo nga magtutok kita kay Nefi lang. Pero ang pagtutok sa Manluluwas makabulig sa aton nga makita nga ining rekord wala gin-amligan para tudloan kita parte sa kahalangdon ni Nefi kundi para ipakita sa aton ang kahalangdon sang Dios—nga ginahatagan Niya kita sang kusog nga tumanon ang Iya mga kasugoan kag ginaluwas kita sa tinion sang panginahanglan.

Mahimo man kita magtutok sa importante nga papel ni Jesucristo sa perpekto nga plano sang kalipayan sang Amay nga Langitnon. Mahimo mabag-o ang direksyon sang aton mga kabuhi kon makita naton ang aton mga kahimtangan sa perspektibo sang wala katapusan nga plano sang Dios imbes nga tan-awon ang plano paagi sa perspektibo sang aton dutan-on nga mga sirkumstansya. Ang ebanghelyo indi listahan sang mga ginapangayo; ini ang maayong balita nga gindaug ni Jesucristo ang sala kag kamatayon Paagi sa pagtigayon sang Iya makahalawhaw nga grasya tungod sa pagtuman sang aton mga kasugtanan sa Dios nga makapangabuhi kita nga malipayon sa karon kag makahanda para sa kabuhi upod sa aton Amay sa Langit sa wala katapusan. Samtang nagatuon kita para makit-an ang Amay nga Langitnon kag ang Manluluwas sa balaan nga mga kasulatan, amat-amat nga makilala naton Sila sing mas maayo kag makita ang Ila gugma kag impluwensya sa aton mga kabuhi sing mas pirme kag mas mabaskog.

Madumduman ko gid pirme ang Espiritu nga akon nabatyagan bilang lamharon sang nagtudlo ang amon titser parte sa katapusan nga mga adlaw sa kabuhi sang Manluluwas. Ginbuligan Niya kami nga makita ang kahulugan sang mga hitabo sa hulut nga naibabaw, sa Getsemani, sa Golgota, kag sa wala unod nga lulubngan. Ginsugid niya ang iya daku nga kapasalamatan sa Manluluwas kag iya daku nga handum nga sundon Sia. Ang iya pinanudlo imbitasyon para sa Balaan nga Espiritu nga magpamatuod kay Jesucristo. Ang Espiritu nga nabatyagan ko sa sina nga klase nagpabakod sang akon pagtuo kag nagdugang sang akon pagpalangga kag pag-apresyar sa Manluluwas. Ang impluwensya sinang titser nagpabilin sa akon sa bilog ko nga kabuhi. Pareho sa ginhambal parte sa isa pa ka titser sang ebanghelyo, “Mahimo naton painitan ang aton mga kamot sa kalayo sang iya pagtuo.

Sa aton mga miting sa balay kag sa Simbahan, kon magtutok kita kay Jesucristo, itudlo ang Iya doktrina, kag magtuon sing matutom, ginaagda naton ang Balaan nga Espiritu nga pabakuron ang aton pagtuo kay Jesucristo kag buligan kita nga mangin mas pareho sa Iya, nga amo ang tuyo sang tanan nga pagtudlo kag pagtuon sang ebanghelyo.

Nagapasalamat ako para sa mga titser sa akon kabuhi, halin sa maayo nga mga ginikanan kag lokal nga mga lider kag mga titser hasta sa mga lalaki kag mga babayi nga gintawag nga magtudlo kag magpamatuod halin sa sining pulpito, nga nagabulig sa aton nga makilala kag sundon si Jesucristo. Kag nagapasalamat ako para sa Balaan nga Espiritu, ang perpekto nga tutor. Paagi sa Balaan nga Espiritu nakahibalo ako nga ang Langitnon nga Amay nagapalangga sa aton kag may perpekto nga plano para sa aton, nga si Jesus ang Cristo, ang Manluluwas kag Manunubos sang kalibutan, kag ang Iya ebanghelyo kag Simbahan ginpanumbalik. Mapasalamaton ako nga nagapamatuod sa sining mga butang sa ngalan ni Jesucristo, amen.