Wala sang Nagapungko nga Isahanon

Sa sulod sang 50 ka tuig, nagtuon ako sang kultura, pati ang kultura sang ebanghelyo. Nagsugod ako sa fortune cookies.

Sa Chinatown sang San Francisco, ang mga panyapon sa pamilya Gong nagatapos gid sa pagkaon sang fortune cookie kag sa maalam nga hulubaton pareho sang “Ang pagpanglakaton sang isa ka libo ka milya nagasugod sa isa ka tikang.”

Sang soltero ako, nagahimo ako sang mga fortune cookie. Nagasuksok sang puti nga gwantes, ginapilo kag ginahurma ko pabilog ang mga cookie nga bag-o lang ginbak-it sa oven.

Nakibot ako sang mabal-an, nga ang mga fortune cookie indi gali orihinal nga parte sang kultura nga Intsik. Para makilala ang Tsino, Amerikano, kag taga-Europa nga kultura sang fortune cookie, nagpangita ako sang mga fortune cookie sa madamo nga kontinente—pareho sang nagapangita sang ginhalinan sang sunog sa lasang. Ang mga kalan-an nga Tsino sa San Francisco, Los Angeles, kag New York nagaserbe sang mga fortune cookie, pero wala sa Beijing, London, ukon Sydney. Ang mga Amerikano lang ang nagaselebrar sang National Fortune Cookie Day. Tsino lang nga mga pasayod ang nagatanyag sang “Tunay nga Amerikano nga Fortune Cookies.”

Ang mga fortune cookie makalilingaw kag simple nga halimbawa. Pero ining prinsipyo sang pagkumparar sang mga nakagawian sa lainlain nga sitwasyon makabulig man sa aton sa pagkilala sang kultura sang ebanghelyo. Kag karon nagabukas ang Ginuo sang bag-o nga mga oportunidad nga magtuon sang kultura sang ebanghelyo samtang nagakatuman ang mga paanggid nga propesiya sa Libro ni Mormon kag Bag-ong Katipan.

Bisan diin nagasige giho ang mga tawo. Ang United Nations nagreport sang 281 milyon ka internasyonal nga migrante. Sobra ini 128 ka milyon ka indibidwal sangsa 1990 kag sobra sa tatlo ka pilo ini sa ginbanta sang 1970. Sa bisan diin, nagadamo na gid ang nagapamiyembro sa Ang Simbahan ni Jesucristo sang mga Santos sa Ulihing mga Adlaw. Kada Domingo, mga miyembro kag mga abyan sa 195 ka natawhan nga pungsod kag teritoryo nagatipon sa 31,916 ka kongregasyon sang Simbahan. Nagahambal kita sa 125 ka lengguahe.

Sang sini lang, sa Albania, North Macedonia, Kosovo, Switzerland, kag Germany, nasaksihan ko ang bag-o nga mga miyembro nga nagatuman sang paanggid sa Libro ni Mormon parte sa kahoy nga olivo. Sa Jacob 5, ang ulubasan sang Ginuo kag ang iya mga suluguon nagapabakod sang mga gamot kag sanga sang olivo paagi sa pagtipon kag pagsugpon (grafting) sadtong halin sa lainlain nga mga lokasyon. Karon ang mga anak sang Dios nagatipon bilang isa kay Jesucristo; nagatanyag ang Ginuo sang matahum nga natural nga pamaagi para pasangkaron ang aton mga bugay sa Iya ginpanumbalik nga ebanghelyo.

Agud ihanda kita para sa ginharian sang langit, nagaistorya si Jesus sang mga paanggid sang dako nga panyapon kag punsyon sang kasal. Sa sining mga paanggid, ang imbitado nga mga bisita naghimo sang mga rason para indi makakadto. Ginsugo sang amo ang iya mga suluguon nga “dalidali ka sa pagkadto sa mga dalan kag sa mga hilithilit sang banwa” kag “malapad kag makitid nga mga dalan” kag “dalha diri” ang mga imol, ang mga pingkaw, ang mga bulag kag ang mga piang. Sa espirituhanon nga punto, kita ina tanan.

Siling sa balaan nga kasulatan:

“Pagaagdahon ang tanan nga nasyon” sa “panihapon sa balay sang Ginuo.”

“Ihanda ninyo ang alagyan sang Ginuo, … agud maglapnag ang iya ginharian sa duta, agud mabaton ini sang mga pumuluyo sini, kag mangin handa para sa magaabot nga mga adlaw.”

Karon nga panahon ang mga gin-imbitar sa panihapon sang Ginuo nagahalin sa tagsa ka lugar kag kultura. Tigulang kag bata, manggaranon kag imol, lokal kag global, ginahimo naton ang aton mga kongregasyon sa Simbahan nga daw pareho sang aton mga komunidad.

Bilang punong Apostoles, nakita ni Pedro ang langit nga nagbukas sang palanan-awon parte sa “habol nga malapad nga ginatunton sa apat ka pamusod, … nga sa sulod ang tanan nga sahi sang … kasapatan.” Gintudlo ni Pedro: “Matuod gid ginahantop ko nga ang Dios walay ginapasulabi sa mga tawo. … Kay ang bisan sin-o nga nagakahadlok [sa Ginuo] kag nagahimo sing matarong, bisan ano ang iya rasa, nahamut-an sia sang Dios.”

Sa paanggid sang maayong Samariahanon, ginaimbitar kita ni Jesus nga magtipon sa kada isa kag sa Iya sa Iya dalayunan—sa Iya Simbahan. Ginaagda Niya kita nga mangin maayo nga mga kasilingan. Ang maayong Samariahanon nagpromisa nga magbalik kag bayaran ang pag-atipan sang ara sa Iya dalayunan. Ang pagpangabuhi sang ebanghelyo ni Jesucristo nagalakip sang paghatag sang lugar para sa tanan sa Iya ginpanumbalik nga Simbahan.

Ang kahulugan sang “kuwarto sa dalayunan” nagalakip sang “wala sang nagapungko nga isahanon.” Kon magsimba kamo, kon may makita kamo nga nagapungko nga isahanon, pwede bugnuhon ninyo sia kag tuparan? Mahimo nga indi ninyo ini kustombre. Basi lain ang hitsura ukon panghambal sining tawo sa imo. Kag siyempre, sa mahimo isiling sang fortune cookie, “Ang pagpanglakaton sa pag-abyanay sa ebanghelyo kag pagpalangga nagasugod sa una nga pagbugnuhanay kag indi pagpungko nga isahanon.”

Ang “wala sang nagapungko nga isahanon” mahimo man nga nagakahulugan nga wala sang nagapungko nga isahanon sa emosyunal ukon espiritwal. Nag-upod ako sa nagakalisod nga tatay para bisitahon ang iya bata nga lalaki. Tinuig ang nagligad, malipayon gid ang bata nga mangin bag-o nga deacon. Gin-updan ining okasyon sang pagbakal sang iya pamilya sang una niya nga bag-o nga sapatos.

Pero sa simbahan, ginkadlawan sia sang mga deacon. Bag-o ang iya sapatos, pero indi uso. Nahuy-an kag nasaklaw, nagsiling ang bata nga deacon nga indi na sia magbalik-balik sa simbahan. Nagsakit ang akon tagipusuon para sa iya kag sa iya pamilya.

Sa yab-ukon nga dalanon pa-Jerico, ang tagsa sa aton ginkadlawan na, nahuy-an kag nasaklaw, siguro ginyaguta ukon gin-abuso. Kag sa lainlain nga lebel sang tuyo, ang tagsa sa aton nagbalewala man, wala nagsapak ukon nagpamati, basi hungod nga nagsakit sang iban. Mismo tungod nga nasaklaw kita kag nakasaklaw sang iban nga ginadala kita tanan ni Jesucristo sa Iya dalayunan. Sa Iya Simbahan kag paagi sa Iya mga ordinansa kag kasugtanan, nagadangop kita sa isa kag isa kag kay Jesucristo. Nagapalangga kita kag ginapalangga, nagaserbisyo kag ginaserbisyohan, nagapatawad kag ginapatawad. Palihog dumduma, “wala sang kasubo sa duta nga indi mabulong sang langit”; ang mga problema sa duta nagamag-an—ang aton kalipay sa Manluluwas tunay.

Sa 1 Nefi 19, mabasa naton: “Bisan ang Dios mismo sang Israel ginatasak [nila] sang ila mga tiil; … ginasikway nila sia. … Gani bunalon nila sia, kag batason niya ini; kag sakiton nila sia, kag batason niya ini. Huo, duplaan nila sia, kag batason niya ini.”

Siling sang akon abyan nga si Propesor Terry Warner nga ang paghusga, pagbunal, pagsakit, kag pagdupla indi pakis-a kis-a nga mga hitabo nga natabo lang sa mortal nga kabuhi ni Cristo. Ang pagtratar naton sa kada isa—labi na sa ginagutom, sa ginauhaw, sa nagaisahanon—amo man ang pagtratar naton sa Iya.

Sa Iya ginpanumbalik nga Simbahan, mas maayo kita tanan kon wala sang nagapungko nga isahanon. Indi lang kita basta mag-akomodar ukon magtolerar. Sinsero kita nga magbaton, magkilala, mag-minister, magpalangga. Kabay nga ang tagsa ka abyan, utod nga babayi, utod nga lalaki indi mangin daw dayo ukon estranghero kundi pareho sang bata sa iya panimalay.

Sa karon nga panahon kadamo sang ginasubuan kag nagaisahanon. Ang social media kag artificial intelligence nagaresulta sa aton paghandum sang kasuod kag tawhanon nga koneksyon. Gusto naton mabatian ang tingug sang kada isa. Gusto naton sang tunay nga pag-ululupod kag kaayo.

Madamo sang rason kon ngaa pamatyag naton daw indi kita him-os sa simbahan—nga, kon ihambal pa, nagapungko kita nga isahanon. Nagapalibog kita sa aton panghambal, ginasuksok, sitwasyon sa pamilya. Siguro pamatyag naton kulang kita, baho sang aso, nagahandum sang moral nga katinlo, nakigbulag sa isa ka tawo kag nagabatyag sang kasakit kag kasaklaw, nagapalibog parte sa sini ukon sina nga polisiya sang Simbahan. Basi solo-lawas kita, diborsyado, balo. Magahod ang aton kabataan; waay kita sang kabataan. Wala kita nakaserbisyo sa misyon ukon ginpapauli sing temprano. Ang listahan nagapadayon.

Ang Mosias 18:21 nagaimbitar sa aton nga bugkuson ang aton mga tagipusuon sa gugma. Ginahagad ko kamo nga buhinan ang pagpalibog, buhinan ang paghusga, buhinan ang pagpabug-at sa iban—kag, kon kinahanglan, buhini ang pagpabudlay sa kaugalingon. Indi naton mahimo ang Sion sa isa ka adlaw lang. Pero ang tagsa ka “hello,” ang tagsa ka mainit nga pag-amoma, mas nagalapit sang Sion. Mas magsalig kita sa Ginuo kag pilion nga sundon ang tanan niya nga kasugoan sing malipayon.

Sa doktrina, sa panimalay sang pagtuo kag pag-inabyanay sang mga Santos, wala sang nagapungko nga isahanon tungod ululupod kita sa kasugtanan kay Jesucristo.

Gintudlo ni Propetang Joseph Smith: “Ginbilin ini para kita makakita, makapartisipar kag makabulig sa pag-abante sang himaya sang ulihing-adlaw, ‘ang dispensasyon sang kabug-osan sang panahon … ,’ kon diin ang mga Santos sang Dios tingbon halin sa tagsa ka nasyon, kag kaliwatan, kag katawhan.”

Ang Dios “wala sang ginaobra kundi ang para sa benepisyo sang kalibutan; … para mabutong niya ang tanan nga lalaki [kag babayi] sa iya. …

“… Ginaimbitar Niya sila tanan nga magpalapit sa iya kag mag-ambit sang iya kaayo; … kag ang tanan palareho sa Dios.”

Ang pagbag-o padulong kay Jesucristo nagapangayo nga ihal-id naton ang kinaandan nga tawo kag kalibutanon nga kultura. Sa ginatudlo ni Pangulong Dallin H. Oaks, kinahanglan naton buy-an ang bisan ano nga tradisyon kag kultural nga pangginawi nga kontra sa kasugoan sang Dios kag mangin mga Santos sa Ulihing mga Adlaw. Ginpaathag niya, “May pinasahi nga kultura sang ebanghelyo, hugpong sang mga panindugan kag gawi nga komon sa tanan [nga] miyembro sang Ang Simbahan ni Jesucristo sang mga Santos sa Ulihing mga Adlaw.” Ang kultura sang ebanghelyo nagalakip sang kaputli, semanal nga pagsimba, pagdumili sang makahulubog nga ilimnon, tabako, tsa, kag kape. Sakop sini ang katampad kag integridad, pag-intiendi nga nagaabante kita, wala nagapasaka ukon nagapanaog sa mga posisyon sang Simbahan.

Nagatuon ako halin sa matinuohon nga mga miyembro kag mga abyan sa tagsa ka lugar kag kultura. Ang pagtuon sang balaan nga kasulatan sa lainlain nga lengguahe kag kultural nga perspektibo nagapasangkad sang pag-intiendi sang ebanghelyo. Ang lainlain nga pagpahayag sang Cristohanon nga mga kinaiya nagapadako sang akon pagpalangga kag pag-intiendi sang akon Manluluwas. Ang tanan ginabugayan kon ginakilala naton ang aton kultural nga pagkatawo, sa gintudlo ni Pangulong Russell M. Nelson, bilang anak sang Dios, anak sang kasugtanan, disipulo ni Jesucristo.

Ang kalinong nga ara kay Jesucristo gintuyo gid para sa aton personal. Sang nagligad lang may solterito nga sinsero nga namangkot, “Elder Gong, makakadto pa ko ayhan sa langit?” Nagapamangkot sia kon mapatawad pa sia ayhan. Ginpamangkot ko ang iya ngalan, ginpamatian sia sing maayo, kag gin-imbitar nga istoryahon niya ang iya bishop, ginhakos sia sing todo. Naglakat sia nga may paglaum kay Jesucristo.

Ginsambit ko ining solterito sa lain nga okasyon. Sang ulihi nakabaton ako sang waay pirma nga sulat nga nagasiling, “Elder Gong, kami sang akon asawa nagpadako sang siyam ka kabataan … kag kaduha nga naglakat sa misyon.” Pero “pamatyagan ko pirme nga indi ako makasulod sa selestiyal nga ginharian … tungod grabe kaayo ang akon mga sala sang hubin pa ako!”

Padayon sa sulat, “Elder Gong, sang mag-istorya ka parte sa solterito nga nakaagom sang paglaum nga mapatawad, napuno ako sang kalipay, amat-amat ko nga narealisar nga basi [pwede ako mapatawad].” Ang katapusan sang sulat, “Nanamian na gani ako sang akon kaugalingon subong!”

Ang pagpasakop naton sa kasugtanan nagadalom samtang nagapalapit kita sa isa kag isa kag sa Ginuo sa Iya dalayunan. Ginabugayan kita tanan sang Ginuo kon wala sang nagapungko nga isahanon. Kag sino abi ang makahibalo? Basi ang tawo nga tuparan naton mangin ang pinakamanami nga fortune cookie naton nga abyan. Kabay nga pangitaon naton kag hatagan Sia sang lugar kag ang kada isa sa panihapon sang Kordero, ang hugot ko nga pangamuyo sa balaan nga ngalan ni Jesucristo, amen.