Magpakig-uli Kamo sa Dios

Sang ginatun-an ko ang balaan nga mga kasulatan, nakakita ako sang mga tinaga nga nagkuha gid sang akon atensyon, labi na gid kay may pinasahi nga kahulugan ang mga ini tungod sang mga eksperiyensia ko sa kabuhi. Dako nga bahin sang akon kabuhi ang ginhatag ko sa akon propesyon bilang forensic accountant. Sa sina nga eksperiyensia, ang tinaga nga magpakig-uli (ipasanto) nagkuha sang akon atensyon samtang ginabasa ko ang balaan nga mga kasulatan. Ang akon obra amo ang ipasanto ang ginreport nga mga kantidad sa mga pinansyal nga rekord paagi sa paggamit sang ihibalo sa accounting, auditing, kag imbestigasyon. Buot silingon, ang akon tuyo amo nga balansehon ang pinansyal nga report sa orihinal nga nagasuporta nga mga dokumento para mapasiguro ang kahusto kag kabalido. Mapisan ko nga ginatinguhaan nga lubaron ang mga diperensya, kag masami dako nga tion ang ginahatag sa paglubad bisan pa sang pinakagamay nga mga diperensya.

Si Apostoles Pablo nagpangabay sa mga Taga-Corinto nga “[magpakig-uli] kamo sa Dios.” Ang magpakig-uli sa Dios nagakahulugan nga mapabalik sa pag-isa sa Dios, ukon mapanumbalik ang relasyon sa Dios nga nahalitan ukon naguba tungod sang aton mga sala ukon mga buhat. Kon sayuron, ang magpakig-uli sa Dios nagakahulugan nga ipabagay ang aton pagbuot kag mga buhat sa pagbuot sang Dios ukon, suno sa gintudlo ni Pangulong Russell M. Nelson, tugotan ang Dios nga magpangibabaw sa aton mga kabuhi.

Sa natudlo sa balaan nga mga kasulatan, hilway kita sa paghulag para sa aton mga kaugalingon, “sa pagpili sang dalan sang kamatayon nga wala’y katubtuban ukon sang dalan sang kabuhi nga wala’y katapusan.” Pero kon indi kita mapisan, ining kahilwayan sa paghulag para sa aton mga kaugalingon mahimo magresulta sa indi pagsanto sa pagbuot sang Dios.

Ang propetang si Jacob nagtudlo nga kon masalapoan naton ang aton mga kaugalingon nga wala nagahiusa ukon wala nagasanto sa Dios, ang paagi gid lang nga matigayon naton ang pagpakig-uli amo ang “magpakig-uli sa [Dios] paagi sa pagbayad-sala ni Cristo.” Dapat naton marealisar nga ang pagpakig-uli nagasandig sa kaluoy, nga nagapahangop nga ang maalwan nga buhat sang pagbayad-sala ni Jesucristo nagahimo sang pagpakig-uli nga posible.

Samtang ginabinagbinag mo ang imo kabuhi, hunahunaa ang tion nga nagbatyag ka nga malayo sa Amay nga Langitnon tungod nagpalayo ka sa Iya. Halimbawa, basi indi ka na tanto ka tutom sa imo mga pagpangamuyo sa Iya ukon sa pagtuman sang Iya mga kasugoan. Pareho nga nagapili kita nga magdistansya sa Dios, dapat naton sugdan ang pagtinguha nga magpakig-uli. Ginpatalupangod sang Ginuo ang aton responsibilidad sang nagsiling Sia, “Magpalapit sa akon kag magapalapit ako sa inyo; pangitaa ako sing matutum kag makita ninyo ako; magpangayo kag magabaton kamo; magpanuktok kag pagabuksan ini sa inyo.”

Paano ang Manluluwas nagabulig sa aton nga mabalik kag mauli ining importante nga kaangtanan? Para sa akon, dako ang akon pag-uswag sa akon pagtinguha nga makig-uli sa Dios kon ginasunod ko ang laygay ni Pangulong Nelson kag nagahinulsol adlaw-adlaw. Ang rason amo nga ang pagpakig-uli nagakahulugan sang pagpanumbalik sang naguba nga relasyon, labi na gid sa tunga sang Dios kag katawhan, paagi sa pagkakas sang sablag sang sala.

Isa sa pinakadako nga pagpakig-uli nga mabasa naton sa balaan nga mga kasulatan amo ang iya ni Enos. May ara sa iya kabuhi nga wala nagasanto sa Dios. Ginpakita niya ang pagsalig sa Pagbayad-Sala ni Jesucristo para magpakig-uli sa Dios. Ginpaathag niya ang iya handum nga maghinulsol, iya pagpaubos, iya tutok, kag iya determinasyon. Ang iya pagpakig-uli sa Dios ginkompirma sang may nabatian sia nga tingug nga nagasiling, “Enos, ang imo mga sala ginpatawad na, kag pagapakamaayuhon ka.” Ginkilala ni Enos ang epekto sa iya sang paghinulsol kag pagpakig-uli sang nagsiling sia, “Kag ako, si Enos, nakahibalo nga ang Dios indi mahimo nga magbutig; gani, ang akon kabasulanan nadula sing lubos.”

Ang pagpakig-uli wala lang nagadala sang kaumpawan sa pagkakonsyensia kundi sang kalinong man sa aton kaugalingon kag sa iban. Ginapaayo sini ang mga relasyon, ginapahumok ang mga balatyagon, kag ginapabakod ang aton pagkadisipulo, nga nagadala sang dugang nga kompiyansa sa atubang sang Dios. Ang nagadala sa akon sang dako nga paglaum kag kompiyansa isa pa gid ka bunga sang pagpakig-uli nga ginlaragway ni Enos sang nagsiling sia, “Kag pagkatapos nga ako, si Enos, nakabati sining mga pulong, ang akon pagtuo nagsugod nga mangin di-mauyog sa Ginuo.”

Sang bata pa ako, ang akon lolo sa iloy may dako nga talamnan sang cherry. May tsansa ako nga mag-obra sa talamnan, kalabanan sa tig-ilinit kon anihon ang mga cherry. Bilang gamay pa gid nga bata, narealisar ko nga ang akon partisipasyon amo lang gid ang hatagan sang balde kag pasakaon sa kahoy para mamuksi sang mga cherry.

Dako ang ginbag-o sang pagpamupo sang mga cherry sang nagbakal ang akon lolo sang makina nga ginatawag cherry shaker. Ginasunggaban sining makina ang puno kag ginauyog ini nga nagaresulta sa pagkalahulog sang mga cherry sa lambat nga ginagamit sa pagkolekta sang mga cherry. Nakita ko nga kon sugdan uyog sang shaker ang kahoy, halos tanan nga cherry nagakalahulog halin sa kahoy sa pila lang ka segundo. Nakita ko man nga indi importante kon ang kahoy gin-uyog sing 10 ka segundo ukon isa gid ka minuto, may pila ka cherry nga indi gid mahulog. Indi gid sila matuod mauyog.

Ang pagkalahulog sang mga cherry halin sa kahoy posible tungod sang pagpagwa sang ethylene. Ini nga hormone nagapaluya sang mga selula (cells) sa tunga ang pungango sang cherry ka sang kahoy. Gani, ang pungango sang luto nga cherry mas mahapos makakas sa kahoy tungod sang nagluya nga koneksyon.

Sa balaan nga mga kasulatan, matun-an naton nga ang sanga ni Jesse isa ka paanggid para sa Mesias, si Jesucristo, nga ginpropesiya nga magahalin sa linahi ni Jesse, ang amay ni Haring David. Pareho nga ang ethylene nagapaluya sang koneksyon sang luto nga cherry sa sanga, ang pagsuay, pagduhaduha, kag kahadlok makapaluya sang aton koneksyon sa sanga ni Jesse, ukon kay Jesucristo, nga nagatugot nga mahapos kita mauyog kag mahamulag sa Iya. Bisan pa nga matutom kita, dapat kita mag-andam sa pagluya sang aton koneksyon kay Jesucristo.

Sa Doktrina kag mga Kasugtanan, bisan ang mga matutom ginapaandaman: “Apang may posibilidad nga ang tawo mahamulag sa grasya kag magpalayo sa buhi nga Dios.” Ang Ginuo nagapadayon, “Huo, … kag bisan pa inang mga ginpakabalaan paandaman man.” Para maglikaw sa pagkahulog, ang Ginuo naglaygay, “Gani, paandaman kag papangamuyuon pirme ang simbahan, agud indi sila mahulog sa tentasyon.”

Mahimo mapaanggid ang estado sang pagkahapos mauyog sa ginalaragway sang balaan nga kasulatan nga pagkaluto na sa kalaglagan nga may nagahilapit nga konsikwensya para sa mga binuhatan. Ang dinalan mahimo gamiton sing mas masangkad para ilaragway ang kahimtangan sang pagkadunot, korapsyon, ukon paghuyang nga nagahimo sang isa ka butang nga madali marusdak ukon maguba.

Ano ang ginasimbolo sining pagkaluto? Nagakahulugan bala ini nga mahimo naton malab-ot ang punto nga indi na gid kita magbag-o? Indi, sa pensar ko nagakahulugan ini nga makalab-ot kita sa punto nga indi kita handa nga magbag-o. Ang pangontra sa pagkaluto sa kalaglagan amo ang himuon inang mga butang nga magapabakod sang aton koneksyon kay Jesucristo. Sa nahambal na, ang paghinulsol nagdala kay Enos sa punto sang indi mauyog nga pagtuo. May kusog sa paghinulsol—tayuyon, gilayon, kag pirme nga paghinulsol. Sa gintudlo sa aton ni Pangulong Nelson, “Wala na sing labi pa nga makahilway, makapadungog, ukon labi kaimportante sa aton indibidwal nga pag-uswag sangsa tayuyon, adlaw-adlaw nga pagtutok sa paghinulsol.”

Dugang pa sa pagwali sang paghinulsol, ang propetang si Jacob nagtudlo nga ang pagtalupangod sang kamot sang Dios sa aton mga kabuhi, pagpangita kag pagbaton sang rebelasyon, kag pagpamati sa Dios kon nagahambal Sia tanan nagabulig sa aton para indi mauyog. Si Jacob nagtudlo man, “Gani, ginatun-an namon ang mga propeta, kag madamo kami sing mga rebelasyon kag sang espiritu sang propesiya; kag upod ining tanan nga mga saksi nakaangkon kami sing isa ka paglaum, kag ang amon pagtuo nangin di-mauyog.” Ang pagpamati kag pag-akto sa mga pulong kag mga imbitasyon sang mga propeta kag mga apostoles makapuno sa aton sang paglaum, kompiyansa, kag kusog, nga nagaresulta nga mangin di-mauyog ang aton pagtuo.

Natun-an ko nga ang handum nga magpakig-uli sa Dios dapat updan sang handum nga maghinulsol. Ang paghinulsol kag pag-eksperiyensia sang mga bugay sang Pagbayad-Sala ni Jesucristo nagaresulta sa di-mauyog nga pagtuo. Ang di-mauyog nga pagtuo nagaresulta sa handum nga magpakig-uli pirme sa Dios. Ini isa ka nagalibot, sulitsulit nga sulundan.

Mga kauturan, ginaimbitar ko kamo nga magpakig-uli sa Dios paagi sa Pagbayad-Sala ni Jesucristo. Nagapamatuod ako nga ang paghimo kag pagtuman sang mga kasugtanan nagapabakod sang aton koneksyon sa Manluluwas, gani nagalikaw sa aton nga mangin luto na sa kalaglagan. Nagapamatuod ako nga ining pagpakig-uli sa Dios, paagi sa Pagbayad-Sala ni Jesucristo, nagaresulta sa di-mauyog nga pagtuo.

Nakahibalo ako nga ikaw kag ako palangga sang Langitnon nga Amay, kag ginpadala Niya ang Iya Pinalangga nga Anak, si Jesucristo, para mangin aton Manluluwas, Manunubos, kag ang dakong Manugpasag-uli. Nagapamatuod ako kay Jesucristo kag ginahimo ini sa ngalan ni Jesucristo, amen.