“Ginahigugma Mo Bala Ako?”
Kon luyag naton ipakita ang aton gugma sa Dios, dapat naton hangpon kon paano Niya ginakilala ang aton gugma.
Sa paanggid parte sa nadulang anak, ang magulang nga lalaki nabudlayan primero sa pagselebrar sang ang iya manghod nga lalaki nagpauli pagligad sang pila ka tion sang sayop nga mga pagpili kag sang “gin-usikan niya ang iya pagkabutang sa patuyang nga pagpangabuhi.” Ang bugal kag pagpakamatarong-sa-kaugalingon sang magulang nagpugong sa iya sa pagbaton sang kalipay sang pagbalik sang iya mahinulsulon nga utod. Mahimo man naton mapaligad ang mga kahigayunan nga wala ginapahibalo ang aton mga pinalangga, paagi sa aton mga pulong kag mga buhat, sang aton sinsero nga gugma para sa ila.
Madamo sing gamhanan nga mga halimbawa sa balaan nga mga kasulatan sang sinsero nga gugma nga napaambit kag nabaton: Si Noemi kag Rut, Amon kag Haring Lamoni, ang nadulang anak kag iya amay, ang Manluluwas kag Iya mga disipulo.
Kon ang gugma hilway nga ginahatag kag sinsero nga ginabaton, nagaresulta ang maayo nga siklo sa pagdugang sang gugma sa tunga sang nagahatag kag sang nagabaton.
Ang gugma sang Dios perpekto, walay katapusan, nagapadayon, kag “tuman katam-is.” Ginapuno sini ang kalag sing “tuman kadako nga kalipay.” Apang, kon kaisa mahimo kita mabudlayan sa pagrealisar sang gugma sang Dios sa aton mga kabuhi. Apang, ang aton perpekto kag mapinalanggaon nga Amay nga Langitnon luyag gid nga maeksperiyensyahan naton ang Iya gugma sa bagay nga Sia “nagahambal sa [aton] suno sa … [aton] paghangop.” Iya ipahayag ang Iya gugma sa aton sa mga paagi nga kita, ang tagsa-tagsa sa aton, makahibalo. Mahimo naton maeksperiyensyahan ang gugma sang Dios sa aton kon maglantaw kita sang katahum sang palibot, ukon mabaton naton ang mga sabat sa mga pangamuyo, ukon mag-abot ang mga panghunahuna sa aton kaisipan sa tion nga kinahanglanon gid ini, ukon maeksperiyensyahan naton ang matam-is nga mga tinion sang kalipay. Ang pinakadako nga pagpakita sang gugma sang Amay nga Langitnon sa aton nga makahulugan sa panghunahuna kag tagipusuon amo ang sang gintugtan Niya ang Iya Hinigugma nga Anak nga ihalad ang Iya kaugalingon nga maghimo sang pagbayad-sala.
Pareho sa magulang sang nadulang anak, ang aton ginatutokan masami nga nasentro sa aton mga kaugalingon. Tuman kita kasako sa pagpangita sing pamatuod sang gugma sang Dios sa aton, kag nagakapaslawan kita kon indi naton ini makita. Apang ang matahum nga kabaliskaran amo nga kon mas tutok kita sa pagpakita sang aton gugma sa Dios, mas mahapos naton mabatyagan ang Iya gugma sa aton. Ayhan ini ang rason kon ngaa ginsabat sang Manluluwas ang pamangkot “Ano bala ang dako nga sugo sa kasugoan?” sa sining simple kag importante nga pangagda: “Higugmaa ang Ginuo nga imo Dios sa bug-os mo nga tagipusuon, kag sa bug-os mo nga kalag, kag sa bug-os mo nga hunahuna.”
Kon kaisa ang paagi nga ginapakita naton ang aton gugma sa mga ginapakamahal naton mahimo nga indi ang paagi nga ginakilala nila ang gugma. Mahimo ini makapaslaw sa nagahatag kag sa nagabaton. Mahimo nga makabulig ang magpamangkot sa aton mga pinalangga kon paano nila mabal-an ang gugma nga ginapabutyag. Kag, kon luyag naton ipakita ang aton gugma sa Dios, dapat naton hangpon kon paano Niya ginakilala ang aton gugma. Maayo lang, kay ginlaragway Niya sing maathag ang pila ka paagi sa balaan nga mga kasulatan nga sarang naton mapakita ang aton gugma sa Iya.
Ginahigugma Mo Bala Ako Sing Labi Pa Sini sa Ila?
Sa nagapanudlo nga paghinambalanay sa tunga ni Pedro kag sang nabanhaw nga Ginuo sa Dagat sang Tiberias, matun-an naton ang mga paagi nga sarang naton mapakita ang aton gugma sa Ginuo.
“Si Jesus nagsiling kay Simon Pedro, Simon, anak ni Jonas, ginahigugma mo bala ako sing labi pa sini sa ila? Nagsiling sia sa iya, Huo, Ginuo; ikaw nakahibalo nga ako nagahigugma sa imo.”
Ang panguna nga pamangkot sa sining pag-usisa sang Ginuo amo ang “Ginahigugma mo bala ako sing labi pa sini sa ila?” Ginapakita naton ang aton gugma sa Ginuo kon ginapasulabi naton Sia sangsa “ila,” kag ining “ila” mahimo nga bisan sin-o lang, bisan ano nga aktibidades, ukon bisan ano nga nagapahigad sa Iya bilang pinakaimportante nga impluwensya sa aton kabuhi.
Indi gid bastante ang tion sa isa ka adlaw, isa ka semana, isa ka bulan, ukon sa isa ka tuig agud mahimo ang tanan nga luyag ukon kinahanglan naton nga himuon. Bahin sang pagtilaw sang kabuhi sa duta amo ang paggamit sang hamili nga tion sa kon ano ang labing importante para sa aton walay katapusan nga kaayohan kag buy-an ang mga butang nga indi tanto ka importante.
Si Pangulong Russell M. Nelson nagsiling: “Ang pamangkot para sa tagsa sa aton … pareho lang. … Handa ka bala nga tugotan ang Dios nga mangin pinakaimportante nga impluwensya sa imo kabuhi? Tugotan mo bala ang Iya mga pulong, ang Iya mga kasugoan, kag ang Iya mga kasugtanan nga mag-impluwensya sang imo ginahimo sa kada adlaw? Tugotan mo bala ang Iya tingug nga magpanguna sangsa bisan ano nga iban pa? Ikaw bala handa nga unahon ang bisan ano nga kinahanglan Niya ipahimo sa imo sangsa iban mo pa nga mga ambisyon? Ikaw bala handa nga ipaidalom ang imo pagbuot sa Iya?” Ginapakita naton ang aton pagkadisipulo kag gugma sa Dios kon ginahimo naton Sia nga aton una nga prayoridad.
Pahalba ang Akon mga Carnero
Sa masunod nga bersikulo sining paghinambalanay sa tunga ni Pedro kag sang Manluluwas, matun-an naton ang isa pa ka paagi nga ginakilala sang Ginuo ang aton mga pagpabutyag sang gugma: “[Ang Ginuo] nagsiling sa iya liwat sa ika-duha nga tion, Simon, anak ni Jonas, ginahigugma mo bala ako? Nagsiling sia sa iya, Huo, Ginuo; ikaw nakahibalo nga ako nagahigugma sa imo. Nagsiling sia sa iya, Pahalba ang akon mga carnero.”
Ginapakita naton ang aton gugma sa Amay nga Langitnon kon mag-alagad kita, magpamati, maghigugma, magbayaw, ukon mag-alagad sa Iya mga anak. Ang ina nga pag-alagad mahimo nga pareho ka simple lamang sa pagtan-aw sa iban nga wala nagapanghusga. Sa ika-76 nga seksyon sang Doktrina kag mga Kasugtanan, matun-an naton ang parte sa karakter sinang mga magapanubli sang selestiyal nga himaya: “Makita nila kag mahibaloan ang tanan nga butang.” Ginatan-aw nila ang iban pareho sang pagtan-aw sang Dios sa ila, kag ginatan-aw Niya sila kon ano sila sarang nga mangin, nga may mahimayaon nga diosnon nga potensyal.
Pagpauli ko halin sa akon misyon, ako na ang nagdumala sang negosyo nga pagtatap sa ugsaran nga ginsugdan namon sang akon mga utod nga lalaki sang tin-edyer pa kami. Nangin masako man ako sa akon pag-eskwela sa unibersidad. Isa sadto ka semana sang tigpamulak, ang mabaskog nga ulan kag nagahilapit na nga final exams nagpahalawhaw sa akon kag nagpaatrasar sang akon ulobrahon sa ugsaran.
Sing tunga-tunga sang semana nagklaro na ang langit, kag nagplano ako nga maghingagaw sa akon ulobrahon sa ugsaran pagkatapos sang klase. Pero pagpauli ko, wala na ang akon trak kag mga gamit. Natingala ako, gani ginkadtoan ko ang naiskedyul na nga mga ugsaran; tanan sila natriman na sing maayo. Sa katapusan nga ginskedyul nga ugsaran, nakita ko ang akon manghod nga nagatulod sang mower. Nakita niya ako, nagyuhum, kag nagkaway. Grabe gid ang akon pasalamat gani, ginhakos ko sia kag ginpasalamatan. Ang iya makahulugan nga buhat sang pag-alagad nagpalig-on gid sang akon gugma kag katampad sa iya. Ang pag-alagad sa kada isa pat-od nga paagi sa pagpakita sang aton gugma sa Dios kag sa Iya Hinigugma nga Anak.
Mag-ako sang Iya Kamot sa Tanan nga Butang
Ginapakita man naton ang aton gugma sa Dios paagi sa aton mapinasalamaton nga tagipusuon. Ang Ginuo nagsiling, “Wala sa bisan ano nga paagi nga makasala ang tawo sa Dios, … luwas sinang wala nagaako sang iya kamot sa tanan nga butang.” Ginapakita naton ang aton gugma sa Dios paagi sa pagkilala sa Iya bilang ang ginahalinan sang tagsa ka maayo nga butang sa aton kabuhi.
Sa unang mga adlaw sang pagsugod sang kompanya, kami sang akon kaupod sa negosyo nagapangamuyo gid antes sang importante nga mga miting nga nagapangabay sang bulig sang Amay nga Langitnon. Makapila na nga beses nga ginsabat sang Dios ang amon mga pangamuyo, kag nangin maayo lang ang dalagan sang amon mga miting. Pagkatapos sing isa ka miting, nagmuno ang akon kaupod sa negosyo nga madasig kami magpangayo sang bulig pero mahinay magpasalamat. Sumugod sadto, nangin batasan na namon ang maghatag sing sinsero nga mga pangamuyo sang pagpasalamat, nga ginakilala ang kamot sang Ginuo sa amon mga kadalag-an. Ginapakita namon ang amon gugma sa Dios nga may “batasan sang kapasalamatan.”
Kon Ginahigugma Ninyo Ako, Tumanon Ninyo ang Akon mga Kasugoan
Isa pa ka paagi nga ginapakita naton ang aton gugma sa Amay nga Langitnon kag Iya Hinigugma nga Anak amo ang pagpili nga tumanon Sila. Ang Manluluwas nagsiling, “Kon ginahigugma ninyo ako, tumanon ninyo ang akon mga kasugoan.” Ini nga klase sang pagtuman indi bulag ukon obligado kundi sinsero kag kinabubut-on nga pagpabutyag sang gugma. Gusto sang Amay sa Langit nga maluyagan naton ang mangin matinumanon. Ang tawag diri ni Sister Tamara W. Runia “mapinalanggaon nga pagtuman.” Siling niya, “Bisan indi naton mahimo ang perpekto nga pagtuman apang, nagatinguha kita sing mapinalanggaon nga pagtuman subong, nga ginapili nga magpabilin, sa liwat kag liwat, tungod ginahigugma naton Sia.”
Ang Amay nga Langitnon naghatag sa aton sang kahilwayan sa pagpili agud mainspirar kita nga maluyagan naton ang pilion Sia. Ang iya buluhaton kag himaya indi lamang agud ipahanabo ang aton kabuhi nga wala katapusan kundi nagalakip man sang paglaum nga ang aton pinakadako nga handum amo ang magbalik sa Iya. Apang, indi gid Niya kita pagpiliton nga magtuman. Sa himno “Know This, That Every Soul Is Free [Hibaloa, Nga ang Tagsa ka Kalag Hilway],” aton ginakanta:
Bilang mga lider sa misyon, ako kag ang akon asawa nga si Christina nainspirar sang madamo kaayo nga misyonero nga nagpili nga mangin matinumanon, indi lamang tungod talaksan ini sa misyon kundi tungod luyag nila ipakita ang ila gugma sa Ginuo paagi sa pagpili nga magrepresentar sa Iya.
Si Elder Dale G. Renlund nagsiling, “Ang katuyoan sang aton Amay nga Langitnon sa pagkaginikanan indi agud nga ipahimo sa Iya mga anak ang husto; kundi agud nga papilion ang Iya mga anak nga himuon ang husto kag sa ulihi mangin pareho sa Iya. Kon luyag lang Niya nga mangin matinumanon kita, gamiton Niya gilayon ang mga padya kag mga silot agud impluwensyahan ang aton mga pagginawi.” Ginapakita naton ang aton gugma sa Dios kon pilion naton nga tumanon kag sundon Sia.
Ginakilala sang aton Amay nga Langitnon kag aton Manluluwas ang aton mga pagpabutyag sang gugma sa Ila kon unahon naton Sila sa aton kabuhi, kon mag-alagad kita sa kada isa, kon ginakilala naton nga may pagpasalamat ang tagsa ka bugay halin sa Ila, kag kon pilion naton nga magtuman kag magsunod sa Ila.
Nagapamatuod ako nga ang tagsa sa aton matuod nga anak sang Dios kag ginahigugma Niya kita sing lubos. Nagapamatuod ako nga luyag Niya nga maeksperiyensyahan naton ang Iya gugma sa mga paagi nga aton nahibaloan kag nahangpan. Kag ang matahum nga kalatingalahan amo nga maeksperiyensyahan naton ang Iya gugma sa aton sing labi kon ipakita naton ang aton gugma sa Iya. Sa ngalan ni Jesucristo, amen.