15:22

Himoa ang Imo Bahin sa Bug-os Mo nga Tagipusuon

Ni Elder Dieter F. Uchtdorf

Sang Korum sang Dose ka Apostoles

Magsalig sa Manluluwas kag magpakigbahin, sing pasensyoso kag sing matutum, sa paghimo sang imo bahin sa bug-os mo nga tagipusuon.

Sang nagligad nga tuig sa pagbiyahe ko sa Europa, ginbisitahan ko ang akon anay nga ulubrahan, ang Lufthansa German Airlines sa Frankfurt Airport.

Sa paghanas sang ila mga piloto, nagaoperar sila sing pila ka moderno, full-motion nga flight simulators nga makakopya sang halos bisan ano nga normal kag emerhensya nga paglupad sang eroplano. Sa madamo ko nga tinuig bilang kapitan sang eroplano, kinahanglan ko pasaron ang isa ka check flight sa flight simulator kada anum ka bulan agud mapabilin nga balido ang akon lisensya bilang piloto. Madumduman ko pa sadto ang grabe nga mga tinion sang stress kag kulba pero nabatyagan ko man ang kadalag-an pagkatapos nga mapasaran ko ang test. Bata pa ako sadto kag luyag ko gid ang ini nga hangkat.

Sa akon pagbisita, isa sang Lufthansa nga mga executive namangkot kon luyag ko nga tilawan liwat kag paluparon ang 747 simulator sang kaisa pa.

Antes pa ako matapungawan sa pamangkot, nabatian ko ang isa ka tingug—makatilingalahan kay daw akon gid—nga nagasiling, “Huo, gusto ko gid ina.”

Pagkahambal ko gid sina, gulpi ako nahalawhaw sang mga pamensaron. Madugay na gid kaayo humalin sang nagpalupad ako sang isa ka 747. Sadto nga tion bata pa ako kag may kompiansa nga kapitan. Karon may reputasyon ako nga kinahanglan ko tipigan bilang puno nga piloto sadto. Mahuy-an bala ako sini sa atubangan sining mga propesyunal?

Pero ulihi na para mag-isol, gani nagplastar na lang ako sa pulungkoan sang kapitan, ginbutang ang akon mga kamot sa pamilyar kag nanamian ko gid nga mga control, kag nabatyagan, sa liwat, ang kalipay sang paglupad samtang ang dako nga eroplano nagahagong sa runway kag naglupad sa kalangitan sang kahilwayan.

Nalipay ako magsiling nga nangin madinalag-on ang paglupad, ang eroplano wala maguba, kag amo man ang akon mismo nga imahe.

Bisan pa, ang eksperiyensya nagpaubos sa akon. Sang aktibo pa gid ako sadto, ang paglupad nangin kinaandan na lamang. Karon ginkuha sini ang tanan ko nga pagtalupangod sa paghimo sang tig-una nga mga butang.

Ang Pagkadisipulo Nagakinahanglan sang Disiplina

Ang akon eksperiyensya sa flight simulator isa ka importante nga pahanumdum nga ang pagkasampaton sa bisan ano nga butang—kon bala sa paglupad, pagbugsay, pagpanahi, ukon paghibalo—nagakinahanglan sing dalayon nga pagdisiplina sa kaugalingon kag praktis.

Mahimo kamo maghinguyang sing tinuig sa pagtigayon sang abilidad ukon pagpauswag sang talento. Mahimo kamo magpangabudlay gid sa bagay nga mangin kinaandan na lang ini sa inyo. Pero kon abi ninyo ang buot silingon sina pwede na kamo mag-untat sa pagpraktis kag pagtuon, amat-amat madula ang inyo ihibalo kag mga abilidad nga natigayon ninyo paagi sa dako nga pagsakripisyo.

Nagaaplikar ini sa mga abilidad pareho sang pagtuon sang lengguahe, pagtukar sang instrumento sa musika, kag pagpalupad sang eroplano. Nagaaplikar man ini para mangin disipulo ka ni Cristo.

Buot silingon, ang pagkadisipulo nagakinahanglan sang disiplina sa kaugalingon.

Indi ini pasapayan lang nga pagpanikasog, kag indi nga nataboan lang.

Ang pagtuo kay Jesucristo isa ka dulot, pero ang pagbaton sini isa ka hungod nga pagpili nga nagakinahanglan sang pagpangako sang bug-os naton nga “ikasarang, kaisipan kag kusog.” Kinahanglan ini tinguhaan nga himuon kada adlaw. Kada oras. Nagakinahanglan ini sing dalayon nga pagtuon kag determinado nga pagpangako. Ang aton pagtuo, nga amo ang aton katampad sa Manluluwas, nagabakod samtang ginatestingan ini batok sa oposisyon nga aton ginaatubang diri sa duta. Nagapadayon ini tungod ginapabakod naton ini, aktibo nga ginaaplikar naton ini, kag wala gid kita nagapangampo.

Sa pihak nga bahin, kon indi naton paggamiton ang pagtuo kag iya sini nagapasanag nga gahum paagi sa pag-akto sa sini, indi na kita sigurado gid sang mga butang nga sadto anay ginhuptan naton nga sagrado—indi na makasalig gid sang mga butang nga sadto anay nahibaloan naton nga matuod.

Ang mga tentasyon nga indi gid kuntani makasulay sa aton nagasugod nga mangin indi na gid tanto ka makahaladlok kag mangin mas makagalanyat na.

Ang kalayo sang testimonya kahapon makapainit sa aton sa malip-ot lamang nga tion. Kinahanglan ini sing dalayon nga pagpabakod agud padayon ini nga magdabdab.

Sa Bag-ong Katipan, ang Manluluwas nagtudlo sang paanggid parte sa isa ka amo nga naghatag sa tagsa sang iya mga alagad sang sagrado nga pagsalig—isa ka kantidad sang kwarta nga ginatawag nga mga talanton. Ang mga alagad nga nangin matutum sa paggamit sang ila mga talanton nagpadamo sini. Ang alagad nga naglubong sang iya talanton sang ulihi nadulaan sini.

Ang leksyon? Ang Dios nagahatag sa aton sang mga dulot—sang ihibalo, sang abilidad, sang oportunidad—kag luyag Niya nga gamiton naton kag padakuon ang mga ini agud nga mabugayan kita sini kag mabugayan ang iban Niya nga mga anak. Indi ina matabo kon ibutang naton inang mga dulot sa mataas nga estante pareho sang tropeo nga ginadayaw naton kon kaisa. Ang aton mga dulot mapadako kag mapadamo lamang kon gamiton naton ini.

Bulahan Ka

“Pero Elder Uchtdorf,” ayhan masiling ka, “wala ako sing bisan ano nga mga dulot ukon mga talento—wala gid sing amo sina ka mapuslanon.” Mahimo nga nagatulok ka sa iban nga ang ila mga dulot hilmunon kag dalayawon kag pamatyagan mo ordinaryo ka lang kon ikomparar. Mahimo ka maghunahuna nga sa kabuhi antes sa duta, sa adlaw sang dalagko nga mga dulot kag nanarisari nga mga talento, makaluluoy nga ang imo plato daw kahawan—ilabi na ikomparar sa puno-puno kag nagaalawas nga mga plato sang iban.

O, luyag ko gid kuntani nga hakson ka kag buligan nga maintiendihan ining dako nga kamatuoran: Isa ikaw ka bulahan nga tinuga sang kasanag, ang anak nga espiritu sang wala dulonan nga Dios! Kag ara sa sulod nimo ang potensyal nga labaw pa sa imo kaugalingon nga ikasarang nga hunahunaon.

Suno sa mga mamalaybay, nagakari kamo sa duta “sa banas sang mga panganod sang himaya”!

Ang istorya sang inyo ginhalinan diosnon, kag amo man ang inyo padulongan. Ginbayaan ninyo ang langit agud magkari diri, pero wala gid kamo ginbayaan sang langit!

Indi kamo kinaandan.

Bulahan kamo!

Sa Doktrina kag mga Kasugtanan, ang Dios nagpahayag:

“Madamo sang mga bugay, kag sa tagsa ka [tawo] ginahatag ang bugay paagi sa Espiritu sang Dios.

“Sa pila [ka mga miyembro] ginahatag ang isa, kag sa pila lain naman ang ginahatag, [kag] ang tanan makabenepisyo sa sini nga paagi.”

Ang pila sang aton mga dulot nalista sa balaan nga mga kasulatan. Madamo ang wala nalista.

Suno sa propeta nga si Moroni, “Indi ninyo pag-ipanghiwala ang mga dulot sang Dios kay madamo ang mga ini; kag nagahalin ang mga ini sa amo gihapon nga Dios.” Mahimo nga magpahayag ang mga ini sa “nagkalain-lain nga mga paagi … ; apang amo man ini ang Dios nga nagahikot sa tanan-tanan.”

Mahimo matuod nga ang aton espirituhanon nga mga dulot indi pirme magarbo, pero indi buot silingon nga indi na sila importante. Luyag ko ipaambit sa inyo ang pila ka espirituhanon nga mga dulot nga natalupangdan ko sa madamo kaayo nga mga miyembro sa bilog nga kalibutan. Binagbinaga kon nabugayan kamo sing isa ukon dugang pa nga mga dulot pareho sang:

Pagpakita sang kaluoy.
Paghatag atensyon sa mga tawo nga wala ginasapak.
Pagpangita sang mga rason nga mangin malipayon.
Pagkamahidaeton.
Pagtalupangod sa magagmay nga mga milagro.
Paghatag sing sinsero nga mga pagdayaw.
Pagpatawad.
Paghinulsol.
Pagpadayon.
Pagpaathag sing simple sang mga butang.
Pagpakig-angot sa mga kabataan.
Pagsakdag sang mga lider sang Simbahan.
Pagbulig sa iban nga mahibaloan nga kabahin sila.

Indi ninyo makita ining mga dulot nga napasundayag sa talent show sang isa ka ward. Pero nagalaum ako nga makita ninyo kon ano ini ka importante sa buluhaton sang Ginuo kag kon natandog ayhan ninyo, nabugayan, ukon nasalbar ang isa sang mga anak sang Dios paagi sa inyo mga dulot. Dumduma: ”Paagi sa diutay kag simple nga mga butang ginapahanabo ang dalagko nga mga butang.”

Gani himuon naton ang tagsa naton ka diutay nga bahin.

Himoa ang Imo Diutay nga Bahin

Mahal kong mga kauturan, mahal kong mga abyan, ginapangamuyo ko nga ang Espiritu makabulig sa inyo sa pagkilala sang mga dulot kag mga talento nga ginhatag sang Dios sa inyo. Dayon, kita, pareho sang matutum nga mga alagad sa paanggid sang Ginuo, magdugang kag magpadako sini.

Magaabot ang adlaw nga magatindog kita sa atubangan sang aton maluluy-on nga Amay sa Langit agud maghatag sang pagsaysay sang aton pagkatulugyanan. Luyag Niya mahibal-an kon ano ang aton ginhimo sa mga dulot nga Iya ginhatag sa aton—ilabi na, kon paano naton gingamit ang mga ini agud bugayan ang Iya mga anak. Ang Dios nakahibalo kon sin-o gid kita, kon ano kita mangin, kag gani mataas ang Iya mga ginapaabot sa aton.

Pero wala Niya ginapaabot sa aton nga maghimo sang dako gid, maisog, ukon mabudlay katama nga mga paglumpat agud makalab-ot dira. Sa kalibutan nga Iya gintuga, ang pagtubo nagakatabo sing amat-amat kag sing pasensyoso—pero dalayon man kag wala untat.

Dumduma, si Jesucristo ang naghimo na sang mabudlay katama nga bahin sang Iya gindaug ang kamatayon kag ang sala.

Ang aton bahin amo nga sundon ang Cristo. Bahin naton nga magtalikod sa sala, mag-atubang sa Manluluwas, kag maglakat sa Iya dalanon, sing amat-amat. Kon himuon naton ini, sing matutum kag sing tampad, makakas naton sa ulihi ang mga kadena sang mga kakulangan kag mga kasaypanan kag amat-amat nga mangin putli, tubtob sa sinang perpekto nga adlaw nga kita mangin perpekto kay Cristo.

Sarang malab-ot ang mga bugay. Napahamtang ang mga promisa. Bukas ang puwertahan. Ara sa aton ang desisyon kon magsulod kita kag magsugod.

Ang panugod mahimo nga diutay lang. Pero OK lang ina.

Kon maluya ang pagtuo, magsugod nga may paglaum kay Cristo Jesus kag sa Iya gahum sa paglimpyo kag pagtinlo.

Ginapangayo sang aton Amay nga atubangon naton ining hangkat sa pagtuo kag pagkadisipulo indi bilang kaswal nga mga turista kundi bilang bug-os tagipusuon nga mga tumuluo nga ginabayaan kag ginasikway ang Babilonia kag ginapahamtang ang ila mga tagipusuon, mga kaisipan, kag mga tikang pa-Sion.

Nakahibalo ako nga ang aton lamang nga mga pagpanikasog indi makahimo sa aton nga diosnon. Pero ang mga ini makahimo sa aton nga tampad kag dedikado kay Jesus nga Cristo, kag pwede Niya kita himuon nga diosnon.

Tungod sa aton hinigugma nga Manluluwas, wala sing ginatawag nga wala-sing-daug nga kahimtangan. Kon ibutang naton ang aton paglaum kag pagtuo sa Iya, sigurado na ang aton pagdaug. Ginapromisahan Niya kita nga matigayon ang Iya kusog, Iya gahum, kag Iya bugana nga grasya. Sing amat-amat, magapalapit kita sa sinang dako kag perpekto nga adlaw kon magpuyo na kita upod sa Iya kag sa aton mga pinalangga sa wala katapusan nga himaya.

Agud makalab-ot dira, kinahanglan kita maghimo sang aton bahin subong nga adlaw kag sa adlaw-adlaw. Nagapasalamat kita para sa mga tikang nga ginhimo naton kahapon, pero indi kita mag-untat dira. Nakahibalo kita nga damo pa kita sing dapat himuon, pero indi kita dapat magpaluya tungod sina.

Ina ang matuod nga kahulugan sang kon sin-o kita—mga sumulunod ni Cristo.

Ginahangyo ko kag ginapakamaayo ang tagsa ka miyembro sang Simbahan, kag ang tanan nga luyag nga mangin bahin sini, nga magsalig sa Manluluwas kag magpakigbahin, sing pasensyoso kag sing matutum, sa paghimo sang imo bahin sa bug-os mo nga tagipusuon—agud mangin lubos ang imo kalipay kag agud, isa ka adlaw, mabaton mo ang tanan nga may ara ang Amay. Nagasaksi ako sini sa ngalan ni Jesucristo, amen.