Kasimple nga Ara kay Cristo

Treinta’y-tres ka tuig na ang nagligad, nabaton ko ang tawag nga magserbisyo bilang misyonero sa Utah Ogden Mission. Siyempre, kay halin ako sa Europa, ang lokal nga mga tradisyon sa Utah pareho sang “berde nga Jell-O nga may karot” kag “funeral potatoes” pinasahi gid para sa akon!

Pero, nakadayaw gid ako sa debosyon kag pagkadisipulo sang madamo nga Santos, ang kadamuon sang mga nagasilimba, kag kadakuon sang ginaimplementar gid nga mga programa sang Simbahan. Sang matapos ang akon misyon, gusto ko segurohon nga ang kalipay nga nabatyagan ko kag ang espirituhanon ko nga kusog kag pagtubo malab-ot man sang akon pamilya sa pila ka adlaw. Determinado ako nga magbalik dayon para magpangabuhi “sa [landong sang] mga bakulod nga wala sing katapusan.”

Ugaling, lain ang plano sang Ginuo. Sang una ko nga Domingo sa amon, gintawag ako sang maalam namon nga bishop para magserbisyo bilang Young Men president sang amon ward. Sa pagserbisyo ko sining manami nga grupo sang mga pamatan-on, madasig ko nga natun-an nga ang kalipay sang pagkadisipulo ni Cristo waay sa kadamuon sang nagasilimba ukon sa kadakuon sang mga programa.

Gani sang ginpakaslan ko ang matahum ko nga asawa, si Margret, malipayon kami nga nagdesisyon nga magtiner sa Europa kag padakuon ang amon pamilya sa amon dutang natawhan nga Germany. Upod namon nga nasaksihan ang gintudlo ni Pangulong Russell M. Nelson madamo nga tuig na ang nagligad: “Ang kalipay nga aton mabatyagan halos wala sing kalabtanan sa mga sirkumstansya sang aton mga kabuhi kag may dako kaayo nga kalabtanan sa ginatutokan sang aton mga kabuhi.” Kon ang ginatutokan sang aton kabuhi amo si Cristo kag ang mensahe sang Iya ebanghelyo, maeksperiyensyahan naton ang bug-os nga bugay sang pagkadisipulo bisan diin man kita.

Pero, sa kalibutan nga mas nagasekular, nagakomplikado, kag nagagamo, sa tunga sang lainlain kag nagabunggoanay nga mga mensahe kag ginapangayo, paano naton malikawan ang pagkabulag kag pagtig-a sang aton mga tagipusuon kag magpabilin nga nagatutok sa “maathag kag importante nga mga butang” sa ebanghelyo ni Jesucristo? Sa panahon sang kagamo, naghatag si Apostoles Pablo sang manami nga laygay sa mga Santos sang Corinto paagi sa pagpadumdom sa ila nga magtutok sa “putli nga katutom kay Cristo.”

Ang doktrina ni Cristo kag ang layi sang ebanghelyo tama kasimple nga bisan ang magagmay nga kabataan makaintiendi sini. Malab-ot naton ang nagapangtubos nga gahum ni Jesucristo kag mabaton ang tanan nga espirituhanon nga bugay nga ginhanda sang aton Amay nga Langitnon para sa aton paagi sa paggamit sang pagtuo kay Jesucristo, paghinulsol, pagpabunyag, pagpakabalaan paagi sa dulot sang Balaan nga Espiritu, kag pagpadayon tubtob sa katapusan. Matahum nga ginlaragway ni Pangulong Nelson ini nga pagpanglakaton bilang “dalan sang kasugtanan” kag proseso agud mangin “debotado nga disipulo ni Jesucristo.”

Kon amo sini kasimple sang mensahe, ngaa pamatyagan naton kabudlay gid ipangabuhi sang layi ni Cristo kag sundon ang Iya ehemplo? Basi tungod ang pag-intiendi naton sang kasimple amo nga madali lang ini lab-uton nga wala sang pagpaninguha ukon kapisan. Ang pagsunod kay Cristo nagapangayo sang sige-sige nga pagpaninguha kag padayon nga pagbag-o. Kinahanglan naton “[ubahon] ang kinaandan nga pagkatawo kag [mangin pareho sing isa ka diutay nga] bata.” Upod sini ang pagbutang sang aton “pagsalig sa Ginuo” kag buy-an ang pagkakomplikado, pareho sang ginahimo sang mga kabataan. Ang pagpangabuhi sang doktrina ni Cristo sa paagi nga simple kag nakatutok magabulig sa aton nga makakita sang kalipay sa adlaw-adlaw naton nga kabuhi, magahatag sang giya sa aton mga calling, magasabat sang pinakakomplikado nga mga pamangkot sang kabuhi, kag magahatag sang kusog para maatubang naton ang pinakadako naton nga mga kabudlayan.

Pero paano naton matuod iimplementar ining kasimple sa bug-os kabuhi naton nga pagpanglakaton bilang mga disipulo ni Cristo? Ginapadumdom kita ni Pangulong Nelson nga magtutok sa “puro nga kamatuoran, puro nga doktrina, kag puro nga rebelasyon” samtang ginahandum naton nga sundon ang Manluluwas. Ang regular nga pagpamangkot nga, “Ano ang ipahimo sa akon sang Ginuong Jesucristo?” nagapahayag sang dako nga paggiya. Ang pagsunod sang Iya ehemplo nagahatag sang dalan nga malayo sa disgrasya sa tunga sang kawala-kasegurohan kag sang mapinalanggaon, nagagiya nga kamot nga makaptan tagsa ka adlaw. Sia ang Prinsipe sang Paghidaet kag ang Maayong Manugbantay. Sia ang aton Tagpaumpaw kag Manugluwas. Sia ang aton Bato kag Palasilungan. Isa Sia ka Abyan—inyo abyan kag akon abyan! Ginaagda Niya ang tanan nga palanggaon ang Dios, tumanon ang Iya mga kasuguan, kag palanggaon ang aton mga isigkatawo.

Kon pilion naton nga sundon ang Iya halimbawa kag mag-abante nga may pagtuo kay Cristo, batunon ang gahum sang Iya Pagbayad-Sala, kag dumdumon ang aton mga kasugtanan, mapuno sang gugma ang aton tagipusuon, pataason ang aton mga espiritu sang paglaum kag pag-ayo, kag ang kapait mabuslan sang kapasalamatan kag pasensya sa paghulat sang ginpromisa nga mga bugay. Kon kaisa, kinahanglan naton nga idistansya ang aton mga kaugalingon sa indi makapaayo nga mga sitwasyon ukon magpangayo sang bulig propesyunal. Pero sa tagsa ka kaso, ang pagpangabuhi sang simple nga mga prinsipyo sang ebanghelyo makabulig sa aton sa pag-atubang sang mga hangkat sa kabuhi sa pamaagi sang Ginuo.

Kon kaisa wala naton ginatamod ang kusog nga mabaton naton halin sa simple nga pagpangamuyo, pagpuasa, pagtuon sang balaan nga kasulatan, paghinulsol adlaw-adlaw, pag-ambit sang sakramento kada semana, kag regular nga pagsimba sa balay sang Ginuo. Pero kon matun-an naton nga indi naton kinahanglan nga “maghimo sang mabudlay nga butang” kag sentrohon naton ang aton kaugalingon sa pagpangabuhi sang puro kag simple nga doktrina, amat-amat naton nga makita kon daw ano “kaepektibo” sang ebanghelyo sa aton, bisan sa pinakabudlay nga sirkumstansya. Makakita kita sang kusog kag “kompiyansa sa Dios,” bisan pa nga nagabatyag kita sang kasakit sang buot. Pila ka beses kita nga ginpadumdom ni Elder M. Russell Ballard, “Ara sa sinang kasimple nga makita [naton] ang … kalinong, kasadya, kag kalipay.”

Ang pagpangabuhi sinang kasimple nga ara kay Cristo magabulig sa aton nga unahon ang mga tawo imbes nga mga proseso kag wala katapusan nga mga relasyon imbes nga umalagi nga mga pangginawi. Magatutok kita sa “mga butang nga importante” sa buluhaton sang Dios sa pagluwas kag pagpahitaas imbes nga mag-ungot sa pagdumala sang aton ministering. Ginabuksan naton ang aton kaugalingon para unahon ang mga butang nga sarang naton himuon imbes nga punggan sang mga butang nga indi naton mahimo. Ginapadumdom kita sang Ginuo: “Karon, indi magpaluya sa paghimo sang maayo, kay nagapasad kamo sang pundasyon sing isa ka dako nga buluhaton. Kag halin sa magagmay nga mga butang nagaluntad inang mga dalagko.” Daw ano kabaskog nga pagpaisog nga mag-akto sa kasimple kag pagkamapainubuson, bisan ano man ang aton sirkumstansya.

Ang akon lola nga si Marta Cziesla isa ka maayo nga ehemplo sang paghimo sang “gagmay kag simple nga mga butang” sa pagpahanabo sang dalagko nga mga butang. Mapinalanggaon namon sia nga ginatawag nga si Oma Cziesla. Ginbaton ni Oma ang ebanghelyo sa gamay nga baryo sang Selbongen sa East Prussia upod ang akon lola sa tuhod sang Mayo 30, 1926.

Si Marta Cziesla (tuo) sa adlaw nga ginbunyagan sia.

Palangga niya ang Ginuo kag ang Iya ebanghelyo kag determinado sia nga tumanon ang mga kasugtanan nga iya ginhimo. Sang 1930 ginpamana niya ang akon lolo, nga indi miyembro sang Simbahan. Sa sining punto nangin imposible kay Oma nga magsimba tungod ang uma ni lolo malayo kaayo sa pinakalapit nga kongregasyon. Pero nagtutok sia sa sarang niya himuon. Padayon si Oma nga nagpangamuyo, nagbasa sang balaan nga kasulatan, kag nagkanta sang mga kanta sang Sion.

Abi siguro sang iban nga indi na sia aktibo sa iya pagtuo, pero malayo ini sa kamatuoran. Sang nabata ang akon tiya kag tatay, nga wala sang nagakapot sang priesthood sa panimalay kag wala sang simba-simba ukon mabaton nga mga ordinansa, ginhimo niya liwat ang pwede niya himuon kag nagtutok sa pagtudlo sang iya kabataan nga “magpangamuyo, kag maglakat sing matarong sa atubang sang Ginuo.” Ginbasahan niya sila sang balaan nga kasulatan, ginkantahan sila sang mga kanta sang Sion, kag siyempre nagpangamuyo upod sa ila—kada adlaw. 100 porsyento nga nasentro-sa-balay nga eksperiyensya sa Simbahan.

Sang 1945 nagserbisyo ang akon lolo sa giyera malayo sa amon puluy-an. Sang nagapadulong ang mga kaaway sa ila uma, gindala ni Oma ang iya duha ka magagmay nga kabataan kag ginbayaan ang ila pinalangga nga uma para magpanago sa mas hilway nga lugar. Pagkatapos sang mabudlay kag makahalangkat nga biyahe, nakakita sila sang ulihi sang mapanagoan sang Mayo sang 1945 sa norte nga Germany. Wala gid sang bilin sa ila kundi ang biste nga ila ginasuksok. Pero nagpadayon si Oma sa sinang masarangan niya himuon: nagpangamuyo sia upod sa iya kabataan—adlaw-adlaw. Ginkantahan sila sang mga kanta sang Sion nga ginsaulo niya sa iya tagipusuon—adlaw-adlaw.

Mabudlay kaayo ang pangabuhi kag sa madamo nga tuig nagtutok lamang sa pagseguro nga may makaon sila. Pero sang 1955 ang akon tatay, 17 anyos sadto, nagaeskwela sa trade school sa siyudad sang Rendsburg. Naglabay sia sa isa ka bilding kag nakita ang gamay nga karatula sa gwa nga nagasiling “Kirche Jesu Christi der Heiligen der Letzten Tage”—“Ang Simbahan ni Jesucristo sang mga Santos sa Ulihing mga Adlaw.” Siling niya, “Daw kanami sini; amo ini ang simbahan ni Nanay.” Gani pag-abot niya sa balay, ginhambalan niya si Oma nga nakita niya ang iya simbahan.

Hunahunaa bala kon ano ang iya nabatyagan nga pagligad sang halos 25 ka tuig nga wala sia sang kontak sa Simbahan. Determinado sia nga magsimba pagkadason nga Domingo kag ginkumbinsi ang akon tatay nga updan sia. Ang Rendsburg masobra 20 ka milya (32 km) ang kalayuon sa gamay nga bario kon sa diin nagapuyo sila. Pero waay ini makapungong kay Oma sa pagsimba. Pagkadason nga Domingo, nagsakay sila sang akon lolo sa bisikleta kag nagkadto sa simbahan.

Sang magsugod ang sakramento nga miting, nagpungko si tatay sa pinakalikod, nga nagalaum nga matapos ini dayon. Simbahan ini ni Oma kag indi iya. Ginluyahan sia sa iya nakita: pila lang ka tigulang nga mga babayi kag duha ka hubin nga mga misyonero nga mapisan nga nagpalakat sang tanan sa miting. Pero nagsugod sila sa pagkanta, kag ginkanta nila ang mga kanta sang Sion nga nabatian ni tatay halin sa iya pagkabata: “Come, Come, Ye Saints,” “O My Father,” “Praise to the Man.” Pagkabati niya sining gamay nga grupo nga nagakanta sang mga kanta sang Sion nga kabisado na niya halin sa pagkabata, natandog ang iya tagipusuon, kag nahibal-an niya dayon kag wala sing duda nga matuod ang Simbahan.

Ang una nga sakramento nga miting nga gintambungan ni lola pagligad sang 25 ka tuig amo ang miting kon diin nabaton sang akon tatay ang iya personal nga kompirmasyon sang kamatuoran sang ginpanumbalik nga ebanghelyo ni Jesucristo. Ginbunyagan sia pagligad sang tatlo ka semana, sang Septyembre 25, 1955, upod sa akon lolo kag tiya.

Masobra na 70 anyos ang nagligad halin sadtong gamay nga sakramento nga miting sa Rendsburg. Pirme ko ginapanumdom si Oma, kon daw ano ang iya nabatyagan sadtong masubo nga mga gab-i, nga nagahimo sang gagmay kag simple nga mga butang nga iya masarangan himuon, pareho sang pagpangamuyo, pagbasa, kag pagkanta. Samtang nagatindog ako subong sa pangkabilogan nga komperensya kag nagahambal parte kay Oma, sa iya determinasyon nga tumanon ang iya mga kasugtanan kag magsalig sa Ginuo sa pihak sang iya mga kabudlayan nagapuno sa akon dughan sang pagpaubos kag pagpasalamat—indi lang sa iya kundi sa madamo naton nga mabuot nga mga Santos sa bilog nga kalibutan nga nagatutok sa kasimple nga ara kay Cristo sa tunga sang mabudlay nila nga sirkumstansya, siguro nagatan-aw sa gagmay nga pagbag-o subong pero nagasalig nga matabo ang dalagko nga mga butang sa pila ka adlaw sa palaabuton.

Natun-an ko sa akon kaugalingon nga eksperiyensya nga ang magagmay kag simple nga mga butang sa ebanghelyo kag ang tampad nga pagtutok kay Cristo nagadala sa aton sa matuod nga kalipay, nagadala sang mabaskog nga mga milagro, kag nagahatag sa aton sang kompiyansa nga ang tanan nga ginpromisa nga mga bugay matabo gid. Matuod ini para sa imo kag amo man sa akon. Sa pulong ni Elder Jeffrey R. Holland, “Ang pila ka mga bugay nagaabot dayon, ang iban madugay mag-abot, kag ang iban wala nagaabot tubtob sa langit; pero sa ila nga nagapangabuhi sang ebanghelyo ni Jesucristo, nagaabot ang mga ini.” Sa sini nagapamatuod man ako sa ngalan ni Jesucristo, amen.