Ang Wala Katapusan nga Dulot sang Testimonya

Sia ang labing maalam kag labing gamhanan. Paagi sa Kasanag ni Cristo kag sa paghikot sang Balaan nga Espiritu, ang Iya impluwensya ara sa bisan diin. Kinaiya Niya nga bugayan kita.

Nakita Niya ang aton nagliligad, karon, kag wala katapusan nga kapalaran. Wala sang may matago sa Iya.

Ang imbitasyon ni Pangulong Russell M. Nelson nga “magpamensar sang selestiyal” nagapaisog sa aton nga sundon ang panan-awan kag kinaugali sang aton Amay nga Langitnon.

Tungod sang Iya diosnon nga mga kinaiya, ginhatagan kita sang aton Amay nga Langitnon sang tagsa ka maayo nga regalo, ang kada isa nagapadumdum sang Iya wala katapusan nga perspektibo kag palanan-awan.

Upod man diri ang responsibilidad nga magpili sang maayo.

Ginbayran ni Jesucristo ang pinakadako nga bili para sa sinang pribelihiyo paagi sa Iya hamili nga dugo.

Kon kaisa mahimo nga nagapati kita nga ang pagbuot amo ang paghimo sang bisan ano nga gusto naton. Pero ang kamatuoran nga ang bili ginbayran nagakahulugan nga ang pagbuot isa ka sagrado nga regalo.

Mga indibidwal kita nga may pagbuot, kag ang mga indibidwal nga may pagbuot may salabton. Sa sining kaso, may salabton kita sa aton mga ginapili base sa ihibalo nga ara sa aton kag sa mga regalo nga ginhatag sa aton. Indi kita makahimo sang pagpili nga indi mangin responsable sa mga konsikwensya.

Ngaa may ara kita sang kahilwayan sa pagpili?

Para maghimo sang matarong.

Para pilion si Cristo.

Para pilion ang wala katapusan nga kabuhi—sing sulit-sulit.

Ang saksi halin sa Balaan nga Espiritu mas labi pa sangsa pisikal nga ebidensya. Sia ang nagapangibabaw nga saksi sang Amay kag sang Anak. Si Pangulong Nelson nagpanudlo, “Sa maabot nga mga adlaw, indi posible nga makalampuwas kita sing espirituhanon kon wala ang nagagiya, nagatudlo, nagapasulhay kag dalayon nga impluwensya sang Balaan nga Espiritu.”

Mga kauturan, amo ini kon ngaa kinahanglan naton ang gahum sang Balaan nga espiritu karon nga panahon.

Ang testimonya paagi sa Balaan nga Espiritu sarang mag-abot sa madamo nga paagi. Pareho sang suga sa madulom nga kuwarto, pwede ini mag-abot nga makita mo gilayon. Mahimo man ini mag-abot pareho sang pagbutlak sang adlaw nga amat-amat. Mahimo man ini mag-abot nga daw silak sang kasanag, nga lapta-lapta nga pag-atubang sa puro nga kaalam. Bisan ano ang paagi, nagahalin ini sa Balaan nga Espiritu.

Nagdako ako sa matahum nga Jamaica; masadya kag manami. Pero, sang pagsugod ko sa hayskul, may mga klasmeyt kag amigo ako nga indi makaintiendi sang akon desisyon nga magpamiyembro sa Simbahan ni Jesucristo. “Ngaa nga nagpamiyembro ka dira nga simbahan?” pamangkot nila. “Ngaa nagpati ka sa sina nga istorya?”—nga ginatumod ang Unang Palanan-awon. “Ngaa ginbasa mo ina nga libro?”—nga ginatumod ang Libro ni Mormon. “Gapati ka gid sina tanan?” Kag “Ngaa ginausikan mo ang imo kabuhi?”

Masakit ato, labi pa kay halin sa mga tawo nga palangga ko.

Pero ang wala nila mahibal-an: may eksperiyensya ako upod sa Balaan nga Espiritu. Samtang nagadako ang ina nga testimonya sa akon dughan, nadula ang kasakit sang kabuhi, kag “sa makadali, [nagpakita] sa akon ang langit.”

Siguro napamangkot naman kamo sining mga pamangkot. Siguro bisan sa subong ginasige pa kamo pamangkot sini pareho sa akon.

Ang dulot kag saksi sang Balaan nga Espiritu para sa tanan.

Ang Jamaica sa akon daw ang Palmyra kay Joseph Smith. Ini ang akon Sagrado nga Kakahuyan. Wala ako kabalo kon diin ang eksakto nga lugar nga ginludhan ni Joseph sa Sagrado nga Kakahuyan para mangamuyo, pero kabalo ako kon diin ako sang nangin matuod para sa akon ang akon Sagrado nga Kakahuyan. Natabo ini sa Four Grove Road, Mandeville, Jamaica, sa palaliguan namon, alas 6:00 a.m. sang Miyerkules tatlo ka tuig pagkatapos ako nga bunyagan. Ining sagrado nga eksperiyensya natabo tungod duha ka semana antes, gin-agda ako sang inspirado nga sister missionary nga basahon ang Libro ni Mormon. Ari subong si Sister Audrey Krauss sa sining komperensya upod ang iya pamilya, kag palangga ko gid sia hasta sa katubtuban.

Ginbag-o gid ako sadtong eksperiyensya.

Mga kauturan, ang testimonya wala ginahatag para sa temporaryo nga paggamit. Ining regalo halin sa aton mapinalanggaon nga Amay nga Langitnon gintuyo nga mangin wala katubtuban kay ang naghatag wala sing katubtuban. Ang testimonya wala dapat sang expiration date. Indi ini dapat magluya ukon magtahaw tungod may nagliwat sa akon kabuhi ukon may nagliwat sa kalibutan. Dapat mas magbakod pa gid ini tungod, pareho sang mga talento sang suluguon sa paanggid sang mga talento, ang personal ko nga testimonya isa ka regalo nga dapat doblehon—indi pag-ilubong.

Atong mabudlay nga panahon sang pagtilaw kag pagpamigos nga inagyan ko sang bata pa ako nakabulig sa akon nga malab-ot ining nahibaluan ko na karon. Wala lang ako nagpati, naglaum, ukon nagsalig, bisan pa importante ini nga mga bahin sang pagtuo sa dalanon padulong sa sigurado nga panaksihon. Ginadayaw ko kamo sa inyo pagpaninguha paagi sa pagpamangkot, pagtuon, pagpangamuyo, pagpuasa, kag pagbinagbinag. Palihog indi mag-untat. May kapuslanan gid ang tanan nga pagpanikasog nga sundon ining dalanon padulong sa pag-angkon sang testimonya. Sin-o ukon ano ang tugtan ninyo nga magkuha sina sa inyo? “Ano pa ang mas dako nga pamatuod nga imo maangkon kundi ang halin sa Dios?”

Ang tagsa ka anak sang Dios sarang nga makaagom sang mas madalom, mas mabakod, kag mas sigurado nga ihibalo para sa ila mga kaugalingon. Pareho kay Joseph Smith, nga gintindugan ang iya testimonya sa pihak sang oposisyon, maisog kita nga makasiling, “Nahibaloan ko ini, kag nahibaloan ko nga nahibaloan ini sang Dios, kag indi ko ini mapanghiwala, kag wala gid ako nagpangisog nga himuon ini.”

Pinalangga kong kauturan, tugoti ang gamay nga binhi sang testimonya nga maghikot sa inyo hasta nga magdako ini sa wala katubtuban nga himaya sang sigurado nga ihibalo

Kon ginbunyagan kag ginkumpirma kamo nga mga miyembro sang Ang Simbahan ni Jesucristo sang mga Santos sa Ulihing mga Adlaw pero ginabudlayan sa, “Indi ako sigurado kon kabalo ako,” palihog dumduma ining promisa sa pangamuyo sa sakramento: “Agud ila dalayon nga maangkon ang iya Espiritu sa pag-upod sa ila.” Tungod sining promisa, ang tagsa sa aton mahimo nga mag-usoy sa dalanon sa pag-angkon sang testimonya kag sigurado nga ihibalo.

Ari ang dako nga kamatuoran: Bisan paano pa ginhatag ang testimonya—bisan daw pareho sang pagsubang sang adlaw ukon sa mahimayaon nga palanan-awon—nagakinahanglan gihapon ini sang pagpili nga batunon ining bilidhon nga regalo.

Ang paghambal nga “Ginapili ko nga magpati” mas nagapahapos sa pagbaton sang saksi halin sa Dios. Kon makita naton ang aton testimonya nga nagaluya, panumduma nga ang mga pagpili nga ginahimo naton ang nagapaluya sang gahum sang testimonya. Pero ang testimonya wala ina nagakadula. Kinahanglan lang naton pilion nga makig-angot liwat diri.

Ang pagpili nga magpati isa ka maalam kag mabaskog nga paagi para gamiton ang aton kahilwayan sa pagpili.

Wala ako sang makita nga mas maayo nga paggamit sang akon kahilwayan sa pagpili kundi ang depensahan ang akon testimonya.

Gintudlo ni Pangulong Nelson: “Ginapangabay ko kamo nga tatapon ninyo ang inyo panaksihon. Pangabudlayi nga maangkon ini. Mangin responsable sa pag-angkon kag pagtipig sini. Atipana nga magbakod ini. Sagura ini agud nga magdako. Palig-una ini sa kamatuoran.”

Para sa akon, ang mga tinaga nga tatapa, pangabudlayi, atipana, tipigan, sagura, kag palig-una kon pamatian daw pareho sa alagad nga ginatugyanan sang butang nga malahalon kag importante.

Sang bag-o pa ang Simbahan, nangakig si Parley P. Pratt kay Propetang Joseph Smith kag ginpili niya nga pakalainon sia kag ang Simbahan. “Sang magbisita si John Taylor, nga gintudloan ni Parley sang ebanghelyo, gindala sia ni Parley sa higad kag ginpaandaman nga indi pagsundon si Joseph. Siling ni John Taylor kay Parley:

“Antes ka maghalin sa Canada, naghatag ka sang mabaskog nga testimonya nga si Joseph Smith isa ka propeta sang Dios, … kag siling mo nabal-an mo ining mga butang paagi sa rebelasyon kag sa dulot sang Balaan nga Espiritu.

“… Amo man sina ang testimonya ko karon nga ginkalipay mo sadto. Kon ang buluhaton insakto anom ka bulan ang nagligad, insakto man ini karon. Kon si Joseph Smith isa ka propeta sadto, isa man sia ka propeta karon.”

Nagasaksi ako nga si Joseph Smith isa ka propeta sang Dios kag ang awtoridad sang pagkapropeta niya nagapadayon karon. Si Jesucristo ang nagapamuno sining buluhaton.

Ginaagda ko kamo nga binagbinagon ang inyo dalanon padulong sa sigurado nga saksi kay Jesucristo kag sa Iya ebanghelyo. Atipana ang inyo testimonya, gamita sing maalam ang inyo kahilwayan sa pagpili kag kilalaha ang taghatag kag ang tanan Niya nga mahimayaon nga kinaiya. Nagasaksi ako nga ang gahum ara sa sulod ninyo. Wala sang makapili para sa inyo. Wala sang makakuha sining regalo sa inyo. Sarang kamo magpili nga magpati.

Ginapromisa ko nga kon himuon ninyo ini, ang inyo testimonya mangin “tuburan sa sulod [ninyo] sang buhi nga tubig, nga nagaibwal sa kabuhi nga wala’y katubtuban.” Ini ang inyo mangin angkla kag rason sa pagpadayon, kag sakdagon kamo sini sa tinion sang kabudlayan. Tugotan kamo sini nga magpatubo sang espiritwal nga mga dulot. Buligan kamo sini sa inyo personal nga pagpangalagad kag pagserbisyo. Mangin armas ninyo ini batok kay Satanas kag sa inyo mga kaaway. Ang inyo testimonya mangin inyo kalipay kay makita ninyo ini sa inyo kabataan, kaapohan, kag kaapohan sa tuhod kag sa inyo mga ginapalangga kag ginaserbisyohan. Mangin mabaskog ini kon inyo ini ipakigbahin kag gamiton sa pagpamatuod.

Kon kabalo kamo, kabalo kamo. Kabalo ako nga kabalo ako. Kinahanglan naton sang mas madamo nga sigurado nga mga saksi ni Jesucristo kag sang Iya ebanghelyo. Lab-uta ini! Pangitaa ini! Ginadalian ini! Ini ang katapusan nga dispensasyon—ang dispensasyon sang kabug-osan sang tanan nga panahon.

Ginhambal ni Jesucristo ining kamatuoran: “Ang langit kag ang duta magataliwan; apang ang akon mga pulong indi magataliwan.”

Mga kauturan, ang testimonya parte kay Jesucristo wala gintuyo nga mangin temporaryo nga regalo. Wala sang temporaryo diri—indi ang taghatag, indi ang regalo mismo, indi ang nagadul-ong sang regalo, indi ang ginatumod sining regalo. Kabay nga ang inyo testimonya malaragway man sa sini nga paagi. Bisan pa ang “langit kag ang duta magataliwan,” ang inyo testimonya kag saksi sa ebanghelyo ni Jesucristo indi magataliwan. Subong ang tion nga magpanguyapot sa sining malahalon nga regalo. Sa ngalan ni Jesucristo, amen.