Introduksyon

Mahal kong mga kauturan, nagatipon kita samtang nagakasubo kita sa pagtaliwan sang aton pinalangga nga Pangulong Russell M. Nelson. Nagahambal ako sa inyo bilang Pangulo sang Korum sang Dose, nga sa sini nga katungdanan ginasakdag ako sa tagsa naton ka ward, stake kag pangkabilogan nga mga komperensya sang nagliligad nga pito kag tunga ka tuig.

Nagapadayon kita sa sining tunga sa tuigan nga pangkabilogan nga komperensya, suno sa plano kag upod ang mga manughambal kag musika nga gin-asayn ni Pangulong Nelson pagkatapos sang binulan nga preparasyon. Ang gindugang gid lang amo ang, akon pangbukas nga pagpaathag, kag ang akon paghambal sa lugar ni Pangulong Nelson sa pangtakop nga sesyon sa Domingo sang hapon.

Ini ang una nga tion sa sulod sang mga 75 ka tuig nga ang isa ka Pangulo sang Simbahan napatay pila lang gid ka adlaw antes sang pangkabilogan nga komperensya. Nagpangayo ini nga magplano kami kon paano hiwaton ang importante nga mga leadership meeting angot sa pangkabilogan nga komperensya kag pangkabilogan nga mga sesyon sang komperensya, kag amo man ang pag-iskedyul sang iya lubong sa labing madali nga panahon. Naintiendihan gid ni Pangulong Nelson ang kaimportante sang pangkabilogan nga komperensya sa paghatag sang direksyon sa mga Santos sa maabot nga mga binulan. Ginatahod naton sia paagi sa pagsunod sang naplano nga iskedyul sang komperensya nga iya gin-aprobahan.

Sa sining tion sang kasubo, naghiwat na kita sang miting para pasidunggan si Pangulong Russell M. Nelson antes sang aton mga miting sa pangkabilogan nga komperensya kag dayon gin-iskedyul ang iya lubong sa madason nga adlaw pagkatapos sang komperensya. Ini tanan ginhimo nga may pag-aproba sang pamilya ni Pangulong Russell M. Nelson kag sang Korum sang Dose.

Tungod tanan kami nga gin-asayn nga maghambal sa pangkabilogan nga komperensya luyag nga maghatag sang amon personal nga pagdayaw kay Pangulong Nelson, ginpangabay namon ang tanan naton nga mga manughambal sa komperensya nga lip-uton lang inang pagdayaw, kag itigana ang detalyado nga pasidungog para sa lubong nga nasugdan na namon plano.

Ang akon malip-ot nga pasidungog—nga nagakaigo sa sining komperensya kag sa mga pasidungog nga nahatag na—amo nga: Palangga ko si Russell M. Nelson kag mas madamo ako sang natun-an parte sa ebanghelyo kag sa pagkalider sa ebanghelyo sa malawig ko nga pagpakig-abyan kag pagpakig-upod sa iya sangsa bisan sin-o pa man nga lider nga nakilala ko sing personal. Sia ang aton modelo bilang alagad kag sumulunod sang Ginuong Jesucristo. Sa sining mga butang nagapamatuod ako, sa ngalan ni Jesucristo, amen.