Hibaluon Mo Kon Sin-o Gid Ikaw
Bisan diin man kita sa aton banas sa pagkadisipulo, ang aton kabuhi magabag-o kon maintiendihan naton sing mas maayo kon sin-o gid kita.
Pila ka tuig na ang nagligad ang amon anak nga babayi may nangin talalupangdon nga eksperiyensya sa iya misyon. Sa iya pahanugot, ipaambit ko ang bahin sang iya ginsulat sa amon sina nga semana:
“Kahapon isa ka nagbalik nga miyembro nagpangabay sa amon nga magkadto sa iya balay sing gilayon. Pag-abot namon, nakita namon sia sa salog nga nagahilibion. Samtang nagahibi, nabal-an namon nga nawad-an sia sang trabaho, pahalinon na sa iya apartment, kag sa liwat wala na naman sing maistaran.”
Ang amon anak nagpadayon: “Dali-dali ko nga ginbuksan ang balaan nga mga kasulatan, nga may ginapangita—nga bisan ano—para buligan sia. Samtang nagapangita ako sang nagakabagay nga bersikulo, naminsar ako, ‘Ano ang ginahimo ko? Indi ini amo ang himuon ni Cristo. Indi ini problema nga masolbar ko, kundi literal ini nga anak nga babayi sang Dios nga nagakinahanglan sang akon bulig.’ Gani gintakop ko ang akon balaan nga mga kasulatan, nagluhod sa tupad niya, kag gin-uyatan sia samtang nagahibi kami nga duha, tubtob nga handa na sia nga magtindog kag atubangon ining pagtilaw.”
Pagkatapos nga napasulhay ining babayi, ang amon anak dayon naggamit sang balaan nga mga kasulatan agud tilawan nga buligan sia nga maintiendihan ang realidad sang iya diosnon nga bili kag agud tudloan sia sing isa sang pinakaimportante nga mga kamatuoran sang aton pagpangabuhi—nga kita pinalangga nga mga anak nga lalaki kag babayi sang Dios, isa ka Dios nga may perpekto nga kaluoy para sa aton kon nagaantos kita kag handa sa pagbulig sa aton sa aton pagtindog liwat.
Mahinantupon nga ang una nga punto sang doktrina nga ginatudlo sang aton mga misyonero amo nga ang Dios ang aton mapinalanggaon nga Amay nga Langitnon. Ang tagsa ka nagadason nga kamatuoran napasad sa sadsaran nga paghangop kon sin-o gid kita.
Si Susan H. Porter, Pangkabilogan nga Pangulo sang Primary, nagtudlo: “Kon nakahibalo kag nakahangop kamo kon ano kabug-os kamo nga ginahigugma bilang anak sang Dios, ginabag-o sini ang tanan. Ginabag-o sini ang imo balatyagon parte sa imo kaugalingon kon makahimo ka sing mga sayop. Ginabag-o sini ang imo balatyagon kon nagakatabo ang mabudlay nga mga butang. Ginabag-o sini ang imo panan-aw sa mga kasugoan sang Dios. Ginabag-o sini ang imo panulok sa iban, kag sa imo ikasarang nga maghimo sang kinalain.”
Ining pagbag-o ginapaathag sa pagbasa naton parte sa eksperiyensya ni Moises sang nagsugilanon sia sa Dios sing atubangay. Sa sina nga paghinambalanay, sulit-sulit nga gintudloan sang Dios si Moises sang iya diosnon nga panublion, nga nagasiling “Moises, … ikaw akon anak.” Ginpaathag sang Dios nga si Moises kaanggid sang Iya Bugtong nga Anak. Nahangpan ni Moises sing maathag kon sin-o gid sia, nga may hilikuton sia, kag nga may yara sia sing mapinalanggaon nga Amay nga Langitnon.
Pagkatapos sining eksperiyensya, gintentar sia sang kaaway kag gilayon nga gintawag sia nga nagasiling, “Moises, anak sang tawo,.” Kinaandan kag makatalagam ini nga mga pamaagi sang kaaway. Samtang ang aton Amay nga Langitnon dalayon kag mapinalanggaon nga nagapahanumdum sa aton nga mga anak Niya kita, ang kaaway pirme gid magatinguha nga bansagan kita base sa aton mga kahuyangan. Pero si Moises nakahibalo na nga labaw pa sia sangsa “anak sang tawo.” Nagsiling sia kay Satanas: “Sin-o ka? Kay tan-awa, anak ako sang Dios.” Amo man, kon nagapangatubang kita sang mga hangkat sang kabuhi sa duta ukon kon daw may nagatinguha nga bansagan kita base sa aton mga kahuyangan, kinahanglan magpakabakod kita sa paghibalo kon sin-o gid kita. Kinahanglan matigayon naton ang kahamuot sang Dios kag indi sang iban nga tawo. Kag sa paghimo naton sini, kita man makapahayag sing may kaisog nga, “Anak ako sang Dios.”
Sa isa ka bug-os kalibutan nga devotional para sa mga lamharon, ang aton pinalangga nga si President Russell M. Nelson nagtudlo: “Gani sin-o bala kamo? Una gid sa tanan, kamo anak sang Dios, anak sang kasugtanan, kag disipulo ni Jesucristo. Kon inyo batunon ining mga kamatuoran, buligan kamo sang aton Amay nga Langitnon nga malab-ot ang inyo pinakamataas nga tuyo nga magpuyo sa Iya balaan nga presensya sing wala katapusan.”
Indi natabuan lamang nga sa labing ginasulit-sulit nga balaan nga kasulatan, ang Dios nagapahanumdum sa aton sang aton kaangtanan sa Iya. Sa tanan nga ngalan nga pwede Sia kilalahon sa sakramento nga pangamuyo, Iya ginpangayo nga tawgon sia nga “Dios, ang Wala Katapusan nga Amay.”
Sa aton paghibalo kon sin-o gid kita, mas magapati pa gid kita nga ang aton mapinalanggaon nga Amay nga Langitnon naghatag sang plano para makabalik kita sa pagpuyo liwat upod sa Iya. Si Elder Patrick Kearon nagtudlo: “Ang matahum nga plano sang aton Amay, nga amo ang Iya ‘dalayawon’ nga plano, gindesinyo agud dal-on kamo pauli, indi nga indi kamo pagpasudlon. … Ang Dios wala untat nga nagaulikid sa inyo.” Hunahunaa ina sing makadali—ang aton makagagahum, mapinalanggaon nga Amay “wala untat nga nagaulikid sa inyo.”
Bisan diin man kita sa aton banas sa pagkadisipulo, ang aton kabuhi magabag-o kon maintiendihan naton sing mas maayo kon sin-o gid kita. Luyag ko magpanugyan sing duha ka paagi sa diin mapadalom naton ang paghangop parte diri.
Una, Pangamuyo
Sang nagasugod na ang Manluluwas sang Iya mortal nga pag-alagad, gindala sia [sang Espiritu] sa kamingawan agud “makaupod ang Dios.” Dapat siguro naton liwaton ang aton mentalidad halin sa paghambal lamang sang aton mga pangamuyo pakadto sa paghinguyang sing bastante nga tion sa pagpakig-angot sa kag “makaupod ang Dios” sa kada adlaw.
Narealisar ko nga ang kalidad sang akon mga pangamuyo mas nagaayo kon maggamit ako sing pila ka minutos agud maghanda sa pagpakighambal sa akon Amay. Ginapakita sang balaan nga mga kasulatan sa aton nga epektibo ini nga sulundan. Si Joseph Smith; si Nefi, nga anak ni Helaman; ukon si Enos man, tanan sila nagbinagbinag kag nagpamalandong antes sang ila narekord nga pagpakigsugilanon sa Dios. Si Enos nagsiling nga ang iya kalag gingutom samtang ang mga pulong sang iya amay nagdulut sing madalom sa iya tagipusuon. Ang tagsa sining mga halimbawa nagatudlo sa aton nga kinahanglan kita maghanda sing espirituhanon para sa aton tion kada adlaw nga “makaupod ang Dios.”
Sa mga Nefinhon, ang Manluluwas nagtudlo, “Kon magpangamuyo kamo, magsulod sa inyo gamay nga kwarto, kag kon nasira na ninyo ang inyo puwertahan, magpangamuyo sa inyo Amay.”
Kon sa gamay man nga kwarto ukon sa hulot-tulugan, ang prinsipyo amo nga magpangita sang lugar kon diin pwede ka makapangamuyo nga ikaw lang, agud tugotan ang imo kalag nga mangin malinong, kag mabaton ang mga pagpabatyag sang “mahinay kag diutay nga tingug.” Makahanda kita paagi sa pagbinagbinag sang mga butang nga aton ginapasalamatan kag sang mga pamangkot ukon mga kabalaka nga luyag naton dal-on sa aton Amay. Dapat naton tinguhaan nga indi pagsulit-suliton ang aton pangamuyo kundi magsugilanon sa aton Amay, sing mabaskog kon posible.
Narealisar ko nga sa pagsinako naton sa aton mga kabuhi, kon nagahimakas kita sa aton gagmay nga kabataan ukon nagataristaris sa aton mga miting, mahimo nga wala na kita sing oras pa nga magsulod sa malinong nga kwarto kag magpreparar—apang ang inang mahipos, madasig, kag insigida nga mga pangamuyo mahimo nga mangin mas makahulugan kon nagatinguha kita nga “makaupod ang Dios” sing mas temprano pa tagsa ka adlaw.
Mahimo nga may pila nga wala na nakapangamuyo sa malawig nga tinion ukon iban nga wala nakabatyag nga ginapamatian ang ila mga pangamuyo. Ginapromisa ko sa inyo nga ang inyo Amay nga Langitnon nakakilala sa inyo, nagapalangga sa inyo, kag luyag nga makabati halin sa inyo. Luyag Niya nga magpakig-angot sa inyo. Luyag Niya nga dumdumon ninyo kon sin-o kamo.
Si Elder Jeffrey R. Holland sang sini lang nagtudlo: “Bisan ano pa kasunson sang imo pagpangamuyo, magpangamuyo sing dugang pa gid. Bisan ano pa ka todo sang imo pagpangamuyo, magpangamuyo sing mas todo pa gid.”
Magluwas sa pagdugang sang kasunson kag kahanuot sang aton mga pangamuyo, ang pagtuon sang Libro ni Mormon adlaw-adlaw kag pagsimba sa templo makabulig sa paghanda sang aton mga kaisipan para sa rebelasyon. Kon nagatinguha kita nga mas ayuhon ang aton pagpakig-angot sa aton Amay nga Langitnon, pagabugayan Niya kita nga mabatyagan gid naton nga kita Iya mga anak.
Ika-duha, Kilalahon Nga si Jesus ang Cristo
Ang pinakadako nga pagpakita sang gugma sang Amay nga Langitnon sa aton bilang Iya mga anak amo ang realidad nga ginpadala Niya ang Iya Anak, nga aton kaugalingon nga personal nga Manluluwas, agud buligan kita nga magpauli. Gani, kinahanglan nga kilalahon naton Sia.
Pila na ka tuig ang nagligad, samtang nagaalagad bilang stake president, nagsumiter ako sang rekomendasyon para sa isa ka brother nga mag-alagad bilang ordinance worker sa templo. Pagkatapos ko paathag nga mangin maayo sia nga ordinance worker, indi hungod nga natum-okan ko ang “Indi pag-i-endorso” nga nagsumiter sang rekomendasyon. Pagkatapos sing pila ka beses nga indi ko na makanselar ang mensahe, gintawgan ko ang temple president kag nagsiling, “Nakahimo ako sing dako gid nga sala.” Sing walay duhaduha, ining maayo nga temple president nagsiling, “President Eyre, wala sing bisan ano nga imo nahimo nga indi mapatawad kag sa ulihi matadlong.” Daw ano ka gamhanan nga kamatuoran. Sa pagkamatuod, si Jesucristo “gamhanan sa pagluwas.”
Sang 2019 may nangin dako nga pagbag-o sa mga pamangkot para sa temple recommend. Sang una, ang isa ka pamangkot amo ang kon may testimonya ka parte sa papel ni Jesucristo bilang Manluluwas kag Manunubos. Subong ang pamangkot sini amo nga kon may testimonya ka parte sa Iya papel bilang imo Manluluwas kag Manunubos. Ang pagbayad-sala ni Jesucristo indi lamang epektibo sa iban; epektibo ini sa imo kag sa akon. Sia ang akon Manluluwas. Sia ang imo Manluluwas. Sing indibidwal. Paagi lamang sa Iya nga ikaw kag ako makabalik agud makaupod ang aton Amay.
Gani, mga kauturan, pangitaon naton Sia. Tun-an naton ang Iya diosnon nga kaangtanan sa Amay kag sa tagsa sa aton. Mag-angot kita sa ambahanon sang nagatubos nga gugma nga nagaabot sa tagsa sa aton paagi sa aton Manunubos kon maghinulsol kita. Kon makilala naton “[sia] nga gamhanan sa pagluwas,” maintiendihan naton nga kita, bilang mga anak sang Dios, amo ang Iya kalipay—Iya pinakaimportante nga ginatutukan—kag matuod gid nga nagakaangay ang tagsa sa aton nga luwason.
Nagapamatuod ako nga may ara kita sang mapinalanggaon nga Amay nga Langitnon. Sa aton pagkahibalo sining wala katapusan nga kamatuoran paagi sa hugot nga pagpangamuyo, personal nga rebelasyon, kag pagpalapit kay Jesucristo, makapahayag na kita karon kag sa tanan nga tion sing may kaisog nga, “Anak ako sang Dios.” Sa ngalan ni Jesucristo, amen.