Ang Proklamasyon sang Panimalay—Mga Pulong sang Dios

Ining Oktubre 2025 nga pangkabilogan nga komperensya nagasaulog sang ika-30 nga anibersaryo sang pag-anunsyo sang “Ang Panimalay: Isa ka Proklamasyon sa Kalibutan.” Sa diosnon nga disenyo, ining proklamasyon, upod ang ginpahayag nga mga pulong sini, ginhimo “sa pagtipig kag pagpabakod sang panimalay bilang tig-una nga yunit sang sosyedad.”

Ang tanan miyembro sang isa ka pamilya, bisan nanay ka, tatay, bata nga babayi, bata nga lalaki, apo, lolo/lola, tiya, tiyo, utod nga lalaki, utod nga babayi, ukon pakaisa. Labing importante, ang kada isa sa aton, sa ginhambal sa proklamasyon, “pinalangga nga espiritu nga anak nga lalaki ukon anak nga babayi sang langitnon nga mga ginikanan … [nga may] diosnon nga kinaiya kag kapalaran.”

Sang gintawag ako sa balaan nga pagkaapostoles sang 2015, ginlaygayan ako nga, “Imo na ining proklamasyon karon. Ang imo ngalan [nga ginatudlo ang mga tinaga ‘Konseho sang Dose ka Apostoles’ sa tig-ulo] ari diri. Batyaga ini kag itudlo ini nga pareho nga imo ini.”

Palangga ko ang proklamasyon sang panimalay. Nagpamatuod ako sa bilog nga kalibutan halin sa Aprika pakadto sa Australia kag sa bisan diin parte sa papel sang pamilya sa wala katapusan nga plano sang Dios. Ang proklamasyon may diosnon nga ginhalinan, gani kinahanglan naton ini kabigon nga may pagtahod nga nagakaangay para sa mga pulong sang Dios.

Panumduma, mga kauturan, sa ginsiling ko sang nagligad nga pangkabilogan nga komperensya sa sini mismo nga pulpito, “Ang mga tinaga may importansya.”

Hatagan ko kamo sang konteksto parte sa proklamasyon bilang tig-una nga mensahe sang aton ginapatihan.

Sang 1994, isa ka tuig antes ginpresentar ang proklamasyon, ginhambalan sang Korum sang Dose ka Apostoles kon paano nagapalayo ang sosyedad kag mga gobyerno sa mga layi sang Dios para sa pamilya, pag-asawahay, kag gender. “Pero indi ina ang katapusan sang amon nakita,” paathag ni Pangulong Russell M. Nelson sang ulihi. “Makita naton ang pagpaninguha sang lainlain nga mga komunidad para dulaon ang tanan nga talaksan kag limitasyon sa sekswal nga buluhaton. Nakita naton ang kagumon sa mga gender. Makita naton nga matabo gid ini tanan.”

Nagdesisyon ang Dose nga maghimo sang dokumento, isa ka opisyal nga proklamasyon, nga nagasuma sang posisyon sang Simbahan parte sa pamilya. Sina nga tuig, ining mga Apostoles, mga manugpanan-aw nga gintawag sang Dios, naghanda sang deklarasyon parte sa pamilya. Ginsaysay ni Pangulong Dallin H. Oaks nga mainampuon sila nga nagdangop sa Ginuo “kon ano ang dapat [nila] ihambal kag kon paano [nila] ini ihambal.” Ginpresentar nila ini sa Unang Pangulohan—kanday Pangulong Howard W. Hunter, Pangulong Gordon B. Hinckley, kag Pangulong Thomas S. Monson—para sa ila pagbinagbinag.

Pila lang ka bulan ang nagligad, sang Marso 1995, napatay si Pangulong Hunter kag si Pangulong Hinckley ang nangin ika-15 nga Pangulo sang Simbahan. Ang proklamasyon iya na karon nga responsibilidad. San-o bala ang husto nga tion para himuon ining deklarasyon sa Simbahan? Ang ina nga tion nag-abot pagligad sang anom ka bulan.

Inadlaw antes sang Septembre 23 nga general Relief Society meeting antes sang pangkabilogan nga komperensya, nagmiting si Pangulong Hinckley kag ang iya mga manuglaygay upod sa Relief Society General Presidency. Ang mga sister, pareho sang mga Apostoles, nagabinagbinag man sang mga problema sang kababayin-an kag mga pamilya. Gintutok nila ang palaabuton nga miting sa mga pamilya.

Si Pangulong Hinckley naiskedyul nga maghambal sa mga babayi sa pagtililipon. Ginabinagbinag niya ang direksyon sang iya mga inughambal. Samtang nagapadayon ang diskusyon, ginhinambitan niya ang ngalan sang bag-o lang gindihon pero wala pa mapubliko nga “Ang Panimalay: Isa ka Proklamasyon sa Kalibutan.” Ang ining miting sang kababayin-an husto bala nga lugar para maghimo sang desidido nga deklarasyon parte sa pamilya?

Ginpaathag sang ulihi lang ni General Relief Society President Elaine Jack: “Wala pa kami kabalo kon ano ang proklamasyon sang panimalay sang amo sadto nga tion. … Mapaktan na [na]mon sa tig-ulo, pero nabatyagan namon nga ang bisan ano parte sa pamilya … isa ka positibo nga butang. … Positibo ako kaayo nga may mga miyembro kita sa Korum sang Dose nga nagabaton sang rebelasyon.”

Makasaysayan ang miting sang Relief Society sadto nga Sabado. Ginpakilala ni Pangulong Hinckley ang proklamasyon sang panimalay sa sining importante nga mga tinaga: “Sa kadamo sang kabutigan nga ginapagwa nga kamatuoran, sa kadamo nga pagpang-into parte sa mga pagsulundan kag panindugan, sa kadamo sang pagpangganyat kag pagtentar nga tilawan ang amat-amat nga dagta sang kalibutan, nabatyagan namon nga magpaandam kag magpabalo … parte sa mga talaksan, mga doktrina, kag mga pangginawi may angot sa pamilya nga sulit-sulit nga ginahambal sang mga propeta, mga manugpanan-aw, kag manugpahayag sang rebelasyon sang sining Simbahan sa bug-os nga kasaysayan.”

Dayon ginbasa niya ang bilog nga proklamasyon. Sa ginsiling sang Ginuo, “Paagi man sa akon kaugalingon nga tingug ukon paagi sa tingug sang akon mga alagad, pareho lang ina.”

Siling sa proklamasyon, “Ang panimalay gin-ordin sang Dios.” Nanamian ako sa kaathag sina nga pahayag. Ang proklamasyon isa ka panawagan sa aton para magpangabuhi sa mortalidad nga ginadumdom ang pagkadiosnon sa sulod naton kag ang wala katubtuban nga kapalaran nga ara sa aton atubang. Gintudlo ni Pangulong Nelson, “Literal kamo nga mga espiritu nga anak sang Dios. … Indi magsala parte sina: Diosnon ang inyo ikasarang. Sa inyo maukod nga pagpangita, ang Dios magahatag sa inyo sang mga ideya kon ano kamo pwede nga mangin.”

Sang ginpresentar ini, ang proklamasyon wala nagsanto sa panan-awan sang kadam-an sa kalibutan. Wala sadto. Wala sa karon. May ara sang mga nasaklaw sang deklarasyon sa pamilya, pag-asawahay, kag gender. May mga nagasiling nga i-atras ini sang Simbahan, liwaton, ukon ipahigad ang proklamasyon.

Ining proklamasyon sa pamilya isa ka, sa ginhambal ni Pangulong Hinckley, doktrina, pinalangga kong mga kauturan. Ang mga prinsipyo wala nagaliw-as kundi nagasibo gid sa pamaagi sang Ginuo kag sa iya dalan sang kasugtanan. Ang mga pinanudlo sa proklamasyon ginpahayag sang aton Ginuong Jesucristo sa Iya mga Apostoles sadto kag karon. Iya ini Simbahan; ginpahamtang Niya ang mga kamatuoran nga aton ginapangabuhi.

Siguro may ara sa inyo nga magabinagbinag sang proklamasyon kag magsiling, “Indi ini insakto para sa akon.” “Daw ka insensitibo sini.” “Indi man amo sini ang akon pamilya.” “Indi ako bagay diri.”

Sa may mga problema, hibaloa nga anak kamo sang langitnon nga mga ginikanan, parte sang panimalay sang inyo Amay nga Langitnon. Wala sang may mas nakakilala sa inyo ukon mas nagaulikid sa inyo sangsa Iya. Magdangop sa Iya; ibubo ang inyo tagipusuon sa Iya; magsalig sa Iya kag sa Iya mga promisa. May pamilya kamo sa inyo Manluluwas, si Jesucristo, nga nagapalangga sa inyo. Nagkari sia sa duta para bayaran ang aton mga sala kag kargahon ang mga palas-anon sang aton mga kasaypanan kag sang malain kaayo naton nga mga adlaw. Naintiendihan Niya ang inyo ginaatubang kag ginabatyag. Magliso sa Iya; magsalig nga ipadala Niya ang Balaan nga Espiritu para updan kamo, alsahon kamo, kag giyahan kamo. Batyaga ang Ila pagpalangga nga “nagalapnag sa mga tagipusuon sang mga anak sang katawhan; … ini ang labing ginahandum labaw sa tanan nga butang … kag ang labing makalilipay sa kalag.”

Palangga kamo kaayo sang tanan nga Apostoles sang Ginuo. Ginapangamuyo namon kamo kag ginapangayo ang giya sang Ginuo para sa inyo. Mag-upod sa amon. Nagapangabuhi kamo sa makahalangkat nga panahon kon diin ginatinguhaan sang kaaway nga agawon kamo. Indi kamo magpadala. Kag kon nadala kamo, magbalik. Nagauntay ang amon mga kamot sa inyo, pareho man sa iban nga nagapalangga sa inyo.

Ginasiling sa proklamasyon, “Ang mga ginikanan may sagrado nga tulumanon sa pagpadako sang ila mga kabataan sa gugma kag pagkamatarong.” Ang Libro ni Mormon nagahatag sang ikaduha nga saksi sa sining kamatuoran. Sa una nga bersikulo sang una nga kapitulo, mabasa naton, “Ako, si Nefi, bangod nga nabun-ag sa maayo nga mga ginikanan.” Pila sa aton ang nagsugod basa sang Libro ni Mormon—kag nagsulit-sulit sa pagsugod—kag sa ulihi nasaulo na ining mga tinaga? Ibutang naton ini sa aton tagipusuon.

Isa sa akon paborito nga mga pahayag sa proklamasyon amo ini: “Ang kalipayan sa kabuhi sang panimalay laban nga malab-ot kon napasad sa mga pinanudlo … [ni] Jesucristo.”

Sin-o ang indi gusto nga malipay?

Kag ano ang mga pinanudlo ni Jesucristo? Liwat, sa proklamasyon: “Pagtuo, pangamuyo, paghinulsol, pagpatawad, pagtahod, gugma, kaluoy, trabaho, kag makapaayo nga mga kahiwatan sa paglingaw-lingaw.”

Kay sin-o kabuhi ang indi mag-ayo kon ipangabuhi ining mayor nga mga prinsipyo? Wala sa aton ang makaperpekto sini; pero pwede naton sundon ang maalam nga mga pulong ni Pangulong Hinckley: “Himoa ang inyo masarangan.”

Mabasahan naton sa proklamasyon, “Ang mga amay amo ang magapamuno … sa gugma kag pagkamatarong,” kag “ang mga iloy una sa tanan, amo ang responsable sa pagbatiti sang ila mga kabataan.” Ang pagpamuno wala nagakahulugan sang pagdominar, kag ang pagbatiti wala nagakahulugan nga kubos ini nga hilimuon. Ginhatagan sang Dios ang mga lalaki kag babayi sang lainlain pero patas kag importante nga mga papel nga nagasuporta sa kada isa.

Tugoti ninyo ako nga magsugid sang isa ka personal nga istorya.

Natun-an namon sang akon asawa nga mas magbuligay bilang magkatuwang sang isa ka adlaw naghimo ako sang isa ka importante nga desisyon nga wala magkonsulta sa iya. Nakibot sia sang akon ginhimo, wala sia makahanda, kag nabutang sia sa mabudlay nga sitwasyon. Pagkatapos, ginbutang niya ang iya mga kamot sa akon mga abaga kag mabakod nga nagsiling, “Ron, palihog, indi na ato paghimoa liwat sa akon.” Halin sadto upod na kami nga nagadesisyon.

Makita naton sa proklamasyon sang panimalay: “Ang mga amay kag mga iloy obligado sa pagbulig sa isa kag isa bilang palareho nga magkatuwang.”

Ang palareho importante nga tinaga. Sa mga tinuig, nagabuligay kami ni Sister Rasband sa ginalarawan sa proklamasyon nga “amon sagrado nga mga responsibilidad,” nakaporma kami sang balanse nga gota sa pag-asawahay. Tungod kasado na karon ang tagsa namon ka kabataan, padayon namon sila nga ginalaygayan ni Sister Rasband kag ang ila mga asawa/bana kon paano mangin palareho nga magkatuwang.

Kon nagapangabuhi kita nga isa ang panan-aw sa himaya sang Dios, ginarespeto naton ang kada isa kag ginasuportahan ang kada isa. Ina nga diosnon nga mga sulundan sang pagkamatarong nagaresulta sa kapag-on sang indibidwal naton nga mga kabuhi, sang aton mga pamilya, kag sosyedad.

Ang aton Amay sa Langit naghatag sang proklamasyon sang panimalay para buligan kita nga makabalik sa Iya, para buligan kita nga magtuon kag mapuno sang gugma, kusog, katuyuan, kag wala katapusan nga paghangop. Upod sa bilog ko nga kalag, ginapangabay ko sa inyo nga magpangabuhi nga malapit sa Iya kag sa Iya Pinalangga nga Anak. Ginapromisa ko nga kon himuon ninyo ini, tandugon kamo sang Espiritu kag giyahan kamo kag buligan kamo nga mabatyagan sa inyo tagipusuon ang ginpromisa Nila nga kalinong nga “indi matungkad sang paghangop.” Sa ngalan ni Jesucristo, amen.