Ang Ginuo Nagatulok sa Tagipusuon
Ang kinahanglan gid lang sang Dios para matuman ang Iya mga katuyoan kag buligan kita nga mangin kon sin-o ang luyag Niya nga mangin kita amo nga lisuon sang tagsa sa aton sing lubos ang aton mga tagipusuon sa Iya.
Sang ginsugo nga magpili sang bag-o nga hari sang Israel sa mga kabataan nga lalaki ni Jesse, ang propetang si Samuel, pagkakita sang kamagulangan nga bata ni Jesse nga si Eliab, nagpahayag, “Sa pagkamatuod ang hinaplas sang Ginuo yari sa iya atubangan.” Pero indi si Eliab ang ginpili nga alagad sang Ginuo. Ang Manluluwas nagpaandam kay Samuel: “Indi ka magtulok sa iya nawong ukon sa iya kataason; bangod nga ginsikway ko sia: kay ang Ginuo nagatan-aw indi subong sang pagtan-aw sang tawo; ang tawo nagatulok sa gwa nga dagway, apang ang Ginuo nagatulok sa tagipusuon.”
Bisan pa nga si David indi ang pinakamakusog sa pisikal ukon ang pinakasagad sa iya mga utod nga lalaki, espirituhanon sia nga mabakod sa panulok sang Dios. Palangga niya ang Dios sa bilog niya nga tagipusuon kag may dako nga handum nga tumanon Sia. May malig-on sia nga pagtuo sa pagpalangga, gahum, kag ginpromisa nga mga bugay sang Dios, pareho sa iya ginpakita sang wala-kahadlok nga nakig-away sia kag ginpierde si Goliat sa bulig sang Ginuo.
Ini nga istorya nagatudlo sa aton nga ang kinahanglan gid lang sang Dios para mahimo ang Iya mga katuyoan kag buligan kita nga mangin kon sin-o ang luyag Niya nga mangin kita amo nga lisuon sang tagsa sa aton sing lubos ang aton mga tagipusuon sa Iya. Sa Manunudlo sang Kasugoan, nagsugo Sia, “Higugmaa ang Ginoo nga imo Dios sa bug-os mo nga tagipusoon.” Kay Propeta Joseph Smith, nagsiling Sia, “Tan-awa, ginapangayo sang Ginuo ang tagipusuon kag handa nga panghunahuna.” Kag sa mga Nefinhon, ang nabanhaw nga Manluluwas nagtanyag sining pangagda: “Magahatag kamo bilang halad sa akon sing isa ka masinulub-on nga tagipusuon kag mahinulsulon nga espiritu.”
Ngaa amo na? Ang Manluluwas nagtudlo nga kon ang aton mga tagipusuon lubos nga naliso sa Iya, tungod sang Iya nagabayad-sala nga sakripisyo mahimo kita mabugayan sang kusog kag espirituhanon nga mga regalo nga kinahanglan naton para malampuwasan ang aton mga hangkat sa kabuhi, mabatuan ang mga tentasyon, makabaton sang paggiya kag paghangop, kag makabatyag sang kalipay kag kalinong sa aton mga kabuhi. “Halin sa magagmay nga mga butang nagaluntad inang mga dalagko.” Nagsiling Sia nga sarang Niya “himuon ang mahuyang nga mga butang nga mangin mabakod” kag bugayan kita sang tanan nga kinahanglan naton para magmadinalag-on sa sining mortal nga kabuhi kag magbaton sang kabuhi nga wala katapusan. “Bulahan ang mga putli sing tagipusuon,” siling Niya, “kay sila makakita sa Dios.”
Nagapati ako nga ini ang rason, bisan bahin lang, nga pirme ginasaway ni Jesucristo ang mga escriba kag mga Fariseo sa tion sang Iya mortal nga pag-alagad. Bisan nga mapisan sila sa pagtuman sang Iya layi, ginahimo nila ini sa indi husto nga mga rason. Ginsaway Niya sila, nga nagasiling, “Ining katawhan sa mga bibig nagatahod sa akon, apang ang tagipusuon nila malayo sa akon.”
Seryoso ini nga pahanumdum sa tanan Niya nga mga disipulo nga indi lang ini parte sa kon ano ang aton ginahimo—ang aton mga ginahambal kag mga buhat—kundi man kon ngaa ginahimo naton ang mga ginapangayo ni Jesucristo nga aton himuon—ang aton mga handum kag mga motibo. Siling Niya, “Kay ako, nga Ginuo, magahukom sang tanan nga tawo suno sa ila mga binuhatan, suno sa handum sang ila mga tagipusuon.” Gusto sang aton Amay nga Langitnon ang labaw pa sangsa maabtik nga pagtuman kag pag-alagad sang Iya mga anak. Gusto Niya nga himuon naton inang mga butang nga may matuod-tuod nga tinutuyo tungod palangga naton Sia sa bilog naton nga tagipusuon. Gusto Niya nga maghandum kita nga mangin pareho sa Iya.
Karon, kon ang espirituhanon nga ikaayo sang aton mga tagipusuon tuman kaimportante sa Manluluwas—ang Iya ginapangita sa matuod-tuod nga disipulo—paano naton mausisa ang aton tagipusuon kag mahibal-an kon matarong ini sa panulok sang Dios?
Sang sini lang, pagbalik namon sang akon asawa halin sa amon misyon sa Portugal, nagpaidalom kami sa serye sang mga eksaminasyon para mahibal-an ang kondisyon sang amon lawas. Ang pila sinang mga eksaminasyon nagtutok sa estado sang amon mga tagipusuon—pareho sang mga eksaminasyon sa dugo, echocardiogram, kag stress test. Nagapati ako nga ang Manluluwas naghatag man sa aton sang espirituhanon nga mga eksaminasyon nga magamit naton para mahibal-an ang kondisyon sang aton mga tagipusuon. Tugoti ako nga ipakigbahin ang pila sa inyo.
Pag-usisa sang Inyo Tagipusuon Paagi sa Espirituhanon nga Eksaminasyon
Una, ang Aton Tutok, mga Prayoridad, kag mga Motibo
“Kay kon diin ang inyo manggad, didto man ang inyo tagipusuon,” tudlo ni Jesus. Ang manggad butang nga malahalon sa aton, butang nga ginadedikaran naton sang aton pagtinguha kag atensyon. Ang pagpili naton kon diin ihatag ang aton tiempo kag itutok ang aton atensyon, kag ang aton man mga motibo sa paghimo sang aton mga ginahimo klaro nga nagapakita sang estado sang aton mga tagipusuon. Ang Manluluwas nagpaandam nga bisan pa madamo ang Iya ginatawag, diutay lang ang ginapili “bangod nahamtang gid ang ila mga tagipusuon sa mga butang sining kalibutan, kag nagahandum [sila] sang mga pagdayaw sang mga tawo.” Ginahimo ko bala ang Manluluwas nga prayoridad sa akon kabuhi? Ang akon mata tampad bala sa Iya himaya sa tanan nga akon ginahimo?
Ika-duha, Ang Aton Kahanda nga Tumanon ang mga Kasugoan sang Dios
Sa bilog nga balaan nga kasulatan, ang Ginuo kag Iya mga propeta nag-angot sang bugal kag pagkadi-matinumanon sa pag-angkon sang matig-a nga tagipusuon. Si Nefi naglaygay sa iya mga utod, nga nagasiling: “Ngaa man nga wala kamo nagatuman sang mga kasugoan sang Ginuo? Ngaa man nga magakadula kamo, tungod sang katig-a sang inyo mga tagipusuon?” Sa mga Santos sa Missouri, ang Ginuo nagpaandam, “Apang sia nga wala sing may ginahimo kon indi sia pagsuguon, kag nagabaton sang kasugoan nga may pagpangduhaduha sa tagipusuon, kag nagatuman sini nga may katamad, ang amo man pagasilotan.” Bisan pa nga ang Manluluwas wala nagapaabot sang pagkaperpekto sa pagtuman sang Iya mga kasugoan, nagapangayo gid Sia nga maghandum kita kag magtinguha nga tumanon ang mga ini sa bilog naton nga mga tagipusuon.
Ika-tatlo, Ang Aton Kapisan sa Pagtuon sang Balaan nga mga Kasulatan kag Pagpangita sang Rebelasyon
Ang Ginuo naglaygay kay Oliver Cowdery nga “[huptan] ining mga pulong sa imo nga tagipusuon.” Ginaimbitar kita nga tun-an ang balaan nga mga kasulatan sing mapisan kag, paagi sa gahum sang Balaan nga Espiritu, magtinguha sa pag-angkon sang paghangop kag saksi sang kamatuoran sang ebanghelyo sa aton mga tagipusuon.
Ginsaway ni propetang Abinadi ang mga pari sang malain nga si Haring Noe sa indi paghimo sina, nga nagasiling, “Wala ninyo gingamit ang inyo mga tagipusuon sa paghangop; gani, indi kamo nangin maalam.” Sinsero bala ako nga nagatinguha nga tun-an ang balaan nga mga kasulatan adlaw-adlaw kag matutum kag sinsero nga nagapangamuyo para maintiendihan ang mga ini?
Ika-apat, Ang Aton mga Hunahuna kag mga Ginahambal
Ang Manluluwas nagtudlo nga “sa tagipusuon nagagikan ang malaut nga mga hunahuna” kag “sa kabuganaan sang tagipusuon nagapamulong ang baba.” Ang kalidad sang aton mga hunahuna kag mga ginahambal maayo nga talaksan sang katinlo sang aton mga tagipusuon. Nagahupot kag nagatutok bala ako sa tuman ka damo nga negatibo nga mga panghunahuna parte sa mga ginahimo ukon mga motibo sang iban ukon bisan pa gani sang akon kaugalingon? Maabtik bala ako maghusga kag magkondenar sa iban? Nagapangita bala ako sang mga balibad ukon mga rason para sa akon mga sayop? Kag paano ang akon mga ginahambal? Nagabulig kag nagainspirar bala ang mga ini sang mga ara sa akon palibot? Ukon masami ang mga ini nagatuga sang konplikto kag kaugot?
Sang nakumpleto na ang akon pisikal nga mga eksaminasyon, ginhambalan ako sang akon doktor nga sa kabilogan, ang akon tagipusuon maayo ang kahimtangan—pero may pila ka butang nga kinahanglan himuon subong, antes maglala ang mga ini. Dayon nagpanugyan sia sang pila ka mga pagbag-o sa estilo sang pagpangabuhi. Sa amo man, sa inyo paghikot sining espirituhanon nga pagtulutimbang sang inyo tagipusuon kag pagkamutik sang pila ka negatibo nga mga sintomas nga amat-amat nga nagasugod, palihog indi magpakulba! Ang Manluluwas naghatag sang maayo gid nga espirituhanon nga bulong para buligan kamo. Nagpromisa pa sia gani nga hatagan kamo sang bag-o nga tagipusuon! Ari ang pila ka mga hilimuon nga mas makapaayo sang espirituhanon nga kusog sang inyo tagipusuon.
Pag-improbar sang Espirituhanon nga Ikaayo sang Inyo Tagipusuon
Una, Pabakura ang Inyo Relasyon kay Cristo
Sa pagdedikar naton sang tiempo adlaw-adlaw para mas magpalapit kay Cristo, ang aton mga tagipusuon ginabag-o. Ang adlaw-adlaw nga pagtuon sang balaan nga mga kasulatan, upod ang sinsero nga pangamuyo kag regular nga pagpuasa, magadugang sang inyo pagpalangga sa Manluluwas kag magapabakod sang inyo pagtuo kag handum nga maghinulsol kag mapainubuson nga itugyan ang inyo tagipusuon sa Dios. Hunahunaa ining ehemplo ni Nefi: “Gani, nagpakitluoy ako sa Ginuo; kag tan-awa ginbisita niya ako, kag ginpahumok ang akon tagipusuon nga nagpati ako sa tanan nga pulong nga ginpanghambal sang akon amay.”
Kon padayon naton nga ginaatipan ang liso sang pagtuo paagi sa aton matarong nga mga handum kag mga buhat, maeksperiyensiahan naton ang pagpakabalaan sang aton mga tagipusuon pareho sang mga Nefinhon: “Apang nagpuasa kag nagpangamuyo sila pirme, kag mas nagbakod nga nagbakod pa gid sa ila pagkamapainubuson, kag mas naglig-on nga naglig-on pa gid sa pagtuo kay Cristo, tubtob sa pagkapuno sang ila mga kalag sing kalipay kag kaumpawan, huo, bisan tubtob sa pagtinlo kag pagpakabalaan sang ila mga tagipusuon, nga ang amo nga pagpakabalaan nagaabot tungod sang ila pagtugyan sang ila mga tagipusuon sa Dios.”
Ika-duha, Ipasanto ang Inyo Pagbuot sa Iya
Ang Manluluwas nagtudlo, “Kon nagahigugma kamo sa akon, magabantay kamo sang akon mga sugo.” Ginaagda Niya kita nga ipakita ang aton pagpalangga paagi sa paghimo kag pagtuman sang mga kasugtanan upod sa Iya. Sa aton pagtinguha nga tumanon ang Iya mga kasugoan, sinsero nga maghinulsol sa aton mga sala, kag magpursige sa pagdala sang Iya ngalan sa aton mga kaugalingon kag ipasanto ang aton pagbuot sa Iya pagbuot, mahimo kita mabugayan sang dalayon nga pagpakig-upod sang Balaan nga Espiritu.
Si Nefi nagpamatuod, “Gani, pinalangga kong mga kauturan, nahibal-an ko nga kon sundon ninyo ang Anak sa bug-os nga katuyoan sang tagipusuon, nga nagabuhat nga wala’y pagkahipokrito kag wala’y pagpatalang sa atubang sang Dios, kundi nga may matuod-tuod nga tinutuyo, nga nagahinulsol sang inyo mga sala, nga nagasaksi sa Amay nga sugot kamo sa pagdala sa inyo kaugalingon sang ngalan ni Cristo paagi sa bunyag … , dayon mabaton ninyo ang Balaan nga Espiritu.” Ang Balaan nga Espiritu magagiya sa inyo kag magabulig sa inyo nga mahibal-an ang pagbuot sang Ginuo kag maghimo sang maayo nga mga pagpili.
Katapusan, Mag-alagad sa Dios kag sa Iban sa Bug-os Ninyo nga Tagipusuon
Ang Manluluwas nagaimbitar sa tanan nga “mag-alagad sa iya sa bug-os ninyo nga tagipusuon.” Kon pilion naton nga himuon ang tagsa ka butang nga ginapangayo sang Ginuo nga aton himuon—pareho sang pagtuman sang mga kasugoan, pag-ambit sang sakramento, pagsimba sa templo, kag pag-alagad sa iban—nga may sinsero nga tagipusuon kag matuod-tuod nga tinutuyo, ang tagsa ka buhat sang pag-alagad kag pagsimba mangin gamhanan nga espirituhanon nga eksperiyensia nga nagapabakod sang aton pagtuo kag testimonya kag nagapuno sang aton mga tagipusuon sang kalipay kag pagpalangga sa Dios kag aton isigkatawo.
Ang pamangkot ni propetang Alma mapuslanon gihapon sa karon: “Kamo bala espirituhanon nga nabun-ag sa Dios? Nabaton bala ninyo ang iya imahen sa inyo mga nawong? Naagyan bala ninyo ining dako nga pagbag-o sa inyo mga tagipusuon?”
Mga kauturan, ginaagda ko kamo nga ihatag ang bug-os ninyo nga hunahuna kag balatyagon sa Manluluwas subong. Himoa ang tagsa ka buhat sang pagsimba kag pag-alagad nga sinsero kag hungod. Ipahigad ang mga disturbo sang kalibutan kag tinguhai nga maghatag sang makahulugan nga tion para sa Ginuo adlaw-adlaw sang inyo kabuhi. Sinsero nga maghinulsol kag magbalik sa Iya, kag patawaron Niya kamo kag likupan kamo sa butkon sang Iya guguma. Indi maglagas sa mga butang sining kalibutan, kundi pilia nga ang inyo mata mangin tampad sa Iya himaya kag pangitaon ang mga butang sang mas maayo nga kalibutan. Nakahibalo Sia sang inyo mga hunahuna kag mga handum sang inyo tagipusuon, kag kon magpalapit kamo sa Iya, bugayan Niya kamo sang kusog, kompiyansa, kalinong kag kalipay sa sini nga kabuhi kag lugar sa Iya selestyal nga ginharian sa bilog nga walay katapusan.
Nakahibalo ako nga si Jesucristo buhi. Sia ang aton Manunubos. Kag palangga Niya kamo kag ako sa bug-os Niya nga tagipusuon. Sa ngalan ni Jesucristo, amen.