Pagdumdom sa mga Karnero

Si Cristo ang Maayong Manugbantay. Ang kada isa sa panong malahalon sa Iya. Ginpakita niya ang pamaagi sang pagbantay kag gintudloan kita sa pulong kag sa buhat sang mga kinaiya sang maayong manugbantay, dala ang pagkilala sang mga ngalan sang inyo karnero, pagpalangga sa ila, pagpangita sang mga nadula, pagpakaon, kag, sa ulihi, paggiya sa ila pabalik. Ginapaabot Niya nga himuon man naton ini bilang mga bulig Niya nga manugbantay.

Madamo kita sang matun-an parte sa ministering sa paagi sang Ginuo halin sa dumaan nga propeta—kag maayo nga manugbantay—nga si Moroni. Nagpangabuhi sia sa mabudlay kaayo nga panahon, nga wala sang cell phone, mga kompyuter, kag internet. Pero natigayon niya nga hibaluon ang tanan nga karnero. Paano niya ini ginhimo? Makita naton ang iya pamaagi sa Moroni 6. Mabasa naton didto nga ang mga miyembro “gin-isip sila sa katawhan sang simbahan ni Cristo; kag ang ila mga ngalan ginkuha, agud madumduman sila kag masagod sang maayo nga pulong sang Dios, agud tipigan sila sa husto nga dalan. … Ang simbahan masunson nga nagtipon-tipon, sa pagpuasa kag pagpangamuyo, kag sa paghinambalanay sa isa kag isa parte sa kaayohan sang ila mga kalag.”” (Moroni 6:4–5; emphasis gindugang).

Para kay Moroni, parte ini tanan sa mga tawo—mga ngalan! Ginasunod niya ang prinsipyo sang pag-isip kag paghibalo para ang tanan madumduman. Ang bisan sin-o nga ginabudlayan ukon nagtalang natalupangdan, kag ginatugtan sini ang mga Santos nga hambalan ang ila ikaayo sa mga konseho. Pareho sang manugbantay nga ginbilin ang nobentay nuebe (nga hilway sa katalagman, sigurado ako) kag ginpangita ang isa nga nadula (tan-awa sa Lucas 15:4–7), ginapangabay man kita nga hibaluon ang aton mga grupo—nga talupangdon kag dumdumon kag maglakat kag himuon man ini.

Bilang mission leader sa India, nadumduman ko nga ginpamangkot ko ang isa ka hubin nga branch president parte sa pila niya ka mga lalab-uton sa madason nga tuig: “Pila ka lalaki ang ihanda mo para makabaton sang Melchizedek Priesthood?” Ang madasig niya nga sabat “Pito!”

Nanumdom ako kon diin niya ginkuha ang amo gid sadto nga numero! Antes ako makasabat, nagpagwa sia sang papel nga may numero uno hasta pito nga nasulat sa kilid. Ang primero nga lima ka linya may mga ngalan—tunay nga mga tawo nga imbitahon niya kag sang iya elders quorum kag paisugon nga batunon ang bugay sang priesthood sa ila mga kabuhi. Siyempre, ginpamangkot ko ang parte sa blangko nga ikaanom kag ikapito nga linya. “Ay, President,” siling niya, nga nagatango sang iya ulo, “sigurado nga may mabunyagan kami nga duha ka lalaki sa pagsugod sang tuig nga pwede na magbaton sang priesthood antes matapos ang tuig.” Ining maayo nga lider nakaintiendi sang prinsipyo sang pag-isip kag paghibalo.

Gin-organisar ni Cristo ang Iya Simbahan sa paagi nga mangin mabudlay kalimtan ang isa ka kalag, kay ang kada isa malahalon sa Iya. Ang tagsa ka indibidwal sa ward, bisan ano ang edad ukon gender, may madamo nga tinugyanan—mga manugbantay—nga ginhatagan sang responsibilidad para atipanon sila, kag dumdumon. Ang isa ka pamatan-on, halimbawa, ginaasaynan para sa ikaayo niya sang bishopric, mga ministering brother, hamtong nga mga youth adviser, mga titser sa seminary, mga presidency sa korum, kag iban pa—tanan nagaserbe bilang manugprotekta, nga mabakod nga nagakaptanay sa idalom sining pamatan-on para sal-on sia kon mahulog. Bisan isa lang ka pukot ang naplastar sing maayo, ina nga pamatan-on mangin hilway sa katalagman, matalupangdan, kag madumduman. Pero, kasami wala kita sang makita nga bisan isa ka net. Ang mga tawo pirme nagatalang sa alipuop—kag wala gid sang nakatalupangod. Paano kita mangin mas maayo nga mga manugbantay? Sarang naton matun-an ang pag-isip kag paghibalo.

Ginahatagan kita sang Simbahan sang mga report kag mga gamit para mahimo ina—para makadumdom. Ang Quarterly Report ang pinakauna nga halimbawa. Ginatugotan kita sini nga isipon kag hibaluon ang kada miyembro sing pila ka beses kag talupangdon ang mga nadula ukon nagakinahanglan sang aton bulig kag pagpalangga. Ang Action and Interview List nagalista sang mga nagakinahanglan sang aton atensyon karon, amo man ang Temple Recommend Status report kag iban pa. Ining mga gamit sa pag-isip kag paghibalo nagapatutok sa aton sa mga tawo. Sin-o ang kinahanglan sang calling, pag-abanse sa priesthood, ukon bulig sa pagdala sang ngalan sang pamilya sa templo? Sin-o ayhan ang pwede naton buligan nga maghanda para sa full-time nga misyon? Sin-o ang wala nakasimba sini nga bulan? Ining mga gamit nagabulig sa aton nga madumduman ang mga tawo.

May kilala ako nga pamilya halin sa Estados Unidos nga nagbaton sang asaynment sa Aprika. Sa primero gid nila nga Domingo, nagsulod sila sa solo nga yunit sang Simbahan sa pungsod, kon diin masinadyahon sila nga gintamyaw. Sa pagtakop sang aga, ang asawa sang lalaki gintawag bilang Relief Society president kag sia bilang lider sa Young Men! Ginpamangkot niya ang daw ginakapoy nga branch president kon pila kabilog ang ila pamatan-on. Ining tampad, una-nga-henerasyon nga lider nagtudlo sa likod sang sacrament hall kag nagsiling, “Ina sila nga duha.” Ining tawo daw nagduda, gani gindala niya pauli ang listahan sang branch, kag nakita niya dayon nga may 20 gali ka pamatan-on sa listahan. Nagbalik sia sa branch president kag nagpangayo sang duha ka mapisan, bilingual nga mga soltero bilang iya mga manuglaygay kag dayon ginrebyu upod sa ila kag sa duha ka pamatan-on ang mga ngalan.

Dayon nagsugod ining mapisan nga mga pamatan-on sa pagtrabaho. Sang nagdason nga pila ka bulan, ginpangita nila ang tagsa ka pamatan-on nga nalista. Paagi sa ila mga ngalan, ining nagkaladula nga mga karnero gin-abiabi sang ila mga kaupdanan kag ginsagod sa espiritwal kag sa pisikal! Sa sulod sang isa ka tuig, bisan ano nga Domingo, may ara gid sang 21 ka pamatan-on nga nagasimba. Salamat sa mga pamatan-on nga nag-isip kag naghibalo.

Isa ko ka pinalangga nga abyan, nga bag-o lang maggradweyt, nagsaylo upod ang iya pamilya sa dako nga siyudad sa Amerika para magpadayon sang iya pag-eskwela. Gintawag sia dayon para pangunahan ang elders quorum. Medyo ginanerbyos sa primero niya nga interbyu sa stake president, determinado sia nga magkadto nga handa. Siling niya sa stake president nga may tatlo sia ka lalab-uton sa masunod nga tuig: (1) 90 porsyento nga ministering, (2) makahulugan nga leksyon sang ebanghelyo kada semana, kag (3) ginplanuhan gid nga aktibidades sang korum kada bulan.

Nga nagayuhum sa akon abyan, ining maalam nga stake president nagsiling, “May ngalan ka sang indi gawa aktibo nga miyembro sang korum nga mabuligan mo nga magkadto sa templo upod sa iya pamilya sini nga tuig?” Nakibot ang akon abyan. Nanumdom sia sing maayo kag naghambal sang ngalan. “Isulat ina,” siling sang stake president. Dayon ining eksperiyensyado nga lider namangkot liwat sini sang tatlo pa ka beses—kag natapos na ang interbyu. Ining pamatan-on naggwa sa sinang interbyu nga nakatuon sang isa sa pinakadako niya nga leksyon parte sa pagkalider kag ministering. Nagsulod sia sa interbyu dala ang mga programa, mga leksyon, kag aktibidades. Naggwa sia nga may dala nga mga ngalan! Atong apat ka ngalan sang ulihi ang nangin mayor nga tutok sang iya pag-alagad kag sang iya korum.

Bilang mission leader, ginbisitahan ko ang isa sa akon mga branch isa ka Domingo sang aga. Natalupangdan ko ang branch president nga nagasige hunos sang kard sa iya bulsa kag ginasulatan. Plano ko nga pamangkoton sia parte sadto pagkatapos sang pangtakop nga pangamuyo. Pagkatapos sang miting kag antes pa ako makapamangkot parte sa kard, nagdali-dali ang branch mission leader sa pulpito, kon diin gindaho sa iya ang papel. Madasig ko nga ginsundan ining masinadyahon nga lider sa iya semanal nga branch missionary coordination meeting. Antes sila magsugod, ginkuha niya ang papel sa iya bulsa. Puno ini sang ngalan sang mga miyembro nga wala makakadto sa sakramento nga miting. Sa sulod sang pila ka minutos, ang tagsa ka miyembro sang council nakapili na sang isa ukon duha ka ngalan, nga nagapangako nga bisitahan sila sina mismo nga adlaw para sigurohon nga OK sila kag pabal-on sila nga ginadumdom sila. Amo ina ang pag-isip kag paghibalo.

Nadumduman ko ang isa ka district, nga inoras ang kalayuon kon sakyon sa eroplano ang pinakalapit nga templo, kon diin pinakamataas nga prayoridad ang pagmentinar sang temple recommend, sa pihak sang kamatuoran nga daw indi gid nila ini magamit. Ang una nga Domingo kada bulan, ginagamit sang mga lider ang ila mga gamit sa pag-isip para hibaluon ang endowed nila nga mga miyembro. Kon may makita sila nga recommend nga malapit na lang ma-expire, nagaiskedyul dayon ang executive secretary sang renewal nga interbyu. Ang mga tawo nga paso na ang mga recommend ginalaygayan, dayon ginapangita para buligan nga makabalik sa dalan sang kasugtanan. Ginpamangkot ko kon pila sa ila endowed nga mga miyembro ang may current recommend. Ang sabat isa ka makadalayaw nga 98.6 porsyento. Sang ginpamangkot ko sila parte sa anum nga paso na ang mga recommend, ginlawag sang mga lider ang ila mga ngalan kag ginlaragway sa akon ang ila mga ginahimo para mapabalik sila!

Pila ka tuig ang nagligad, nagbalik ang akon pamilya sa Estados Unidos. Nasadyahan kami nga magsimba diri pagkatapos sang 26 ka matahum nga tinuig sa mas gagmay, mas naligwin nga mga yunit. Gintawag ako bilang misyonero sang ward. Kanami sang amon ward mission leader kag nagahimo sila sang masadya nga mga butang kag nagatudlo sang manami nga mga tawo. Nangabay ako nga magtambong sa ward council meeting para mag-obserbar kag magpangayo sang ila bulig para sa mga abyan nga ginabuligan namon. Nakibot ako nga ang gin-istoryahan lang amo ang palaabuton nga aktibidades sa ward. Ginpalapitan ko ang ward mission leader pagkatapos kag nagmuno nga wala sia makareport parte sa amon mga ginabuligan. Ang iya sabat? “Ay, indi gid ko pirme maka-report.”

Ginkumparar ko ina sa branch council meeting sa Lahore, Pakistan, nga nakadtuhan ko pila lang ka semana antes. Ining gamay nga grupo nagpungko sa gamay nga lamisa, kag ang ila gin-istoryahan puro tawo. Mga ngalan. Ang tagsa ka lider nagreport sang ila pagkatinugyanan kag sang mga indibidwal kag mga pamilya nga ila ginaulikdan. Ang tanan may tsansa nga magtugda sang ila ginahunahuna kon paano nila mabugayan sang pinakamaayo ang ila ginaistoryahan. May mga plano nga ginhimo kag ginpanagtag nga mga asaynment. Kanami nga leksyon parte sa pag-isip kag paghibalo paagi sa ngalan halin sa una nga mga henerasyon naton nga kauturan.

Sa Simbahan ni Jesucristo, gin-instruksyonan kita sang mga propeta sadto kag mga propeta subong—kag paagi sa sulundan nga ginpahamtang sang aton Manluluwas—kon paano mag-minister. Nagalista kita sang mga ngalan, nagadumdom kita, kag nagahambalanay kita parte sa ikaayo sang mga kalag. Ang mga lider nga nagahimo sini indi gid maubusan sang agenda sa ila mga miting sa konseho! Ang prinsipyo sang pag-isip kag paghibalo epektibo. Amo ini ang pamaagi sang Ginuo. Mahimo naton ini. Para sa Dios, nga nagtuga sang uniberso kag nagadumala sang tanan, ining buluhaton—ang Iya buluhaton kag himaya—personal kaayo. Kag dapat amo man ini sa tagsa sa aton, bilang mga instrumento sa Iya mga kamot sa Iya matahum nga buluhaton sang kaluwasan kag pangkahitaasan. Magaresulta ini sa mga milagro sa kabuhi sang tunay nga mga tawo. Sa ngalan ni Jesucristo, amen.