Mapainubuson nga mga Kalag Nagaluhod sa mga Altar
Kon maghimo kita kag magtuman sang aton mga kasugtanan, ginahugpong naton ang aton mga kaugalingon sa Manluluwas, nga matigayon gid ang Iya kaluoy, pag-amlig, pagpakabalaan, pag-ayo, kag kapahuwayan.
Salamat, koro, para sa inyo testimonya paagi sa sinang bag-o nga himno.
Ang bag-o nga pang-sakramento nga himno “Bread of Life, Living Water” nagapuno sang akon kalag. Isa ka linya sa himno nagasiling, “Now I come before the altar, off’ring Him my broken heart.”
Ang akon paghangop sinang mga pulong nagdalom wala madugay pagkatapos nga ang amon pamilya naghalin sa Newbury Park, California, agud mag-alagad sa Utah Ogden Mission sang 2015. Nakabaton ako sang imbitasyon nga maglibot-libot sa Hill Air Force Base malapit sa Layton, Utah. Wala pa gid ako nakakadto sa base militar, ukon nakasugata sang pari sang militar ukon sang mga lalaki kag mga babayi nga nagatrabaho agud mahatag ang kasigurohan kag proteksyon para sa ila pungsod.
Pareho sa linibo ka iban pa nga boluntaryo kag propesyunal nga mga pari nga nagaserbe sa aton mga bilanggoan, mga ospital, kag mga kampo militar sa bilog nga kalibutan, si Chaplain Harp nag-inspirar kag nagpalig-on sa akon. Ang amon katapusan nga ginkadtoan sa base amo ang santuaryo. Namangkot ako sa chaplain kon nagahikot sia sang mga serbisyo para sa tanan nga tawo nga luyag magbinagbinag, magpangamuyo, magpamalandong, kag magsimba. Nagdiretso sia sa atubang nga dingding sang kapilya, kag ginkuha niya ang isa ka krus sa likod sang mga kurtina. Nagsiling sia nga ginagamit niya ang krus sa mga serbisyo nga para sa mga Protestante kag mga Katoliko. Namangkot ako sa iya kon ano ang ginagamit niya para sa aton Judio nga mga kauturan, kag naglakat sia sa pihak sang atubang nga dingding, kag ginkuha niya ang Bituon ni David.
Dayon namangkot ako, “Ano ang ginahimo mo nga mga serbisyo para sa mga Santos sa Ulihing mga Adlaw?” Ginpahigad niya ang mga simbolo kag gintudlo ang dako nga kahoy nga altar sa tunga sang santuaryo. Nagsiling sia nga ang mga miyembro sang Ang Simbahan ni Jesucristo sang mga Santos sa Ulihing mga Adlaw nagahanda kag nagapakamaayo sang tinapay kag tubig sa altar. Namangkot ako kon ang dako, nga daw naplastar na nga altar ginakakas antes sang mga serbisyo para sa aton mga kauturan nga Judio, Muslim, Katoliko, ukon Protestante. Nagsiling sia nga ang altar wala na ginaidog tungod pila sang mga pagtuluohan nagagamit man sang altar.
Si Abraham naghimo sang altar, gingapos si Isaac, kag sadto handa na nga ihalad ang iya bugtong nga anak, pero ginpunggan ang iya kamot, kag nagpahayag sia, pareho sang pagpahayag sang Ginuo, “Yari ako”! Pila bala ka beses ang Dakong Jehova ukon isa sang Iya mga propeta nagboluntaryo nga, “Yari ako”?
Sa Iya Wali sa Bukid, gin-agda kita sang Manluluwas nga makig-uli sa aton mga utod antes kita magpalapit sa altar. Si Pablo nagtudlo nga “napakabalaan” kita sa altar paagi sa Pagbayad-sala ni Jesucristo.
“Ginbayaan [sang propeta nga si Lehi] ang iya balay … kag ang iya malahalon nga mga butang. … [Dayon] nagpatindog sia sing isa ka altar … kag naghimo sang halad … , kag naghatag sang pasalamat sa Ginuo.”
Ang Biblia kag ang Libro ni Mormon nagatudlo sa aton nga magsimba sa Anak sang Dios sa mga altar. Ngaa?
Ang aton una nga mga ginikanan nga si Adan kag Eva naghimo kag nagsimba sa mga altar. Pagkatapos nga gintabog sila pagwa sa Hardin sang Eden kag nagsimba sing “madamo nga inadlaw,” isa ka anghel ang nagbisita nga may makatalandog nga pamangkot nga mahimo ipamangkot sa kada isa sa aton: “Ngaa nagahalad ka sang mga sakripisyo sa Ginuo?”
Si Adan nagsabat, “Wala ako makahibalo.”
Ang sabat sang anghel sa mapainubuson nga pag-ako ni Adan makahalawhaw: “Ini … kaangay sang sakripisyo sang Bugtong nga Anak sang Amay. … Gani, himuon mo ang tanan nga imo ginahimo sa ngalan sang Anak, kag maghinulsol kag magpanawag ka sa Dios sa ngalan sang Anak sa wala’y katubtuban.”
Ang pang-sakramento nga lamesa kag mga altar sa templo nagasimbolo sang sakripisyo ni Jesucristo kag Iya wala dulonan nga Pagbayad-sala.
Kon maghimo kita kag magtuman sang aton mga kasugtanan, nga nagabaton sang mga ordinansa sang sakramento sa simbahan kag sang endowment kag paghugpong sa templo, ginahugpong naton ang aton mga kaugalingon sa Manluluwas, nga matigayon gid ang Iya kaluoy, pag-amlig, pagpakabalaan, pag-ayo, kag kapahuwayan.
Kaluoy kag Pag-amlig Paagi sa mga Kasugtanan
Sang nagaedad ako 15 anyos, naglisensya ako sa akon tatay kon pwede nga indi ako magtambong sa sakramento nga miting—isa lang ka Domingo sa Enero para sa espesyal nga American football nga hampang. Nagsiling sia nga yara na ako sa husto nga edad para maghimo sina nga desisyon para sa akon kaugalingon kag nagpangabay sia sa akon nga pamatian ang iya laygay. Nagsiling sia, “Kon pilion mo nga indi magtambong sa sakramento sing kis-a lang, mas mahapos ang magdesisyon nga indi magtambong liwat.”
Kon ang Manluluwas ang dako nga nagakonektar, ang kaaway ang nagaseparar. Sia, si Satanas, nagatentar sa aton nga iseparar ang aton mga kaugalingon halin sa aton nakonsagrar nga mga lugar sang pagsimba kag halin sa pag-amlig ni Jesucristo. Kon magsimba kita sa Manluluwas, nagabaton kita sang “gahum nga magkontra sa natural nga hilig sang kalibutan.” Kon maghinguyang kita sing tion sa pagpakig-angot sa Iya, mabaton naton ang promisa nga “maluwas [kita] halin kay Satanas.” “Dayon, samtang ginatipigan naton ang aton mga kasugtanan, ginabugayan Niya kita sang Iya … nagapabakod nga gahum.” Naapresyar ko gid ang akon eksperiyensya nga pagpakig-angot sa Manluluwas paagi sa mga kasugtanan nga ginahimo sa balaan nga mga altar.
Ang pagpalambo sang paghangop sang wala katapusan nga Pagbayad-sala sang Manluluwas sing dinalan sa dinalan, pagsulundan sa pagsulundan, nagahatag sang espirituhanon nga proteksyon batok sa mga pagsulay sang kaaway. Ang lamharon nga si Elder Jaggi sa Mexico, si Zuster [Sister] Jaggi sa Belgium, kag iban pa nga mga misyonero sa bilog nga kalibutan mahimo gid nga makita ang ila mga abyan nga nagaambit sang mga bugay sang bunyag kag nagabaton sang dulot sang Balaan nga Espiritu kon ang ila mga abyan magtambong sa sakramento nga miting sa sulod sang una nga semana sang pagkontak sa ila.
Ang isa ka lamharon nga adulto sa Tonga or Samoa mahimo gid nga mahugpong sa balay sang Ginuo kon naghanda sila para sa kag nagbaton sang ila endowment pagkatapos nga makagradweyt sa eskwelahan. Sa endowment, ang mga miyembro ginaagda nga ipangabuhi, tumanon, kag tipigan ang lima ka layi nga nagahatag sa ila mga kabuhi sang gahum kag proteksyon. Kon maghimo kita sang mga kasugtanan upod sa Ginuo, nagaluntad ang suod nga kaangtanan. Ginapakita naton ang aton katampad kag gugma sa Iya. Ang aton kusog kag gahum nagatubo sa tagsa ka promisa nga ginahimo kag ginatuman.
Pagpamalandong kag Pagpakabalaan
Kon kita mapainubuson kag simboliko nga magluhod sa mga altar sang Ginuo, isa ini ka oportunidad para sa pagpamalandong nga, “nagapaumod parte sa bugal sang [aton] mga tagipusuon, … [nga nagapaubos sang aton mga kaugalingon] sa atubang sang Dios.” Bilang pamatan-on, antes ako maglagaw upod sa akon mga abyan, ang akon iloy pirme nagasiling, “Dumduma kon sin-o ka, kag pabal-a ko nga nag-abot ka na.” May pila ka gab-i nga wala na ako nakapabalo tungod gab-i na gid ako nakapauli. Ginhinulsulan ko nga wala ko nahimo yadtong importante nga mga pagpakita sa akon Nanay.
Karon ginapaabot ko ang dalayon nga pagpakig-angot sa Amay nga Langitnon. Sa akon adlaw-adlaw nga rutina sa personal nga pagsimba, nagaluhod ako sa pagpangamuyo, sa tupad sang akon kama ukon upod sang akon pamilya, kag ginapanan-aw ko ang akon kaugalingon nga nagaluhod sa mga altar, nga nagapamalandong kag nagausisa sang akon kabuhi. Nagapamensar ako parte sa sakramento, sa pila ka bilog nga mga tinapay, nga ginatipik-tipik kag ginasipad-sipad para sa aton, nga ang tagsa simbolo sang gintipik-tipik nga lawas sang aton Manluluwas. Madumduman ko ang panudlo ni President Dallin H. Oaks nga “ang tagsa ka tinapay pinasahi, pareho nga ang mga indibidwal nga nagaambit sini pinasahi man.” Kon magluhod ako sa pagpangamuyo, ginahunahuna ko kon paano ko mahatag sa Dios ang akon pagbuot.
Si Elder David A. Bednar nagtudlo nga “ang ordinansa sang sakramento isa ka balaan kag sulitsulit nga pangagda nga maghinulsol sing sinsero kag magbag-o sa espirituhanon. Ang akto sang pag-ambit sang sakramento, kon ini lang, wala nagakakas sang mga sala. Pero kon mahinalungon kita nga nagahanda kag nagapartisipar sa sining balaan nga ordinansa nga may masinulub-on nga tagipusuon kag mahinulsulon nga espiritu, ang promisa amo nga aton dalayon nga maangkon ang Espiritu sang Ginuo sa pag-upod sa aton. Kag paagi sa nagapakabalaan nga gahum sang Balaan nga Espiritu bilang dalayon naton nga kaupod, aton dalayon nga mahuptan ang kapatawaran sang aton mga sala.”
Kon ako kag si Amy magbinagbinag sang mga eksperiyensya sang amon kabuhi, ginaselebrar namon ang dulot sang perpekto nga gugma kag sakripisyo ni Jesucristo. Makita man namon kon paano nagaibwal sa kaakig ang impiyerno. Paano namon madaug ang mga paghimutad sa paghusga, kabalaka, depresyon, kanser, diabetes, pagdaugdaog sa online, pagkawat sang identidad, pagkahulog sang lapsag, pagkadula sang anak, utod nga lalaki, kag amay? Bangod ginkuha ni Jesus ang mapait nga kupa sang pagkurog, ang kupa sang kaakig—para sa akon, para sa akon pamilya, para sa aton tanan!
Gethsemane, ni Adam Abram, courtesy of altusfineart.com © 2025
Ang “mapait nga ilimnan” nga Iya gin-inom sa Hardin sang Getsemani kag ang Iya pag-antos nga “nangin tuman” sa krus sa Kalbaryo nagatugot sa aton sa paghamtang sang mga kabudlayan, pagtamay, pagpamintas, kaakig, kag sang pagkurog sa mga altar sang Ginuo kag “mapakabalaan [kita] paagi sa pagbaton sang Balaan nga Espiritu,” pirme.
Si Sister Patricia Holland nagsiling, “Ang akon hanuot nga pangamuyo para sa inyo kag para sa akon karon nga adlaw amo nga itugyan naton sing lubos ang aton pagbuot sa Dios, maghinulsol kita kag magsalig sa mga promisa kag paghidaet sang Dios bisan diin man kita kag bisan ano man ang aton nahimo.”
Isa ka Lugar para sa Pag-ayo kag Kapahuwayan
Kon magpalapit kita sa altar, wala kita nagatigayon sang padya; kundi nagatuon kita parte sa Taghatag sang Regalo. Sa sinang pagtuon kag pag-angot kay Jesucristo paagi sa kasugtanan nagaabot ang pag-ayo. Si Nefi nagsiling, “Ginpuno niya ako sang iya gugma, bisan tubtob sa pagkaupos sang akon unod.” Kag ang aton mapinalanggaon nga Manluluwas nag-agda, “Indi bala kamo subong magbalik sa akon, kag maghinulsol sang inyo mga sala, kag mahaylo, agud nga mapaayo ko kamo?”
Sang gagmay pa lang ang amon duha ka magulang nga babayi, si Mackenzie kag Emma, isa sang paborito nila nga mga istorya amo ang The Chronicles of Narnia: The Lion, the Witch and the Wardrobe [Ang mga Cronica sang Narnia: Ang Leon, ang Aswang kag ang Aparador]. Naluyagan gid namon ang leon nga si Aslan. Ang isa sang amon di-malipatan nga mga gab-i sa pagbasa sang libro amo nga sang ginhatag sang gamhanan nga leon ang iya kabuhi kay Edmund. Di-malipatan tungod ang mga ginikanan kag mga anak nga babayi naghibi sang ang kabuhi sang leon gintapos sa Stone Table sang Aswang. Di-malipatan tungod ang paglaum nagpadayon, sa pihak sang trahedya, tubtob nga ang makahalawhaw natabo. Ang mga singgit sang kalipay naglanog sa sinang gamay nga kwarto sang si Aslan nabanhaw kag nagsiling, “Kon [ang Aswang nakahibalo sang matuod nga kahulugan sang sakripisyo], … [nakahibalo] sia nga [kon] ang isa ka handa nga biktima nga wala nagluib ang [mapatay] imbes sang traidor, mabuka ang [Stone] Table kag ang Kamatayon mismo [mabaliskad].”
Ginaayo ni Jesucristo ang tanan nga pilas. Ginahimo nga posible ni Jesucristo ang mabuhi liwat.
Sa iya pamulongpulong sa Oktubre 2022 nga pangkabilogan nga komperensya, ginlaragway ni President Russell M. Nelson ang isa ka naga-tour nga grupo nga nagsulod sa ginhiwat nga open house sang isa ka templo. Isa ka bata nga lalaki yara didto. Si Pangulong Nelson nagtudlo:
“Sang magsulod ang grupo sa endowment room, gintudlo sang bata nga lalaki ang altar, kon diin nagaluhod ang mga tawo para maghimo sang mga kasugtanan upod sa Dios, kag nagsiling, ‘Ay ho, kanami. Amo ini diri ang lugar para ang mga tawo nga makapahuway sa ila pagpanglakaton sa templo.’
“… Sigurado wala sia sang ideya parte sa direkta nga koneksyon sang paghimo sang kasugtanan upod sa Dios sa templo kag sang indi matupungan nga promisa sang Manluluwas:
“Kari sa akon, tanan kamo nga ginabudlayan kag ginabug-atan, kag papahuwayon ko kamo.
“Itakod ang akon gota sa inyo, kag magtuon kamo sa akon; … kag makakita kamo sang kapahuwayan sa inyo mga kalag.
“Kay ang akon gota mahulas, kag ang akon lulan mamag-an’ [Mateo 11:28–30; pagdagmit gindugang].”
“Ang Anak sang Tawo wala gid sing olonlan sang iya ulo,” apang gin-agda Niya ang Iya mga disipulo, ikaw kag ako, sa sakramento nga lamesa agud magpahuway upod sa Iya didto. Kon ang “mapainubuson nga mga kalag nagaluhod sa mga altar,” ang paghidait nagabugana. Ang mga butkon sang aton Manluluwas nahumlad; ang Iya lamesa nahanda na. Simbahon ang Anak sang Dios sa Iya balaan nga mga altar. Sa ngalan ni Jesucristo, amen.