10:36

Ipahisanto ang Inyo Tagipusuon kay Jesucristo: Ang Sagrado nga Regalo sang Musika sa Primary

Ni Sister Tracy Y. Browning

Ika-duhang Manuglaygay sa Pangkabilogan nga Pangulohan sang Primary

Ang mga kanta sa Primary mga wali para sa mga disipulo ni Jesucristo, mga testimonya sa pagkamatuod sang ginpanumbalik nga ebanghelyo, kag mga pangamuyo nga ginpahamtang sa musika.

Isa sang mga bugay sang akon pag-alagad sa Primary amo nga ang akon tagipusuon nakatuon nga magpalangga sa mga lengguahe nga wala ginahambal sang akon dila. Nasalapoan ko ang kalipay sa pagpakig-angot sa kaupod nga mga Santos paagi sa kinaandan nga lengguahe sang sagrado nga musika. Kag ilabi na paagi sa simple nga mga kanta sang Primary, nalabawan sang Balaan nga Espiritu ang sablag sa lengguahe kag nagpuno sang akon tagipusuon sang Iya paghutik. Sa mga tingug sang mga kabataan, ang gugma sang Dios kag Iya Anak nga si Jesucristo napahayag sa maathag kag nagadulut nga kamatuoran.

Bisan pa nga wala ako nagdako sa Primary, madasig ako gintudloan sang Espiritu sang kasagrado sang mga kanta sini, kag nangin bahin na ini sang akon personal nga pagsimba. Ang mga kanta sang Primary nagdala sang balaan nga impluwensya sa akon kabuhi kag nagbayaw sang akon kalag, nagtudlo sa akon sang wala katapusan nga mga kamatuoran, kag nagpapalapit sa akon sa Manluluwas kag sa Iya ebanghelyo.

Si President Dallin H. Oaks sang una nagtudlo nga “ang pagkanta sang mga himno isa sang pinakamaayo nga paagi nga makatuon sang doktrina sang ginpanumbalik nga ebanghelyo.” Ina nga mga pulong matuod para sa aton tanan pero ilabi na gid sa mga kabataan. Ang musika sa Primary isa sang labing mapinalanggaon nga paagi sa pagtanom sang mga liso sang testimonya sa mga tagipusuon sang pinakalinghod nga mga disipulo sang Manluluwas. Ang mga ginikanan, mga lider, kag mga titser nagasagod sinang liso kon magpamatuod sila kag mag-agda sa kabataan nga maghatag sang ila mga testimonya sa pagkilala nila sang Amay nga Langitnon; Iya Anak, si Jesucristo; kag sang Balaan nga Espiritu.

Sining katapusan nga mga tinuig sang akon pag-alagad, naghinguyang ako sing tion sa pagkanta kag pagtuon sang musika sa Primary samtang ginabinagbinag ang pila ka mga pamangkot:

Paano bala ang mga kanta sa Primary nga natun-an sa pagkabata mangin espirituhanon nga lengguahe nga ginagamit sang kabataan sa pagpamatuod sa bug-os nila nga kabuhi?
Paano bala ang pagkanta sang mga kamatuoran sang ebanghelyo nagabulig sa kabataan nga dumdumon ang Ginuo bilang bahin sang ila kasugtanan kag nagahanda sa ila para sa Iya mga ordinansa?
Kag paano bala ang mga kanta sa Primary nagabulig sa pagsulat sang mga layi sang Dios sa mga tagipusuon sining pinakalinghod nga mga disipulo?

Sang nagsugod ang Primary sang 1878, ang iya sini una nga pangulo, si Aurelia Spencer Rogers, nakatalupangod nga “importante ang magkanta.” Ang musika masami nga sentro sa pagtudlo sang ebanghelyo sa kabataan. Ang mga kanta sa Primary mahimo mangin una nga espirituhanon nga lengguahe sang bata tungod ang ila sini simple, di-malipatan nga mga melodiya nagapaathag sang mga kamatuoran sang ebanghelyo. Ining mga kanta sarang nga magpabilin sa mga kabataan sa bug-os nga kabuhi, nga nagahimo nga bahin sang ila pagkadisipulo kag isa ka natural kag normal nga paagi sa ila nga magpamatuod parte sa Manluluwas.

Pagtudlo sang Doktrina ni Jesucristo Paagi sa Kanta

Ang mga kanta sa Primary mahimo man nga mangin gamhanan nga mga paagi sa pagtudlo sang doktrina. Ang pila ka mga kanta nagasugid parte sa kabuhi kag pag-alagad sang Manluluwas. Ang iban nagatudlo parte sa Iya mga kinaugali, pareho sang Iya pagtuo, Iya paglaum, kag Iya putli nga gugma. Kag ang pinakasagrado nga mga kanta nagapamatuod sang Iya wala dulonan nga Pagbayad-sala kag sang gugma nga nagailig halin sa sinang buhat sang pagluwas.

Ang aton pinalangga nga propeta nga si President Russell M. Nelson, nagtudlo: “Ang [musika] sarang mangin padayon nga impluwensiya para sa kaayohan nga lampas sa mga tinion nga gagmay pa ang mga kabataan. … [May] gahum [ini] sa paghatag sang espirituhanon nga pagbatiti. May yara ini sang makapaayo nga gahum. May gahum ini sa pagpahapos sang pagsimba; nagatugot ini sa aton nga binagbinagon ang Pagbayad-sala sang [Manluluwas] kag ang Pagpanumbalik sang ebanghelyo upod ang iya sini nagaluwas nga mga prinsipyo kag nagapahitaas nga mga ordinansa. Ang musika nagahatag sang gahum agud mapahayag naton ang mapinangamuyuon nga mga hunahuna kag magpamatuod kita sang sagrado nga mga kamatuoran.”

Bilang mga ginikanan, mga lider, kag mga titser, ang aton panikasog nagalakip sang pagbulig sa kabataan nga mabaton ining ginpromisa nga mga bugay paagi sa pagtudlo, sing hungod, sang mga kamatuoran sang ebanghelyo nga makita sa musika. Si President Nelson nagtudlo man nga ang “mga kabataan makatuon sang doktrina kon nagatuon sila sa pagkanta pareho man nga matun-an nila ang doktrina sa klase.” Ining mga kanta makahatag sing pila ka mga leksyon sa pagtuo nga nagatudlo sa kabataan sa Manluluwas kag makabulig sa ila nga magtubo ang ila pagkatutum sa Iya ebanghelyo.

Ang balaan nga mga kasulatan nagatudlo nga ang mga kanta sang mga matarong nga halin sa tagipusuon nagapalipay sa Manluluwas. Nanamian ako sa kalipay nga dala sang mga tingug sang pinakalinghod nga mga disipulo sang Manluluwas. Nakahibalo ako nga ang ila mapinangamuyuon nga mga kanta nagalab-ot sa langit bilang mga pagpabutyag sang pagtuo nga nagaagda sang Balaan nga Espiritu nga magkompirma sang wala katapusan nga mga kamatuoran kag malulo nga nagaagda sa iban nga batunon ang tawag sang aton Manluluwas nga sundon Sia kag magpauli. Suno sa pahanumdum ni Elder Henry B. Eyring sa aton, yara sa sina nga mga tinion sang pagbatyag sang Espiritu nga may ebidensya kita sang Pagbayad-sala sang Manluluwas nga nagaepekto sa aton kabuhi.

Pagtudok sang Kamatuoran sa Tagipusuon

Ang musika sa Primary mahimo mangin milagro nga ginadala sang aton kabataan bilang mga disipulo sa ila bug-os nga kabuhi. Ang isa ka kanta nga matun-an sa edad nga anum ka tuig may gahum nga magpabilin sa aton—kag pwede magbalik pagligad sing pila ka dekada sa mga tinion sang desisyon, tentasyon, kalisud, ukon kalipay. Ayhan sa ulihi, ang mga liriko sang “I Will Follow God’s Plan [Sundon ko ang Plano sang Dios]” mahimo magserbe bilang espirituhanon nga angkla nga nagasulit sang pamatuod sang Apostoles nga si Pablo parte sa kapat-uran sang mga promisa sang Dios sa aton. Ukon mahimo ini magpahanumdum sa aton nga tungod ginatuman sang Dios ang Iya mga promisa, ang Iya mga kasugtanan nagahatag sing mabaskog nga pagpasulhay kag lugar nga dalangpan kag nagaagda sa aton nga ibutang ang aton paglaum kag pagsalig sing malig-on kay Jesucristo kag sa Iya nagabayad-sala nga gahum.

Ang hamtong nga mga miyembro sa bug-os nga kalibutan, sa tinion sang kabudlayan, pirme nagadumdum kag nagaliso sa mga kanta sang Primary nga ila natun-an sang bata pa sila. Para sa madamo, ining mga kanta nagsuporta sang una nga pagtubo sang ila pagtuo kay Jesucristo kag masami nga una nga kahimtangan kon diin nagsugod ang pagkahaylo sa Iya ebanghelyo. Ang mga ginikanan, mga lider, kag mga titser nagbatiti sinang pagtuo sa sulod sang mga tinuig paagi sa pagtudlo, pagkanta, kag pagpamatuod sa mga kabataan nga may paghalong.

Isa ka sister ang nagsugid sa akon nga ginaapresyar gid niya ang musika sa Primary, kag pagligad sing 20 ka tuig tungod sini napadasig ang iya dalayon nga pagkahaylo sa ebanghelyo ni Jesucristo. Isa pa ka miyembro ang nagpamatuod nga ang Primary nagtanom sang mustasa nga liso sang pagtuo sang bata pa sia kag nangin rason nga nakabalik sia sa Simbahan sang Ginuo sang nagaedad na sia sing mga 30 anyos. Ang Manluluwas nagpromisa, “Ang Mananabang … magatudlo sa inyo sang tanan nga butang, kag magapahanumdum sa inyo sang tanan.” Ang musika sa Primary mahimo mangin isa ka paagi nga matuman ang ina nga promisa.

Isa pa ka ginapakamahal nga kanta sa Primary nagapahayag sang gahum sang simple nga pagtuo kag nagapadayon nga testimonya:

Sa akon paglakat upod kay Jesus paibabaw sa akon puluy-an,
Bugayan Niya ako sang Iya Espiritu kag pun-an ako sang Iya gugma,
Bag-ohon ang akon tagipusuon sa wala katapusan kag buligan ako nga maathagan.
Magalakat ako upod kay Jesus, kag Sia man sa akon.

Kon magkanta ang kabataan, ginapabutyag nila ang handum sing isa ka disipulo kag ginatun-an ang sulundan sang pagkabuhi sang kasugtanan. Mahimo gamiton sang Espiritu ang musika sa pag-ukit sang wala katapusan nga mga kamatuoran sa ila malum-ok nga mga tagipusuon. Kag sa ulihi, ang mga kabataan makapili sa pagpahisanto kag pagliso sang ila mga tagipusuon kag ila mga kabuhi kay Jesucristo paagi sa paghimo kag pagtuman sang sagrado nga mga kasugtanan upod sa Iya.

Pagdumdum sang Aton mga Kasugtanan kag Paghanda para sa mga Ordinansa

Ang sagrado nga musika makabulig sa pagsulat sang doktrina ni Cristo sa kalag kag paghanda sa aton sa pagbaton sang Iya mga ordinansa. Ginaangot sini ang doktrina sang Manluluwas sa aton memorya kag ang ina nga memorya sa aton pagkadisipulo sa Iya.

Bilang mga lider sang Primary, may kahigayunan kami kag sagrado nga responsibilidad nga sigurohon nga ang musika sa Primary ginatudlo nga may kalipay, nga may paghangop sang doktrina, kag kaupod ang Espiritu. Nagalakip ini sang pag-agda sa kabataan nga talupangdon kon ano ang ila nabatyagan samtang nagakanta sila kag pagbulig sa ila nga mahibaloan nga inang mga balatyagon nagahalin sa Balaan nga Espiritu. Ining mga pagpanikasog nagabulig handa sang aton kabataan para sa sagrado nga mga ordinansa, pareho sang bunyag kag kompirmasyon, kag pag-inspirar sang ila memorya sa kasugtanan sa ila dalayon nga pagbag-o sang ila mga promisa sa Dios.

Sa Katapusan nga Panihapon, pagkatapos nga ginpahamtang sang Manluluwas ang sakramento, si Mateo nagsulat nga “sang nakaamba sila sing ambahanon, naggwa sila pakadto sa Bukid sang mga Olivo.” Kada semana, ang nabunyagan kag nakompirma nga mga miyembro sang ginpanumbalik nga Simbahan sang Ginuo, lakip na ang nabunyagan nga kabataan nga nagaedad walo ka tuig, nagahanda sa pag-ambit sang sakramento sang Ginuo. Paagi sa pagkanta sang sagrado nga musika, ang mga kongregasyon sang mga anak sang Dios ginahatagan sing oportunidad nga ihanda ang ila mga tagipusuon para sa sinang sagrado nga ordinansa nga dal-on sa ila mga kaugalingon ang Iya ngalan, nga dumdumon Sia pirme, kag nga tumanon ang Iya mga kasugoan.

Pangtakop nga Testimonya

Mahal kong mga abyan, nagapamatuod ako nga ang mga kanta sa Primary nagatudlo sang wala katapusan nga mga kamatuoran kag doktrina nga nagadul-ong sa aton kay Jesucristo kag sa Iya ebanghelyo. Ginaagda ko kamo sa pagbinagbinag sang sadsaran nga mga kamatuoran nga nasulat sa inyo mga tagipusuon paagi sa simple nga mga ginatudlo sining mga kanta kag sa pagpamatuod sinang mga kamatuoran sa pinakalinghod nga mga disipulo sang Manluluwas samtang nagatudlo kamo sa ila sang maayong balita sang ebanghelyo paagi sa kanta.

Nakahibalo ako nga ang Dios nga Amay, sa Iya wala dulonan nga gugma, nagpadala sang Iya Hinigugma nga Anak sa duta agud tudloan kita; agud ipakita sa aton ang dalanon, kag agud tuboson kita paagi sa Iya Pagbayad-sala.

Nakahibalo ako nga ang kabuhi kag pag-alagad sang Manluluwas matuod kag personal. Ang balaan nga mga kasulatan puno sang mga istorya parte sa Iya pagpang-ayo, Iya kaayo, kag Iya mga milagro.

Nakahibalo ako nga ginapamatian kag ginasabat sang Amay nga Langitnon ang sinsero nga mga pangamuyo sang Iya mga anak, bisan ano man ang ila edad, sirkumstansya, ukon lengguahe. Ginapamatian Niya ang mahipos nga mga pagpakitluoy sang aton mga tagipusuon.

Nagapamatuod ako nga sa Getsemani, ginlukdo ni Jesucristo ang kabug-at sang aton mga sala, mga kasubo, kag mga kasakit. Handa Sia sa pag-antos tungod sang Iya gugma sa aton kag ginhimo posible para sa aton nga mapatawad kag makapauli.

Nakahibalo ako nga literal kita nga mga anak sang Dios, nga gintuga sa Iya dagway, ginhatagan sing diosnon nga potensyal, kag gin-agda nga magbalik agud magpuyo upod sa Iya kon pilion naton nga sundon si Jesucristo.

Nakahibalo ako nga si Jesucristo ang aton perpekto nga ehemplo, kag kon sundon naton Sia paagi sa pag-alagad, pagpatawad, kag pagpalangga sa iban, mangin mas pareho kita sa Iya adlaw-adlaw.

Kag nakahibalo ako nga ang balaan nga mga templo sang Ginuo Iya balay diri sa duta. Sa sulod sini, nagahimo kita sang sagrado nga mga kasugtanan, nagabaton sang wala katapusan nga mga pagpakamaayo, kag nagatuon pa gid parte sa Iya kag mabatyagan pa gid ang Iya presensya. Ang templo isa ka lugar sang pagtuon, katawhay, kag paghanda para sa aton mga kabuhi.

Nagapamatuod ako nga ang mga pagpanikasog nga aton ginahimo sa pagtudlo kag pagkanta sa aton kabataan sining mga kanta sang Primary indi lamang manami nga bahin sang aton relihiyoso nga tradisyon. Mga wali ini para sa mga disipulo ni Jesucristo, mga testimonya sa pagkamatuod sang ginpanumbalik nga ebanghelyo, kag mga pangamuyo nga ginpahamtang sa musika. Ang sagrado nga musika makapasilak sang Kasanag ni Cristo sa nagapamati kag makabubo sini sa tagipusuon sang nagakanta. Mahal kong mga abyan, luyag ni Jesus nga ipalapnag naton ang Iya impluwensiya. Nagapamatuod gid ako sa sagrado nga ngalan ni Jesucristo, amen.