Ua Faaalia e le Eseta Lo Tatou Taua Moni ia Keriso

I le Eseta tatou te faamanatuina ai le mea moni e faapea, ona o Keriso, e mafai ai ona tatou suia. Pe a tatou salamo, tatou te faaali atu ia te Ia tatou te mananao e sui.

Sa masani ona ou matuai lotovaivai lava i a’u agasala ma mea sese. Ou te tatalo ona toe faia lea o lea lava mea sese e tasi. Sa ou lagona e pei ua ou leiloa. Sa ou mafaufau, "Pe ua ou agavaa ea e salamo?" Ona ou faalogologo lea i le saunoaga a Sister Tamara W. Runia "O Le Salamo E Le o se Avega Mamafa ia Iesu Keriso—Na Te Faasusuluina Lona Olioli!" O lana lauga o le tali lea sa ou manaomia. Pe a tatou i ai i ni vaega maualalo i o tatou olaga, e siitia i tatou e Keriso ma faamalosiauina i tatou. O le salamo o le auala sili lea ona lelei e agai ai i luma.

Na afio mai Iesu Keriso i le lalolagi e totogi le tau mo i tatou. E ala i le salamo ma mulimuli i Ana faataitaiga, tatou te aoao ai le auala e mafai ai ona tatou faia ia sili atu i le lumanai.

I le taimi o le Eseta, tatou te faamanatuina ai le manumalo o Keriso. Ona o Lana taulaga, tatou te le tau lagonaina ai le lotovaivai. E mafai ona tatou latalata atili atu ia te Ia, ma e ala i le salamo, e mafai ai ona tatou saunia mo Lona Afio Mai Faalua. I lo’u atunuu, matou te faia gaoioiga e fesoasoani ia i matou e manatua ai le taua tele o le Eseta. E aumai e tagata uma meaai ma matou te fefaasoaai i tusitusiga paia ma a matou molimau i le tasi ma le isi. Matou te usuina viiga faapitoa e uiga i le Toetu o Keriso. O le faatumutumuga lena o le Eseta mo au.

Ou te fiafia i le mau Mataupu Faavae ma Feagaiga 93:1: "E moni, ua faapea ona fetalai mai o le Alii: O le a oo mai, o tagata uma taitoatasi o e lafoai ana agasala ma o mai ia te a’u, ma valaau mai i lo’u igoa, ma usiusitai i lo’u leo, ma tausi i a’u poloaiga, o le a vaai i o’u mata ma iloa o loo i ai a’u." Pe a tatou salamo, ua tuuina mai e Keriso ia i tatou se avanoa! I le taimi o le Eseta, e mafai ona tatou lagonaina Lona alofa mo i tatou ma iloa ai tatou te taua i taimi uma ia te Ia.