O leEseta i Taimi Uma
Ia faia le Eseta o se vaitau o le faamoemoe e ala i le faalatalata atili atu i le Faaola.
Ata na tusia e Toby Newsome
I le Aso Sa muamua o le Eseta, ina ua asiasi atu Maria le Makatala ma isi fafine i le tuugamau o Keriso, sa ta’u atu e agelu ia i latou, “E le o iinei o ia: aua ua toe tu mai o ia” (Mataio 28:6). O lenei sāvali na aumaia ai le faamoemoe tele i Ona soo ina ua mavae le faanoanoa i le molimauina o Lona Faasatauroga.
Le tala fou silisili? O loo moni pea lena savali. O loo toetu pea Keriso. O loo manumalo pea o Ia i le oti ma le agasala. Ma o le faamoemoe e sau mai Lona Toetu o loo avanoa pea mo oe—e le na o le Eseta, ae o taimi uma lava!
O le Eseta e le na o le pau lea o le aso e mafai ai ona e faamamaluina le Toetu. Faataitai nisi o fautuaga nei e fai ai le Eseta—ma ona faamanatuga o le Faaola ma Lana Togiola ma le Toetu—o se vaitau atoa o le faamoemoe ma le olioli.
Suesue i le Olaga a le Faaola
O tusitusiga paia o se meafaigaluega mamana e fesoasoani ia te oe e iloa patino ai Iesu Keriso ma faamalosia ai lou faatuatua ia te Ia. I le vaitau o le Eseta, atonu e te taulai atu lau suesuega o tusitusiga paia i le vaiaso mulimuli o Lona soifuaga po o Lana asiasiga i Amerika o le Faaola toetu o le lalolagi. O le faitauina o nei tala mamana e mafai ona fesoasoani ia te oe e lagona ai le alofa o le Faaola mo oe ma malamalama atili ai i Lana Togiola ma le Toetu.
Afai e te le o mautinoa po o a fuaitau e taulai i ai, e mafai ona e taumafai e mulimuli i le taiala suesue o le Eseta i le Sau, Mulimuli Mai ia te A’u po o isi taiala suesue ua faasalalauina i le ChurchofJesusChrist.org.
Auai i Galuega o le Malumalu
O le manumalo o Keriso i le oti ma le malamalama o le a tatou toetutu foi o le “savali aupito mamalu lea i tagata.” Ona o Lana Togiola ma le Toetu, e mafai ai ona faavavau o tatou aiga, ma e mafai e o tatou tuaa uma ona maua le avanoa e osia ai feagaiga paia.
E mafai ona e faamanatuina le Toetu o Iesu Keriso ma faaauau Lana galuega o le faaolaina o i latou i le falepuipui o agaga (tagai i le 1 Peteru 3:18–20) e ala i le faia o galuega o talafaasolopito o aiga ma le malumalu. O lau auaunaga i le malumalu e mafai ai e na agaga ona filifili e maua foi faamanuiaga uma o le Togiola a Keriso.
Auauna Atu i Isi e pei ona Faia e Keriso
Sa siitia ma auauna atu Iesu Keriso i isi i Lana galuega atoa i le olaga nei—e oo lava i luga o le satauro. E mafai ona e faamamaluina Lana faataitaiga e ala i le auauna atu i tagata o siomia oe i le ala o le a Ia faia ai. E oo lava i faatinoga faigofie o le agalelei e pei o le ataata soo, faalogo moni atu i isi, ma le fesoasoani i feau i le fale e mafai ona fatuina ai se siosiomaga o le alofa faaKeriso. Pe a e auauna atu i isi, e mafai e oe ma i latou ona lagonaina le faamoemoe ma le agalelei o le vaitau o le Eseta.
Taumafa ma le Tatau i le Faamanatuga
Sa faatuina e le Faaola lava Ia se tu masani e fesoasoani ia te oe e manatua lelei ai o Ia nai lo se isi lava mea: o le faamanatuga. O le ai ma inu i le faamanatuga e faaalia ai ua e naunau e “manatua pea o ia ma tausi ana poloaiga,” ma o le taui ua Ia folafola mai o le a e “maua pea lona Agaga e faatasi ma [oe]” (Mataupu Faavae ma Feagaiga 20:77). O se meaalofa mamana lena! Pe a e ai ma inu i le faamanatuga i vaiaso taitasi, e mafai ona e amata lagonaina le moni o lena folafolaga i le Eseta ma taimi uma.
Taumafai e tomanatu i le auaunaga a Iesu Keriso, Togiola, ma le Toetu a o e tagofia le faamanatuga. Tatalo ma le faamaoni, ma taumafai e mafaufau pe na faapefea ona faamanuiaina oe lava ia i Lana taulaga.