E Le Manaomia Ona Avea Oe ma se Tagata Polofesa

Atatusi mai le Getty Images

O le toatele o i tatou na maua le aafiaga o le fetaiai ai ma se vaega tele o faatufugaga po o faafiafiaga ma mafaufauga: “Ou te moomoo maimau pe ana mafai ona ou faia lena mea, ae e le lava lo’u talenia.”

O le tele o au galuega e sili ona e fiafia i ai sa faia moni lava e tagata e tele ni taleni faalenatura. Ae o le a e ofo i le tele o taimi ua na o se tagata masani sa i ai se manatu musuia.

“Let Easter Anthems Ring,” o se tasi o viiga fou na faasalalauina mai talu ai nei e le Ekalesia, na tusia e se Au Paia o Aso e Gata Ai e igoa ia Larry A. Hiller. O ia o se tusitala ma se faatonu faapolofesa (ua litaea nei), ae lē o se tusipese. E le o ia o se tagata pese maoa’e po o se tagata musika.

Sa na o ia o se tasi e fiafia i musika ma sa i ai sona manatu musuia.

A o avea ma faatonu o le aufaipese a le uarota i tausaga ua mavae, sa faia se taumafaiga e Uso Hiller e tusiaina upu fou mo se pese tuai sa ia mauaina. Sa fiafia o ia i lena aafiaga ma fesili atu i se uo sa faigaluega i le Ekalesia pe na te iloaina nisi lava pese e manaomia ni upu fou. Sa ia faasino atu o ia i se fati o le viiga na fatuina i le 1800.

Fai mai Uso Hiller, “Sa ou nofo i lalo ma lena musika ma sa vave ona oo mai upu i lo’u mafaufau: ‘Ina tulai ia, outou le Au Paia, ia fiafia.’ Ma mai iina sa ou lagonaina ai le anotusi lautele ma le mea e tatau ona i ai—o se pese o le olioli e uiga i le Faaola.”

O lena viiga sa lolomiina i le Ensign i le 2012. E fa ona fuaiupu ma sa faatatau i le Togiola a Iesu Keriso. “Sa i ai se taulaiga malosi i le ‘o le a e toe vaai ai i e pele ia te oe; o loo i ai se toetu,’” o le tala lea a Uso Hiller. Ina ua tuuina mai e le Ekalesia le valaau mo ni viiga fou, sa talosagaina Uso Hiller e toe taulai atu patino lava ana upu i le Eseta.

Ina ua uma ona suia le tele o upu—e ui o le laina amata, “Tulai ia, outou le Au Paia, ia olioli,” sa tumau pea—ua i ai nei se viiga e tolu fuaiupu a Brother Hiller e ta’ua o le “Let Easter Anthems Ring.” E mafai ona e usuina i le sauniga faamanatuga i lenei vaitau o le Eseta!

Pe na lagona e Uso Hiller le musuia ina ua ia tusia upu?

“E faalotomaualaloina le faapea atu o le tulaga lena,” o lana tala lea. “Ae ioe. Sa i ai taimi na ou lagonaina ai le oo mai o upu i lo’u mafaufau. E faamalieina ma fiafia lemu. Ma e masani ona ou lagonaina se lagona o lena olioli pe a ou toe faitauina se mea na faapitoa ona uunaia ai a’u i lena taimi. O lena lava mea e toe aumaia ai na lagona o le molimau. E toetoe lava a pei ua toe i ai i le aafiaga.”

Atonu o le a fiafia tagata i le viiga, ae e foliga mai o le tagata na sili ona maua mai ai o le (ta talipalau) … tagata lea na tusiaina! O le faaaogaina o a tatou taleni ma manatu musuia e le na o le faamanuiaina ai o isi—e faamanuiaina ai foi i tatou.